20/09/2025
पानशेतमध्ये २७ व २८ सप्टेंबरला होणार चौथा आंतरराष्ट्रीय पर्यटन लघुपट महोत्सव
- गणेश चप्पलवार यांची माहिती; पर्यटन संचालनालय व परभन्ना फाउंडेशनचा पुढाकार
- वीणा गोखले यांना 'जीवनगौरव पुरस्कार'; छाया कदम, विठ्ठल काळे, अतुल पाटणे यांची उपस्थिती
पुणे : जागतिक पर्यटन दिवसानिमित्त परभन्ना फाउंडेशन, पर्यटन संचालनालय, महाराष्ट्र राज्य, महाराष्ट्र चित्रपट रंगभूमी व सांस्कृतिक विकास मंडळ आणि धोंडू बाजी चव्हाण प्रतिष्ठान यांच्या संयुक्त विद्यमाने चौथ्या आंतरराष्ट्रीय पर्यटन लघुपट महोत्सवाचे आयोजन करण्यात आले आहे. येत्या शनिवारी (दि. २७ सप्टेंबर २०२५) व रविवारी (दि. २८ सप्टेंबर २०२४) वरसगाव (पानशेत) येथील सूर्य शिबिर रिसॉर्ट येथे हा लघुपट महोत्सव होत आहे, अशी माहिती परभन्ना फाउंडेशनचे अध्यक्ष गणेश चप्पलवार यांनी पत्रकार परिषदेत दिली. प्रसंगी महोत्सव सल्लागार समितीचे डॉ. राजीव घोडे, जीवराज चोले, पानशेत पर्यटन निमंत्रक किरण राऊत, संयोजन समितीचे असीम त्रिभुवन, के. बसवंत विठाबाई बाबाराव, के. अभिजीत, अश्विनी वाघ, महेश काळे, साहिल भोसल आदी उपस्थित होते.
गणेश चप्पलवार म्हणाले, "यंदा महोत्सवात १७ राज्य आणि दोन देशांतून ६१ लघुपट, माहितीपटांपैकी १७ माहितीपट व लघुपटाचे स्क्रीनिंग होणार आहे. महोत्सवासाठी प्रमुख पाहुणे म्हणून भोरचे आमदार शंकर मांडेकर, राज्य पर्यटन विभागाचे प्रधान सचिव डॉ. अतुल पाटणे, उपसचिव संतोष रोकडे, सांस्कृतिक विभागाचे उपसचिव महेश वाव्हळ, महाराष्ट्र चित्रपट,रंगभूमी, सांस्कृतिक विकास महामंडळाच्या वित्त लेखाधिकारी चित्रलेखा खातू, 'एमटीडीसी'चे महाव्यवस्थापक चंद्रशेखर जैस्वाल, पर्यटन संचालनालयाचे सहसंचालक सुशील पवार, उपसंचालिका शमा पवार, 'पीएमपीएमएल'चे अध्यक्ष पंकज देवरे, अभिनेत्री छाया कदम, अभिनेता विठ्ठल काळे, अभिजित कारंडे, माजी आयएएस अर्जुन म्हसे पाटील आदी उपस्थित राहणार आहेत."
डॉ. राजीव घोडे यांनी सांगितले की, महोत्सवाचे उद्घाटन शनिवारी (ता. २७) सकाळी ११ वाजता होणार आहे. अश्वारूढ छत्रपती शिवाजी महाराजांची शाही मिरवणूक, शिवकालीन शस्त्रात्रांचे प्रात्यक्षिक व ऐतिहासिक मर्दानी खेळांचे सादरीकरण करत महोत्सवाला सुरुवात होईल. 'पानशेतमधील महोत्सवाचे सामाजिक, आर्थिक आणि सांस्कृतिक परिणाम' यावर चर्चा होणार आहे. दुपारच्या सत्रात 'पानशेतमधील निसर्ग, इतिहास आणि पर्यटनातील रोजगाराच्या संधी' या विषयावर परिसंवाद होईल. दुपारी ३ ते सायंकाळी ६ या वेळेत लघुपटांचे स्क्रिनींग होईल. संगीत मैफलीने पहिल्या दिवसाच्या कार्यक्रमाची सांगता होईल.
दुसऱ्या दिवशी सकाळी ९ ते १० या वेळेत स्थानिक पर्यटन, रिसॉर्ट मालक, टूर्स अँड ट्रॅव्हल्स यांचा मेळावा होणार आहे. सकाळी १० ते १२ या वेळेत निवडक लघुपटाचे स्क्रीनिंग होणार आहे. दुपारी १२ वाजता 'महाराष्ट्रातील पर्यटनस्थळे व चित्रपटाचे चित्रीकरण' या विषयावर परिसंवाद होणार आहे. यामध्ये दिग्दर्शक, पत्रकार, पर्यटन व विपणन क्षेत्रातील तज्ज्ञ व अधिकारी सहभागी होणार आहेत. 'पानशेतमधील निसर्ग, इतिहास, भूगोल आणि पर्यटनातील उलगडा' यावर श्रमिक गोजमगुंडे आणि महेश धिंडले यांची प्रकट मुलाखत होणार आहे. दुपारी ३ ते ५ दरम्यान मान्यवरांच्या हस्ते पुरस्कार समारंभ पार पडणार आहे, असे असीम त्रिभुवन म्हणाले.
पर्यटन क्षेत्रातील उल्लेखनीय योगदानाबद्दल यंदाचा जीवनगौरव पुरस्कार २०२५ वीणा गोखले, बेस्ट टूर्स अँड ट्रॅव्हल्स अवॉर्ड' अमित कुलकर्णी (गेट सेट गो हॉलिडेज) यांना प्रदान प्रदान करण्यात येणार आहे. यासह सर्वोत्कृष्ट लघुपट व सर्वोत्कृष्ट असे विविध पुरस्कार देण्यात येणार आहेत. लघुपट महोत्सवाचे परीक्षक म्हणून अभिनेत्री वैशाली केंदळे, परीक्षक डॉ. संतोष पठारे आणि अक्षय इंडिकर यांनी काम पाहिले आहे, असे जीवराज चोले यांनी नमूद केले.
---------------------
पत्रकार परिषदेत डावीकडून सारंग मोकाटे, डॉ. राजीव घोडे, गणेश चप्पलवार, असीम त्रिभुवन व जीवराज चोले
