15/09/2026
"हिंदुत्वाचे मोठे वर्तुळ न विसरता सामाजिक सद्भाव जपू ! - डाॅ. आनंद लेले
(कर्वे संस्थेत सामाजिक रक्षाबंधन)
दि. १२ सप्टेंबर २६ - महर्षी कर्वे स्त्री शिक्षण संस्थेच्या वतीने आज सामाजिक रक्षाबंधनाचा कार्यक्रम संपन्न झाला. संस्थेच्या नावलौकिकात जसा शिक्षक, प्राध्यापक, शाखाप्रमुख, प्राचार्य, संस्थाचालक यांचा वाटा आहे तसेच संस्थांतर्गत विविध सेवा देणारे कष्टकरी, सुरक्षाकर्मी यांचाही तितकाच महत्वपूर्ण वाटा आहे. अशा सर्व सेवाकर्मींच्या प्रती असलेल्या कृतज्ञतेचे प्रकटीकरण म्हणून या कार्यक्रमाचे आयोजन केले गेले होते. संस्थेत अशा सेवा देणारे सुमारे १८५ महिला व १३५ पुरुष कर्मचारी या कार्यक्रमासाठी निमंत्रित होते.
या वेळी व्यासपीठावर संस्थेचे कार्याध्यक्ष श्री. रवींद्र देव, उपकार्याध्यक्ष डाॅ. आनंद लेले, व्यवस्थापन समिती सदस्य श्रीमती उमा जोशी, श्रीमती रेखा सोनुने, श्रीमती शुभांगी तांबट, सचिव डाॅ. पी. व्ही. एस. शास्त्री, उपसचिव श्रीमती कांचन सातपुते, मानद उपसचिव श्री. प्रदीप वाजे, आजन्म सेविका श्रीमती वैशाली पोतदार हे मान्यवर उपस्थित होते.
"संस्थेला भेट देणारे अनेक मान्यवर इथे असलेली स्वच्छता, सुरक्षा या गोष्टींचे कौतुक इथल्या पदाधिका-यांसमोर करतात. वस्तुतः या कौतुकाचे मानकरी आपणच आहात", अशा शब्दांत श्री. रवींद्र देव यांनी या कर्मचारी वर्गाचा गौरव आपल्या प्रास्ताविकात केला आणि अशा पुढील कार्यक्रमाचे संचालन कर्मचा-यांद्वारेच व्हावे अशी इच्छा व्यक्त केली. डाॅ. शास्त्री यांनी आपल्या मनोगताद्वारे या संस्थेला आश्रम म्हणण्यामागे एक पवित्रतेचे अधिष्ठान असल्याचे विशेषत्वाने नमूद केले आणि कष्टकरी वर्गाच्या सर्व शैक्षणिक समस्या सोडविण्यास संस्था कटिबद्ध असल्याचे सांगितले.
यानंतर सर्व उपस्थित कर्मचाऱ्यांनी परस्परांना रक्षाबंधन केले. सर्वांना भेटवस्तू देऊन तसेच महिला कर्मचाऱ्यांना साड्या व हळदीकुंकू देऊन त्यांचा गौरव केला गेला. या वेळी श्रीमती महानंदा उभे, श्रीमती सुगंधा पवार व श्रीमती चंदा भोसले या महिला कर्मचाऱ्यांनी आपल्या मनोगतांद्वारे संस्थेबद्दलची आपली कृतज्ञता व्यक्त केली. कोरोना काळ किंवा अन्य संकटकाळात संस्था अशा अनेक गरजूंच्या पाठीशी ठामपणे उभी राहिल्याने अनेक घरे सावरली असल्याचे या मनोगतांमधून पुढे आले.
डाॅ. आनंद लेले यांनी या प्रसंगी मार्गदर्शन करताना सर्व कर्मचा-यांविषयी कृतज्ञता व्यक्त करत सामाजिक रक्षाबंधनाचा आशय उलगडला. ते म्हणाले, "परस्परांमधील आत्मीयता वाढीस लागणे हेच या सणाचे खरे प्रयोजन आहे. सामाजिक रक्षाबंधन म्हणजे समाजाचे रक्षण करण्याचे दायित्व. जो समाज आपल्या रक्षणासाठी सदैव कटिबद्ध असतो, तोच टिकून राहतो. आपला समाज संपन्न असल्याने इथे मोठ्या प्रमाणावर आक्रमणे झाली. इथे अपरिमित लूट झाली असली तरी परस्परांबद्दलच्या सामाजिक दायित्वाचा भाव टिकून राहिला. छत्रपती शिवाजी महाराजांसारख्या महापुरुषांनी यासाठी आपले आयुष्य पणाला लावले. आजच्या कार्यक्रमाचा उद्देश्यही हा भाव जागविणे हाच आहे."
"आपण सर्वजण इथल्या विद्यार्थिनींची काळजी घेण्यासाठी कटिबद्ध आहोत. त्या अर्थाने आपण सर्वच जण सुरक्षारक्षक आहोत. मात्र तरीही एका विशिष्ट गणवेषात आपला चेहरा विसरुन हे काम तुम्ही सर्वजण करत आहात आणि एका मोठ्या कामाशी जोडलेले आहात. आत्मीयतेने केलेल्या या कामाचे मोल होऊ शकत नाही. हे सर्व करत असताना आपल्याच बांधवांना आधारभूत होण्यासाठी स्वदेशीचा स्वीकार, एकजिनसी समाज म्हणून शांतिपूर्ण राहण्यासाठी जातीपातींचा मनातून विसर, सर्व प्रकारच्या नागरी अनुशासनाचे कटाक्षाने पालन, पर्यावरणाचे संरक्षण या गोष्टी आपण आचरणात आणायला हव्यात. अमेरिका, चीन, रशियासारख्या देशांच्या अतिश्रीमंतीमागे हिंसेचा भयानक इतिहास आहे. मात्र भारत देश आज जो काही आहे, त्यामागे असा कुठलाही इतिहास नाही. कारण ती आपली प्रवृत्ति नाही. सामाजिक सद्भाव हीच आपली मूळ प्रकृति आहे", असे सांगून मतदार नोंदणी आणि जनगणना या अतिमहत्वाच्या विषयाकडे लक्ष वेधले. हे कर्तव्य करताना 'आपण गर्दी नसून समाज आहोत' हे लक्षात घेऊन आपली हिंदुत्वाशी असलेली बांधिलकी या स्पष्टपणे मांडली पाहिजे, असे आग्रहाचे प्रतिपादन डाॅ. लेले यांनी केले.
श्री. प्रदीप वाजे यांनी कार्यक्रमाचे सूत्र संचालन व श्रीमती उमा जोशी यांनी आभार प्रदर्शन केले. सामूहिक कल्याण मंत्राने कार्यक्रमाची सांगता झाली.
