17/06/2026
தமிழக அரசே!
விவசாயிகளின் பயிர்க் கடன் தள்ளுபடியில் பாரபட்சம் கூடாது!
தமிழக அரசின் பயிர்க் கடன் தள்ளுபடி அறிவிப்புகள் விவசாயிகளிடையே பல்வேறு கேள்விகளையும் எதிர்பார்ப்புகளையும் உருவாக்கியுள்ளன. தேர்தல் காலத்தில் அளிக்கப்பட்ட வாக்குறுதிகளுக்கும் தற்போது அறிவிக்கப்பட்டுள்ள திட்டங்களுக்கும் இடையே வேறுபாடு காணப்படுவதாக விவசாயிகள் கருதுகின்றனர்.
முதலில் ₹50,000 வரை பயிர்க் கடன் பெற்ற குறு மற்றும் சிறு விவசாயிகளுக்கு மட்டுமே முழு தள்ளுபடி வழங்கப்படும் என்று அறிவிக்கப்பட்டது. பின்னர், எமது சங்கம் உட்பட பல்வேறு விவசாயிகள் சங்கங்கள் தொடர்ந்து முன்வைத்த கோரிக்கைகள், மனுக்கள் மற்றும் போராட்டங்களின் விளைவாக, ₹75,000 வரை பயிர்க் கடன் பெற்றவர்களுக்கு முழு தள்ளுபடி வழங்கப்படும் என்றும், அதற்கு மேல் கடன் பெற்றவர்களுக்கு ₹35,000 தள்ளுபடி வழங்கப்படும் என்றும் புதிய அறிவிப்பு வெளியிடப்பட்டுள்ளது.
இருப்பினும், ஒரே சமூக மற்றும் பொருளாதார நிலையில் வாழும் குறு மற்றும் சிறு விவசாயிகளிடையே கடன் தொகை அடிப்படையில் வேறுபாடு காட்டுவது மறுபரிசீலனை செய்யப்பட வேண்டியதாகும். பயிர் வகை, சாகுபடி பரப்பு மற்றும் உற்பத்திச் செலவுகளின் காரணமாக கடன் தொகையில் மாறுபாடு ஏற்படுவது இயல்பான ஒன்றாகும்.
எனவே, தேர்தல் வாக்குறுதியில் அறிவித்தபடி குறு மற்றும் சிறு விவசாயிகள் கூட்டுறவு வங்கிகளில் பெற்றுள்ள பயிர்க் கடன்களை முழுமையாக தள்ளுபடி செய்வதுடன், அனைத்து விவசாயிகளுக்கும் சமநீதியான நிவாரணம் வழங்க தமிழக அரசு உரிய நடவடிக்கை எடுக்க வேண்டும் என கேட்டுக்கொள்கிறோம்.
NSP. வெற்றி
செயல் தலைவர்
கட்சி சார்பற்ற தமிழக விவசாயிகள் சங்கம்
தலைவர்
ஏர்முனை இளைஞர் அணி
