01/12/2025
Assalamu aliekum
Aaj 1/12/2025
Syed Feroz Ali, Co-convenor JAC - Nizamabad
Mai Aaj Nizamabad ki muqaddas Eidgha ki zameen se,jo ke hamare liye izzat aur deen ki ek bahut badi nishani hai—tamaam Ummat-e-Mohammadia ke liye ek appeal lekar ayaa hoon.
Bhaiyo, buzurgon aur zimmedar saathiyo!
Aaj ka yeh paighaam sirf ek guzarish nahi—ek tarikh saaz zimmedari hai.
Mere paas AIMPLB ke President aur JAC–Nizamabad ke Convenor ka woh ahem letter hai, jisme poori Ummat-e-Mohammadia se darkhwast ki gayi hai ki apne tamaam Islamic idare, auqaf, masajid, maktab, madaris, qabristan, dargah ko Umeed Portal par zarur se zarur register karwayein.
Bhaiyo, 5 December akhri tareekh hai.
Aur aaj hum sab pe yeh farz hai… yeh zimmedari hai… ke ane wali nasal ko ek mehfooz aur qanooni taur par registered virasath de kar jayein.
Aaj ek faisla lena hoga.
Apne sawalaat, apni personal soch aur apni aapas ki fehmi ko kuch der ke liye side me rakhiye…
Aur AIMPLB ke President ke is appeal par sab milkar “Labbaik” kahiye.
Bhaiyo,
Umeed Portal par register na karwana—yeh hamari sabse badi ghalti hogi.
Agar hum aaj ye zimmedari nahi nibha paye,
To kal ane wali nasal ko hum jawaab nahi de payenge…
Aur woh hum se poochegi:
"Aapne humare haqooq ki hifazat ke liye kya kiya tha?"
Magar Alhamdulillah!
Bahut saare zimmedar saathi, volunteers, committee members, JAC ke brothers din-raat apni khidmat de rahe hain.
Hum unki lagan, unki mehnat aur unki niyat ko salaam karte hain.
Main tamaam bhaiyo se,
District, Mandal aur Village levels ke zimmedar committee members se guzarish karta hoon:
Aap bhi is farz ko samjhiye.
Apni community, apni masjid, apne waqf idare, apni heritage ki hifazat ke liye apna hissa zaroor dijiye.
Logon ki madad kijiye, unko guide kijiye, unka registration poora kijiye.
Yeh kaam sirf duniya ke liye nahi…
Yeh sadqa-e-jariya hai.
Aaj hum madad karenge,
Kal yeh amal Qabr me roshni ban kar aayega, InshaAllah.
Shukriya
Allah Hafiz
Jai Hind
