05/09/2026
بسم اللە الرحمن الرحیم
بەلاغی كۆتایی كۆنفرانسی دووەمی رێکخراوی هانا
رێکخراوی هانای خێرخوازی ، رۆژی ( شەممە ٥/٩/٢٠٢٦ ) لە ژێر دروشمی ( هانایەکی بەهێزتر و دامەزراوەییتر ) ، بە ئامادەبوونی زیاتر لە ( ٦٥ ) ئەندام کۆنفرانس ، کۆنفرانسی دووەمی خۆی لە شاری هەولێر گرێدا .
سەرەتا، كۆنفرانس بە خوێندنەوەی چەند ئایەتێك لە قورئانی پیرۆز و دوعای خێر ، دەستی بە کارەکانی کرد ، پاشان راپۆرتی چوارساڵ کار و چالاکییەکانی خولی رابڕدووی رێکخراوی هانا لە لایەن دکتۆر ( بوخاری جەمیل) پێشكەشكرا.
لە تەوەرەیەكی تردا ، ڕەشنوسی پەیرەوی ناوخۆی ئامادە كراو بۆ خولی داهاتوو پەسندكرا، دوای ئەوەی لە سێ كۆنفرانسی ناوخۆییدا كە ئەندامانی کۆنفرانسی گشتی بەشداریان تێداكردبوو و تێیاندا تێكرای ماددە و بڕگەكانی گفتوگۆی تێروتەسەلیان لەبارەیەوە كرابوو، خرایە دەنگدانەوە و بەزۆرینەی رەها پەسند كرا.
لە برگەیەكی تری كارنامەی كۆنفرانسدا كە تایبەت بوو بە هەڵبژاردن بۆ پۆستی سەرۆکی رێکخراو . دەرگای خۆپاڵاواتن کرایەوە ، بە میکانیزمی دەنگدانی نهێنی هەڵبژاردن ئەنجامدرا ، دوای جیاکردنەوەی دەنگەکان ، ( د. بوخاری جەمیل ) بە زۆرینەی رەها جارێكیتر متمانەی كۆنفرانسی گشتی بەدەست هێنایەوە، وەك سەرۆکی رێکخراو بۆ خولی داهاتوو.
دواتر پڕۆسەی هەڵبژاردنی جێگری سەرۆکی رێکخراو بەڕێوەچوو ، بە خۆپاڵاوتن و دەنگدانی نهێنی و جیاکردنەوەی دەنگەکان ، بەڕێز ( ئاسۆ حمید ) وەک جێگری سەرۆکی رێکخراو بۆ خولی داهاتوو متمانەی کۆنفرانی گشتی بەدەست هێنا .
هەر لەو میانەدا (٢٨) ئەندامی ئەنجومەنی بەڕێوەبردنی رێکخراو ، بە هەڵبژاردن و دەنگدانی نهێنی ، متمانەی كۆنفرانسیان بەدەست هێنا.
هەر لەم کۆنفرانسە گشتییەدا ، هێڵە گشتییەکانی ستراتیژییەتی چوار ساڵی داهاتووی رێکخراوی هانا ، دوای خوێندنەوەی و تاوتوێ کردن ، پەسەند کرا ، کە لەم خاڵانە پێکهاتووە :
1- بەدامەزراوەییکردن و بەڕێوەبردنی باشتر .
2- سەربەخۆیی و بەردەوامی دارایی .
3- پاراستن و پەرەپێدانی تواناسازی منداڵانی بێباوک و خێزانە کەمدرامەتەکان .
4- پەرەپێدانی پڕۆژە مرۆیی و کۆمەڵایەتییەکان .
5- گواستنەوەی (هانا) لە فریاگوزارییەوە بۆ گەشەپێدان .
6- بەهێزکردنى تواناكانى لق و نووسینگەکان و یەکەو نوێنەرایەتییەکان .
7- فراوانکردنی کاری مرۆیی لە ناوخۆی هەرێمی کوردستان .
8- وەرچەرخانی دیجیتاڵی و شەفافییەتی زانیارییەکان .
9- بەهێزکردنی متمانە و ناسنامەی دامەزراوەیی هانا .
10- بونیادنانی هاوبەشییە ستراتیژییەکان .
لە كۆتاییدا ، بەڕێز سەرۆکی رێکخراو و جێگری سەرۆک و ئەندامانی ئەنجومەنی بەڕێوەبردن ، لە بەردەم کۆنفرانسی گشتیدا پەیمانیان نوێكردەوە كە هەموو هەوڵ و توانایان بخەنەگەڕ بۆ پابەندبوون بە پەیڕەوی ناوخۆی پەسندكراوی کۆنفرانس و بەئەنجام گەیاندنی بڕیار و راسپاردە و هێڵە گشتییەکانی ستراتیژییەتی کار ، وەک رێکخراوێکی خێرخوازی کوردستانی کار بکەن بۆ خزمەتی چین و توێژە هەژار و لێقەوماوەکان ، منداڵانی بێباوک و گەنجان و لاوان ، هاوکات پاراستنی شکۆی مرۆڤ و رێزگرتن لە بەها باڵاکانی خزمەتی مرۆڤایەتی
لێژنەی ئامادەكردنی كۆنفرانس
٥/٩/٢٠٢٦
