06/03/2026
ग्रामपीठ शिक्षणालय - समुदायासाठी खुले शिक्षणाचे दालन
शिरसगाव, ता. त्र्यंबकेश्वर येथे गावातील युवांच्या पुढाकाराने ‘ग्रामपीठ शिक्षणालय’ (समुदाय शिक्षण केंद्र - CLC) सुरू करण्यात आले. हे केंद्र केवळ युवकांसाठी नसून लहान मुले, तरुण, मुली-महिला आणि सर्व वयोगटातील गावकऱ्यांसाठी शिकण्याचे खुले दालन ठरणार आहे.
या केंद्रामध्ये वेगवेगळ्या विषयांवरील पुस्तके, तसेच कॉम्प्युटर, प्रिंटर उपलब्ध करून देण्यात आली आहे. त्यामुळे वाचन, स्व-अध्ययन, करिअर मार्गदर्शन, संवाद, कौशल्यविकास आणि माहिती मिळवण्यासाठी गावकऱ्यांना एक प्रेरणादायी शिकण्याची जागा (Learning Space) निर्माण झाली आहे.
हे केंद्र प्रौढ शिक्षण (Adult Learning), अनौपचारिक शिक्षण (Non-formal Education) आणि स्वयंप्रेरित शिक्षण (Self-directed Learning) या संकल्पनांवर आधारित आहे. संवाद, अनुभवांची देवाण-घेवाण आणि सामूहिक शिकण्याच्या प्रक्रियेतून जीवनकौशल्ये (Life Skills) विकसित करण्याचा प्रयत्न येथे केला जाणार आहे.
शिक्षण हे केवळ पुस्तकांपुरते मर्यादित नसून संवाद आणि अनुभवातून घडते, या विचारातून प्रेरित होऊन पेडॅगॉजी आणि पाउलो फ्रेरे यांच्या सहभागात्मक शिक्षणाच्या दृष्टिकोनातून गावात आजीवन शिक्षणाची (Lifelong Learning) संस्कृती रुजवण्याचा प्रयत्न या माध्यमातून केला जाणार आहे.
उद्घाटन प्रसंगी जि. प. शाळेच्या मुख्याध्यापिका, सरपंच, ग्रामपंचायत सदस्य तसेच अभिव्यक्ती संस्थेचे अध्यक्ष, विश्वस्त, कार्यकर्ते आणि ग्रामस्थ उपस्थित होते.
शिक्षण, संवाद आणि सामूहिक शिकण्याची नवी सुरुवात…
#ग्रामपीठशिक्षणालय
