16/11/2025
---
મહિલા વિકાસ ચેરિટેબલ ટ્રસ્ટનો કરુણા દિવસ
લેખિકા – ચેતના ગોસ્વામી ‘ઊર્જા’
આજે મહિલા વિકાસ ચેરિટેબલ ટ્રસ્ટની ટીમે માધર ગામની અંજલી શાળા માં પગ મુક્યો… અને ખરેખર એવું લાગ્યું કે ધરતી માતાના ખોળામાં પ્રવેશ્યા હોઈએ.
જ્યાં શારીરિક ક્ષમતાના બાળકો પોતાના નિર્દોષ સ્મિતોમાં જીવનની સાચી વ્યાખ્યા છુપાવી બેઠા હતા.
એમની સાથે રમતાં રમતાં, દોડતાં દોડતાં અને હાસ્યનાં ફૂલો ખીલતાં—
અમે ભૂલી ગયા કે આજે રવિવાર હતો.
આજે તો ખુશીનો ઉત્સવ હતો…
એક એવી ખુશી, જેને શબ્દો કરતાં હૃદય વધારે સારી રીતે સમજી શકે.
આઈસ્ક્રીમનાં મીઠાં સ્વાદ સાથે, સવારનું ભોજન એમની સાથે કરી
એક ક્ષણ માટે લાગ્યું કે—
ખુશી ખરીદાતી નથી…
ખુશી તો વહેંચવામાં જન્મે છે.
જ્યારે આવા દેવદૂત સમાન બાળકોને આંખોમાં જોઇએ,
ત્યારે સમજાય છે કે –
ભગવાને આપેલા આપણા સ્વસ્થ બાળકો પણ એક આશીર્વાદ છે,
કોઈક જન્મે છે સુખ લઈને,
અને કોઈક જન્મે છે સુખ શીખવવા.
પણ આ નિર્દોષ બાળકોની પાછળ કેટલા માતાપિતાની અસમર્થતા,
કેટલી વેદના અને કેટલું મૌન સંતાયેલું હશે…
એક ક્ષણ માટે હૃદય પલટી જાય—
કે માતા–પિતા પોતાના બાળકને હૃદયથી ચાહે છે,
પણ ઘણીવાર પરિસ્થિતિ તેમને શાળાના આશ્રય સુધી પહોંચાડે છે,
જ્યાં તેના બાળકને સાચું સંસ્કાર, સાચી કાળજી અને સાચો સાથ મળે.
આવી શાળાઓ માત્ર ઈમારતો નથી,
આ તો ભાવનાનું ઘર છે…
જ્યાં દરેક બાળકને સમાનતા, પ્રેરણા અને સ્વાભિમાનની ઓટ મળે છે.
અને જ્યારે અમે આજે એમની સાથે સાથ આપ્યો—
ત્યારે સમજાયું કે જીવનના આપણા દુખો,
આપણી ફરિયાદો, આપણી ફરિયાદોમાં છુપાયેલું નાટક—
બધું કેટલું નાનું છે!
આ બાળકો આપણને શીખવે છે કે—
જીવન મુશ્કેલીઓમાં પણ સ્મિત રાખી શકાય,
અને પ્રેમની ભાષા બોલવા માટે શબ્દો જરૂરી નથી.
આજે માધર ગામની આ મુલાકાત,
અમારા હૃદયમાં એક દીવો પ્રગટાવી ગઇ—
કે માનવતા જીવંત છે,
અને આપણે જ્યાં સુધી આવા બાળકો સાથે જોડાયેલા રહીશું
ત્યાં સુધી હૃદયનું આકાશ વધુ વિશાળ બનતું જશે.
આ દિવસ યાદ રહેશે…
ખેડ–ખેતરને સ્પર્શતા પવનોની વચ્ચે,
આ બાળકોના શુદ્ધ હાસ્ય સાથે વિતાવેલો
ખરો આનંદનો દિવસ.
— લેખિકા ચેતના ગોસ્વામી ‘ઊર્જા’
