22/08/2026
إنا لله و إنا إليه راجعون 😥
معروف داعی حق، سادگی شرافت ، مروت نرمی و متانت کے پیکر اور جمعیت اہلحدیث بیروہ کے مدبر و دانشور صدر غلام احمد لون صاحب نہیں رہے جمعیت ایک دیدہ ور سے محروم یوگئی/انتہائی رنج و غم کے ساتھ جمعیت اہلحدیث جموں و کشمیر کے سبھی حلقوں میں معروف دانشور، بے مثال مدرس بے بدل داعی حق اور جمعیت اہلحدیث تحصیل بیروہ کے صدر جناب غلام احمد لون صاحب کے انتقال کی خبر سنی گئی فقید عمل جراحت سے بھی گذرے تھے اورکچھ عرصہ صاحب فراش رہنے کے بعد آج داعی اجل کو لبیک کہہ گئے ہر جانب سوگ کا عالم ہے اور ہر زبان پر آیت استرجاع کا ورد بھی ہے اور ان کےحق میں مغفرت، بلندی درجات اور جنت نشینی کی دعائیں ہر لب پر ہیں اللہ تعالی نے متوفی کو متعدد صلاحیتوں کے علاوہ بے نظیر قائدانہ اوصاف سے آراستہ و پیراستہ کیا تھا معاملہ فہمی، تدبر، دانشمندی، فہم و فراست، تحمل و بردباری اور ہر شخص کو ساتھ چلانے کی ان کی ادائیں اور انداز جمعیت کی تاریخ کے جلی عنوانات میں شامل ہوں گے کم گو تھے لیکن جتنا بولتے تھے بامقصد اور بامعنی ہوا کرتا تھا مشکل گتھیوں کو سلجھانے کا ملکہ اللہ تعالی نے بطور خاص عطا کیا تھا غصہ اور غیض و غضب سے دور رہتے تھے کارکنوں کے لیے بے حد شفیق تھے اور ضرورت مندوں کے مونس و غم خوار، نظم و تنظیم کے حوالے سے ان کا کام اور کارکنوں کی تربیت کا تسلسل سے اہتمام اور دعوتی و علمی میدان میں اصلاحات اور درس و تدریس کے فروغ و پھیلاؤ کے لیے جدید سہولیات سے مستفید ہونے کےلیے داعیان و کارکنان جمعیت کو اپنے خطابات میں ہدایات دیتے رہنے کا ان کا عمل دیدنی ہوتا تھا احتسابی عمل کو اپنی تحصیل میں بہت آگے بڑھایا اور درسگاہوں، مدارس میں اجتماعات، سیمناروں کے انعقاد اور علمی انعامی مقابلوں کا اہتمام کرتے رہنا ان کا مشغلہ تھا مساجد میں تعلیم و تربیت کی محافل کا انعقاد اپنی ذمہ داری سمجھتے تھے وہ ہر مدرس، معلم مربی اور مبلغ کو ہر آن مستعد رکھتے تھے اور ان سے قران و سنت کی ترویج و اشاعت کےلیے کام لینے کے فن سے آگاہ تھے کسی بھی مسئلے کو اس حد تک بڑھنے نہیں دیتے جو کسی انتشار و افتراق کا باعث ہوتا۔۔ ۔۔ مزاج بے حدنرم تھا اور طبعیت سادہ پائی تھی اسی لیے ہر مکتب فکر کے لوگوں کے دلوں میں جگہ بناگئے تھے آج وہ ہم میں نہیں رہے تو سب کسی مسلکی تمیز کے بغیر اشکبار بھی ہیں اور سوگوار بھی۔ وہ صاحب فراش رہے تو جمعیت کی قیادت صدر جمعیت ڈاکٹر عبداللطیف الکندی صاحب کی قیادت میں ان کی صحت کے تعلق سے فکر مند رہی ان کی خبر پرسی کرتی رہی جمعیت کی ہر اکائی سے اطراف و اکناف سے کارکنوں اور عوام کا تانتا ان کی خبر پرسی کےلیے روز بندھا رہتا اور آج جب وہ سفر آخرت پر روانہ ہوئے تو پھر ہر گوشہ زمین سے قافلوں کی صورت میں غم زدہ عوام اپنے اس رفیق اور ساتھی کی نماز جنازہ تجہیز و تکفین اور تدفین کےلیے ان کے دنیوی مسکن کی جانب رواں دواں ہیں لوگوں کا انبوہ کثیر جمع ہے صدر جمعیت اہلحدیث جموں و کشمیر بھی اپنے رفقاء سمیت روانہ ہو چکے ہیں اور ضلعی قیادت اپنے صدر ضلع انجینئر محمد شعبان صاحب کی قیادت میں انتظا مات دیکھ رہی ہے اور اپنے اس شفیق ساتھی کے انتقال پر سراپا کرب و اضطراب ہے۔۔۔۔ آئیے ان کے لئے دعا کریں۔۔۔۔ مثل ایوان سحر مرقد فروزاں ہو تیرا۔۔۔۔ نور سے معمور وہ خاکی شبستان ہو تیرا۔۔۔۔ راقم السطور کے ساتھ ان کے تعلقات دیرینہ تھے ان کے حسن سلوک اور اعلی اخلاق نے اپنا مداح بنالیا تھا آنکھیں ڈبڈبائی ہوئی ہیں اور دل غم و اندوہ میں ڈوبا ہوا۔۔۔ واقعی الفاظ عقیدت کا خراج پیش کرنے کےلیے ساتھ نہیں دے پا رہے ہیں چند بے ترتیب جملے اور کچھ بے ربط سطور ہیں بس مسلسل زبان انا للہ وانا الیہ راجعون کا ورد کر رہی ہے۔۔۔۔۔ اللہ تعالی انہیں جوار رحمت میں جگہ دے۔۔۔۔ سوگوار۔۔ ۔۔۔۔
بشارت بشیر مدیر مسلم سرینگر
تاريخ وفات: ٢٢/٠٨/٢٠٢٦
