21/02/2026
📍 सातारा
सातारा येथे शेळी-मेंढी विकास महामंडळाचे माजी अध्यक्ष मा.श्री. टि. आर. गारळे साहेब यांच्या मार्गदर्शनाखाली मेंढपाळ आर्मी संघटनेची महत्त्वपूर्ण बैठक उत्साहात व गांभीर्यपूर्ण वातावरणात संपन्न झाली.
बैठकीत मेंढपाळ समाज व पशुधनासमोरील विविध ज्वलंत प्रश्नांवर सविस्तर चर्चा करण्यात आली. मेंढपाळांवर सातत्याने होणारे मारहाण व भ्याड हल्ल्यांचे प्रकार, शेळ्या-मेंढ्यांचे मोठ्या प्रमाणावर होणारे नुकसान, स्थलांतराच्या काळात भेडसावणाऱ्या अडचणी, तसेच पशुधन सुरक्षेचे प्रश्न यावर संघटनेच्या पदाधिकाऱ्यांनी आपली मते मांडली. अशा घटनांवर कठोर कारवाई व्हावी आणि मेंढपाळांना कायदेशीर संरक्षण मिळावे, यासाठी संघटनेतर्फे पुढाकार घेण्याचा निर्धार व्यक्त करण्यात आला.
याशिवाय महाराष्ट्र शासनाच्या वतीने मेंढपाळ तसेच धनगर समाजासाठी राबविण्यात येणाऱ्या विविध सेवाभावी योजनांचा आढावा घेण्यात आला. या योजना प्रत्यक्ष लाभार्थ्यांपर्यंत प्रभावीपणे पोहोचत नसल्याची खंत व्यक्त करण्यात आली. शासनाच्या योजना गावपातळीवर पोहोचाव्यात, सामान्य मेंढपाळ कुटुंबांना थेट लाभ मिळावा, यासाठी जनजागृती, मार्गदर्शन शिबिरे आणि प्रशासनाशी समन्वय वाढविण्याचा निर्णय घेण्यात आला.
फलटण व खंडाळा तालुक्यातील ग्रामपंचायत सालपे, ग्रामपंचायत हिंगणगाव, ग्रामपंचायत निंबोडी तसेच ग्रामपंचायत आदर्की बु. येथील गावपातळीवरील समाजविकासाच्या विविध प्रश्नांवरही चर्चा झाली. स्थानिक पातळीवर पाणी, चराई हक्क, वस्तीवरील मूलभूत सुविधा आणि शासकीय योजनांचा लाभ या मुद्द्यांवर पदाधिकाऱ्यांनी ठोस भूमिका मांडली.
यावेळी सातारा जिल्हाध्यक्ष मा.श्री. रमेशभाऊ तांबे, मेंढपाळ आर्मीचे मार्गदर्शक किसनराव सोनवलकर (आबा), फलटण तालुका अध्यक्ष व सालपे गावचे सरपंच दादासाहेब कोळपे, खंडाळा तालुकाध्यक्ष महादेव शेळके (आबा), सुनील शिंदे संघटनेचे शाखाध्यक्ष, पदाधिकारी तसेच कार्यकर्ते मोठ्या संख्येने उपस्थित होते.
बैठकीत संघटन अधिक बळकट करून मेंढपाळ समाजाच्या हक्कांसाठी संघटितपणे लढा उभारण्याचा निर्धार व्यक्त करण्यात आला. शासनाच्या योजना प्रभावीपणे राबविण्यासाठी आणि समाजाच्या सर्वांगीण विकासासाठी पुढील काळात ठोस कृती आराखडा राबविण्यात येणार असल्याची माहिती यावेळी देण्यात आली.
#मेंढपाळ_आर्मी
#मेंढी_माऊली
#सातारा
