16/07/2026
༢༠༢༦ ལོའི་དབྱར་དུས་སློབ་གྲྭ་སྐབས་ལྔ་པའི་མཇུག་བསྡོམས་མཛད་སྒོ་ཚུགས་སོང་།
ཕྱི་ལོ་༢༠༢༦ ཟླ་ ༧ ཚེས་ ༡༦ ཉིན་སེར་བྱེས་མཁས་སྙན་གྲྭ་ཚང་གིས་མཐུན་རྐྱེན་སྦྱར་བའི་ཕྱི་རྒྱལ་བོད་རིགས་སློབ་མ་གཞོན་སྐྱེས་ལ་དམིགས་པའི་དབྱར་དུས་སློབ་གྲྭ་སྐབས་ལྔ་པའི་མཇུག་བསྡོམས་མཛད་སྒོ་དེ་སེར་བྱེས་བཀྲ་ཤིས་ཆོས་གླིང་ཚོགས་ཁང་དུ་དངོས་སུ་དབུ་འཛུགས་བསྐྱངས་སོང་། སྐབས་དེར་སྐུ་མགྲོན་གཙོ་བོ་སེར་བྱེས་མཁས་སྙན་གྲྭ་ཚང་གི་སྐྱབས་རྗེ་མཁན་རིན་པོ་ཆེ་དགེ་བཤེས་བཀྲ་ཤིས་ཚེ་ཐར་མཆོག་དང་། གྲྭ་ཚང་གི་དབུ་ཆོས་རྣམ་གཉིས་དང་། ཕྱག་མཛོད་ཆེན་མོ་ལགས་དང་། ཤེས་ཡོན་འགན་འཛིན་ལགས། དམིགས་བསལ་སྐུ་མགྲོན་སྦེལ་ཀོབ་ལུགས་བསམ་གཞིས་འགོ་དགེ་ལེགས་འབྱུང་གནས་ལགས་དང་། ས་གནས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ J.P URS བཅས་དབུ་བཞུགས་ཐོག གྲྭ་ཚང་གི་ཚོགས་པ་ཁག་གི་འགན་འཛིན་དང་། ཁང་ཚན་རྒན་ལགས་རྣམ་པ། དབྱར་དུས་སློབ་གྲྭའི་དགེ་རྒན་དང་སློབ་མ་བཅས་འཛོམས་ནས། ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་། དེ་ནས་སྐུ་མགྲོན་རྣམ་པས་རིམ་བཞིན་གསུང་བཤད་གནང་བ་དང་། སྐུ་མགྲོན་གཙོ་བོ་སེར་བྱེས་མཁན་རིན་པོ་ཆེ་མཆོག་ནས་འདི་ལོ་དབྱར་དུས་སློབ་གྲྭའི་སློབ་མ་རྣམས་ལ་མཉམ་ཞུགས་ཕྱག་ཁྱེར་གནང་བ་དང་། དེ་ནས་ཤེས་ཡོན་འགན་འཛིན་ལགས་ནས་དྲ་ཐོག་སློབ་གྲྭའི་འཛིན་རིམ་བརྒྱད་པ་སྐབས་གཉིས་པ་ཐོན་མཁན་རྣམས་ལ་སློབ་ཐོན་ཕྱག་ཁྱེར་གནང་བ་དང་། སེར་བྱེས་ཁྲིམས་བདག་དགེ་བསྐོས་ལགས་ནས་ལས་བྱེད་དགེ་རྒན་དང་དྭང་བླངས་ཞབས་ཞུ་མ་རྣམས་ལ་ཕྱག་ཁྱེར་དང་ལེགས་འབུལ་བཅས་ཕུལ་གནང་སོང་། དེ་ནས་སློབ་མ་རྣམས་ཀྱིས་ཉིན་གྲངས་མང་པོའི་རིང་སྒྲ་སྙན་བཀྲོལ་སྟངས་དང་གླིང་བུ་བུད་སྟངས་སོགས་སྦྱངས་བརྩོན་བྱས་པ་ཁག་ཅིག་གཟིགས་འབུལ་ཞུས་ནས། མཐར་དབྱར་དུས་སློབ་གྲྭའི་འགན་ཁུར་བ་རྒན་པད་མ་དོན་གྲུབ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་ནས་མཇུག་བསྡོམས་མཛད་སྒོ་ལེགས་པར་གྲུབ་སོང་།
འདི་ལོར་རྒྱལ་ཁབ་མི་འདྲ་བ་ ༡༡ ནས་སློབ་མ་གྲངས་ ༤༠ ཡིས་མཉམ་ཞུགས་གནང་ཡོད་པ་དང་། དབྱར་དུས་སློབ་གྲྭ་ཉིན་གྲངས་ ༢༡ རིང་ལ། སྔ་དྲོ་སྒོམ་འཛིན་གྲྭ་དང་། དེ་ནས་ནང་ཆོས་དང་བོད་ཀྱི་སྐད་ཡིག་དང་བོད་ཀྱི་ཡིག་གཟུགས། བོད་ཀྱི་སྲོལ་རྒྱུན་གཞས་སྣ་འཁྲབ་སྟོན་དང་། སྒྲ་སྙན་བཀྲོལ་སྟངས་དང་། གླིང་བུ་བུད་སྟངས་སོགས་སློབ་ཁྲིད་ཞུས་ཡོད། བར་བར་ལ་ཉེ་འཁོར་དགོན་པ་རྒྱུད་སྨད་གྲྭ་ཚང་དང་། རྫོང་དཀར་ཆོས་སྡེ་དང་། རྣམ་གྲོལ་གླིང་སོགས་ལ་མཆོད་མཇལ་དང་། ཀ་རུ་ཎ་བལྟ་སྐྱོང་ཁང་དང་། རྒས་གསོ་ཁང་དང་། སློབ་གྲྭ་ཁག་ལ་བལྟ་སྐོར་བཅས་ཁྲིད་ནས་སློབ་མ་རྣམས་ལ་དམིགས་བསལ་ཉམས་མྱོང་ཚོར་བ་དང་བག་ཆགས་མི་འདྲ་བ་འཇོག་ཐུབ་ཡོད། མདོར་ན་ཉིན་གྲངས་ ༢༡ རིང་སློབ་ཁྲིད་བྱས་པ་བརྒྱུད་སློབ་མ་རྣམས་བོད་ཀྱི་ནང་ཆོས་དང་སྐད་ཡིག་དང་ཡིག་གཟུགས་དང་སྲོལ་རྒྱུན་རོལ་མོ་བཀྲོལ་སྟངས་བཅས་མ་ཤེས་པ་ཤེས་པ་དང་། ཕྲན་བུ་ཤེས་པ་རྣམས་ཡར་རྒྱས་གོང་འཕེལ་ཡོང་བ་ལ་དགེ་མཚན་ཆེན་པོ་ཐོན་ཐུབ་པ་བྱུང་ཡོད།
The 5th Summer School for children of Tibetan diaspora organized at Sera Jey Tashi Choeling Centre from 26th June 2026, concluded with the closing ceremony on 16th July 2026. This year’s summer school has the participation of 40 Tibetan children from 11 different countries.
Sera Jey Monastery’s Abbot, Khen Rinpoche Geshe Tashi Tsethar, was the Chief Guest, and Guest of Honour – Mr. Gelek Jugney, Representative of Lugsam Tibetan Settlement of Bylakuppe, and Mr. J.P. Urs. President of Indo-Tibetan Friendship Society of Bylakuppe Chapter. The ceremony was attended by the monastery’s Chief Disciplinarian, Chant Master, Chief Administrator, respective Department & Khangtsen Heads and concerned Staffs.
The Abbot, presented the Certificate of Participation to respective children, The Head of Department of Modern Education Department presented the completion certificate to Sera Jey Online School’s 8th Grade, second semester students, and the Chief Disciplinarian presented the Appreciation Certificates to teachers, staffs & volunteers.
The children displayed their Tibetan calligraphy work, Tibetan guitar and flute skills and performed traditional folk and opera dance at the closing ceremony, which they had learned during the 21 day summer school.
