08/04/2026
തിരുവനന്തപുരത്തെ വഴുതക്കാട്ടുള്ള മനോഹരമായ കുന്നിൻപ്രദേശമാണ് കോട്ടൺഹിൽ. ടാഗോർ തിയേറ്ററിനും ശ്രീമൂലം ക്ലബ്ബിനും അപ്പുറത്തായി ചിന്മയ സ്കൂൾ കഴിഞ്ഞ് കുറച്ചു മുന്നിലേക്ക് പോകുമ്പോൾ കേരള വാസ്തുശില്പശൈലിയിൽ നിർമ്മിച്ച ഒരു മനോഹരമായ കെട്ടിടം ഇന്നും അവിടെ കാണാം. ഇന്ന് എൻ.സി.സി ഡയറക്ടറേറ്റായി ഉപയോഗിക്കുന്ന ഈ മന്ദിരത്തിലാണ് ചരിത്രത്തേയും ചിത്രകലയേയും ഒക്കെ ഏറെ സ്നേഹിച്ചിരുന്ന സി.ഡബ്ല്യു.ഇ.കോട്ടൺ സായിപ്പ് താമസിച്ചിരുന്നത്.
തിരുവിതാംകൂർ റസിഡന്റും പൊളിറ്റിക്കൽ ഏജന്റുമായിരുന്ന കോട്ടൺ സായിപ്പ് ഇവിടെ താമസിക്കാൻ തുടങ്ങിയതോടെയാണ് ഈ പ്രദേശത്തിന് 'കോട്ടൺഹിൽ' എന്ന പേര് വന്നതെന്നാണ് കാലങ്ങളായി നാം വിശ്വസിച്ചിരുന്നത്. എന്നാൽ ലഭ്യമായ ചരിത്രരേഖകളുടെ അടിസ്ഥാനത്തിൽ ഇപ്പോൾ ആ അഭിപ്രായം തിരുത്തേണ്ടിയിരിക്കുന്നു. സി.ഡബ്ല്യു.ഇ. കോട്ടൺ 1923 മുതൽ 1926 വരെയാണ് ഇവിടെ താമസിച്ചിരുന്നതെങ്കിലും, അതിനു പതിറ്റാണ്ടുകൾക്കു മുമ്പുതന്നെ ഈ സ്ഥലം 'കോട്ടൺഹിൽ' എന്നും 'പരുത്തിക്കുന്ന്' എന്നും അറിയപ്പെട്ടിരുന്നു എന്നതിന് വ്യക്തമായ തെളിവുകളുണ്ട്.
ഇക്കാര്യത്തിൽ ഏറ്റവും പ്രധാനപ്പെട്ട തെളിവ് 1869 മാർച്ച് 9-ലെ (1044 കുംഭം 27) തിരുവിതാംകൂർ ഗസറ്റാണ്. ആയില്യം തിരുനാൾ മഹാരാജാവിന്റെ കാലത്ത് പ്രസിദ്ധപ്പെടുത്തിയ ഈ ഗസറ്റിൽ പൊതുമരാമത്ത് വകുപ്പിന്റെ ഒരു ദർഘാസിനെക്കുറിച്ച് പരാമർശിക്കുന്നുണ്ട്. 'ചെങ്കൽചൂളയിൽ നിന്നും പരുത്തിക്കുന്നിലേക്ക് പോകുന്ന റോഡിന് സമീപത്തുള്ള കുളത്തിന്റെ കര ഉറപ്പിക്കുന്നതിനെക്കുറിച്ചുള്ള' ആ കുറിപ്പിൽ മലയാളത്തിൽ 'പരുത്തിക്കുന്ന്' എന്നും അതിന്റെ ഇംഗ്ലീഷ് തർജ്ജമയിൽ 'കോട്ടൺഹിൽ' എന്നുമാണ് രേഖപ്പെടുത്തിയിരിക്കുന്നത്. അതായത് കോട്ടൺ സായിപ്പ് ഇവിടെ എത്തുന്നതിനും 54 വർഷം മുമ്പുതന്നെ ഈ പേര് നിലവിലുണ്ടായിരുന്നു എന്ന് ചുരുക്കം.
മറ്റൊരു തെളിവ് രാജാരവിവർമ്മയുടെ അനുജൻ സി. രാജരാജവർമ്മയുടെ ഡയറിക്കുറിപ്പുകളാണ്. 1903 ജൂൺ 11-ന് തന്റെ കുതിരവണ്ടി ദിവാന്റെ വസതിയായ ഭക്തിവിലാസത്തിലേക്ക് (ഇന്നത്തെ ആകാശവാണി നിലയം) പോകുമ്പോൾ കോട്ടൺഹില്ലിലെ കയറ്റത്തിൽ വെച്ച് അപകടത്തിൽപ്പെട്ടതിനെക്കുറിച്ച് അദ്ദേഹം എഴുതിയിട്ടുണ്ട്. അതേ വർഷം തന്നെ അദ്ദേഹം രവിവർമ്മയ്ക്കൊപ്പം ഇവിടെ സന്ദർശനം നടത്തിയതായും സൂചിപ്പിക്കുന്നു. കൂടാതെ, 1918-ൽ മഹാകവി ഉള്ളൂരിന് സി.വി. രാമൻപിള്ള അയച്ച കത്തിലെ ലെറ്റർ പാഡിലും 'കോട്ടൺഹിൽ റോഡ്' എന്നാണ് വിലാസം നൽകിയിരിക്കുന്നത്. കോട്ടൺ സായിപ്പ് വഴുതക്കാട്ട് താമസിക്കാൻ എത്തുന്നതിനും വർഷങ്ങൾക്കു മുമ്പുള്ള ഈ രേഖകളെല്ലാം വിരൽ ചൂണ്ടുന്നത് ഒരേ കാര്യത്തിലേക്കാണ്; സി.ഡബ്ല്യു.ഇ. കോട്ടൺ വരുന്നതിനും മുമ്പേ ഈ പ്രദേശം പരുത്തിക്കുന്നും കോട്ടൺഹില്ലുമായിരുന്നു. ഇതിൽ നിന്നും കോട്ടൺ സായിപ്പിന്റെ പേരിലല്ല ഈ കുന്നിന് പേര് ലഭിച്ചതെന്ന് വ്യക്തമാകുന്നു.
Post© Ajith Meenakshy Thiruvananthapuram
