30/08/2026
Ojaswini Aspire Scholarship
22/8/2026
“કોઈ બાળક આજે ક્યાં ઊભું છે એના કરતાં,
એ આવતીકાલે ક્યાં પહોંચી શકે છે…
એ જોવાની દૃષ્ટિનું નામ છે Ojaswini Aspire Scholarship.”
એક શરૂઆત… જે કદાચ અનેક જિંદગીઓની દિશા બદલી દેશે.
દરેક ધોરણમાં પ્રથમ, દ્વિતિય કે તૃતિય આવનારા વિદ્યાર્થીઓને સ્કોલરશીપ મળતી હોય,ઇનામ મળતા હોય છે.
પરંતુ Ojaswini Aspire scholarship ની વિચારધારા થોડી અલગ છે.
અહીં પસંદગી માત્ર ગુણોના આધારે નથી થઈ.
કારણ દરેક તેજસ્વી ભવિષ્યને માત્ર ગુણપત્રકથી ઓળખી શકાય નહીં…
અહીં પસંદ કરવામાં આવ્યા એવા દીકરા-દીકરીઓ, જેમનામાં ભણવાની ધગશ છે, કંઈક બનવાની ઈચ્છા છે, આગળ વધવાની તીવ્ર ભાવના છે અને જેમના ઉજ્જવળ ભવિષ્યની સંભાવના આજે જ જોઈ શકાય છે.
અને એટલું જ નહીં…
આ બાળકોના સપનાની સાથે ઊભા રહેવાની તેમના પરિવારની પણ એટલી જ મજબૂત ઈચ્છા છે.
કારણ કે બાળકના ભવિષ્ય માટે બાળકની મહેનત સાથે એટલો જ મહત્વનો હોય છે પરિવારનો વિશ્વાસ અને સાથ.
આ જ વિચાર સાથે તા. 22 ઓગસ્ટ 2026ના રોજ મુંજકા સ્કૂલ નં. 2 ખાતે Ojaswini Aspire Scholarshipનો આરંભ થયો.
ધોરણ 5, 6 અને 7ના 9 દીકરા-દીકરીઓ સાથે શરૂ થયેલી આ સફરમાં દરેક બાળકને શરૂઆતના તબક્કે ₹1,100ની સ્કોલરશીપ આપવામાં આવી.
રકમ કદાચ નાની છે…
પણ તેની પાછળનો વિચાર બહુ મોટો છે.
આ સ્કોલરશીપ કદાચ નાની લાગે,
પણ એક બાળક માટે એ તેના સપનામાં કોઈએ મૂકેલો વિશ્વાસ છે.
એક બાળકને એવું કહેવાનો અમારો નાનકડો પ્રયાસ છે કે
“તારી અંદર કંઈક ખાસ છે…
તારી મહેનત અમને દેખાય છે…
તારા સપનામાં અમને વિશ્વાસ છે…
અને તું આગળ વધે એ માટે અમે તારી સાથે છીએ.”
ને ખાલી એક આંગળીના નખભાર ટેકો કરવાથી પણ મનોબળ વધતું હોય છે ..એટલે જ આવા વિધાર્થીઓને શોધીને તેમને, તેમના સમગ્ર શિક્ષણ દરમિયાન થોડોક ટેકો કરવાનો ઓજસ્વિની ફાઉન્ડેશન દ્વારા સંકલ્પ કર્યો છે.
" આ માત્ર ને માત્ર ખિસકોલી કર્મ જ છે."
આજે આ સંખ્યા 9 છે…
અને દરેક વર્ષ સાથે વધુ 9 કે તેથી વધુ બાળકોના સપનાઓ અમારી સાથે જોડાશે.
કોઈ બાળકની પ્રતિભા માત્ર એટલા માટે અધૂરી ન રહી જાય કે તેના પરિવાર પાસે પૂરતા સાધનો નથી.માત્ર ને માત્ર આ જ વિચાર સાથે શરૂ થયેલી આ સફર છે.
દરેક વર્ગખંડમાં માત્ર વિદ્યાર્થીઓ નથી હોતા…
કેટલાક આવતીકાલના ડૉક્ટર, શિક્ષક, અધિકારી, ઉદ્યોગસાહસિક, કલાકાર અને સમાજના નેતાઓ પણ બેઠા હોય છે.
ફરક એટલો છે કે,
કોઈની સંભાવના વહેલી ઓળખાઈ જાય છે,
અને કોઈની ઓળખ માટે માત્ર એક તકની જરૂર હોય છે.
Ojaswini Aspire scholarship એ તક અને સંભાવના વચ્ચેનો એક નાનકડો સેતુ બનવાનો પ્રયાસ છે.
કોઈ બાળક આજે ક્યાં ઊભું છે એના કરતાં,
એ આવતીકાલે ક્યાં પહોંચી શકે છે…
એ જોવાની દૃષ્ટિનું નામ છે Ojaswini Aspire Scholarship.
કદાચ વર્ષો પછી આ જ બાળકો પાછા વળી ને કહેશે,
“જ્યારે અમે નાના હતા, ત્યારે કોઈએ અમારા સપનાને ગંભીરતાથી લીધું હતું.”
અને કદાચ એ જ આ પહેલની સૌથી મોટી સફળતા હશે.
કારણ કે સમાજમાં પરિવર્તન હંમેશા મોટા પ્રોજેક્ટથી જ આવે એવું નથી.
ક્યારેક એક બાળકને આગળ વધવાની તક આપવાથી પણ એક નવી શરૂઆત થાય છે.
અને જો આ નાનકડી પહેલ કોઈ એક વ્યક્તિને પણ પોતાના આસપાસના કોઈ બાળક માટે કંઈક સારું કરવાની પ્રેરણા આપે…
તો સમજવું,
એક શરૂઆત સફળ થઈ કારણ કે,
એક બાળકનું સપનું,
એક પરિવારનો વિશ્વાસ,
અને સમાજની એક નાનકડી હૂંફ આ બધું
મળીને એક આખું ભવિષ્ય બદલી શકે છે.
Ojaswini Aspire scholarship
See the potential. Believe in the dream. Nurture the future.
એક શરૂઆત…
અને કદાચ અનેક ઉજ્જવળ ભવિષ્યો તરફનું ઉપાડેલ નાનકડું પણ મક્કમ પગલું.
આ યજ્ઞમાં સાથ આપનારાઓ અને સાથે રહેનારાઓનો આ તકે હૃદયપૂર્વક આભાર.
ખાસ શિક્ષણ સમિતિના ચેરમેન શ્રી વિક્રમ પુજારા સાહેબ, કોર્પોરેટર શ્રી પ્રવીણભાઈ સેગલીયા,પુંજાભાઈ સેગલીયા સ્કૂલના આચાર્ય શ્રી અને સર્વે શિક્ષકગણનો ખૂબ આભાર.
ટીમ ઓજસ્વિનીના ટ્રસ્ટી શ્રી મૌલેશ દવે, સુરભીબેન આચાર્ય,કૃતિબેન રાઠોડ તથા કર્મનિષ્ઠ કાર્યકરો ભાવનાબેન ભટ્ટ,નેહાબેન પાઠક,નાયરા ફળદુ અને મિત્સુ દવે હાજર રહ્યા હતા.
