09/09/2023
दोदक युथ क्लबको मुख्य कार्यलय भव्य कार्यक्रमबिच उद्घाटनमा, दोदक युथ क्लबलाई हार्दिक बधाई
सोरेङ जिल्लामा दोदक युथ क्लबको हेड अफिस शनिबार विधिवत उद्घाटन उर्जा तथा यातायात विभागका मन्त्री एमएन शेर्पाले गरे। क्लबको उक्त हेड अफिस दोदक स्कुल डाँडामा सेवानिवृत्त शिक्षक डीपी गुरुङको घरमा मन्त्री शेर्पाले उद्घाटन गरेका हुन्। उद्घाटन कार्यक्रममा मन्त्री एमएन शेर्पा मुख्य अतिथिको रूपमा उपस्थित थिए। यसरी नै कार्यक्रममा सिक्किम राज्य अनुसूचित जनजाति कल्याण बोर्डका अध्यक्ष प्रेम कुमार सुब्बा, जिल्ला पञ्चायतकी सदस्य अञ्जु गुरुङ, दोदक ग्राम पञ्चायत एकाईका सभापति एचके छेत्री, पञ्चायत उप-सभापति रेनुका गुरुङ, पञ्चायत सदस्यहरु क्रमशः सुजाता गुरुङ र अरुण हाङ सुब्बा, पूर्व जिल्ला तथा ग्राम पञ्चायतगण, स्थानीय दोदक ब्लक भित्रका एघारवटा गैरराजनीतिक संघ-संस्थाहरु अरुणोदय समिति दोदक, शिखर संघ लोवर दोदक, प्रतिबिम्ब कल्याण संघ लोवर दोदक, जीवन ज्योति समाज दोदक, आस्था समाज मिडल दोदक, अमर ज्योति समाज दोदक, पञ्च स्मृति क्लब अप्पर दोदक, अमर बेली क्लब पाखागाउँ, याङ स्टार क्लब आले, धर्म सुधार संघ थङलिङ र माउन्ट स्नो क्लब थङलिङका प्रतिनिधिहरु र क्लबका शुभचिन्तकहरुको पनि विशेष उपस्थिति थियो।
उल्लेख्य, दोदक युथ क्लबको स्थापना 2016 मा भएको थियो। यस क्लबमा दोदक ब्लकका युवाहरुले बाक्लो सदस्यता ग्रहण गरेका छन्। आज क्लबको हेड अफिस उद्घाटन कार्यक्रममा मुख्य अतिथि मन्त्री शेर्पा र विशिष्ट अतिथिहरुले दोदक युथ क्लबको झण्डा र लोगोको पनि लोकार्पण गरे। कार्यक्रममा क्लबले मन्त्री एमएन शेर्पा, राज्य अनुसूचित जनजाति कल्याण बोर्डका अध्यक्ष पीके सुब्बा, स्थानीय जिल्ला तथा ग्राम पञ्चायतका प्रतिनिधिगण, दोदक ब्लकमा एघारवटा गैरराजनीतिक संघ-संस्थाका प्रतिनिधिगण, सेवानिवृत्त शिक्षक डीपी गुरुङ र समाजसेवी राजेश खड्कालाई पनि क्लबले सम्मान जनायो। अर्कोतिर क्लबको अफिस उद्घाटनको निम्ति सहयोग पुर्याउने व्यक्तिहरुमा समाजसेवी राजेश खड्का, विद्यृत विभागका अतिरिक्त मुख्य अभियान्ता जीवन थापा, सरकारी ठेकेदार सञ्जय चाण्डक, सडक एवं पुल विभागका सहायक अभियान्ता सुमन छेत्री, घर मालिक डीपी गुरुङ, साथै फुटबल टुर्नामेन्टको निम्ति क्लबलाई आर्थिक सहयोग पुर्याउने शुभचिन्तकहरुलाई पनि क्लबले कृतज्ञता चढाएका छन्।
