Sevadhyas Foundation

21/08/2026

सर्व सामजिक संस्थांनी एकत्र येऊन,एकमेकांच्या कार्याची देवाण घेवाण करावी आणि एकमेकांच्या सहकार्याने समाजासाठी मोठ योगदान द्याव या विचारातून टी बी लुल्ला चॅरिटेबल फाउंडेशन ने काल एक मार्गदर्शन पर बैठक आयोजित केली होती.
याच बैठिकीत Ngo साठी उपयुक्त पालकमंत्री कार्यालयाच्या योजना यांचे मार्गदर्शनही श्री विजय वरुडकर सर यांनी अतिशय छान पद्धतीने केले.
श्री किशोर लुल्ला सर ,मुग्धा अभ्यंकर मॅडम ,विजय वरुडकर सर तुमच्या सर्वांचे सेवाध्यास फाउंडेशन परिवारातर्फे मनःपूर्वक आभार🙏🙏

16/08/2026

03/08/2026

सेवाध्यास फाउंडेशनच्या प्रयत्नातून सांगलीत पुण्याच्या ज्ञानप्रबोधिनी या संस्थेच्या 'आनंदी शिक्षण' उपक्रमाला प्रारंभ
ज्ञानप्रबोधिनीच्या सहकार्याने शिक्षकांचे पहिले प्रशिक्षण शिबिर संपन्न
सांगली, दि. ३ — घरची बेताची आर्थिक परिस्थिती, विभक्त कुटुंब किंवा एकल पालक अशा विविध अडचणींतून जाणाऱ्या मुलांचे मन अभ्यासात रमत नाही आणि अशीच मुले हळूहळू शैक्षणिक प्रवाहातून बाहेर पडतात. अशा विद्यार्थ्यांना पुन्हा शिक्षणाच्या प्रवाहात आणण्यासाठी सेवाध्यास फाउंडेशन, सांगली आणि विद्योदय मुक्तांगण, इचलकरंजी या दोन संस्थांनी ज्ञानप्रबोधिनी, पुणे यांच्या सहकार्याने 'आनंदी शिक्षण' हा उपक्रम हाती घेतला आहे. या उपक्रमाच्या यंदाच्या पहिल्या शिक्षक प्रशिक्षण शिबिराचे आयोजन दि. २ व ३ ऑगस्ट रोजी महात्मा गांधी वाचनालय, वखार भाग, सांगली येथे करण्यात आले.
शिबिराचे उद्घाटन वुमन्स एज्युकेशन सोसायटीच्या अध्यक्षा व ज्येष्ठ समाजसेविका डॉ. लताताई देशपांडे आणि सामाजिक संस्थांच्या पाठीशी खंबीरपणे उभे राहणारे सांगलीतील प्रसिद्ध वकील व कर सल्लागार श्री. किशोर लुल्ला यांच्या हस्ते झाले. शिबिराची सांगता सहकारमहर्षी कै. अण्णासाहेब कराळे यांचे सुपुत्र श्री. प्रकाश कराळे यांच्या उपस्थितीत झाली.
ज्ञानप्रबोधिनीच्या कार्याचा सांगलीत प्रसार करणारे अ‍ॅड. शैलेंद्र केळकर, तसेच ज्ञानप्रबोधिनीचे श्री. सुरज रसाळ व श्री. जयंत पाठक,श्री सचिन खारवे, यांनी तासगाव, इचलकरंजी व सांगली येथील 'आनंदी शिक्षण' उपक्रमातील सर्व शिक्षकांना मोलाचे मार्गदर्शन केले.
उपस्थित मान्यवर व ज्ञानप्रबोधिनीच्या प्रशिक्षकांच्या मार्गदर्शनाखाली सेवाध्यास फाउंडेशन मोठी झेप घेईल आणि 'आनंदी शिक्षण'सारखे उपक्रम अधिकाधिक शाळांपर्यंत पोहोचवेल, असा विश्वास संस्थेचे अध्यक्ष श्री. अमेय फाळके आणि सेवाध्यासच्या टीमने व्यक्त केला. उपक्रम सुरू असलेल्या शाळांचे मुख्याध्यापकही या वेळी उपस्थित होते.
कार्यक्रमाचे सूत्रसंचालन श्री. योगेश झांबरे यांनी केले, तर संस्थेचा परिचय श्री. विजय निकम यांनी करून दिला. कार्यक्रम यशस्वी करण्यासाठी विजय लड्डा, गोमटेश किल्लेदार, संदीप जाधव, कुणाल शिवलकर, विनायक बुटाले, गजानन सावंत, दिपाली बुटाले, विदुला दिवेकर, प्राजक्ता गाडगीळ, आरती गुर्जर व श्री. सुशांत निकम यांचे सहकार्य लाभले.
प्रशिक्षणासाठी सभागृह उपलब्ध करून दिल्याबद्दल महात्मा गांधी वाचनालयाचे अध्यक्ष डॉ.अशोक मेहता, उपाध्यक्षा डॉ. लताताई देशपांडे तसेच श्री. दिगंबर सूर्यवंशी व त्यांच्या सर्व सहकाऱ्यांचे सेवाध्यास चमूतर्फे मनःपूर्वक आभार.🙏

13/07/2026

सेवाध्यास फाउंडेशन तर्फे आज जिजामाता बाल मंदिर ,सांगली ,येथे सेवाध्यास संस्थेचे सदस्य श्री मिलिंद चितळे यांच्या हस्ते १ ते ४ थी च्या गरजू विद्यार्थाना शालेय साहित्य किट वाटप करण्यात आले.
यावेळी जिजामाता संस्थेच्या अध्यक्षा लताताई देशपांडे स्वतः उपस्थित होत्या.
उपस्थित सर्व शिक्षक आणि मुख्याध्यापिका डीगे मॅडम यांचेही या कार्यक्रमास सहकार्य लाभले त्या बद्दल त्यांचे मनःपूर्वक आभार.

13/07/2026

सेवाध्यास फाउंडेशन तर्फे आज दत्त महाविद्यालय कुरुंदवाड येथे सध्या कॉम्प्युटर सायन्स साठी ११ वी मध्ये प्रवेश घेतलेल्या आणि १० वी मध्ये ९२% मार्क मिळवलेल्या एका गरजू ,प्रामाणिक आणि हुशार मुलीची फी अमेरिकेत स्थायिक असलेले मित्र मुबारक मुजावर यांच्या आर्थिक सहकार्यातून भरण्यात आली, फी च्या रकमेचा चेक , विद्यार्थिनी ज्या शाळेत घडली त्याच तिच्या दत्त विद्या मंदिर नृसिंहवाडी प्राथमिक शाळेचे आणि माध्यमिक शाळेचे मुख्याध्यापक वाडीकर सर आणि कुंभार मॅडम यांच्या हस्ते ,महाविद्यालयाचे प्रिन्सिपॉल श्री पाटील सर यांच्या कडे सुपूर्त करण्यात आला.
एखाद्या गरजू विद्यार्थ्याची शिक्षणाची धडपड हे तिच्या पालकासोबत तिचे शिक्षकच चांगल्या प्रकारे ओळखू शकतात याचा अनुभव आज पुन्हा एकदा आला.
सध्या तरी आपण तिची कॉम्प्युटर सायन्स पहिल्या वर्षाच्या प्रवेशाची इच्छा पूर्ण करू शकलो त्याबद्दल समाधान वाटत आहे.

07/07/2026

आनंदी शिक्षण २०२६ - २७ प्रकल्प पूर्वतयारी कार्यशाळा शनिवार दिनांक ४.७.२०२६ रोजी संपन्न झाली.

कार्यशाळेची सुरवात सूरज रसाळ सरांनी एक प्रश्नावली देऊन केली. यामध्ये काही इंटरेस्टिंग असे प्रश्न होते ज्याचा भर सगळे फॅसिलिटेटर शिक्षण या प्रक्रियेकडे कसे बघतात यावर होता.

त्यानंतर दोघांनी खेळायचा असा एक कार्ड गेम होता, त्यामध्ये एकाग्रता आणि सूक्ष्म निरीक्षण यावर भर होता.

4C (Critical thinking, Creativity, Communication,Collaboration) ही संकल्पना आणि त्याचे शिक्षण प्रक्रियेतील महत्व सर्वांनी समजावून घेतले.

पुढचे सत्र बाल मानसशास्त्र यावर आधारीत होते. माँटेसरी, रूसो यांच्या काही संकल्पना समजावून घेऊन गटचर्चा झाली.

पुढील सत्र मुलांना द्यावयाच्या २१ इनपूटस बद्दल होते. त्यासाठी सत्रांची रचना कशी करता येईल यावर चर्चा झाली.

अशा पद्धतीने एक नवीन सुरवात करण्यास फॅसिलिटेटर सज्ज होऊन, येणाऱ्या आठवड्याच्या सत्राचे नियोजन मनात घेऊन त्यांनी सर्वांचा निरोप घेतला.
सर्व उपस्थित फॅसिलिटेटर / विद्यार्थी मित्र आणि सूरज रसाळ सर तुमचे सेवाध्यास परिवारा तर्फे मनःपूर्वक आभार.
आम्हाला हॉल उपलब्ध करून दिल्या बद्दल आर. बी.पाटील सर यांचेही विशेष आभार.

07/07/2026

" *सेवाध्यास- ज्ञान प्रबोधिनी आनंदी शिक्षण प्रकल्प वर्ष दुसरे २०२६-२७ "*
अभ्यासात मागे पडणाऱ्या विद्यार्थ्यांना शैक्षणिक प्रवाहात आणणाऱ्या आनंदी शिक्षण या उपक्रमाची सुरवात खालील ५ शाळांमध्ये झाली .
१.महापालिका शाळा नंबर ६.टाकळी रोड ,
२.सारडा प्राथमिक शाळा,पेठ भाग ,सांगली
३.महापालिका शाळा नंबर ६
४.दत्त प्राथमिक विद्या मंदिर , नृसिंहवाडी
५.महापालिका शाळा नंबर ६,चांदणी चौक ,सांगली

सविस्तर माहिती नक्की वाचाच.......
विद्यार्थी चांगला घडला तरच चांगले राष्ट्र घडू शकते, हे ओळखूनच आज सेवाध्यास अनाथ, गरजू,होतकरू विद्यार्थ्यांच्या भविष्यासाठी, खंबीर पणे त्यांच्या पाठीशी उभी आहे.
त्यांना शिक्षणासाठी लागणारे साहित्य असेल ,त्यांची शैक्षणिक फी असेल,त्याचे उत्तम करिअर घडवण्यासाठी ,विविध क्षेत्रात कार्यरत असणाऱ्या तज्ञांचे मार्गदर्शन त्यांना मिळावे, यासाठी सेवाध्यास विशेष कार्यरत आहे .
या प्रवासात आम्हाला एक महत्त्वाची गोष्ट प्रकर्षाने जाणवली—
गरजू विद्यार्थ्यांना शालेय साहित्य, शैक्षणिक शुल्क किंवा आर्थिक मदत देणे आवश्यक आहेच; पण त्याचबरोबर त्यांच्या व्यक्तिमत्त्वाचा विकास होणंही तितकंच महत्त्वाचं आहे.
कारण काही विद्यार्थी घरच्या किंवा आजूबाजूच्या परिस्थितीमुळे अभ्यासापासून दूर जातात, प्राथमिक अभ्यासाचा पाया कच्चा राहिल्याने पुढे शिक्षणाबद्दलची गोडीच कमी होत जाते आणि शिकणं त्यांच्यासाठी आनंददायक राहत नाही आणि
हीच गरज लक्षात घेऊन विद्यार्थ्यांना शालेय संकल्पना सोप्या पध्दतीने शिकवणारी,त्यांच्या कौशल्यांचा विकास करणारी अशी एखादी शिक्षण पद्धती विद्यार्थ्यांपर्यंत पोचावी असा विचार सेवाध्यास ने केला .
आणि अशा शिक्षण पद्धतीच्या शोधात असतानाच पुण्याच्या ज्ञान प्रबोधिनी या संस्थेने विकसित केलेल्या आनंदी शिक्षण या प्रकल्पाची माहिती सेवाध्यासला मिळाली.
या शिक्षण पद्धतीचा विद्यार्थ्यांवर होणारा सकारात्मक परिणाम लक्षात घेऊन सेवाध्यास ने ज्ञानप्रबोधिनी च्या मदतीने हा प्रकल्प सांगली परिसरात राबविण्याचा संकल्प केला आणि
२०२५ _२६ या शैक्षणिक वर्षात हा प्रकल्प महानगरपालिका शाळा क्रमांक ६, टाकळी रोड, मिरज आणि सावईकर प्राथमिक शाळा, वडर कॉलनी, सांगली येथे वर्षभर यशस्वी रित्या राबविण्यात आला.
विद्यार्थ्यांना केवळ शिकवणे नव्हे, तर त्यांना शिकण्यात गुंतवून ठेवणे हा या सत्रांचा मुख्य उद्देश होता.
वर्गात आणि मैदानावर घेतलेल्या उपक्रमांमध्ये विद्यार्थ्यांच्या आवडी-निवडींचा बारकाईने विचार करण्यात आला.
त्यांच्या भावविश्वाशी जोडणारे शब्द, गोष्टी आणि अनुभव वापरून शिकण्याची प्रक्रिया अर्थपूर्ण बनवली.
गाणी, कविता आणि आजूबाजूच्या वस्तूंच्या साहाय्याने सत्रे रंजक ठेवली गेली.
विविध खेळांमधून गणिताच्या संकल्पना सहज समजावून सांगितल्या, तर सभोवतालच्या गोष्टींमधून अक्षरओळख विकसित केली.
संगीत आणि कवितांच्या माध्यमातून मुलांचे लक्ष वेधून घेत, त्यांच्यात अभ्यासाची गोडी हळूहळू रुजवली.
चित्रांच्या माध्यमातून चर्चा घडवून आणणे, विद्यार्थ्यांना मोकळेपणाने बोलते करणे, तसेच काही निवडक वस्तूंवर आधारित गोष्टी तयार करायला प्रवृत्त करणे—या उपक्रमांनी त्यांच्या कल्पनाशक्तीला आणि अभिव्यक्तीला चालना दिली.
अशा अनेक प्रयोगशील आणि सहभागात्मक पद्धतींमुळे शिकणे हा मुलांसाठी आनंददायी अनुभव ठरला.
सेवाध्यासने या उपक्रमासाठी सामाजिक सेवेची जाणीव असलेले, मुलांशी छान संवाद साधू शकणारे व त्यांच्या भावनांची समज असलेले शिक्षक मानधन तत्त्वावर नियुक्त केले, त्यांना ज्ञानप्रबोधिनी कडून आवश्यक प्रशिक्षण व मार्गदर्शन देण्यात आले.
प्रबोधिनीने उपलब्ध करून दिलेले सराव आणि शिक्षकांसाठीचे मार्गदर्शक पुस्तक यांचा अत्यंत परिणामकारक वापर करण्यात आला.
या प्रशिक्षणाचा प्रत्यक्ष परिणाम जाणून घेण्यासाठी आम्ही शाळेला भेट दिली.
तेथे मुख्याध्यापक आणि पालक यांच्याशी संवाद साधला.
मुलांशी संवाद साधून त्यांच्या वर्तनातील अपेक्षित बदल आणि शाळेबद्दलची वाढती ओढ याचे मूल्यमापन केले.
अभिप्राय सकारात्मक मिळाला असून मुलांमधील बदल स्पष्टपणे जाणवले.
या यशस्वी प्रतिसादामुळे आमचा उत्साह वाढला असून, आम्ही या शैक्षणिक वर्षात हा उपक्रम जास्तीत जास्त शाळांमध्ये सुरू करण्याचा संकल्प केला ,तसा हा उपक्रम खर्चिक असल्याने थोडी काळजी होती पण तुमच्या सर्वांच्या आशीर्वादाने आमच्या मित्र परिवारानेच याचे शिवधनुष्य उचलले आणि बघता बघता या प्रकल्पासाठी तब्बल २ लाख रुपये उभे राहिले ,आणि आम्ही हा उपक्रम आता ५ शाळांमध्ये सुरू केला आहे.
आमच्या या कार्याला आजवर जी मोलाची साथ लाभली, ती तुमच्यासारख्या सेवाभावी मित्रांची, समाजातील सुसंस्कृत व्यक्तींची आणि सेवाध्यासच्या पुरस्कर्त्यांची—यासाठी आम्ही आपल्या सर्वांचे मनःपूर्वक ऋणी आहोत.
आम्हाला शाळांमध्ये उपक्रमा साठी संधीदिल्या बद्दल मुख्याध्यापक ,श्री गावडे सर,चौगुले मॅडम, पेटकर मॅडम,गोरे मॅडम,कुंभार मॅडम , सहकारी शिक्षक सुशांत निकम सर यांचे मनःपूर्वक आभार .🙏
तुमच्या या सहकार्यामुळे अनेक विद्यार्थ्यांचे भविष्य उजळू शकते , मूल शैक्षणिक प्रवाहात राहिली तर बाल गुन्हेगारी ,व्यसनाधिनता याला सुद्धा आपोआपच आळा बसेल.दुर्लक्षित शाळांची घडी बसण्यास मदत होईल.
आपण सर्वजण एकत्र आलो, तर शिक्षणाची ही ज्योत अधिकाधिक लोकांपर्यंत पोहोचेल, यावर आमचा पूर्ण विश्वास आहे.
भविष्यात प्रत्येक गरजू विद्यार्थ्यांपर्यंत आम्हाला पोहोचायचं आहे. यथा शक्ती असेच सहकार्य करत रहा..

धन्यवाद🙏
सेवाध्यास परिवार

07/07/2026

लेट पोस्ट
कार्यक्रमाची तारीख २२.०६.२०२६
सकाळी दत्त प्राथमिक विद्या मंदिर नृसिंहवाडी येथे शालेय साहित्य वाटप कार्यक्रम सुरू असतानाच दुपारी अचानक आणखी एका कार्यक्रमाचे नियोजन झाले ,राणी सरस्वती कन्या शाळे मधील आई वडील नसलेल्या,आणि काही गरजू अशा माध्यमिक शाळेतील (५ ते १० वी )मुलींना आपण गणवेश देतो ,त्यांची यादी आली होती पण गणवेश दुकानदाराकडे शिल्लक नव्हते आणि नेमके ते आज दुपारी बारा वाजता मिळाले ,त्यामुळे त्यातील 10 विद्यार्थिनींना आज गणवेश द्याल का असा कॉल शाळेतून आमचे सचिव विजय निकम यांना आला आणि सेवाध्यासची टीम वाडीतून पुन्हा दुपारी राणी सरस्वती माध्यमिक शाळेमध्ये पोहोचली.
आपले सदस्य अभिजीत बोळाज आणि मिसेस अभिजीत बोळाज (वहिनींनी) ऑलरेडी याचं नियोजन केलं होतं त्यामुळे आम्हाला कुठलीही अडचण आली नाही, आणि त्या शाळेत सुद्धा काही मोजक्या मुलींच्या उपस्थितीत गणवेश वाटपाचा कार्यक्रम पार पडला .शाळेच्या मुख्याध्यापिका यांनी मुद्दामच इतर मुलींना बोलावून घेतले होते आणि सेवाध्यासच्या कामाची माहिती दिली आणि भविष्यात तुम्ही सुद्धा असं काहीतरी करत राहिलं पाहिजे याची जाणीव करून दिली.
उपस्थित सर्व शिक्षक,शाळेच्या मुख्याध्यापिका आणि खराडे मॅडम यांनी पुन्हा सेवेची संधी दिली त्याबद्दल त्यांचे मनःपूर्वक आभार .

22/06/2026

आज सकाळी दत्त प्राथमिक विद्या मंदिर नरसोबावाडी येथे आपले सदस्य विजय लड्डा यांचे बंधू तेलाचे प्रसिद्ध व्यापारी श्री राजेंद्र लड्डा आणि त्यांच्या मातोश्री यांच्या उपस्थित गरजू विद्यार्थ्यांना शालेय साहित्य वाटप कार्यक्रम अतिशय छान प्रकारे पार पडला .
शिक्षकांशी पण बरीच चर्चा झाली , 1 ते 4 थी शाळा पूर्ण विनाअनुदानित आहे , जास्ती मूल गरीब कुटुंबातील असल्याने त्यांच्या कडून कोणतीही फी आकारली जात नाही,देणगीदार,सामाजिक संस्था ,माध्यमिक चे शिक्षक यांच्या सहकार्यातून ही शाळा सुरू आहे.
विजय लड्डा हे फाउंडेशनचे कार्यकारणी सदस्य आहेतच पण आज त्यांचे थोरले बंधू श्री राजेंद्रजी लड्डा या वाटपाच्या कार्यक्रमाला उपस्थित राहिल्याने त्यांनाही आपल्या कार्याची जवळून माहिती मिळाली ,मदत प्रत्यक्ष गरजुंपर्यंत जात असल्याने त्यांनी पण समाधान व्यक्त केले. त्यांच्या बॅचच्या मित्र परिवारापर्यंत ते सेवाध्यास फाउंडेशनचे काम नक्की पोहोचवतील आणि आपल्याला कार्य करायला आणखीन बळ मिळवून देतील याची आम्हाला खात्री आहे.
या कार्यक्रमाला वेळात वेळ काढून उपस्थित राहिल्यामुळे सेवाध्यास फाउंडेशन तर्फे त्यांचे मनःपूर्वक आभार🙏🙏

20/06/2026