09/03/2025
ഇന്നലത്തെ നോമ്പു തുറ പീസ് വാലിയിലെ അന്തേവാസികളോടൊപ്പം.
പാലക്കാട് പത്തിരിപ്പാല മൗണ്ട് സീന ഇംഗ്ലീഷ് സ്കൂൾ അലുംനി അസോസിയേഷൻ 'സീനാൾജിയ' അംഗങ്ങളാണ് പീസ് വാലിയിലെ അന്തേവാസികളോടൊപ്പം ഒരു ദിവസത്തെ നോമ്പു തുറയിൽ പങ്കെടുക്കാനെത്തിയത്.
സീനാൾജിയ രൂപീകരിക്കുന്നതിനും അതിനു ശേഷം നാളിതുവരെയുള്ള അതിന്റെ പ്രവർത്തനങ്ങൾക്കും എല്ലാ പിന്തുണയും മാർഗ്ഗനിർദ്ദേശവും കുട്ടികൾ ആവശ്യപ്പെടാറുണ്ട്.
അവരുടെ ഓരോ ചുവടുകളും ആത്മ സംതൃപ്തിയോടെയാണ് എപ്പോഴും വീക്ഷിക്കാറുള്ളത്..
കഴിഞ്ഞ ഏഴു വർഷത്തോളമായി
ജീവകാരുണ്യ പ്രവർത്തനങ്ങൾ, സ്കോളർഷിപ്പുകൾ, സാമ്പത്തിക സഹായങ്ങൾ, വീടു നിർമ്മാണം അങ്ങനെ മാതൃകാപരമായ ഒട്ടനവധി പ്രവർത്തനങ്ങൾ സീനാൾജിയ നടത്തി വരുന്നു.
കഴിഞ്ഞ വർഷവും സീനാൾജിയ പീസ് വാലിയിൽ ഇഫ്താർ സംഘടിപ്പിച്ചിരുന്നു.
പീസ് വാലി ചെയർമാൻ അബൂബക്കറിന്റെ രണ്ടു മക്കൾ നിഹാലും ഹബീബും ഇംഗ്ലീഷ് സ്കൂളിലെ വിദ്യാർത്ഥികളായിരുന്നു എന്നതും അഭിമാനകരം..
നിഹാലിനെ കൂടാതെ പ്രസിഡന്റ് അൻസിൽ, ബിസിനസ് രംഗത്തെ പുലികളായ ഹിസാൻ ബുഹാരി, അഖിൽ റാസ, മാൽദീവ്സിൽ നിന്നും അവധിക്കെത്തിയ അജ്മൽ. P. ഇബ്രാഹിം, Dr. തൗഫീഖ്, റാനിയ റജീബ്.. എല്ലാവരും മൗണ്ട് സീന ഇംഗ്ലീഷ് സ്കൂളിന്റെ സംഭാവനകൾ അയവിറക്കുകയായിരുന്നു ഇന്നലത്തെ സായാഹ്നത്തിൽ..
മൗണ്ട് സീന ഇംഗ്ലീഷ് സ്കൂളിന്റെ അലങ്കാരവും അനുഗ്രഹവുമാണ് സീനാൾജിയ.
സ്ഥാപനത്തോട് അത്രയേറെ ആത്മാർഥതയും കൂറും കടപ്പാടും പുലർത്തുന്ന ഒരു ടീമിനെയാണ് ഇന്നലെ അവിടെ കണ്ടത്.
ഓരോ ഒത്തു കൂടലിലും കുട്ടികളോടൊപ്പം അവരുടെ അധ്യാപകരും ഉണ്ടാകണം എന്നവർ ആഗ്രഹിക്കുന്നു.
അതനുസരിച്ചാണ് ഞാനും ഹോസ്റ്റൽ വാർഡൻ ആയിരുന്ന ഹുസൈൻ സാറും ആ സംഘത്തിൽ എത്തിച്ചേർന്നത്. വല്ലാത്തൊരു അനുഭൂതിയാണ് ഇന്നലത്തെ സംഗമം പകർന്നു നൽകിയത്.
നമ്മുടെ മുന്നിലൂടെ കടന്നു പോയ ശിഷ്യർ ബിസിനസ്, ആതുര സേവനം, പ്രവാസം.. തുടങ്ങി വിവിധ മേഖലകളിലും പ്രദേശങ്ങളിലും തൊഴിൽ ചെയ്യുമ്പോഴും കാരുണ്യത്തിന്റെയും സഹജീവി സ്നേഹത്തിന്റെയും തണലിൽ ഒത്തു കൂടാൻ കാണിക്കുന്ന ആ മനസ്സ് തന്നെയാണ് ഏറ്റവും വലിയ ശിഷ്യ സമ്പത്ത്..
നോമ്പു കാലത്തിന്റെ ബുദ്ധിമുട്ടുകൾ കാര്യമാക്കാതെ നീണ്ട ദൂരം യാത്ര ചെയ്ത് അവരെത്തിയത് പീസ് വാലി സംരക്ഷണം നൽകിയ കുറെ മനുഷ്യാത്മാക്കളുടെ കൂടെ നോമ്പു തുറന്നു സംതൃപ്തി നേടാനായിരുന്നു.
പ്രിയ കുട്ടികളെ..
ലഹരിക്കു പിന്നാലെ പായുന്ന പുതിയ കാലത്തെ കുട്ടികളെക്കുറിച്ച് എല്ലാവരും പരിതപിക്കുമ്പോൾ നിങ്ങളെയോർത്ത് ഞങ്ങൾ അഭിമാനിക്കുന്നു..
ജനസേവനവും കാരുണ്യ പ്രവർത്തികളുമാണല്ലോ നിങ്ങൾക്ക് ലഹരി..?
ആ ലഹരിയാണല്ലോ ഇന്നലെ നിങ്ങളെ ആ സമാധാനത്തിന്റെ താഴ് വരയിലെത്തിച്ചത്..
നാട്ടിലെ വിഭവ സമൃദ്ധമായ ഇഫ്താറുകൾ ഒഴിവാക്കി ഈ കാരുണ്യത്തിന്റെ ഭവനത്തിൽ ഒത്തു കൂടാൻ നിങ്ങൾ കാണിച്ച മനസ്സിനെ അഭിനന്ദിക്കുന്നു..
ഇതാണ് മക്കളെ യഥാർത്ഥ ലഹരി..
ഇതാകണം ലഹരി..
ജീവിതത്തിൽ ഒറ്റപ്പെട്ടും, കഷ്ടപ്പെട്ടും അവശരായവരെ ചേർത്തുപിടിക്കുമ്പോൾ കിട്ടുന്ന സംതൃപ്തി മറ്റൊരു ലഹരിക്കും നൽകാനാവില്ല എന്ന് മനസ്സിലാക്കിയ നിങ്ങൾക്ക് ഒരു ബിഗ് സല്യൂട്ട്..
ഈ ഒത്തു ചേരലിന്റെ ഊഷ്മളത അനുഭവിച്ചു മതിയാകാത്തതിനാലാകണം യാത്ര പറയുമ്പോൾ ഹുസൈൻ സാർ ഒരു നിർദ്ദേശം വെച്ചു :
" ഇനി നമുക്കൊരു ദിവസം മൗണ്ട് സീനയിൽ നോമ്പു തുറന്നാലോ?
മൗണ്ട് സീന എന്ന് കേൾക്കേണ്ട താമസം അവരൊന്നടങ്കം പറഞ്ഞു :
" ഞങ്ങൾ റെഡി "
അതങ്ങനെയാണ്..
മൗണ്ട് സീന ഒരു വികാരമാണ്..
അവിടെ പഠിച്ചവർക്കും.. പഠിപ്പിച്ചവർക്കും..
വിശേഷിച്ചും മൗണ്ട് സീന ഇംഗ്ലീഷ് സ്കൂൾ..
അവിടെ കുട്ടികളും അധ്യാപകരും സ്നേഹം കൊണ്ടും ആത്മാർഥത കൊണ്ടും പരസ്പരം ഇഴ ചേർക്കപ്പെട്ട മനസ്സുകളായിരുന്നു..
ശാസിച്ചവരെയും ശിക്ഷിച്ചവരെയും കൂടെ കൊണ്ടു നടക്കാൻ വർഷങ്ങൾക്കിപ്പുറവും ആ മക്കൾ ഇഷ്ടപ്പെടുന്നുവെങ്കിൽ അതാണല്ലോ യഥാർത്ഥ ഗുരു ശിഷ്യ ബന്ധം?
അതാണ് മൗണ്ട് സീന ഇംഗ്ലീഷ് സ്കൂളിന്റെ ശക്തിയും ഊർജ്ജവും..
സീനാൾജിയ..
അതു തന്നെയാണ് ആ സ്ഥാപനത്തിന്റെ അലങ്കാരവും.. ആവേശവും..
" ടീച്ചറെ.. ഈ റമളാനിൽ ടീച്ചർ പ്രാർത്ഥിക്കുമ്പോൾ അര മണിക്കൂർ എനിക്കു വേണ്ടി മാത്രം പ്രാർത്ഥിക്കണം" എന്നു പറഞ്ഞു കൊണ്ട് യാത്ര ചോദിച്ച അജ്മലിന്റെ വാക്കുകൾ കണ്ണും മനസ്സും നിറച്ചു..
ഇവരുടെയൊക്കെ മനസ്സിൽ ഇങ്ങനെ ഒരിടം കിട്ടുക എന്നതിനേക്കാൾ വലിയ മറ്റെന്തു സമ്പാദ്യമാണ് ഈ അധ്യാപക ജീവിതത്തിൽ ബാക്കിയുള്ളത് എന്ന് ഒരു നിമിഷം ചിന്തിച്ചു പോയി..
നന്ദി..
ആത്മ നിർവൃതിയുടെ ഒരു സായാഹ്നം സമ്മാനിച്ചതിന്..
മുന്നോട്ടുള്ള പ്രയാണത്തിൽ എന്നും നിങ്ങളോടൊപ്പമുണ്ട്..
ദൈവം അനുഗ്രഹിക്കട്ടെ..
റസിയ ചാലക്കൽ.
