12/01/2026
*अग्रण धुळगांव जिल्हा परिषद प्राथमिक शाळेत मुलांचा आठवडी बाजार उत्साहात संपन्न*
अग्रण धुळगाव (ता. कवठेमंहाकाळ) येथील जिल्हा परिषद प्राथमिक शाळेत विद्यार्थ्यांसाठी आयोजित करण्यात आलेला मुलांचा आठवडी बाजार मोठ्या उत्साहात पार पडला. या उपक्रमात विद्यार्थ्यांनी स्वतः पिकवलेल्या तसेच गावच्या परिसरातून संकलित केलेल्या विविध प्रकारच्या भाज्या व शेतीमाल विक्रीसाठी मांडला होता.
या बाजारात हिरव्या पालेभाज्यांसह संक्रांतीच्या पार्श्वभूमीवर लागणारे तीळ, गूळ, संक्रांतीचे खण, ऊस, गाजर, मुळा, हरभरा, पालक, राळे, मटकी आदी भाजीपाला तसेच सणासाठी आवश्यक साहित्य विक्रीस उपलब्ध करण्यात आले होते. त्याचबरोबर वडापाव, भजी, भेळ, समोसा, कचोरी, पाणीपुरी, थालीपीठ, मसाले डोसा, केक - बर्फी, लाडू गुलाबजाम, खाद्यपदार्थाचे स्टॉल सुद्धा लावण्यात आले होते. त्यामुळे पालक व ग्रामस्थांनी मोठ्या संख्येने उपस्थित राहून खरेदीसाठी एकच गर्दी केली होती.
विद्यार्थ्यांना व्यवहारज्ञान, आत्मविश्वास, स्वावलंबन व उद्यमशीलतेचे प्राथमिक धडे मिळावेत या उद्देशाने मुख्याध्यापक विजय खोत, शाळा व्यवस्थापन समिती व शिक्षक वृंद, अंगणवाडी सेविका या सर्वांच्या वतीने या उपक्रमाचे आयोजन करण्यात आले होते. विद्यार्थ्यांनी स्वतः ग्राहकांशी संवाद साधून खरेदी-विक्री केल्याने बाजारात चैतन्यपूर्ण वातावरण निर्माण झाले होते.
या आठवडी बाजाराचे उद्घाटन ऑ. कॅप्टन हिम्मत भोसले यांच्या हस्ते करण्यात आले. यावेळी शाळा व्यवस्थापन समितीचे अध्यक्ष सुधीर भोसले, उपाध्यक्ष हेमंत खंडागळे, रमेश खंडागळे, सोनाली सुतार, वैभवी भोसले, दादासाहेब माने, स्वाती काटकर, कोमल भोसले, स्वाती आवळे, सुनील कुंभार, संतोष भोसले, ग्रामपंचायत सदस्य प्राचीन भोसले, शुभम भोसले, ग्रामविकास अधिकारी अंकुश दवणे तसेच पालक-ग्रामस्थ हणमंत रसाळे, बाळासो भोसले, सुनील काटकर, आबासाहेब भोसले कांचन भोसले, मालन जाधव, सविता चव्हाण, सारिका भोसले आदी मान्यवर उपस्थित होते.
या उपक्रमामुळे विद्यार्थ्यांमध्ये आर्थिक साक्षरता, श्रमाचे महत्त्व व व्यवहारातील शिस्त यांचे संस्कार रुजण्यास मदत झाली, अशी भावना उपस्थित मान्यवरांनी व्यक्त केली.
#अग्रणी_पाणी_फाऊंडेशन #सह्याद्री_देवराई_अग्रणी #अग्रणी_स्पर्धा_परीक्षा_मार्गदर्शन_केंद्र #सह्याद्री_देवराई_अग्रणी #अग्रण_धुळगाव
