17/09/2026
കേരള വാട്ടർ അതോറിറ്റി എംപ്ലോയീസ് യൂണിയൻ (CITU)
സംസ്ഥാന കമ്മിറ്റി
പൊതു സ്ഥലംമാറ്റ ഉത്തരവ് — സമരത്തിന്റെ വിജയം
സഖാക്കളെ,
കേരള വാട്ടർ അതോറിറ്റിയിൽ നിലവിലുണ്ടായിരുന്ന പൊതു സ്ഥലംമാറ്റ പ്രക്രിയ അട്ടിമറിക്കാനുള്ള നീക്കങ്ങൾക്കെതിരെ യൂണിയന്റെ നേതൃത്വത്തിൽ ആരംഭിച്ച ശക്തമായ പോരാട്ടത്തിന് നിർണായകമായ നേട്ടം.
ജൂൺ 18-ന് സംസ്ഥാനത്തെ എല്ലാ ജില്ലാ കേന്ദ്രങ്ങളിലും നടത്തിയ പ്രതിഷേധ ധർണ്ണ മുതൽ, അതോറിറ്റിയുടെ വിവിധ ക്യാമ്പസ്സുകളിൽ നടത്തിയ ഓഫീസ് തല വിശദീകരണ പ്രചാരണങ്ങൾ, ജൂലൈ 20 മുതൽ 24 വരെ കേന്ദ്ര കാര്യാലയത്തിന് മുന്നിൽ നടത്തിയ പഞ്ചദിന സത്യാഗ്രഹം, തുടർന്ന് എം.ഡി. ഓഫീസിന് മുന്നിലെ പ്രതിഷേധം, ഒടുവിൽ ജൂലൈ 29 മുതൽ കേന്ദ്ര കാര്യാലയത്തിന് മുന്നിൽ ആരംഭിച്ച അനിശ്ചിതകാല സത്യാഗ്രഹം — ഇതെല്ലാം ഉൾപ്പെടുന്ന ശക്തമായ പോരാട്ടത്തിന്റെ ഫലമായാണ് ഇന്ന് പൊതു സ്ഥലംമാറ്റ ഉത്തരവ് പുറപ്പെടുവിച്ചിരിക്കുന്നത്.
“പൊതു സ്ഥലംമാറ്റം നടപ്പാക്കുക”
“മാനദണ്ഡവിരുദ്ധമായ സ്ഥലംമാറ്റ ഉത്തരവുകൾ പിൻവലിക്കുക”
“ഓർഡറുകൾ പൂഴ്ത്തിവെക്കുന്ന പ്രവണത അവസാനിപ്പിക്കുക”
എന്നീ ആവശ്യങ്ങൾ ഉയർത്തി നടത്തിയ പോരാട്ടം മാനേജ്മെന്റിനെയും സർക്കാരിനെയും ചർച്ചയ്ക്ക് നിർബന്ധിതമാക്കി. ബഹു. ജലവിഭവ വകുപ്പ് മന്ത്രിയുടെ സാന്നിധ്യത്തിലും തുടർന്ന് മാനേജിംഗ് ഡയറക്ടറുടെ നേതൃത്വത്തിലും നടന്ന ചർച്ചകളിൽ യൂണിയൻ ഉന്നയിച്ച വിഷയങ്ങൾ പരിഗണിക്കാമെന്ന് ഉറപ്പ് ലഭിച്ചു.
ആ ഉറപ്പിന്റെ ഭാഗമായി ഇപ്പോൾ പൊതു സ്ഥലംമാറ്റ ഉത്തരവ് പുറപ്പെടുവിച്ചിരിക്കുകയാണ്.
എല്ലാ ആവശ്യങ്ങളും പൂർണ്ണമായി അംഗീകരിക്കപ്പെട്ടിട്ടില്ലെങ്കിലും, ശക്തമായ തൊഴിലാളി സമരത്തിലൂടെ പ്രധാനപ്പെട്ട ആവശ്യങ്ങളിൽ പരിഹാരം നേടിയെടുക്കാൻ കഴിഞ്ഞത് ഒരുമാസത്തോളം നീണ്ടുനിന്ന ഐതിഹാസികമായ പോരാട്ടത്തിന്റെ ശ്രദ്ധേയമായ വിജയമാണ്.
ഈ നേട്ടം തൊഴിലാളി ഐക്യത്തിന്റെയും സംഘടനാശക്തിയുടെയും പോരാട്ടവീര്യത്തിന്റെയും വിജയമാണ്.
സമരത്തിന് നേതൃത്വം നൽകിയ യൂണിയൻ സംസ്ഥാന പ്രസിഡന്റ് സഖാവ് പി. കരുണാകരൻ, സി.ഐ.ടി.യു. അഖിലേന്ത്യാ സെക്രട്ടറി സഖാവ് കെ.എൻ. ഗോപിനാഥ്, സംസ്ഥാന ഭാരവാഹികൾ, 15 ജില്ലാ കമ്മിറ്റികളിൽ നിന്നും സമരത്തിൽ അണിനിരന്ന മുഴുവൻ സഖാക്കൾ, തിരുവനന്തപുരം സൗത്ത്, നോർത്ത് ജില്ലാ കമ്മിറ്റികൾ, വനിതാ സഖാക്കൾ, അക്വ, പെൻഷനേഴ്സ് ഓർഗനൈസേഷൻ ഉൾപ്പെടെയുള്ള വർഗ്ഗബഹുജന സംഘടനകൾ തുടങ്ങി സമരത്തിന്റെ വിജയത്തിനായി അണിനിരന്ന മുഴുവൻ സഖാക്കളെയും സംസ്ഥാന കമ്മിറ്റി അഭിവാദ്യം ചെയ്യുന്നു.
സമരത്തിന് ഐക്യദാർഢ്യവും പിന്തുണയും നൽകിയ എല്ലാ സഖാക്കൾക്കും സംസ്ഥാന കമ്മിറ്റിയുടെ ഹൃദയപൂർവ്വമായ നന്ദി രേഖപ്പെടുത്തുന്നു.
സംസ്ഥാന കമ്മിറ്റിക്കുവേണ്ടി
പി. ഉണ്ണികൃഷ്ണൻ
ജനറൽ സെക്രട്ടറി
