छत्रपती सेवा प्रतिष्ठान

05/06/2026

19/02/2026

शिवजयंती च्या हार्दिक शुभेच्छा!🚩

*स्मृती शिवाची सदा जागती। पुन्हा घडावे युगप्रवर्तन ।*
*नवे घडाया राष्ट्र आपुले सदा असावे शिवमय जीवन ।।धृ।।*

अमंगलाचा विनाश व्हावा, भोगवृत्तीचा स्पर्श नसावा ।
मातृभाव हो पुन्हा जागता, अबलांना आधार असावा।
जिजामाऊली पुन्हा घडावी, पुन्हा घडावे श्री शिवदर्शन।।१।।

युद्ध जिथे ना कधी नांदते, अयोध्या अशी पुन्हा दिसावी।
दीनदरिद्री जिथे ना कोणी, बंधुभावना सदा जगावी।
रामराज्य साकार कराया शिवापरी हो विजयी जीवन ।।२।।

रायगिरीच्या शिवरायाचा कर्मयोग तो पुन्हा दिसावा।
मुरारबाजी तानाजींच्या समर्पणाचा भाव फुलावा ।
अणूरेणुने व्रतस्थ व्हावे, संस्थापाया शिवसिंहासन।।३।।
*रचना - प.पू. सद्गुरुदास महाराज, श्रीगुरुमंदिर नागपूर*

11/02/2026

अत्यंत दुःखद अंत:करणाने सूचित करण्यात येते की, छत्रपती सेवा प्रतिष्ठान चे संस्थापक, विख्यात शिवकथाकार श्री. विजयराव देशमुख, सद्गुरुदास महाराज 11 फेब्रुवारी रोजी संध्याकाळी 7.00 वाजता श्रीदत्तचरणी लीन झालेत!
छत्रपती सेवा प्रतिष्ठान, श्रीगुरुमंदिर व पत्रभेट चा आधारवड कोसळला.

23/11/2025

आज नागपूर येथे नॅशनल बुक ट्रस्ट द्वारा आयोजित पुस्तक महोत्सवात लिट फेस्टिवल चे उद्धाटन परम पूजनीय विजयराव देशमुख, संस्थापक अध्यक्ष, छत्रपती सेवा प्रतिष्ठान यांच्या प्रमुख उपस्थितीत झाले. छत्रपती सेवा प्रतिष्ठान स्टॉल नंबर 23, इथे अवश्य भेट द्या!

29/09/2025

छत्रपती सेवा प्रतिष्ठान चा 44 वा जिजामाता विद्वत गौरव पुरस्कार, श्री. संदीप बाबाराव शिंदे, यांना दिनांक 4 ऑक्टोबर 2025, शनिवारी, संध्याकाळी 6.00 वाजता, सायंटिफिक सभागृह, आठ रस्ता चौक, राणीलक्ष्मी नगर, नागपूर येथे प्रदान करण्यात येणार आहे. सोहळ्याचे अध्यक्ष, श्रीमंत मुधोजीराजे भोसले तर प्रमुख अतिथी कृषितज्ज्ञ श्री. शरदराव निंबाळकर सर असणार आहेत. सर्व शिवप्रेमींनी उपस्थित राहावे व आमचा आनंद शतगुणीत करावा ही विनंती.
श्री. भालचंद्र देशकर,
सचिव, छत्रपती सेवा प्रतिष्ठान, नागपूर

18/09/2025

जेष्ठ इतिहास संशोधक आदरणीय श्री. गजानन भास्कर मेहेंदळे सर, यांचे काल दि. 17 सप्टेंबर 2025 रोजी दुःखद निधन झाले. छत्रपती सेवा प्रतिष्ठान चे संस्थापक परम पूजनीय सद्गुरुदास महाराज यांचे मेहेंदळे सरांशी असलेल्या स्नेहबंधाचे स्मरण होत आहे. रायगड स्मारक समिती व भारत इतिहास संशोधक मंडळाचे कार्यातील त्यांचे योगदान अविस्मरणीय आहे. पुरावे व प्रमाणित संदर्भ असल्याशिवाय इतिहास लेखन करायचे नाही, असे व्रत घेतलेल्या पिढीतील एक थोर संशोधक आपण गमावला.
छत्रपती सेवा प्रतिष्ठान च्या वतीने श्री. मेहेंदळे सरांना भावपूर्ण श्रद्धांजली!
मोहन श्रीराम बरबडे.

01/05/2025

"शककर्ते शिवराय"
सुधारित नववी आवृत्ती, लवकरच वाचकांच्या भेटीला..

मराठा तितुका मेळवावा, महाराष्ट्र धर्म वाढवावा||
जय शिवराय