Ashadeep Sanstha

30/03/2026

आशादीपच्या दिव्यांग कलाकारांना दक्षिण मध्य क्षेत्र सांस्कृतिक केंद्राचे व्यासपीठ पहिल्यांदाच मिळणार आहे. तरी या कलाकारांचे कौतुक करण्यासाठी 31 मार्च 2026 ला संध्याकाळी सर्वांनी अवश्य यावे.

24/03/2026

*आशादीपचा महिला दिन कार्यक्रम*
दिनांक १८ मार्च, २०२६

आशादीप- अपंग, महिला-बाल विकास संस्थेतर्फे महिला दिन विशेष कार्यक्रम १८ मार्चला साजरा झाला. दीपप्रज्वलनानंतर ईश्वरी पांडे हिच्या सरस्वती स्तवनाने कार्यक्रमाची सुरूवात झाली.

डॅा. वृंदा जोगळेकर यांनी कार्यक्रमाच्या संचलनाच्या सुरवातीला एका रंजक गोष्टीद्वारे सांगितले की स्वतः स्वतःची जवाबदारी घेणे ही फार मोठी उपलब्धी आहे. सध्याच्या मुली स्वतंत्र विचार करत स्वतःची लढाई लढत लक्ष्य साध्य करत आहेत. महिला दिवस हा महिलांचे सशक्तीकरण, त्यांचे हक्क व स्त्री-पुरुष समानता याविषयी जागरूकता निर्माण करण्यासाठी आणि तसेच महिलांचे यश, त्यांचा संघर्ष आणि समाजातील त्यांच्या योगदानाचा सन्मान करण्यासाठी समर्पित आहे.

स्वागत समारंभानंतर, प्रास्ताविकात डॅा. प्रतिमा शास्त्री यांनी उपस्थितांचे स्वागत करत सांगितले की महिलांचे क्षितीज व कार्य वाढत आहे. दिव्यांग महिलांमध्येही परिस्थिती बदलत आहे. यापूर्वी महिला दिनी श्रीमती नंदिता त्रिपाठी, श्रीमती मंगला समर्थ यांना संस्थेतर्फे सन्मानित केले गेले होते हे सांगितले. संस्थेच्या कार्याची संक्षिप्त माहिती त्यांनी दिली.

'आशादीप'तर्फे यंदाच्या महिला दिन कार्यक्रमाचे औचित्य साधून दृष्टिबाधित कु. माला शंकरबाबा पापळकर, सहाय्यक महसूल अधिकारी, नागपूर यांना कै. गौरी शिरखेडकर स्मृती पुरस्कार आणि आशादीप संस्थेतर्फे शेला, मानपत्र व स्मृती चिन्ह प्रदान करण्यात आले. हा पुरस्कार प्रमुख अतिथी सौ. सुवर्णा पांडे, सी. पी. टी. पी. संचालक, वनामती, नागपूर यांच्या हस्ते प्रदान करण्यात आला. त्याआधी सत्कारमूर्ती कु. माला पापळकर यांना अर्पण करण्यात येणाऱ्या मानपत्राचे वाचन सौ. अपर्णा कुळकर्णी यांनी केले.
कु. माला पापळकरांनी या पुरस्कारानंतर आशादीपने केलेल्या या सन्मानाने त्यांना व शंकरबाबा पापळकरांना खूप आनंद झाला आहे हे सांगितले.
याप्रसंगी बोलतांना प्रमुख अतिथी श्रीमती सुवर्णा पांडे यांनी दृष्टीबाधित माला विपरीत परिस्थितीत तिच्या ध्येयापर्यंत पोचली व तिने महाराष्ट्र लोकसेवा आयोगाची परीक्षा पहिल्या प्रयत्नात उत्तीर्ण केली याचे कौतुक केले. महिला दिनी योग्य व्यक्तीचा सन्मान होत आहे याबद्दल आनंद व्यक्त केला. आशादीप बरोबर लेखनिकाच्या माध्यमातून त्यांच्या कार्यालयाचे संबंध आधीच जुळले आहेत असं सांगून त्यांनी आशादीप संस्थेच्या कार्याचे कौतुक केले.
‘आशादीप' संस्थेकडून ईश्वरी पांडेला तिच्या पुढच्या आव्हानात्मक जलतरण कामगिरीसाठी शुभेच्छा व सहाय्य म्हणून डॉ. प्रतिमा शास्त्री यांच्या हस्ते २०,००० रूपये देण्यात आले.

यानंतर आशादीपतर्फे कु. माला पापळकरांची मुलाखत सौ. अपर्णा कुळकर्णी यांनी घेतली. या मुलाखतीत माला यांनी शंकरबाबा पापळकरांनी त्यांना आपल्या नावाची ओळख देत पालकत्व स्वीकारून, अतिशय प्रेमाने लहानाची मोठी केले याबद्दल त्यांचा खूप आदर व अभिमान आहे हे सांगितलं. मालाच्या आयुष्यातील सर्वात आनंदाचा क्षण म्हणजे श्री. शंकरबाबा पापळकरांना ज्या दिवशी पद्मश्रीचा मान मिळाला त्याच दिवशी मालाचा MPSC पास झाल्याचा निकाल कळला हा होय. मालाने त्यांचे MPSC कोचिंग सेंटरचे शिक्षक श्री. अमोल पाटील यांनाही धन्यवाद दिले. क्लास बरोबरच ब्रेलमधील पुस्तके, अभ्यासक्रमावर आधारित you tube audio वाचत अभ्यास पूर्ण केला हे मालाने सांगितले. या हुद्यावर पद ग्रहण करतांना त्यांना आनंद खूप होता पण मनात थोडं दडपण होतं की आपल्याला जबाबदारीने काम करून बाबांचं नाव पुढं आणायचं आहे. तसेच सध्याच्या कार्यालयात सहकारी अतिशय छान सहाय्य करतात हे मालाने सांगितले.

मालाने पुढे सांगितले की २०१६ मध्ये IAS पास केलेल्या पहिल्या दृष्टीबाधित प्रांजल पाटीलची मुलाखत ऐकल्यापासून प्रेरणा घेऊन केंद्रीय लोकसेवा आयोगाची परीक्षा पास करायची तयारी त्या करत आहेत.
श्री. शंकरबाबा पापळकरांसाठी व त्यांच्या आश्रमासाठी त्यांच्याकडून जे जमेल ते त्या करणार आहेत. मालाला ईश्वरी पांडे व पल्लवी धमगाये या दृष्टीबाधित मुलींनी देखील प्रश्न विचारले व मालाने त्यांची योग्य उत्तरे दिली. मुलाखतीच्या शेवटी जिद्द ठेवून, धीर न सोडता प्रयत्न केले तर स्पप्नं पूर्ण होतात. तसेच विविध परीक्षा देत राहा असा संदेश प्रेक्षकांतील दृष्टिबाधित व्यक्तींना माला पापळकरांनी दिला.

या मुलाखतीनंतर अध्यक्ष श्री. लालासाहेब पाटील यांनी अध्यक्षीय भाषण दिले. ते म्हणाले की दिव्यांग काय करू शकतात हे पाहून डोळसही थक्क होतात. अशा कार्यक्रमातून दृष्टिबाधितांना प्रेरणा मिळते असेही सांगितले.
सक्षम संस्थेच्या श्री. शिरिषजी दारव्हेकरांनी माला पापळकरांना 'लोकमान्य टिळक’ व ‘अहिल्याबाई होळकर’ या दोन पुस्तकांच्या ब्रेललिपी मधील प्रति भेट दिल्या. कार्यक्रमाच्या शेवटी श्री. शंकरबाबांच्या वझ्झर येथील आश्रमातील दृष्टीबाधित गांधारी पापळकर ने पसायदान सादर केले.

या कार्यक्रमाला पुरस्काराचे प्रायोजक श्री. विवेक शिरखेडकर आणि परिवार, मालाची सहकारी सौ. देशपांडे, रा. तु. म. नागपूर विद्यापीठातील मराठीचे प्रोफेसर डॉ. प्रदीप गावंडे, विद्यापीठ सिनेट सदस्य डॅा. मनमोहन बाजपेयी, शंकरबाबांच्या वझ्झर येथील आश्रमातून आलेल्या मालाच्या मैत्रिणी, पापळकर बाबांच्या मतिमंद मुलांच्या शाळेचे मुख्याध्यापक - श्री. अनिल पिहुरकर, सौ. प्रमिला लघाटे या बालगृहाच्या प्रभारी अधिक्षिका आणि ‘जिव्हाळा’ व इतर समाजसेवी संस्थांमधून काम करणारे श्री. अविनाश संगवई व त्यांचे बंधू, आशादीप सदस्य, कार्यकारिणी सदस्य, आशादीप स्नेही मंडळातील दृष्टिबाधित सदस्य अशी बऱ्याच जणांची उपस्थिती होती.

कार्यक्रमाचे संचालन डॅा. वृंदा जोगळेकर, प्रमुख अतिथींचा परिचय गीता तारे व आभार प्रदर्शन सुप्रिया केकतपुरे यांनी केले.

17/03/2026

*आशादीपतर्फे बिंझाणी महाविद्यालयात ‘साथी हाथ बढाना’*
दिनांक १६ मार्च २०२६

आशादीप- अपंग, महिला-बाल विकास संस्थेतर्फे श्री. बिंझाणी सिटी महाविद्यालयात ‘साथी हाथ बढाना’ कार्यक्रम घेण्यात आला. प्रास्ताविकात 'आशादीप'च्या डॅा. वृंदा जोगळेकर यांनी ‘लक्ष्य’ सिनेमातील 'कंधों से मिलते हैं कंधे क़दमों से कदम मिलते हैं...' या प्रसिद्ध गाण्याचा उल्लेख करत, लढाईच्या वेळी जशी एकमेकांच्या खांद्याला खांदा भिडवून चालण्याची गरज असते अगदी तसेच कोणत्याही कठीण परिस्थितीचा सामना करताना सोबत चालत लवकर प्रगती करता येते असे सांगितले. दृष्टीबाधित व्यक्तींना सर्वसामान्य नागरिकांसारखे जीवन जगता यावे यासाठी समावेशकता व त्यांच्या आत्मनिर्भरतेसाठी समाजाच्या साथीची गरज असते हे सांगितले. आशादीपच्या कार्याबद्दल थोडक्यात माहिती देत त्यांनी दृष्टिबाधितांना येणाऱ्या समस्या व युवक त्यांना कशा प्रकारे मदत करू शकतात याविषयी जागरूकता निर्माण करणे हे ‘साथी हाथ बढाना’ कार्यक्रमाचं प्रयोजन आहे हे स्पष्ट केलं.
त्यानंतर दृष्टीबाधित व्यक्तीच्या जीवनात लेखनिकाची गरज विषद करणारा व्हिडिओ दाखविण्यात आला.
संस्थेच्या सचिव अपर्णा कुळकर्णी यांनी महाविद्यालयीन विद्यार्थ्यांना लेखनिक आणि साथी होण्याचे आवाहन केले. आशादीप संस्थेच्या स्नेहीमंडळ सदस्यांपैकी जे साथी हाथ बढाना या कार्यक्रमाद्वारे आपल्या कार्यक्षमता, यश सांगून दिव्यांग जागृती करण्यास आले होते त्यांची उपस्थितांना सुयोग्य ओळख करून दिली. प्रत्येक सदस्याची यशोगाथा संघर्ष कसा प्रेरक आहे हे ठसवून विद्यार्थ्यांनी त्यातून कशी प्रेरणा घ्यावी. नैराश्य कसे टाळावे आणि साथी हाथ बढाना कार्यक्रमाचे उद्दिष्ट पूर्ण करण्यासाठी काय काय करावे हे सांगितले.
उशिराने अंधत्वाला सामोरे जावे लागलेल्या *भारती यादवने* परिस्थितीशी संघर्ष करत चक्क LLM पर्यंतचे उच्च शिक्षणाचे ध्येय कसे साध्य केले ते प्रभावीपणे सांगत आमच्या कागदावरच्या निळ्या शाईतील अक्षरे तुम्ही व्हा असे आवाहन कवितेतून केले.
सौरभ बोरेकरने अचानक अंधत्व आल्यावर मानसिक संतुलन सांभाळताना मदतीचा हात हवा असतो हे सांगून त्याला दृष्टिबाधित्व आल्यावर शिक्षण घेतांना आशादीपकडून प्रोत्साहन, लेखनिक मिळणं व 'दिव्यगुंजन' आर्केस्ट्रा यासाठी वेळोवेळी मदतीचा हात मिळाला हे मुख्यत्वे सांगितले.
दहावीच्या परीक्षेत दृष्टीहीन असूनही अव्वल ठरलेल्या ईश्वरीने तिच्या जलतरणातील विक्रमांबद्दल माहिती दिली व तिच्या पुढील जागतिक लक्षाबद्दल उल्लेख केला.
सुरेखा बाईस्कारने दृष्टीबाधित असतांनाही सतत शिकत राहणारी गृहिणी साकारली. आत्मनिर्भरता दाखवणाऱ्या अजय लिंगलवारने दिघोरी ते विमानतळ हे अंतर तो सफेद केनच्या आधाराने पायी जातो. हातात सफेद केन असणाऱ्या दृष्टिबाधितांना डोळस व्यक्ती रस्ता ओलांडतांना मदत करणे, आपल्या वाहनावर बसवून जमेल ते अंतर पोचवून मदत करणे अशी साथ देऊ शकतात हे सांगितले.

दानिश शेखने बुध्दिबळ व क्रिकेट दृष्टीबाधित खेळाडू कसे खेळू शकतो याचे प्रात्यक्षिक दिले. व्हाईट केन ब्रदर या त्याच्या उद्योगाबद्दल माहिती देऊन त्याने व्हिडीओद्वारे दाखवले की स्वच्छतेसाठी लागणारी उत्पादने इथे तयार केली जातात. यानंतर सौरभ, सुरेखा व ईश्वरी यांच्या समुहगायनाने कार्यक्रम रंगतदार झाला.

कार्यक्रमाच्या शेवटी डॅा. ज्योती शिवलकर यांनी ‘साथी हाथ बढाना’या कार्यक्रमाचा सारांश करणारी एक कविता सादर केली. त्या म्हणाल्या की हेलन केलर सारख्या प्रसिद्ध व्यक्तींनी सिध्द केलंय की दृष्टीहीनता हा प्रगतीतला अडथळा नाही. आशादीपच्या या चमूनेही तेच सिद्ध केलंय.
लेखनिक होण्यासाठी प्रेक्षकांतील मुलांना आवाहन करत त्यांनी आयोजकांना धन्यवाद दिले.

यानंतर प्राचार्य डॉ. सुजीत मेत्रे यांनी आशादीपचा हा कार्यक्रम सामाजिक प्रतिनिधित्व करणारा व समाजाला जाणीव करून देणारा आहे असे सांगितले. कम्युनिटी एंगेजमेंट म्हणून आपण या कार्यक्रमाला पुढे घेऊन जाऊ अशी प्रतिक्रिया देत त्यांनी आशादीपच्या चमूचे आभार मानले.
कार्यक्रमाला आशादीपतर्फे अपर्णा कुळकर्णी, डॅा. वृंदा जोगळेकर, सुप्रिया केकतपुरे, डॅां. ज्योती शिवलकर व शैलजा काळे उपस्थित होत्या.

14/03/2026

एका दृष्टीबाधित अनाथ मुलीची यशोगाथा जाणून घेत तिचे अभिनंदन करायला सर्वांनी अवश्य उपस्थित रहावे.

03/03/2026

*आशादीपतर्फे दृष्टीबाधित आणि डोळस यांच्यातील बुद्धीबळ स्पर्धा- उत्साहात संपन्न*
२८ फेब्रुवारी २०२६

आशादीप- अपंग, महिला-बाल विकास संस्था, चेस असोसिएशन, नागपूर आणि फ्रीमेसन्स यांचेतर्फे आयोजित ही वैशिष्ट्यपूर्ण बुद्धिबळ स्पर्धा सलग तिसऱ्या वर्षी विदर्भ संशोधन मंडळाच्या वा. वी. मिराशी सभागृहात आयोजित करण्यात आली.
उद्घाटन समारंभाच्या प्रास्ताविकात बोलतांना डॅा. ज्योती शिवलकर यांनी सांगितले की ही स्पर्धा क्रिडामाध्यमातून समावेशकता व संवेदनशीलतेचा अनोखा संदेश देणारी आहे. अंधांमध्ये आत्मविश्वास व क्रीडाभावना वृध्दींगत करणे हे या स्पर्धेमागचे आशादीपचे ध्येय आहे हे सांगून त्यांनी आशादीप च्या बाकी कार्याबद्दल थोडक्यात माहिती दिली.
उद्घाटन समारंभाचे प्रमुख अतिथी श्री. सदानंद हजारे यांनी ‘बुद्धिबळ’ हा खेळ स्मरणशक्ती व निर्णय क्षमतेसाठी उत्तम आहे असे सांगत ‘छोटीसी बात’ सिनेमातील अमोल पालेकरचा आत्मविश्वास त्याचा मार्गदर्शक अशोककुमार बुध्दीबळ या खेळातून कसा वाढवतो ते स्पष्ट केले. त्यांनी जेष्ठांसाठी बुद्धिबळ शिक्षण सुरू करण्याची विनंती नागपूरच्या चेस असोसिएशनला केली व सर्व खेळाडूंना शुभेच्छा दिल्या.
आशादीपच्या अध्यक्षा डॅा. प्रतिमा शास्त्री यांनी आपल्या उद्बोधनात दिव्यांगांचा समाजात स्वीकार आणि समावेश होऊन सुसंवाद निर्माण व्हावा यासाठी आशादीपने ‘साथी हाथ बढाना’ कार्यक्रम विविध महाविद्यालयात सादर केल्याने त्यायोगे दृष्टीबाधितांसाठी लेखनिक मिळतात. डोळस आणि दृष्टीबाधित बुध्दीबळ स्पर्धेसाठी आवश्यक स्वयंसेवक यामुळे आज आले आहेत असे सांगितले. त्यांनी चेस असोसिएशन नागपूर व मेसॅानिक लॅाजचे विशेष आभार मानले.
चेस असोसिएशन नागपूर तर्फे श्री. सच्चिदानंद सोमण यांनी खेळातील ५ चमूंची (५० खेळाडूंची) घोषणा केली व खेळातील आपल्या आणि इतरांच्या चुकांचा अभ्यास आणि सातत्य हेच यशाचे गमक आहे असे सुचविले.
यानंतर ५ दृष्टीबाधित विरूध्द ५ डोळस चमूंमध्ये प्रत्येकी ५ बोर्ड मध्ये स्पर्धा सुरू झाली.
अतिशय उत्साही वातावरणात स्पर्धेचे पाच राउंड खेळण्यात आले, तसेच टीम मध्ये समावेश नसलेल्या दृष्टीबाधित खेळाडूंना देखील उपस्थित डोळस व्यक्तींबरोबर खेळण्याची संधी देण्यात आली.
समारोप प्रसंगी विशेष अतिथी सुजित शिंदे यांनी दृष्टीबाधित असूनही स्वतः बघितलेली स्वप्ने स्वतःच कशी पूर्ण करत उच्च शिक्षण पूर्ण करून वरचे पद मिळवले ते सांगितले. स्वप्न माऊंट एव्हरेस्टचं पाहिलं तर इतर शिखरे पार करता येतात हे सांगत त्यांनी UPSC चं स्वप्न पाहिलं तेव्हा रेल्वे व बॅंक च्या प्रोबेशनरी ॲाफिसरच्या परीक्षा पास करत MPSC परीक्षाही पास करता आली हे सांगितले. त्यांचे भाषण प्रत्येकासाठी अतिशय प्रेरणादायी होते.
याप्रसंगी मुख्य अतिथी डॅा. तेजिंदरसिंग रावल यांनी आपल्या मनोगतात निर्णय दृढ असेल तर लक्ष साधणं कठिण नाही हे सांगितले. याचबरोबर बुध्दीबळ खेळण्यामुळे संयम, जबाबदारीची जाणिव, आत्मविश्वास, धोरणात्मक नियोजन, स्मृतीभ्रंश, सामाजिक संवाद या सर्वात सुधारणा होते हे सांगितलं.
डॅा. प्रतिमा शास्त्री यांनी आपल्या मनोगतात स्पर्धेचा आढावा घेतांना सांगितले की यंदा १२ वर्षांपासून ८० वर्षांच्या खेळाडूंचा समावेश होता व स्पर्धेचा उत्साह व सहभाग वाढल्याने पाच टीम व पाच राऊंड घ्यावे लागले ही खूपच समाधानकारक गोष्ट आहे.
प्रमुख अतिथींच्या हस्ते पारितोषिके देण्यात आली. दोनही गटांमधून प्रथम व द्वितीय क्रमांकाच्या चमूना, तसेच अतिरिक्त खेळाडूंमधून प्रथम व द्वितीय क्रमांकाची खालील पारितोषिके देण्यात आली.
दृष्टीबाधित प्रथम - तीजन गावर गट
दृष्टीबाधित द्वितीय - मानवतकर गट
डोळस प्रथम -सदानंद महाजन गट
डोळस द्वितीय -दिलीप चेपटे गट
या शिवाय प्रत्येक बोर्ड वरील उत्कृष्ट डोळस खेळाडू पाचही महाजन ग्रुपचे व दृष्टीबाधित खेळाडू चार तीजन गावर व एक मानवतकर ग्रुपचे आहेत.
रेखा पारखी यांनी प्रायोजित केलेले स्पर्धेतील सर्वोत्कृष्ट दृष्टीबाधित महिला खेळाडू पारितोषिक सिम्रन गिरडकरला मिळाले. डॅा. प्रतिमा शास्त्री यांनी प्रायोजित केलेले सर्वांत लहान दृष्टीहिन खेळाडूचे पारितोषिक शिवम ठाकूरला देण्यात आले. याव्यतिरिक्त दृष्टीबाधित दोन कन्सोलेशन बक्षिसे महानंदा तळवेकर व राज करगोळे यांना देण्यात आले. विदर्भ चेस असोसिएशन चे पदाधिकारी सतचिदानंद सोमण , आरबीटर शिवा अय्यर, प्रयास अंबादे आणि अमित टेम्भूर्णे यांचाही सत्कार करण्यात आला.
यानंतर डोळस खेळाडूंपैकी सदानंद महाजन, व दृष्टीबाधित खेळाडूंपैकी राजेश व कमलेश यांनी खेळाबद्दल त्यांच्या प्रतिक्रिया देत आशादीपला अशा प्रकारच्या वेगळ्या खेळाबद्दल धन्यवाद दिले.
सर्व खेळाडूंना व स्वयंसेवकांना सर्टिफिकेट व बॅग्ज देण्यात आल्या.
कार्यक्रमाचे अध्यक्ष श्री. पाटील यांनी आशादीपच्या कार्यकर्त्यांचे कौतुक करत जिंकलेल्या खेळाडूंना शुभेच्छा दिल्या.
संपूर्ण दिवसाचा हा बुद्धिबळ स्पर्धेचा कार्यक्रम Lodge Independence No. 392, Lodge Vidarbha No. 470, Lodge Vivekananda No. 367 आणि Lodge of Promac Masons No. 473 यांनी प्रायोजित केला होता. श्री. अमलेश पुरोहित, श्री. मोहन बालानी, श्री. भूषण अलोणे, श्री. राजीव पारखी, श्री. जी. व्ही. देशपांडे व श्री. हरीश काळीकर हे मेसॅानिक लॅाज सदस्य उपस्थित होते व त्यांचा आशादीपतर्फे सत्कार करण्यात आला.
कार्यक्रमाचे संचालन डॉ. ज्योती शिवलकर तर अतिथींचा परीचय, श्रीमती छाया तारे व सौ. गीता तारे यांनी केला. दोन्ही सत्रातले आभार प्रदर्शन अपर्णा कुलकर्णी यांनी केले. कार्यक्रमाला विदर्भ संशोधन केंद्रांचे अध्यक्ष श्री. पराग पांढरीपांडे व त्यांचे इतर सदस्य, बिंझाणी सिटी महाविद्यालयाचे प्राचार्य डॅा. सुजित मेत्रे तसेच इंद्रंधनुच्या अध्यक्षा श्रीमती अलका लंके, सेक्रेटरी श्रीमती सीमा व्यास, आशादीप कार्यकारिणी सदस्य,
चार स्वयंसेवक आसादीपच्या लेखनिक गटातील व ६ स्वयंसेवक बिंझाणी सिटी महाविद्यालयाचे उपस्थित होते.

27/02/2026

उद्याच्या बुद्धिबळ स्पर्धेची वृत्तपत्रांनी घेतलेली दखल

26/02/2026

सर्वांनी या अभिनव उपक्रमास भेट देऊन दिव्यांगांच्या क्षमतांना प्रोत्साहित करावे

08/02/2026

लुई ब्रेल दिनानिमित्त आशादीप संस्थेचा नाविन्यपूर्ण उपक्रम*
( दिनांक २९ जानेवारी २०२६)
ब्रेल लिपीचे जनक लुई ब्रेल यांचा जन्मदिवस ४ जानेवारी हा जागतिक ब्रेल दिन म्हणून साजरा केला जातो. त्यांच्या स्मरणार्थ *आशादीप* अपंग, महिला बाल विकास संस्थेने कुर्वेज न्यू मॉडेल स्कूलमध्ये दृष्टीबाधित विद्यार्थ्यांसाठी नाविन्यपूर्ण कार्यक्रमाचे आयोजन केले. दृष्टीबाधित विद्यार्थ्यांना ब्रेल लिपीतील वाचन कौशल्यासाठी प्रोत्साहन व श्रवण कौशल्य या दोन्ही क्षमतांचा विकास हा या कार्यक्रमाचा प्रमुख उद्देश होता.
हा स्पर्धात्मक उपक्रम यशस्वी करण्यासाठी श्री. सुनील कांत मुंजाल लिखित ' हीरो की कहानी -चार भाईंयोंका औद्योगिक चमत्कार (भाग 1/2/3)' *ब्रेल लिपी आणि हिंदीत* उपलब्ध या पुस्तकाची निवड करण्यात आली. या पुस्तकाला 'सर्वोत्तम औद्योगिक पुस्तक' हा पुरस्कार मिळाला असून दिल्ली येथील सक्षम ट्रस्टने अंध व्यक्तींसाठी ही विशेष आवृत्ती प्रकाशित केली आहें. या पुस्तकाचे तीन भाग शाळेच्या दृष्टीबाधित विद्यार्थ्यांसाठी देण्यात आले आणि विद्यार्थ्यांकडून त्याचे वाचन करवून पूर्व तयारी करण्यात आली होती. आशादीपतर्फे छाया तारे, प्रीति दास व वंदना देशपांडे यानी पुस्तकाचे पूर्व वाचन केले आणि त्यातील प्रेरणात्मक, शिक्षात्मक व जीवनमूल्ये देणारे पाठ्यांश निवडून त्यावर आधारित छोटी छोटी प्रश्नोत्तरे तयार केली.
कार्यक्रमाच्या सुरवातीला वंदना देशपांडे यांनी ब्रेल लिपीला अंधांसाठीची वैश्विक लिपी बनविण्याचे महान कार्य करणाऱ्या लुई ब्रेल यांचे स्मरण करून ' हीरो की कहानी ' या पुस्तकाची पार्श्वभूमी सांगितली. नंतर या स्पर्धेचे नियम विद्यार्थ्यांना समजावून सांगण्यात आले. कार्यक्रमात एकूण चाळीस विद्यार्थी सहभागी झाले होते. विद्यार्थ्यांचा उत्साह आणि सहभाग प्रशंसनीय होता. चौदा विद्यार्थ्यांनी योग्य उच्चारण,विरामचिन्हे व आत्मविश्वासाने निवडलेल्या पाठ्यांशाचे वाचन केले तर बाकीच्या विद्यार्थ्यानी प्रश्नांची योग्य उत्तरे दिली. वाचन स्पर्धेत इयत्ता दहावीची *जसविंदर भादा हिने प्रथम,* *नववीच्या सुजल जाधवने द्वितीय* तर *इयत्ता आठवीच्या शिवम ठाकुरने तृतीय क्रमांक* मिळवला. आशादीप संस्थेद्वारे पारितोषिक देऊन त्यांचे कौतुक करण्यात आले. योग्य उत्तरे दिलेल्या विद्यार्थ्यांना देखील आशादीप संस्थेद्वारे छोटीशी स्नेहभेट देण्यात आली. सर्व विद्यार्थ्यांना खाऊचे वाटप करण्यात आले.
कुर्वेज न्यू मॉडेल स्कूलच्या मुख्याधपिका श्रीमती संगीता उगे आणि विशेष शिक्षिका श्रीमती विद्या बचाले यांनी कार्यक्रम यशस्वी होण्यासाठी उत्तम सहकार्य केले. कार्यक्रमाचे कौतुक करताना संगीता उगे म्हणाल्या कि विद्यार्थ्यांना ब्रेल लिपीत वाचन करताना पाहून त्यांना खूप आनंद झाला आहे. आशादीप संस्था नेहमीच आमच्या शाळेत दृष्टीबाधित विद्यार्थ्यांसाठी शिक्षात्मक व नाविन्यपूर्ण कार्यक्रम आयोजित करते. आशादीप संस्थेचे सहकार्य आम्हाला सतत लाभो ही सदिच्छा त्यांनी व्यक्त केली.
आशादीप संस्थेद्वारे छाया तारे, वीणा मोहाडीकर. प्रीति दास व वंदना देशपांडे यांना हा उपक्रम यशस्वीरित्या पूर्ण करण्यासाठी आशादीप संस्थेच्या अध्यक्षा डॉ प्रतिमा शास्त्री यांनी मोलाचे मार्गदर्शन केले.
कार्यक्रमाचे सूत्रसंचालन वंदना देशपांडे व आभार प्रदर्शन विद्या बचाले यांनी केले.

06/02/2026

आशादीपतर्फे शोकसभेचे आयोजन *
दिनांक ३ फेब्रुवारी २०२६

आशादीपचे आधारस्तंभ स्व. सौ. वनिताताई पाटील व स्व. अविनाश डोंगरे यांचे 30/01/2026 रोजी दुःखद निधन झाले. त्यांना श्रद्धांजली अर्पण करण्यासाठी शोकसभेचे आयोजन वा. वि. मिराशी सभागृहात करण्यात आले.
याप्रसंगी प्रथम आशादीपच्या अध्यक्षा डॅा. प्रतिमाताई शास्त्री यांनी मातृसेवा संघ विकलांग केंद्रातील वनिताताईंचे गाजावाजा न करता केलेले प्रभावी शिक्षणकार्य, विकलांग मुलांना आणि त्यांच्या पालकांना प्रभावी समुपदेशन, विकंलांगांना त्यांनी सतत केलेली निरपेक्ष मदत, त्यांचे मनोबल वाढवून त्यांना शिकवण्याचा त्यांनी घेतलेला वसा यांच्या आठवणी सांगितल्या. त्याबरोबरच १९९३ साली आशादीपची स्थापना होत असतांना स्व. उषाताई संत आणि इतर समाविचारी सेवाभावी कार्यकर्त्यांबरोबर वनिताताईंनी यशस्वी रीतीने आशादीपचे कामाची व्याप्ती कशी वाढविली हे सांगितले. वनिताताईंनी प्रेरणा देत NGO च्या कामाचे धडे कसे दिले याचा प्रतिमाताईंनी विशेष उल्लेख केला.
वनिताताईंना २०१७ मध्ये भारत विकास संघटनेनें सेवाव्रती पुरस्काराने सन्मानित केले होते ही माहिती दिली.
स्व. अविनाशजी डोंगरे यांच्याबद्दल बोलताना डोंगरे परिवाराचे आशादीप बरोबर अनेक वर्षांपासून संबंध आहेत असे त्या म्हणाल्या. त्यांच्या दिवंगत पत्नी स्व. पद्मजा डोंगरे या आशादीप च्या संस्थापक सदस्य होत्या, आणि दिव्यांग विद्यार्थ्यांना शिकविणे, रेकॉर्डिंग करणे, इ. नियमित करीत होत्या. त्यांच्या स्मृती निमित्त श्री डोंगरे यांना गिरीश गांधी फौंडेशन तर्फे मिळालेल्या सत्कार निधीमध्ये तितकीच भर घालून त्यांनी आशादीपला दिलेल्या देणगी मधून 2017 साली स्व.पद्मजा डोंगरे शैक्षणिक सुविधा केंद्रा ची स्थापना करण्यात आली असा प्रतिमाताईनी उल्लेख केला.
त्यानंतर छायाताई तारे यांनी मातृसेवा संघांतील स्नेहांगण शाळेत शिकवतांच्या आठवणी सांगून त्यावेळेस पद्मजा डोंगरे व वनिताताई यांचा आधार मिळाल्याने या मुलांना शिकवण्याचे कार्य चांगले करता आले आणि आनंद मिळाला असे सांगितले. प्रत्येकाच्या वैयक्तिक समस्यांच्या साठी त्या तत्परतेने योग्य सल्ला देवून मदतीचा हात पुढे करीत, असे त्यांनी आवर्जून सांगितले.

वनिताताईंनी माणुसकी जपत कित्येक कुटुंबांना मदत केली याचा उल्लेख डॅा. अनघा नासेरी यांनी केला. प्रत्येकाच्या क्षमता ओळखून त्या क्षेत्रात कार्य करण्यासाठी त्या प्रेरित करायच्या, असे सांगत विविध आठवणी व संस्मरणीय क्षणांचा त्यांनी उल्लेख केला आणि वनिताताईंची पदोपदी आठवण जागृत केली.
अंजली जोशी, डॅा. निवेदिता कुलकर्णी, डॉ. पुष्पा दुर्गे यांनी वनिताताईच्या सहवासातील विविध क्षणांची आठवण केली.
डॅा. वृंदा जोगळेकर यांनी वनिताताईंबद्दल बोलताना त्या दुसऱ्यांच्या आयुष्याला सकारात्मकपणे स्पर्श करायची क्षमता असणाऱ्या होत्या व संस्था उभी करतांना जे गुण आणि दृष्टीकोन लागतो तो वनिताताईंमध्ये होता हे सांगितले.
डॅा. ज्योती शिवलकर यांनी वनिताताईंच्या माणसं जोडणं व नविन सभासदांना त्यांनी केलेल्या कामाची दखल घेऊन प्रेरीत करणं हा त्यांचा गुण मनाला उभारी देणारा होता हे सांगितले. यामुळे नव्या व जुन्या संभासदांमध्ये छान नातं तयार होते ही शिकवण त्यांच्या वागणूकीतून दिसायची.
वीणा मोहाडीकरने तिला स्नेहांगण शाळेत शिकवायला वनिताताईंकडून प्रेरणा मिळाली असे सांगितले.
यानंतर अपर्णा कुळकर्णी हिने त्यांच्यावर काव्य सादर करत त्यांच्या काही ह्रदयस्पर्शी आठवणी सांगितल्या. माणसे जोडण्यासाठी वैयक्तिक राग लोभ बाजूला सारून संस्थेच्या हितासाठी चिकाटीने कार्य करण्याची त्यांची शिकवण होती, असा विशेष उल्लेख केला. तसेच त्या मला आईसमान होत्या असे म्हणत त्यांचं मातृरुपिणी व्यक्तिमत्व सर्वांसाठी प्रेरक होते आणि प्रेरणा देत राहील असे प्रतिपादन केले.
या संपूर्ण कार्यक्रमात वनिताताईचे सेवाभावी काम, प्रेमळ स्वभाव, सामाजिक कळकळीने विकलांगांची केलेली सेवा, घर सांभाळून संस्थेच्या प्रगतीचा ध्यास, अजात शत्रू स्वभाव आणि विशाल जन संपर्क, या गुणांचा वेळेवेळी सगळ्यांकडून उल्लेख झाला.
शोकसभेच्या शेवटी स्व. अविनाश डोंगरे व स्व. वनिताताई पाटील यांच्या निधनाबद्दल आशादीपतर्फे लिहिलेल्या शोकसंदेशांचे वाचन अनुक्रमे श्रीमती छाया तारे व डॅा. प्रतिमाताई शास्त्री यांनी केले. त्यानंतर २ मिनिटांचे मौन पाळत या दोन्ही महान व्यक्तींना श्रद्धांजली अर्पण करण्यात आली व शोकसभेची सांगता झाली.

30/01/2026

आशादीप संस्थेच्या संस्थापक सदस्य आणि उपाध्यक्ष सौ.वनिताताई पाटील यांचे आज सकाळी 10 वाजता दुःखद निधन झाले. ईश्वर त्यांच्या आत्म्याला शांती देवो. श्री. लालासाहेब आणि कुटुंबियांना दुःख सहन करण्यास ईश्वर शक्ती प्रदान करो हीच प्रार्थना. भावपूर्ण श्रद्धांजली🙏🏻🙏🏻🙏
ओम शांती
🌼🌼🌼🌼🌼🌼🌼🌼
आशादीपचे हितचिंतक आणि देणगीदार आर्किटेक्ट श्री. दादासाहेब डोंगरे यांचे काल रात्री दुःखद निधन झाले. ईश्वर त्यांच्या आत्म्याला शांती देवो. आणि कुटुंबियांना दुःख सहन करण्यास ईश्वर शक्ती प्रदान करो हीच प्रार्थना. भावपूर्ण श्रद्धांजली🙏🏻🙏🏻🙏
ओम शांती

17/01/2026

*आशादीप व्याख्यानमालेच्या नवव्या पुष्पाचे आयोजन*
*दिनांक १० जानेवारी २०२६*

आशादीप अपंग, महिला-बाल विकास संस्थेतर्फे ‘प्रभावी व्यक्तित्वाची गुरुकिल्ली’ या विषयावर श्री. मिलिंद तारे, वरिष्ठ प्रशिक्षण कार्यक्रम समन्वयक, वनामती, नागपूर यांच्या व्याख्यानाचे आयोजन करण्यात आले.

कार्यक्रमाची सुरुवात दीपप्रज्वलन व स्वागत समारंभाने झाली. त्यानंतर प्रमुख वक्ता श्री. मिलिंद तारे व अध्यक्ष लालासाहेब पाटील यांचे परिचय अनुक्रमे डॅा. अनघा नासेरी व सुप्रिया केकतपुरे यांनी केले.

प्रास्ताविक भाषणात आशादीपच्या अध्यक्षा डॅा. प्रतिमा शास्त्री यांनी सांगितले की २०१८ या रजतजयंती वर्षात आशादीप संस्थेने व्याख्यानमालेचे पहिले पुष्प आयोजित केले होते व आजचे व्याख्यान हे ९ वे पुष्प आहे. ‘साथी हाथ बढाना’ यातील जे साथी आले होते, त्यांच्या कामाचे स्वरूप स्पष्ट करत त्यांनी या व्याख्यानात त्यांची दृष्टीबाधितांबद्दलची भूमिका स्पष्ट केली व आशादीपबद्दल संक्षिप्त माहिती दिली.
यानंतर आशादीपच्या जुलै ते डिसेंबर २०२५ या इमासिकाचे विमोचन मान्यवरांच्या हस्ते करण्यात आले.

प्रमुख वक्ता श्री. मिलिंद तारे यांनी व्यक्तिमत्त्वाची काही गुरुकिल्ली आहे का? अशी विचारणा करत प्रत्येकाकडे व्यक्तिमत्व आहे व ते अनुभव, परिस्थिती, शिक्षण, संस्कार, प्रथा-परंपरा यातून घडत जातं असं सांगितलं.
व्यक्तीमत्वाच्या प्रभावीपणाच्या व्याप्तीत फरक असतो. त्यांच्या मते व्यक्तिमत्वाची गुरूकिल्ली ही प्रत्येकाजवळ आहे व ती प्रत्येकाला शोधायची आहे.
या विधानाला अनुसरून त्यांनी एक अतिशय मनोरंजक व महत्त्वाची क्षमतामापन सरावाची ॲक्टीव्हिटी सर्वांना गोलाकार बसवून घेतली.
क्षमतामापनाचे १३ प्रभाग असून त्यांचे मोजमाप कसे करायचे हे सांगायला त्यांनी एक ७० विधानं असलेली चाचणी सर्वांना दिली. या चाचणीत व्यक्तिमत्वाबद्दल जी ७० विधानं होती त्याविषयी पूर्ण सहमत असल्यास ५ गुण तर ‘असहमत’ साठी १ गुण अशा प्रकारे १ ते ५ गुण द्यायचे होते.
विशेष गोष्ट म्हणजे दृष्टीबाधित मुलांना त्यांच्या writer साथींनी गुण द्यायला या चाचणीत मदत केली.
या वाक्यांना गुण देतांना सर्वांचे विचारमंथन व आत्म परीक्षण झाले. यानंतर श्री. तारे यांनी हे गुण गुणपत्रिकेत कसे लिहायचे व त्यांचे कसे अर्थबोध घ्यायचे ते शिकवले.

या संपूर्ण सत्रात सर्व वयातील उपस्थितांनी रस घेत अतिशय छान प्रकारे साथ दिली. या क्षमता मापन चाचणीद्वारे सर्वजण आपल्या व्यक्तीमत्वातील त्रुटी ओळखून त्यावर उपाय शोधून व्यक्तित्व प्रभावी करण्याचा प्रयत्न स्वतःच करू शकतात असे श्री. तारे यांनी या सत्राचा शेवट करत सांगितले.
अध्यक्षीय भाषणात श्री. लालासाहेब पाटील यांनी श्री. मिलिंद तारे यांच्या आशादीप मधील प्रोजेक्ट विषयीच्या मदतीचा उल्लेख करत त्यांच्या सत्राची तारीफ केली. हे सत्र उपस्थित सर्वांना उपयोगी झाले असल्याचे व आशादीपचे नववे पुष्प सर्व व्याख्यानात अनोखे असल्याचे त्यांनी सांगितले.
कार्यक्रमाचे उत्तम संचालन सौ. वीणा मोहाडीकर व आभार प्रदर्शन सौ. अपर्णा कुलकर्णी यांनी केले.

08/01/2026