14/06/2026
बाल रंगभूमी म्हणजे संस्कार करणारी शाळा: रवींद्र फडणवीस
बाल रंगभूमी परिषद नागपूर शाखा:अभिनय कार्यशाळेचा समारोप
नागपूर- बालरंगभूमी म्हणजे बालमनावर संस्कार करणारी शाळाच आहे. या शाळेच्या माध्यमातून नवी पिढी घडविण्याचे सुरू असलेले प्रयत्न अभिनंदनीय आहेत, असे प्रतिपादन स्त्री शिक्षण प्रसारक मंडळाचे अध्यक्ष श्री रवींद्र फडणवीस यांनी केले. बाल रंगभूमी परिषद, नागपूर शाखाद्वारे महिला महाविद्यालय नंदनवन येथे ८ ते १४ जून दरम्यान आयोजित अभिनय कार्यशाळा २०२६ च्या समारोपप्रसंगी अध्यक्ष स्थानावरून श्री फडणवीस बोलत होते. प्रमुख अतिथी म्हणून ज्येष्ठ सिने नाट्य कलावंत श्री मुकुंद वसुले उपस्थित होते. त्यांनी आपल्या भाषणातून बाल रंगभूमीच्या विविध उपक्रमांचे कौतुक केले. ते म्हणाले, माझ्यासारखे अनेक अशाच शिबिरांमधून घडलेले कलावंत आज रंगभूमीवर आघाडीवर आहेत. या संधीचे बालकांनी आणि त्यांच्या पालकांनी सोने केले पाहिजे.
प्रारंभी नागपूर शाखेचे अध्यक्ष श्री श्याम आस्करकर यांनी आपल्या प्रास्ताविकातून बालरंगभूमी परिषद नागपूर शाखेच्या येत्या त्रैमासिकातील विविध उपक्रम आणि स्पर्धांची माहिती दिली.
५ ते १४ वर्षे वयोगटातील मुला-मुलींसाठी आयोजित या अभिनय कार्यशाळेत वैदेही चवरे, अभिषेक बेल्लारवार आणि लोकेश उर्फ लकी तांदुळकर यांनी अभिनय आणि नृत्याचे प्रशिक्षण दिले. कार्यशाळेतील सर्व सहभागींनी नृत्य आणि संस्कारक्षम प्रहसन सादर केले. पाहुण्यांच्या हस्ते शिबिरातील सर्व सहभागींना प्रशस्तीपत्र बहाल करण्यात आले. कल्याणी देव यांनी कार्यक्रमाचे सूत्रसंचालन केले. प्रमुख कार्यवाह अभिषेक बेल्लारवार यांनी आभार प्रदर्शन केले. कार्यक्रमाच्या यशस्वीतेसाठी कोषाध्यक्ष डॉ रवींद्र भुसारी, कार्याध्यक्ष रूपाली मोरे, उपाध्यक्ष (उपक्रम) किशोर डाऊ यांच्यासह रोशन नंदवंशी, अमोल निंबार्ते, सुशील सरोदे, अर्चना श्रावणे यांनी विशेष परिश्रम घेतले.
Balrangbhumi Parishad Nagpur
