SYS Kurunkad

01/01/2026

കേരളയാത്ര കാസർഗോഡ് നിന്നും ആരംഭിക്കുകയാണ്. 'മനുഷ്യർക്കൊപ്പം' എന്ന പ്രമേയത്തിലാണ് യാത്ര കേരളത്തിലുടനീളം സഞ്ചരിക്കുന്നത്. ഇസ്‌ലാമിക ചരിത്രത്തിൽ മനുഷ്യർക്കൊപ്പം എന്ന ആശയം തെളിഞ്ഞു കാണാം. തിരുനബി(സ്വ)യും സ്വഹാബതും ജീവിതത്തിലൂടെ പകർന്നു നൽകിയതാണിത്. സാമൂഹിക നിർമിതിയെ വിശ്വാസത്തിന്റെ ഭാഗമായാണ് പരിചയപ്പെടുത്തുന്നത്. നൂറ്റാണ്ടുകളായി ഇസ്‌ലാം പ്രാവർത്തികമാക്കുന്ന ആശയവും ഈ സാമൂഹികതയാണ്.

പ്രവാചകന്മാരും, ഇമാമുകളും, പണ്ഡിതന്മാരുമെല്ലാം ജീവിതത്തിന്റെ പ്രധാന ഭാഗം ചിലവഴിച്ചത് സമൂഹത്തോടൊപ്പം നിൽക്കാനായിരുന്നു. അപരനെ ചേർത്ത് നിർത്തുന്നതാണ് ഇസ്‌ലാം. അവരിലേക്ക് വികസിക്കുമ്പോൾ മാത്രമേ വിശ്വാസി ജീവിതം പൂർണമാകുന്നുള്ളു. നിങ്ങളുടെ ഉത്തരവാദിത്തത്തെക്കുറിച്ച് ചോദിക്കപ്പെടും എന്ന തിരുനബിയധ്യാപനം മനുഷ്യർക്കൊപ്പം നിങ്ങൾ നിന്നില്ലേ എന്ന ചോദ്യമാണ്. റസൂൽ(സ്വ) മദീനയിൽ എത്തിയ ശേഷം ആഹ്വാനം ചെയ്തത് ജനങ്ങൾക്കിടയിൽ സമാധാനം സാധ്യമാക്കാനും, ഭക്ഷണം നൽകാനും, കുടുംബ ബന്ധം ചേർക്കാനുമായിരുന്നു. ഒരു സാമൂഹിക സൃഷ്ടിപ്പിന്റെ ഘടകങ്ങൾ ഈ പ്രസ്താവനയിലൂടെ അവിടുന്ന് മുന്നോട്ട് വെച്ചു. സേവന പ്രവർത്തനങ്ങളോടൊപ്പം ജനങ്ങളുടെ സാമൂഹികാവശ്യങ്ങളും പൂർത്തീകരിക്കപ്പെടണം. തൊഴിൽ, വിദ്യാഭ്യാസം, ആരോഗ്യം, പരിസ്ഥിതി എന്നിവയിലെല്ലാം സുസ്ഥിര കാഴ്ചപ്പാടാണ് ഇസ്‌ലാമിന്റേത്. ഇവയെല്ലാം ചേരുമ്പോഴാണ് മനുഷ്യജീവിതം ഫലവത്താകുന്നത്. സമൂഹത്തിന്റെ താഴെ തട്ടിലുള്ള മനുഷ്യരെ കേൾക്കാനും അവരുടെ അവകാശങ്ങൾക്ക് വേണ്ടി ശബ്ദിക്കാനും സമൂഹവും ഭരണകൂടവും തയ്യാറാവണം.

വരും ദിനങ്ങളിൽ പതിനാല് ജില്ലകളിലും കേരളയാത്ര സംഗമിക്കും. നീലഗിരിയിൽ സ്‌നേഹയാത്രയും നടക്കും. യാത്രയോടൊപ്പം ചേർന്ന് നിൽക്കാനും യാത്രയുടെ പ്രചാരകരാകാനും നിങ്ങളെയെല്ലാവരെയും സ്വാഗതം ചെയ്യുന്നു. അല്ലാഹു അനുഗ്രഹിക്കട്ടെ,

01/01/2026

01/01/2026

കാലുഷ്യങ്ങൾ നിറഞ്ഞ ഒരു കാലത്തിലൂടെയാണ് നാം മനുഷ്യർ കടന്നുപോകുന്നത്. നമ്മൾ പൊതുവിൽ നേരിടുന്ന ഒരുപാട് വെല്ലുവിളികളുണ്ട്. വർഗീയമായി മനുഷ്യരെ വ്യത്യസ്ത കള്ളികളായിത്തിരിച്ച് വെറുപ്പും ശത്രുതയും വിതക്കാൻ ശ്രമിക്കുകയാണ് ചിലർ. സഹജീവികള്‍ക്ക് വേണ്ടി ചെയ്യുന്ന സത്കർമങ്ങളെ പോലും മതം നോക്കി നിരുത്സാഹപ്പെടുത്തുന്ന സ്ഥിതിയുണ്ട്. എല്ലാ മനുഷ്യർക്കും നന്മയും ഗുണവും കാംക്ഷിക്കാനാണ് സ്രഷ്ടാവിന്റെ നിർദേശം. അദ്ദീനു അന്നസ്വീഹ… എന്നാണ് തിരുവചനം.

അന്നം, അറിവ്, വസ്ത്രം, പാർപ്പിടം, സമാധാനം.. എല്ലാം മനുഷ്യർക്ക് ആവശ്യമാണ്. അതിനു വേണ്ട സന്ദർഭങ്ങളും സാഹചര്യങ്ങളുമാണ് നമ്മളെല്ലാവരും ചേർന്നൊരുക്കുന്നത്.

അറിവില്ലാത്ത മനുഷ്യരാണ് അപരത്തം സൃഷ്ടിക്കുന്നതും ആൾക്കൂട്ടങ്ങളായി മാറി പോർവിളിക്കുന്നതും. വ്യക്തിബോധ്യവും സാമൂഹ്യബോധവുമില്ലാത്ത ആളുകൾ ലഹരിക്കടിമകളാകുന്നു, മറ്റുള്ളവരുടെ സ്വസ്ഥത കെടുത്തുന്നു, ബന്ധങ്ങളെ അറുത്തുമാറ്റുന്നു, വേഷം നോക്കി പുച്ഛിക്കുന്നു, മനുഷ്യത്വ വിരുദ്ധമായ പലതരം വേഷങ്ങൾ കെട്ടുന്നു..

അനീതിക്കെതിരായ ധർമസമരം ഇല്ലാതാകരുത്. മനുഷ്യർ ആത്മസുഖം എന്ന ചെറുവട്ടത്തിലൊതുങ്ങരുത്. ലാഭക്കൊതിയന്മാരായി തീരരുത്. അപരപ്രിയം എന്ന മുദ്രാവാക്യമുയർത്തിയാണ് മലയാളം ഇന്നോളം സഞ്ചരിച്ചത്. മലയാള മണ്ണിൽ ഇസ്ലാം നട്ടുവളർത്തിയ വിത്ത് അപരപ്രിയത്തിന്റേതാണ്. അപരവിദ്വേഷത്തിന്റേതല്ല.
സമാനമായ മനുഷ്യോന്മുഖമായ സന്ദേശങ്ങൾ ഉറക്കെപാടേണ്ട കാലം മുന്നിലിതാ വന്നുനിൽക്കുന്നു. മാനവികതയുടെ സ്വർണ നിമിഷങ്ങൾ കേരളത്തിന് സമ്മാനിച്ച സുൽത്വാനുൽ ഉലമ കാന്തപുരം ഉസ്താദ് ആ ദൗത്യമിതാ ഏറ്റെടുത്തിരിക്കുന്നു. കേരളയാത്രയുടെ മുദ്രാവാക്യമതാണ്, മനുഷ്യർക്കൊപ്പം. ഈ മഹാ പ്രയാണത്തിൽ നമുക്കെല്ലാവർക്കും ചേർന്നുനിൽക്കാം.

Sayyid Ibraheemul Khaleel Al Bukhari