18/08/2026
യു ജി സി നെറ്റ്: കുത്തും കോമയും തുടങ്ങി തലക്കെട്ടുകളിൽ പോലും പിഴവുകൾ, അസാധാരണമായ ആവർത്തനവും: ചോദ്യങ്ങൾ എന്ന് ശരിയാവും?
രാജ്യത്തെ ഉന്നതവിദ്യാഭ്യാസ മേഖലയിലെ ഗവേഷണത്തിനും അധ്യാപക നിയമനത്തിനും നിർണായകമായ UGC-NET പരീക്ഷയുടെ ചോദ്യങ്ങളിൽ ഗുരുതരമായ വീഴ്ചകൾ ഉണ്ടായത് കാരണം മൂന്ന് വിഷയങ്ങൾക്ക് വീണ്ടും പരീക്ഷ നടത്തേണ്ടി വരുന്നത് ദൗർഭാഗ്യകരമാണ്.
2026 ജൂണിൽ രാജ്യത്താകെ 87 വിഷയങ്ങളിലായി UGC-NET പരീക്ഷ നടത്തിയിരുന്നു. എന്നാൽ ചോദ്യപ്പേപ്പറുകളിലെ ഗുരുതരമായ പിഴവുകളെ തുടർന്ന് ഇംഗ്ലീഷ്, സോഷ്യോളജി, കോമേഴ്സ് എന്നീ മൂന്ന് വിഷയങ്ങളിലെ പരീക്ഷകൾ വീണ്ടും നടത്താൻ NTA തീരുമാനിച്ചിരിക്കുകയാണ്. സോഷ്യോളജി പേപ്പറിൽ പേരുകളിലെ തെറ്റുകൾ, വിവർത്തന-വ്യാകരണ പിഴവുകൾ, ചോദ്യങ്ങളുടെ ഘടനയിലെ അപാകതകൾ തുടങ്ങിയവ കണ്ടെത്തിയതായി NTA തന്നെ വ്യക്തമാക്കിയിട്ടുണ്ട്. ഇംഗ്ലീഷ്, കോമേഴ്സ് പേപ്പറുകളിൽ മുൻ പരീക്ഷകളിലെ ചോദ്യങ്ങൾ വലിയ തോതിൽ ആവർത്തിച്ചതായും പരാതികൾ ഉയർന്നിരുന്നു.
ജൂൺ അവസാനത്തോടെ പരീക്ഷ പൂർത്തിയായിട്ടും ആസാധാരണയായി ഒന്നര മാസം കഴിഞ്ഞാണ് ഉത്തരസൂചിക പുറത്തുവന്നത്. പിന്നീടാണ് മൂന്ന് വിഷയങ്ങളിലെ പരീക്ഷകൾ വീണ്ടും നടത്തുന്നതായി പരീക്ഷാ നടത്തിപ്പ് ചുമതലയുള്ള NTA ഉത്തരവിറക്കിയത്. ഇത് പരീക്ഷയെഴുതിയ വിദ്യാർത്ഥികളുടെ തുടർപഠനത്തെയും അക്കാദമിക അവസരങ്ങളെയും അനിശ്ചിതത്വത്തിലാക്കുന്നതാണ്. ചോദ്യപ്പേപ്പർ ചോർച്ചയും മറ്റു പിഴവുകളുമായി മുൻപും UGC-NET വിദ്യാർഥികൾക്ക് കരിനിഴൽ ആയിട്ടുണ്ട്.
ഒരു ദേശീയതല പരീക്ഷയുടെ കൃത്യത ഉറപ്പാക്കേണ്ടത് കേന്ദ്ര വിദ്യാഭ്യാസ മന്ത്രാലയത്തിന്റെ ഉത്തരവാദിത്തമാണ്. ചോദ്യപ്പേപ്പറുകളിലെ തകരാറുകൾക്ക് വിദ്യാർഥികൾ ഇരയാവുന്ന സാഹചര്യം ഇനിയും ആവർത്തിക്കരുതെന്ന് എസ് എസ് എഫ് കേരള കാമ്പസ് സിൻഡിക്കേറ്റ് ആവശ്യപ്പെട്ടു.
Campus Syndicate
© SSF KERALAM
