27/04/2026
*भोंदू बागेश्वर बाबावर गुन्हा दाखल करा*
_*अखिल भारतीय मराठा महासंघाची तक्रार*_
अकोला दि. 27: भोंदू बकवासी बागेश्वरी यांनी कुठलाही शास्त्री आधार अथवा ऐतिहासिक पुरावा नसताना छत्रपती श्री शिवाजी महाराजांबद्दल बेताल वक्तव्य केल्या प्रकरणी त्याच्यावर गुन्हा दाखल करण्यात यावा अशी मागणी अखिल भारतीय मराठा महासंघाचे वतीने आज करण्यात आली.
छत्रपती शिवाजी महाराज, समर्थ रामदास स्वामी तसेच महाराष्ट्राच्या इतिहासाबाबत भ्रामक व विकृत माहिती प्रसारित करून भोंदू बागेश्वर बाबा समाजात तेढ निर्माण करण्याचा प्रयत्न करीत असल्याची तक्रार सिव्हिल लाईन पोलीस स्टेशनच्या ठाणेदार श्रीमती मालतीताई कायटे यांना एका निवेदनाद्वारे करण्यात आली.
तक्रारदारांनी दिलेल्या निवेदनानुसार, ऐतिहासिक तथ्यांचे जाणीवपूर्वक विपर्यास करण्यात आला असून त्यामुळे विविध समाजघटकांच्या भावना दुखावल्या जात आहेत. छत्रपती शिवाजी महाराज हे महाराष्ट्राचे आराध्य दैवत असल्याने त्यांच्या संदर्भात असत्य किंवा भडकाऊ विधान केल्यास सार्वजनिक शांततेला धोका निर्माण होऊ शकतो, असेही तक्रारीत नमूद करण्यात आले आहे.
माननीय मुंबई उच्च न्यायालय, औरंगाबाद खंडपीठ यांनीही ऐतिहासिक विषयांवर जबाबदारीने व तथ्याधारित मांडणी करण्याची आवश्यकता अधोरेखित केली असल्याचा उल्लेख तक्रारीत करण्यात आला आहे. अशा परिस्थितीत भ्रामक माहिती प्रसारित करणे ही गंभीर बाब असल्याचे तक्रारदारांनी म्हटले आहे.
सदर प्रकरणी भारतीय न्याय संहिता, २०२३ मधील कलम १९५, २९९, ३५३, ३५६ तसेच माहिती तंत्रज्ञान अधिनियम, २००० मधील कलम ६६ व ६७ अंतर्गत कारवाई करण्याची मागणी करण्यात आली आहे.
तक्रारदार विनायकराव पवार, संजय सूर्यवंशी, राजेश पाटील, योगेश थोरात, गजानन खराडे, अरुण खोटरे,राजेश देशमुख, श्रीकांत सरोदे, पंकज जायले, कल्पनाताई बिडवे, सिंधुताई पवार यांनी पोलिसांकडे समाजात तेढ निर्माण होऊ नये व शांतता राखण्यासाठी आवश्यक प्रतिबंधात्मक उपाययोजना करून दोषींवर कडक कारवाई करण्याची मागणीही करण्यात आली आहे.
निवेदनावर प्रमुख पदाधिकाऱ्यांसह राखीताई पटेकर, मिनाताई लांडे, रश्मीताई पटेकर, काशिनाथ पटेकर, प्रदीप लुगडे, प्रवीण शिंदे,प्रफुल देशमुख, संतोष वक्ते, प्रशांत माळी, आदींच्या स्वाक्षऱ्या आहेत असे प्रसिद्धी दिलेल्या पत्रकात सोशल मीडिया जिल्हा प्रमुख सचिन पाटील गोमासे यांनी कळविले आहे.
