06/10/2026
തൃശ്ശൂരിൽ നടക്കുന്ന സംസ്ഥാന സ്കൂൾ കായികമേള നടത്തിപ്പിലെ വീഴ്ചകൾ, ഗുരുതരമായ സർക്കാർ കെടുകാര്യസ്ഥതയുടെ അനന്തരഫലം - ഡിവൈഎഫ്ഐ
സംസ്ഥാന സ്കൂൾ കായികമേളയിൽ വിദ്യാർത്ഥികൾക്ക് വേണ്ട അടിസ്ഥാന സൗകര്യങ്ങൾ പോലും ഏർപ്പെടുത്താൻ സംസ്ഥാന സർക്കാരിന് കഴിഞ്ഞില്ല. കാറ്റിലും മഴയിലും അക്വാട്ടിക് കോംപ്ലക്സിലെ മേൽക്കൂര ഷീറ്റുകൾ പറന്നുപോയി പത്തോളം വിദ്യാർത്ഥികൾക്കാണ് അപകടത്തിൽ പരിക്ക് പറ്റിയത്. മാസങ്ങളോളം തയ്യാറെടുപ്പുകൾ നടത്തി പ്രതീക്ഷയോടെ മേളയിൽ എത്തുന്ന വിദ്യാർത്ഥികളാണ് സർക്കാർ കെടുകാര്യസ്ഥതയുടെ ഇരകളായത്.
കടലാസിൽ മാത്രമായ സംഘാടകസമിതിയും പരസ്പരം പഴിചാരി കൈ കഴുകാൻ ശ്രമിക്കുന്ന കായിക, വിദ്യാഭ്യാസ വകുപ്പുകളും വിദ്യാർത്ഥികൾ നേരിടുന്ന ദുരിതത്തിന് മറുപടി പറയണം. അടിസ്ഥാന സൗകര്യങ്ങളിലെ പോരായ്മകൾ ആദ്യദിനം തന്നെ പുറത്തുവന്നു. ഭക്ഷണം, കുടിവെള്ളം, താമസസൗകര്യം എന്നിവ പര്യാപ്തമല്ലെന്ന പരാതികൾ വിദ്യാർത്ഥികളും അധ്യാപകരും രക്ഷിതാക്കളും പലതവണ അറിയിച്ചിട്ടും പ്രതിഷേധിച്ചിട്ടും പരിഹാരമുണ്ടായില്ല. പരിക്ക് പറ്റിയ വിദ്യാർത്ഥികളെ കൃത്യസമയത്ത് ആശുപത്രിയിലെത്തിക്കാൻ പോലും വേദികളിൽ സംവിധാനമുണ്ടായിരുന്നില്ല.
മത്സരാർഥികളുടെ സൗകര്യാർത്ഥം ഒറ്റ ജില്ലയിൽ കേന്ദ്രീകരിക്കുന്ന നിലയിൽ കഴിഞ്ഞ എൽഡിഎഫ് സർക്കാർ മുന്നോട്ട് വച്ച സംസ്ഥാന സ്കൂൾ കായികമേളയുടെ സ്കൂൾ ഒളിംപിക്സ് മാതൃക ഇല്ലാതെയാക്കുകയും ചെയ്ത സർക്കാർ, മുൻവർഷങ്ങളിലേതു പോലെയുള്ള മുന്നൊരുക്കങ്ങൾ നടത്തുന്നതിൽ ഗുരുതരമായ വീഴ്ചയാണ് വരുത്തിയത്. അപകട സ്ഥലം സന്ദർശിക്കുവാനോ പരിക്കുപറ്റിയവരെ കാണുന്നതിനോ ഉത്തരവാദിത്തപ്പെട്ട മന്ത്രിമാർ പോലും തയ്യാറാകുന്നില്ല. സംസ്ഥാന സ്കൂൾ കായികമേള നടത്തിപ്പിലെ വീഴ്ചയുടെ ഉത്തരവാദിത്വം സംസ്ഥാന സർക്കാരിനാണ്. കുറ്റകരമായ അനാസ്ഥയുടെ ഭാഗമായി സംഭവിച്ച അപകടത്തിന്റെ കാരണക്കാർക്ക് എതിരെ നിയമ നടപടി സ്വീകരിക്കണമെന്ന് ഡിവൈഎഫ്ഐ സംസ്ഥാന സെക്രട്ടേറിയറ്റ് ആവശ്യപ്പെട്ടു.
