11/09/2026
சட்ட பஞ்சாயத்து இயக்கத்தின் புதிய கொடி அறிமுகம் செய்யப்பட்டுள்ளது. இக்கொடியில் நீலம், பச்சை, வெள்ளை என மூன்று வண்ணங்கள் அமைந்துள்ளன. கொடியின் நடுவே இயக்கத்தின் சின்னமாக ஒரு செங்கோலும் ஒலிபெருக்கியும் இடம் பெற்றுள்ளன.
தொழில் வளம், வேளாண் வளம் மற்றும் வெளிப்படைத் தன்மை இவை மூன்றும் ஒரு நாட்டின் செழிப்பைக் குறிப்பவையாகவும், நாட்டு முன்னேற்றத்திற்கான இன்றியமையாத காரணமாகவும் விளங்குகின்றன. இதன் காரணமாகவே இந்த மூன்று நிறங்களும் நமது இயக்கக் கொடியில் இடம் பெற்றுள்ளன. இதில் நீல நிறம் தொழில் வளத்தையும், பச்சை நிறம் வேளாண் செழிப்பையும், வெள்ளை நிறம் அரசு நிருவாகத்தில் வெளிப்படைத்தன்மையுடன் செயல்பட வேண்டும் என்பதனை குறிக்கின்றன. செங்கோல் நேர்மையான சட்டத்தின் ஆட்சிக்கு ஆதாரமாகவும், ஒலிபெருக்கி உண்மையை உரக்கச் சொல்லும் தைரியத்தின் அடையாளமாகவும் இருக்க வேண்டும் என்பதற்காக இக்கொடி இவ்வாறு வடிவமைக்கப்பட்டுள்ளது.
06-09-2026 அன்று இயக்கத்தின் 150-வது நிதிநிலை அறிக்கை மற்றும் சிறப்பு மலர் வெளியீட்டு விழாவில், அனைத்து நிர்வாகிகள் மற்றும் உறுப்பினர்கள் முன்னிலையில், இயக்கத் தலைவர் திரு.சம்சுகனி, இயக்கத்தின் பொதுச்செயலாளர் திரு.ஜெய்கணேஷ், இயக்கத்தின் நிறுவனர் திரு.சிவஇளங்கோ அவர்களால் இக்கொடி அறிமுகம் செய்யப்பட்டு, அதற்கான விளக்கமும் அளிக்கப்பட்டது.
சென்னை தாம்பரத்தில் புதியதாக திறக்கப்பட்ட இயக்கத்தின் தலைமை அலுவலகத்தில், இயக்கத் தலைவர் திரு.சம்சுகனி அவர்கள் கொடியேற்றி சிறப்பித்தார். அப்போது, இயக்கத்தின் பொதுச்செயலாளர் திரு.ஜெய்கணேஷ், மாநில செயற்குழு மற்றும் பொதுக்குழு உறுப்பினர்கள் மற்றும் இயக்க நிர்வாகிகள் உடன் இருந்து இயக்கக் கொடிக்கு மரியாதை செலுத்தினார்கள்.
