16/04/2026
मुरबाड तालुक्यातील सज्जनशक्तीचा माणुसकीचा हात — देवराळवाडी येथील गरजू कुटुंबास मदत
गुरुवार, १६ एप्रिल २०२६
मुरबाड तालुक्यात अलीकडेच घडलेल्या अपघातातील पीडित कुटुंबाच्या मदतीसाठी, तालुक्यातील सुमारे ४० हून अधिक सज्जन व संवेदनशील नागरिकांनी राष्ट्रहितम् क्लबच्या माध्यमातून एकत्र येत माणुसकीचा आदर्श निर्माण केला आहे. देवराळवाडी येथील मजूर आदिवासी कुटुंबावर आलेल्या संकटाच्या काळात, समाजाने आपले कर्तव्य ओळखत तातडीने सहाय्य निधी उभारला.
आज सायंकाळी ५.३० वाजता राष्ट्रहितम् Club मधील ३ अधिकृत सदस्यांनी सदर ठिकाणी भेट देऊन एकूण ₹२७,३०० पैकी ₹५,००० इतकी रोख रक्कम संबंधित महिलेच्या हाती सुपूर्द केली. तसेच, उर्वरित रक्कम त्यांच्या बँक खात्यावर ऑनलाइन पद्धतीने जमा करण्यात येणार आहे. आपली मदत अत्यंत योग्य व गरजेच्या ठिकाणी पोहोचली असल्याचे समाधान त्यांनी व्यक्त केले.
ही मदत पूर्णपणे संवेदनशीलता आणि कर्तव्यभावनेतून देण्यात आली आहे. संबंधित कुटुंबातील व्यक्ती दिनांक १३ एप्रिल रोजी आपल्या पत्नीकरिता औषध आणण्यासाठी कल्याण येथे गेले असता अपघातात त्यांचे दुर्दैवी निधन झाले. सध्या कुटुंबात वयस्कर आजी, पत्नी व एक ३ वर्षांचे लहान मूल असून, कर्ता पुरुष हरपल्याने कुटुंब अत्यंत कठीण परिस्थितीत आहे. त्या पार्श्वभूमीवर, सदर महिलेच्या औषधोपचारांविषयी माहिती जाणून घेण्यात आली असून, पुढील आवश्यक मदतीबाबत क्लबमधील डॉक्टरांच्या मार्गदर्शनानुसार निर्णय घेण्यात येणार आहे.
या उपक्रमात क्लब च्या अधिकृत सदस्यां व्यतिरिक्त इतर अनेक नागरिकांनी स्वेच्छेने सहभाग नोंदवत आर्थिक मदत दिली. संपूर्ण निधी प्रक्रियेमध्ये पारदर्शकता राखत मदत थेट कुटुंबापर्यंत पोहोचविण्यात आली.
विशेष म्हणजे, या उपक्रमात कुठल्याही प्रकारचा दिखावा किंवा प्रसिद्धी न करता संबंधित कुटुंबाचा सन्मान जपण्यावर भर देण्यात आला. कोणत्याही व्यक्ती किंवा सदस्यांचे नाव अथवा छायाचित्र जाणीवपूर्वक टाळण्यात आले आहे. औपचारिकतेपोटी फक्त घराचे व पॉकेटवरील मजकुराचे छायाचित्र क्लबतर्फे प्रसिद्ध करण्यात आले आहे.
तालुक्यातील या अत्यंत गरजेच्या ठिकाणी, स्थानिक संवेदनशील नागरिकांनी कोणत्याही बाह्य किंवा शासकीय मदतीची वाट न पाहता तातडीने मदत उभी केली, ही बाब समाजासाठी अत्यंत प्रेरणादायी आहे. अशा प्रकारे, मुरबाड तालुक्यातील या सज्जनशक्तीने पुन्हा एकदा सिद्ध केले की—
संकटाच्या काळात माणुसकीच सर्वात मोठी ताकद असते.
मुरबाड व शहापूर तालुक्यात राजकारणाविरहित निःस्वार्थ समाजसेवा कार्यात मागील ६ वर्षांपासून कार्यरत असलेल्या राष्ट्रहितम् क्लबमध्ये सहभागी होण्यासाठी, पुढील Official Contact वर आपले नाव व ठिकाण व्हॉट्सअँप द्वारे पाठविण्याचे विनंतीपूर्वक आवाहन क्लब द्वारे करण्यात आले आहे.
+91 093706 51318
