25/04/2026
सोलापुरात ‘व्हिजन एक्स्पो’मध्ये महिला उद्योजकांसाठी ‘उद्योजक प्रेरणा’ कार्यक्रम उत्साहात
सोलापूर : सोलापुरातील नॉर्थकोर्ट येथे दिनांक २४ ते २६ एप्रिल दरम्यान सहकार भारती सोलापूर यांच्या वतीने ‘व्हिजन एक्स्पो’चे आयोजन करण्यात आले होते. या एक्स्पोमध्ये विविध क्षेत्रातील उद्योजकांनी सहभाग नोंदवून आपली उत्पादने व संकल्पना मांडल्या. उद्योजकतेला चालना देणारा हा उपक्रम शहरातील उद्योजकांसाठी एक महत्त्वपूर्ण व्यासपीठ ठरला.
दिनांक २५ एप्रिल रोजी दुपारी या एक्स्पोच्या निमित्ताने विशेषतः महिला उद्योजकांसाठी ‘उद्योजक प्रेरणा’ या कार्यक्रमाचे आयोजन सहकार भारती आणि स्वावलंबी भारत अभियान यांच्या संयुक्त विद्यमाने करण्यात आले. या कार्यक्रमाला मोठ्या संख्येने महिला उद्योजक उपस्थित राहून त्यांनी सक्रिय सहभाग नोंदवला.
कार्यक्रमात यशस्वी उद्योजक तसेच स्वावलंबी भारत अभियानाचे मार्गदर्शक प्रभाकर जमखंडीकर यांनी मार्गदर्शन करताना स्वतःच्या अनुभवांबरोबरच विविध यशस्वी उदाहरणे मांडली. त्यांनी व्यवसायातील अडचणींवर मात कशी करावी, नवकल्पनांना कसे प्रोत्साहन द्यावे आणि सातत्याने प्रगती कशी साधावी याबाबत सविस्तर मार्गदर्शन केले. त्यांच्या प्रेरणादायी विचारांनी उपस्थित महिला उद्योजकांमध्ये नवचैतन्य निर्माण झाले.
मार्गदर्शनानंतर प्रश्नोत्तर सत्र आयोजित करण्यात आले, ज्यामध्ये महिला उद्योजकांनी आपल्या व्यवसायाशी संबंधित विविध शंका मांडून त्यांचे समाधान करून घेतले. या संवादात्मक सत्रामुळे कार्यक्रम अधिक परिणामकारक ठरला.
कार्यक्रमानंतर उपस्थित मान्यवरांनी एक्स्पोमधील विविध स्टॉल्सना भेट देऊन नवउद्योजकांच्या कल्पना आणि उत्पादनांची माहिती घेतली तसेच त्यांना प्रोत्साहन दिले. या प्रसंगी सहकार भारतीचे विभाग प्रमुख संतोष गायकवाड, स्वावलंबी भारत अभियानचे प्रांत सहप्रमुख चन्नवीर बंकुर, विनायक बंकापूर, मयंक चौहान, ज्ञानेश्वर जाधव, राघवेंद्र राजबिंदले, प्राची धामणगावकर, संगीता संगवे आदी मान्यवर उपस्थित होते.
कार्यक्रमाचे सूत्रसंचालन ऍड. कुलकर्णी यांनी प्रभावीपणे केले. एकूणच ‘उद्योजक प्रेरणा’ हा कार्यक्रम महिला उद्योजकांसाठी प्रेरणादायी ठरत उद्योजकतेच्या दिशेने नवे मार्गदर्शन करणारा ठरला.
