Family First Guidance Centre

12/08/2026

A New Dawn for Asim After a Long Battle with Addiction

M***i Ashfaq Qazi

Sometimes, a single wrong step in a person’s life becomes a turning point from which the road back seems invisible for years. What begins merely as curiosity, experimentation, or the influence of bad company can gradually turn into a chain that takes control of a person’s health, thoughts, character, livelihood, and relationships.

Addiction is not merely the destruction of an individual; its effects extend beyond the walls of the home and deeply disturb the peace and stability of the entire family. When one member of a family becomes trapped in addiction, his wife, children, parents, and siblings also go through a prolonged period of suffering and distress.

A similar painful case came to the Family First Guidance Centre on 16 April 2026, when two women—one the wife of a person suffering from addiction and the other his elder sister—arrived at our centre with a mixture of extreme distress, helplessness, and hope. Their faces reflected years of suffering, while their hearts carried one question: Could their loved one ever break free from this destructive habit?

For nearly an hour, they shared details of their family circumstances, the difficulties they had been facing, and the emotional pain they had endured for years. They were encouraged with the reassurance that although addiction is a serious illness, recovery is possible through appropriate treatment, continuous guidance, and a strong determination to change. They were advised to bring the affected person to the centre so that his condition could be properly assessed and an appropriate treatment plan could be adopted.

When 38-year-old Asim Sheikh (a pseudonym), a resident of Nagpada, came before us, a painful picture of his 25-year journey emerged. From a medical and psychological perspective, he was suffering from Polysubstance Use Disorder.

He had entered the world of substance abuse at a very young age, around 10 to 12 years old. Over the years, he had become dependent on several substances, including to***co, hashish, cannabis, button drugs, MD, and brown sugar (locally known as gard).

Twenty-five years of prolonged addiction had affected almost every major area of his life. He had lost his livelihood, accumulated significant debt, and developed strained relationships with his wife and children. His social reputation had also been severely affected. A man who could once have been a source of support for his family had himself become trapped in an illness from which he desperately needed help and guidance.

An experienced counsellor at the Family First Guidance Centre, Mr. Moinuddin Petiwala, conducted detailed counselling sessions with Asim. The first priority was to help him understand the reality of his condition and develop the ability to assess his present situation.

He was helped to understand that addiction is not simply a bad habit, but a serious disorder that can affect a person’s thinking, physical and mental health, financial condition, and family life.

Thereafter, motivational counselling was used to develop within him a desire for positive change. He was made aware of the physical, psychological, financial, and family-related consequences of substance abuse and helped to understand that rebuilding his life would require a strong and decisive commitment.

Since long-term use of brown sugar and other dangerous substances could not easily be overcome through counselling and conversation alone, he was referred, based on his medical needs, to Opioid Substitution Therapy (OST) at Gokuldas Tejpal Hospital. His formal treatment began there.

During the course of treatment, Family First Guidance Centre counsellor Mr. Moinuddin Petiwala remained in regular contact with him, continued to encourage him, and provided the necessary guidance to his family.

After approximately 15 to 20 days of treatment, when Asim returned home from the hospital, a remarkable transformation had taken place in his life. He had completely abstained from brown sugar, hashish, cannabis, MD, and other dangerous substances. His to***co use had also reduced significantly, and further work on this habit continued through to***co cessation sessions.

Alongside his recovery, Asim also began making efforts to improve his financial situation. Within approximately one month of returning from the hospital, he secured a new job.

Today, nearly three months later, he is living a more balanced and healthy life. He is employed and has begun rebuilding a relationship of love, trust, and peace with his wife and children.

In a recent meeting, his wife and elder sister expressed their happiness and relief. They shared that the future of the man they had once feared they might lose had seemed hopeless, but today that same person was once again present among his family.

Timely guidance, appropriate treatment, and continuous encouragement had given a new direction to a life that was falling apart.

Asim’s story is not merely the story of one man overcoming addiction. It is also the story of a family’s struggle—a family that refused to let go of hope despite years of pain and disappointment.

It is a journey in which treatment, guidance, determination, and family support came together to transform a dark path into one filled with light.

A struggle that continued for 25 years eventually reached a new dawn. In a home once overshadowed by helplessness, debt, and tears, there is now a light of hard work, treatment, and hope.

Asim’s recovery is a reminder that addiction may break a person, but with timely support and a strong determination, its grip can also be overcome.

Allah Almighty says in the Qur’an:

“Do not despair of the mercy of Allah.”

No matter how deeply a person may be trapped in a difficult trial, the door of return is never closed. What is required is that a person acknowledge his condition, resolve to reform, and seek help from the right source.

Sometimes, one timely piece of advice, one sincere intervention, and one strong decision can completely change the course of a person’s life.

Addiction is not merely a habit; it is a trial that can engulf an entire family along with the individual. Yet, with treatment, patience, love, and trust in Allah Almighty, it is possible to overcome this trial.

Today, Asim’s life bears witness to the fact that after the darkness of despair, the light of hope can emerge once again.

A person who once begins to feel defeated by his own existence can, if given timely support, once again become a source of strength for his family.

May Allah Almighty grant every person struggling with addiction the strength to choose the right path, protect every family from addiction and destructive habits, and restore broken lives with peace, health, dignity, and hope.

Ameen Ya Rabb al-Alameen.

About the Author:
The author is a renowned Islamic scholar, religious scholar, teacher of Hajj pilgrims, Shariah advisor, author, columnist, President M***i of Darul Ifta Wal Irshad, Jama Masjid Bombay, and the Founder & Director of the Family First Guidance Centre.

10/08/2026

Sir Ab Nahi To Kab? || M***i Ashfaq Kazi || family first guidance centre

10/08/2026

حق ایجوکیشن اینڈ ریسرچ فاونڈیشن میں طلبہ کو کاؤنسلنگ کی تربیت
مفتی اشفاق قاضی کی کاؤنسلنگ کے طریقۂ کار، مؤثر سماعت اور بہتر رہنمائی کے عملی پہلوؤں پر تفصیلی گفتگو
کانپور، ۸۔ اگست: فیملی فرسٹ گائیڈنس سینٹر ممبئی کے بانی و ڈائریکٹر، معروف عالم دین مفتی اشفاق قاضی ان دنوں کانپور کے علمی دورے ہیں، جمعہ ۷ اگست کو کانپور حق ایجوکیشن اینڈ ریسرچ فاونڈیشن میں طلبہ، اساتذہ اور علماء سے کاؤنسلنگ کے فن، مؤثر رہنمائی اور لوگوں کی بات سننے کے طریقۂ کار پر خصوصی خطاب کیا، تقریباً دو سے ڈھائی گھنٹے جاری رہنے والی اس نشست میں تقریباً ۴۰ تا ۴۵ طلبہ کے علاوہ ادارے کے اساتذہ اور شہر کے دیگر علماء نے بھی شرکت کی، واضح رہے کہ حق ایجوکیشن میں مرکز المعارف طرز پر بچوں کے لیے دو سالہ انگلش ڈپلومہ کورس بھی کرایا جاتا ہے، مفتی اشفاق قاضی نے اپنے خطاب میں کاؤنسلنگ کے بنیادی اصول، ایک اچھے کاؤنسلر کی خصوصیات، کاؤنسلنگ کی ضرورت و افادیت اور اس کے ذریعے مسائل سے دوچار افراد کی بہتر رہنمائی کے مختلف پہلوؤں پر تفصیلی روشنی ڈالی، انہوں نے خاص طور پر لوگوں کی بات توجہ سے سننے کی اہمیت، مؤثر سماعت کے مختلف طریقوں اور اس کی افادیت پر گفتگو کرتے ہوئے بتایا کہ کسی بھی شخص کی صحیح رہنمائی کے لیے ضروری ہے کہ پہلے اس کی بات کو پوری توجہ، صبر اور سمجھ بوجھ کے ساتھ سنا جائے، اس کے بعد مسئلے کی نوعیت کو سمجھ کر مناسب رہنمائی کی جائے، بتادیں کہ یہ علمی محاضرہ محض یک طرفہ خطاب تک محدود نہیں تھا بلکہ اسٹوڈنٹ اور مفتی صاحب کے درمیان مسلسل تبادلۂ خیال بھی ہوتا رہا، اسٹوڈنٹ نے کاؤنسلنگ سے متعلق متعدد سوالات کیے، جن کے جوابات مفتی اشفاق قاضی نے نہایت خوش اسلوبی سے عملی مثالوں کے ذریعے دیے، تمام طلبہ، اساتذہ اور دیگر شرکاء نے نہایت توجہ اور یکسوئی کے ساتھ نشست میں شرکت کی، نشست کے اختتام پر متعدد طلبہ نے کاؤنسلنگ اور رہنمائی کے اس شعبے میں مزید معلومات اور تفصیلات حاصل کرنے کی خواہش کا اظہار کیا، جس پر انہیں ضروری رہنمائی فراہم کی گئی، مفتی اشفاق قاضی نے اس موقع پر اس بات پر زور دیا کہ علماء، ائمہ، مفتیان کرام اور دینی رہنماؤں کے لیے صرف علمی صلاحیت کافی نہیں بلکہ لوگوں کو سمجھنے، ان کے مسائل سننے اور مناسب انداز میں ان کی رہنمائی کرنے کی صلاحیت بھی بے حد اہم ہے، انہوں نے کہا کہ اس طرح کی تربیت کا مقصد ایسے ائمہ، قائدین، مفتیان اور علماء تیار کرنا ہے جو معاشرے کے افراد کی بہتر رہبری و رہنمائی کرتے ہوئے اپنا مؤثر اور مثبت کردار ادا کرسکیں۔ الحمدللہ، تقریباً دو سے ڈھائی گھنٹے پر مشتمل یہ نشست انتہائی کامیاب رہی اور شرکاء نے اس سے بھرپور استفادہ کیا۔

08/08/2026

نشے کی طویل جنگ کے بعد عاصم کی نئی صبح
مفتی اشفاق قاضی

انسان کی زندگی میں بعض اوقات ایک غلط قدم ایسا موڑ بن جاتا ہے جہاں سے واپسی کا راستہ برسوں تک دکھائی نہیں دیتا، ابتدا میں محض شوق، تجسس یا غلط صحبت میں اٹھایا گیا ایک قدم رفتہ رفتہ ایسی زنجیر بن جاتا ہے جو انسان کی صحت، سوچ، کردار، روزگار اور رشتوں سب کو اپنی گرفت میں لے لیتی ہے، نشہ صرف ایک فرد کی تباہی کا نام نہیں، بلکہ اس کے اثرات گھر کی چار دیواری سے نکل کر پورے خاندان کے سکون کو متاثر اور تہ وبالا کردیتے ہیں،خاندان کا ایک فردجب نشے کی قید میں گرفتار ہوتا ہے تو اس کے ساتھ اس کی بیوی، بچے، والدین اور بہن بھائی بھی ایک طویل آزمائش سے گزرتے ہیں، ایسا ہی ایک نشے کی لت میں مبتلا شخص کا درد بھرا معاملہ ۱۶اپریل ۲۰۲۶کو فیملی فرسٹ گائیڈنس سینٹر میں آیا، جہاں دو خواتین ایک نشے کے شکار شخص کی اہلیہ اور دوسری اس کی بڑی بہن ،انتہائی پریشانی، بے بسی اور امید کے ملے جلے جذبات کے ساتھ ہمارے مرکز پہنچیں، ان کے چہروں پر برسوں کی اذیت اور دل میں ایک ہی سوال تھا کہ کیا ان کا عزیز اس تباہ کن عادت سے نجات حاصل کر سکتا ہے؟ انہوں نے تقریباً ایک گھنٹے تک اپنے گھر کے حالات، درپیش مشکلات اور اس کرب کا ذکر کیا جس سے وہ مسلسل گزر رہے تھے، انہیں حوصلہ دیا گیا کہ نشہ اگرچہ ایک خطرناک بیماری ہے، لیکن مناسب علاج، مسلسل رہنمائی اور مضبوط ارادے کے ذریعے اس سے باہر نکلنا ممکن ہے، انہیں مشورہ دیا گیا کہ متاثرہ شخص کو مرکز لایا جائے تاکہ اس کی اصل صورتحال کو سمجھ کر مناسب طریقۂ علاج اختیار کیا جا سکے، جب ۳۸سالہ عاصم شیخ (فرضی نام)، ساکن ناگپاڑہ، ہمارے سامنے آئے تو ان کی زندگی کے پچیس سالہ سفر کی ایک تلخ تصویر سامنے آئی،طبی و نفسیاتی اعتبار سے وہ متعدد نشوں کے استعمال کی بیماری (پولی سبسٹنس یوز ڈس آرڈر) کا شکار تھے، کم عمری ہی میں، تقریباً ۱۰سے ۱۲سال کی عمر میں، نشے کی دنیا میں قدم رکھنے والے عاصم گزشتہ کئی برسوں سے تمباکو، چرس، گانجا، بٹن، ایم ڈی اور براؤن شوگر (گرد) جیسے خطرناک نشوں کے استعمال میں مبتلا تھے، پچیس سال کی اس طویل جدوجہد نے ان کی زندگی کے کئی شعبوں کو متاثر کر دیا تھا، روزگار ختم ہو چکا تھا، قرض کا بوجھ بڑھ گیا تھا، بیوی بچوں کے ساتھ تعلقات میں دوریاں پیدا ہو گئی تھیں اور معاشرتی عزت بھی شدید متاثر ہورہی تھی، کبھی جو شخص اپنے خاندان کے لیے سہارا بن سکتا تھا، وہ خود ایک ایسی بیماری میں گرفتار تھا جس سے نکلنے کے لیے مدد اور رہنمائی کی ضرورت تھی، فیملی فرسٹ گائیڈنس سینٹر کے تجربہ کار کاؤنسلر معین الدین پیٹی والا نے عاصم کے ساتھ تفصیلی نشست کی، سب سے پہلے ان میں بیماری کی حقیقت کو سمجھنے اور اپنی موجودہ حالت کا جائزہ لینے کی صلاحیت پیدا کرنے پر توجہ دی گئی، انہیں یہ احساس دلایا گیا کہ نشہ محض ایک بری عادت نہیں بلکہ ایک ایسی بیماری ہے جو انسان کی سوچ، صحت، مالی حالت اور خاندانی زندگی کو متاثر کر دیتی ہے،اس کے بعد ترغیبی کاؤنسلنگ کے ذریعے ان کے اندر تبدیلی کی خواہش پیدا کرنے پر کام کیا گیا، انہیں نشے کے جسمانی، ذہنی، مالی اور خاندانی نقصانات سے آگاہ کیا گیا اور یہ سمجھایا گیا کہ زندگی کو دوبارہ سنوارنے کے لیے ایک مضبوط اور فیصلہ کن قدم اٹھانا ضروری ہے، چونکہ براؤن شوگر اور دیگر خطرناک نشوں کا طویل استعمال صرف مشورے یا گفتگو سے ختم ہونا آسان نہیں تھا، اس لیے طبی ضرورت کو دیکھتے ہوئے انہیں اوپیئڈ سبسٹی ٹیوشن تھراپی (او ایس ٹی) کے لیے گوکل داس تیج پال اسپتال ریفر کیا گیا، وہاں ان کا باقاعدہ علاج شروع ہوا، فیملی فرسٹ گائیڈنس سینٹر کے کاؤنسلر جناب معین الدین پیٹی والا صاحب نے علاج کے دوران بھی ان سے مسلسل رابطہ رکھا، ان کی حوصلہ افزائی کی اور اہلِ خانہ کو بھی ضروری رہنمائی فراہم کرتے رہے، تقریباً ۱۵سے ۲۰دن کے علاج کے بعد جب عاصم اسپتال سے واپس گھر آئے تو ان کی زندگی میں نمایاں تبدیلی آچکی تھی، انہوں نے براؤن شوگر، چرس، گانجا، ایم ڈی اور دیگر خطرناک نشوں سے مکمل دوری اختیار کرلی تھی، تمباکو کی عادت میں بھی نمایاں کمی آئی، جس پر مزید بہتری کے لیے ٹوبی کو سسیشن کے ذریعے کام جاری ہے، علاج کے ساتھ ساتھ عاصم نے اپنی معاشی حالت بہتر بنانے کے لیے بھی کوشش شروع کی اور اسپتال سے واپسی کے تقریباً ایک ماہ کے اندر نئی ملازمت حاصل کرلی، آج تقریباً تین ماہ بعد وہ ایک متوازن اور صحت مند زندگی گزار رہے ہیں، روزگار سے وابستہ ہیں اور اپنے بیوی بچوں کے ساتھ دوبارہ محبت، اعتماد اور سکون کا رشتہ قائم کر رہے ہیں،حالیہ مذاکرہ میں ان کی اہلیہ اور بڑی بہن نے خوشی اور اطمینان کا اظہار کرتے ہوئے بتایا کہ جس شخص کے مستقبل سے کبھی مایوسی نظر آرہی تھی، آج وہی انسان دوبارہ اپنے خاندان کے درمیان موجود ہے، بروقت رہنمائی، درست علاج اور مسلسل حوصلہ افزائی نے ایک بکھرتی ہوئی زندگی کو نئی سمت عطا کر دی ہے، عاصم کی داستان صرف ایک شخص کے نشہ چھوڑنے کی کہانی نہیں، بلکہ ایک ایسے خاندان کی جدوجہد کی تصویر ہے جس نے مایوسی کے باوجود امید کا دامن نہیں چھوڑا، یہ ایک ایسے سفر کی داستان ہے جس میں علاج، رہنمائی اور عزم نے مل کر ایک تاریک راستے کو روشنی میں بدل دیا۔ ۲۵برس تک جاری رہنے والی یہ کشمکش آخرکار ایک نئی صبح پر ختم ہوئی، جس گھر میں کبھی بے بسی، قرض اور آنسوؤں کا سایہ تھا، وہاں آج محنت، علاج اور امید کی روشنی نظر آتی ہے، عاصم کی واپسی اس بات کی مثال ہے کہ نشہ انسان کو توڑ ضرور سکتا ہے، مگر صحیح وقت پر ملنے والی مدد اور مضبوط ارادے کے سامنے اس کی گرفت بھی کمزور پڑ جاتی ہے، قرآنِ کریم میں اللہ تعالیٰ کا واضح ارشاد ہے: کی اللہ سے ناامید نہ ہو۔انسان کتنی ہی گہری آزمائش میں کیوں نہ گھِر جائے، واپسی کا دروازہ کبھی بند نہیں ہوتا، شرط یہ ہے کہ وہ اپنی حالت کا اعتراف کرے، اصلاح کا عزم کرے اور مدد کے لیے صحیح دروازہ کھٹکھٹائے، بعض اوقات ایک بروقت مشورہ، ایک مخلص رہنمائی اور ایک مضبوط ارادہ کسی کی پوری زندگی کا رخ بدل دیتا ہے، نشہ صرف ایک عادت نہیں، بلکہ ایک ایسی آزمائش ہے جو فرد کے ساتھ پورے خاندان کو اپنی لپیٹ میں لے لیتی ہے؛ لیکن علاج، صبر، محبت اور اللہ تعالیٰ پر یقین کے ساتھ اس آزمائش سے نکلنا ممکن ہے،آج عاصم کی زندگی اس حقیقت کی گواہ ہےکہ مایوسی کے اندھیروں کے بعد امید کی روشنی ضرور آتی ہے،جس انسان کو کبھی اپنے ہی وجود سے شکست کا احساس ہونے لگے، اگر اسے وقت پر سہارا مل جائے تو وہ دوبارہ اپنے خاندان کا سہارا بن سکتا ہے، اللہ تعالیٰ ہر مبتلا انسان کو صحیح راستہ اختیار کرنے کی توفیق عطا فرمائے، ہر گھر کو نشے اور تباہ کن عادتوں سے محفوظ رکھے اور بکھری ہوئی زندگیوں کو سکون، صحت اور عزت کے ساتھ دوبارہ آباد فرمائے۔ آمین یا رب العالمین۔
(مضمون نگار معروف عالم دین، مشہور مذہبی اسکالر، معلم حجاج، شریعہ ایڈوائزر، مصنف، کالم نگار ، صدر مفتی دارالافتاء والارشاد جامع مسجد بمبئی اور فیملی فرسٹ گائیڈنس سینٹر کے بانی و ڈائریکٹر ہیں)

01/08/2026

31/07/2026

گانجے کی دلدل سے نجات اور نشے پر فتح کی داستان
مفتی اشفاق قاضی
اللہ تعالیٰ نے انسان کو عقل، شعور اور ارادے کی وہ عظیم نعمت عطا فرمائی ہے جو اسے دیگر مخلوقات سے ممتاز کرتی ہے، یہی عقل جب ایمان، تقویٰ اور پاکیزہ ماحول کی روشنی میں پروان چڑھتی ہے تو ایک خوشحال خاندان کی بنیاد بنتی ہے، لیکن جب اس پر نشے کا پردہ پڑ جائے تو صرف ایک انسان ہی نہیں بگڑتا، بلکہ اس کے ساتھ ایک بیوی کی مسکراہٹ، بچوں کا بچپن اور پورے گھر کا سکون بھی آہستہ آہستہ ختم ہونے لگتا ہے،نشہ کبھی صرف ایک بری عادت نہیں رہتا، بلکہ رفتہ رفتہ محبت، اعتماد، ذمہ داری اور خاندانی رشتوں کو نگلنے والا ایسا خاموش زہر بن جاتا ہے جو بظاہر زندہ انسانوں کو بھی اندر سے مردہ بنادیتا ہے، ایسا ہی ایک دردناک واقعہ ہمارے سامنے آیا، جس میں اللہ تعالیٰ کے فضل، سچی توبہ، صحیح علاج اور بروقت رہنمائی نے ایک بکھرتے ہوئے خاندان کو نئی زندگی عطا کر دی۔فائزہ (فرضی نام) ایک معصوم بچے کی ماں تھی، اچانک وہ شدید ذہنی تناؤ، غش آنے اور گھبراہٹ کے دوروں (پینک اٹیکس) کا شکار ہونے لگی، والدین نے جب بیٹی کی بگڑتی ہوئی جسمانی اور نفسیاتی حالت دیکھی تو مختلف معالجین سے رجوع کیا،طبی معائنے کے بعد معلوم ہوا کہ وہ شدید خوف، مسلسل ذہنی دباؤ اور اضطراب میں مبتلا ہے، جس کے لیے ادویات کے ساتھ ساتھ کاؤنسلنگ بھی ناگزیر ہے، جب اس معاملے کی تہہ تک پہنچنے کی کوشش کی گئی تو ایک تلخ حقیقت سامنے آئی، اس بظاہر خوشحال ازدواجی زندگی کے پس منظر میں ایک خاموش زہر سرایت کر رہا تھا، شوہر سعید (فرضی نام) بنیادی طور پر خوش اخلاق، نرم مزاج اور ذمہ دار انسان تھا، لیکن گانجے کی لت نے رفتہ رفتہ اس کی شخصیت، گھریلو ذمہ داریوں اور ازدواجی زندگی کو بری طرح متاثر کرنا شروع کر دیا تھا، ابتدا میں فائزہ اس عادت کی سنگینی کو سمجھ نہ سکی، لیکن وقت گزرنے کے ساتھ سعید کا مزاج بدلنے لگا، کاروبار سے دلچسپی کم ہونے لگی، گھر کے معاملات نظر انداز ہونے لگے اور نشے کے اثرات اس کی روزمرہ زندگی پر نمایاں ہونے لگے، بچے بھی کبھی باپ کی سرخ آنکھوں کو دیکھتے، کبھی اس کے غیر معمولی خوشی یا اچانک افسردہ رویے پر حیران ہو کر سوال کرتے کہ ’’ابو آج ایسے کیوں لگ رہے ہیں؟‘‘ یہ معصوم سوال فائزہ کے دل کو چیر کر رکھ دیتا تھا، کیونکہ اس کے پاس اس کا کوئی جواب نہیں تھا، ایک طرف شوہر کی بگڑتی ہوئی عادت تھی اور دوسری طرف بچے کا مستقبل، وہ ہر رات اسی کشمکش میں آنسو بہاتی کہ اپنے گھر کو بچائے یا اپنے بچے کو اس ماحول سے دور لے جائے، یہی ذہنی کشمکش رفتہ رفتہ اس کی نفسیاتی صحت پر اس قدر اثر انداز ہوئی کہ وہ پینک اٹیکس اور شدید اضطراب کا شکار ہو گئی، شوہر کے نشے کی یہ کیفیت کئی کئی ماہ تک جاری رہتی، کچھ عرصے کے لیے سعید نشہ چھوڑ دیتا، لیکن پھر دوبارہ اسی دلدل میں جا گرتا، آخرکار حالات سے تنگ آ کر فائزہ اپنے بچے کو لے کر مائیکے چلی آئی اور علیحدگی کا فیصلہ کرنے لگی، حیرت کی بات یہ تھی کہ سعید کے والدین بھی اپنے بیٹے کی اس بری عادت سے سخت پریشان تھے اور بہو کی بات کو درست تسلیم کرتے تھے،یوں ایک آباد گھر ٹوٹنے کے دہانے پر پہنچ چکا تھا۔اسی دوران کسی خیر خواہ نے انہیں فیملی فرسٹ گائیڈنس سینٹر سے رہبری لینے کا مشورہ دیا، وہ ہمارے یہاں آئے تو ہمارے کاؤنسلر جناب معین الدین پیٹی والا نے نہایت تحمل، ہمدردی اور باریک بینی کے ساتھ اس پورے معاملے کو سمجھا، سب سے پہلے فائزہ کی ذہنی کیفیت کو سنبھالنے کے لیے مختلف نفسیاتی مشقیں اور گراؤنڈنگ ٹیکنیکس سکھائی گئیں تاکہ وہ اپنے خوف اور اضطراب پر قابو پا سکے،اس کے بعد سعید کو سینٹر میں مدعو کیا گیا، تفصیلی گفتگو سے واضح ہوا کہ وہ گانجے کی شدید لت میں مبتلا ہیں اور اس کی نفسیاتی، خاندانی اور معاشی زندگی بری طرح متاثر ہو رہی ہے، معین الدین پیٹی والا نے حکمت، شفقت اور سائنسی بنیادوں پر مبنی موٹیویشنل انہانسمنٹ تھیراپی کے ذریعے سعید میں تبدیلی کی خواہش پیدا کی، اسے منشیات کے جسمانی، نفسیاتی، روحانی اور خاندانی نقصانات سے آگاہ کیا گیا (سائیکو ایجوکیشن)، مثبت طرزِ زندگی اپنانے کی تربیت دی گئی اور رویوں کی اصلاح پر مسلسل کام کیا گیا، ساتھ ہی اسے نشے کی لت سے نجات کے ماہر معالجین (ڈی ایڈکشن اسپیشلسٹس) اور ماہرینِ نفسیات سے بھی مربوط کیا گیا تاکہ طبی علاج اور کاؤنسلنگ دونوں ساتھ ساتھ جاری رہیں، اسے یہ بھی سکھایا گیا کہ جب نشے کی شدید طلب (کریونگ) پیدا ہو تو اس لمحے کو کس طرح قابو میں رکھنا ہے، خود کو متبادل مصروفیات میں لگانا ہے اور دوبارہ نشے کی طرف لوٹنے سے کیسے بچنا ہے، نشے کی تاریکی سے روشنی کی طرف واپسی کا یہ سفر آسان نہیں تھا، لیکن مسلسل رہنمائی، علاج اور اپنی اصلاح کی سچی خواہش نے حالات بدلنے شروع کر دیے، سعید کو اپنی غلطی کا شدید احساس ہوا۔ اس نے سچے دل سے اللہ تعالیٰ کے حضور توبہ کی اور اس بری عادت کو ہمیشہ کے لیے چھوڑنے کا پختہ عزم کیا، الحمدللہ کئی ماہ گزرنے کے باوجود اس نے نہ گانجے کو ہاتھ لگایا اور نہ ہی دوبارہ اس کی طرف رجوع کیا، سگریٹ نوشی پر بھی اس نے ایک حد تک قابو پا لیا، اس کے رویے میں نرمی آئی، کاروبار میں دلچسپی دوبارہ پیدا ہوئی، گھریلو ذمہ داریوں کا احساس بیدار ہوا اور اہلِ خانہ کے ساتھ تعلقات میں خوشگوار تبدیلی آنے لگی، یہ سب دیکھ کر فائزہ اور بچوں کے دل میں دوبارہ اعتماد پیدا ہونے لگا، چونکہ بچے کا تعلیمی سال مائیکےکے علاقے کے اسکول میں شروع ہو چکا تھا، اس لیے فوری طور پر مستقل طور ایک ہی گھر میں رہنا ممکن نہ تھا، اس صورتِ حال میں کاؤنسلنگ کے ذریعے ایک مناسب درمیانی حل نکالا گیا، اب ہفتہ اور اتوار کے علاوہ دیگر تعطیلات میں فائزہ اپنے بچے کے ساتھ سعید کے پاس آتی ہے، پورا خاندان ساس، سسر اور دیگر اہلِ خانہ کے ساتھ محبت بھرے ماحول میں وقت گزاراجاتا ہے، سیر و تفریح ہوتی ہے اور تعلقات کو مزید مضبوط بنانے کی کوشش ہوتی ہے، انشاء اللہ آئندہ تعلیمی سال میں بچے کا داخلہ مقامی اسکول میں کرا کے پورا خاندان دوبارہ ایک چھت کے نیچے آباد ہو جائے گا۔اسلامی شریعت میں عقل اللہ تعالیٰ کی عطا کردہ ایک عظیم امانت ہے، اور ہر وہ چیز جو عقل کو ماؤف کرے، انسان کو غفلت میں ڈالے اور اس کے اخلاق و کردار کو تباہ کرے، وہ حرام ہے۔ رسول اللہ ﷺ نے فرمایا ’’ہر نشہ آور چیز حرام ہے‘‘۔ (صحیح مسلم)، نشہ صرف جسم کو نقصان نہیں پہنچاتا بلکہ انسان کی عزت، روزگار، اعتماد، محبت اور خاندانی سکون کو بھی دیمک کی طرح چاٹ جاتا ہے، لیکن خوش آئند حقیقت یہ ہے کہ اگر انسان اپنی کمزوری کو تسلیم کرے، سچے دل سے اللہ تعالیٰ کی طرف رجوع کرے، علاج کو اختیار کرے اور ماہرین کی رہنمائی پر ثابت قدمی سے عمل کرے تو گہری سے گہری لت بھی ختم ہو سکتی ہے اور بکھرتے ہوئے گھر دوبارہ آباد ہو سکتے ہیں۔اللہ تعالیٰ کا ارشاد ہے ، ترجمہ : ’’اپنے آپ کو اپنے ہی ہاتھوں ہلاکت میں نہ ڈالو‘‘۔(البقرہ) ، یہی اس واقعے کا اصل پیغام ہے کہ نشے پر فتح صرف ایک فرد کی کامیابی نہیں بلکہ پورے خاندان کی نئی زندگی ہے،جب انسان اللہ تعالیٰ کی طرف سچے دل سے رجوع کرتا ہے، اپنی غلطیوں کی اصلاح کرتا ہے اور اہلِ علم و ماہرین کی رہنمائی قبول کرتا ہے تو ناممکن دکھائی دینے والے مسائل بھی حل ہونے لگتے ہیں،بکھرے ہوئے رشتے پھر سے جڑ جاتے ہیں، اجڑے ہوئے گھر دوبارہ آباد ہو جاتے ہیں اور مایوسی کی تاریکی امید، سکون اور رحمت کی روشنی میں بدل جاتی ہے۔
(مضمون نگار معروف عالم دین، مشہور مذہبی اسکالر، معلم حجاج، شریعہ ایڈوائزر، مصنف، کالم نگار ، صدر مفتی دارالافتاء والارشاد جامع مسجد بمبئی اور فیملی فرسٹ گائیڈنس سینٹر کے بانی و ڈائریکٹر ہیں)

24/07/2026

ارسلان اور شمائلہ : ٹوٹتے رشتے سے نئی زندگی تک!
مفتی اشفاق قاضی
ازدواجی زندگی میں محبت صرف ایک احساس نہیں بلکہ ہر روز دی جانے والی قربانی، برداشت اور ایثار کا نام ہے، جب انا محبت پر غالب آ جاتی ہے تو ایک گھر نہیں ٹوٹتا، کئی دل بکھر جاتے ہیں، کئی خواب دفن ہو جاتے ہیں اور ان سب کے درمیان اکثر معصوم بچے سب سے بڑی قیمت ادا کرتے ہیں، انسان جب اپنی انا کی آگ کو ہوا دیتا ہے تو اکثر اسی کی تپش میں محبت کے گلستان جھلسنے لگتے ہیں، وہ بظاہر سمجھتے ہیں کہ ایک دوسرے سے نفرت میں انا کی تسکین کررہے ہیں لیکن دراصل دونوں شیطان کے کام کو آگے بڑھا کر اسے خوش ہونے کا موقع فراہم کررہے ہوتےہیں، رشتوں کا تقدس محض ایک نکاح نامے کے کاغذ پر رقم نہیں ہوتا، بلکہ یہ دو روحوں اور دو مختلف دنیاؤں کے درمیان باہمی ایثار کا ایک سحر انگیز پیمانہ ہوتا ہے، ایسا ہی ایک دل دوز واقعہ ہمارے سامنے آیا، جہاں ایک نوہیتا جوڑا اختلافات کی آگ میں سلگ رہا تھا۔ شوہر ارسلان (فرضی نام) جو جنوبی ہند کی تہذیب میں پلا بڑھا ایک انجینئر تھا، اور اہلیہ شمائلہ (فرضی نام) شمالی ہند کے روایتی ماحول کی پرورش یافتہ، پیشے سے ایک ڈاکٹر تھیں، دونوں کے درمیان نہ دین کی کمی تھی اور نہ ہی ابتدا میں جذبات و احساسات کی کمی، مگر ان کے رہن سہن کے انداز، بولی کے لہجے اور خوراک کے ذائقوں کا تنوع، علاقائی تہذیب وتمدن کا فرق رفتہ رفتہ ذہنی دوریوں کا سبب بن گیا، شوہر کی تمنا تھی کہ اس کی شریکِ حیات گھر اور خانگی امور کو اپنی پہلی ترجیح بنائے، جبکہ بیوی اپنے پیشہ ورانہ تشخص اور تعلیمی قابلیت کو برقرار رکھنا چاہتی تھی، دونوں کے درمیان ننھے پھول جیسے بچے کی آمد بھی اس سلگتی ہوئی آگ کو بجھا نہ سکی، بلکہ اس معصوم کی تربیت اور نگہداشت کی ذمہ داریوں نے ان کی باہمی تلخیوں کو مزید وسعت دے دی، جوں جوں دن بیتتے گئے، باہمی احترام کا سحر ٹوٹتا گیا اور اس کی جگہ تکرار، طعنہ زنی، نفرت و عداوت اور دلی دوریوں نے لے لی، جہاں شمائلہ اپنے جذبات پر قابو نہ رکھتے ہوئے شدید اشتعال اور غصے کا اظہار کرتی، وہی دوسری جانب ارسلان بھی مسلسل تنقیدی انداز، جواب دہی کے نام پر طنز اور چبھنے والی گفتگو سے حالات کو بہتر بنانے کے بجائے مزید بگاڑتا رہا؛ یوں دونوں ایک دوسرے کے ردِعمل کو مسلسل بڑھاتے رہے، مائیکے والوں کی بے جا مداخلت اور شوہر کو اپنے ہی سسرال کے مکان سے ذلت و رسوائی کے ساتھ نکالے جانے نے اس معاملے کو مزید تکلیف دہ بنادیا، ایک مظلوم اور تڑپتا ہوا باپ اپنے معصوم جگر گوشے کی ایک جھلک کو ترستا ہوا اپنے والدین کے سائے میں آنسو بہانے پر مجبور ہوگیا، اور معصوم بچہ باپ کی شفقت اور دادیہال کی آغوش سے محروم ہو کر رہ گیا، چھ ماہ کا یہ طویل اور دردناک فراق دونوں کے دلوں کو چھیدتا رہا اور یوں لگتا تھا کہ اب اس ٹوٹے ہوئے شیشے کا دوبارہ جڑنا ناممکن ہے، لیکن سچ ہی کہا گیا ہے کہ ’گھر دیواروں سے نہیں، برداشت سے آباد ہوتے ہیں؛ اور جب برداشت ختم ہو جائے تو محل بھی ویران ہو جاتے ہیں‘‘۔جب یہ بکھرتا ہوا شیرازہ ہمارے فیملی فرسٹ گائیڈنس سینٹر کی دہلیز پر پہنچا، تو ہمارے ماہر کاؤنسلر جناب معین الدین پیٹی والا نے اس معاملے کی حساسیت اور درد کو اپنے دل میں محسوس کرتے ہوئے اس کی اصلاح کا بیڑا اٹھایا، انہوں نے نہایت غیر جانب داری، شفقت اور باریک بینی سے دونوں کے دکھ اور زخمی جذبات کو سنا، سائنسی بنیادوں پر کیے گئے شخصیتی جائزے سے معلوم ہوا کہ دونوں اپنی رائے پر غیر معمولی اصرار رکھنے والے، سخت گیر اور غالب مزاج (ڈومینیٹنگ) شخصیات کے حامل تھے، اور یہی خصوصیت ہر چھوٹے اختلاف کو شدت اختیار کرنے پر مجبور کر رہی تھی، اس نازک موڑ پر معین الدین پیٹی والا صاحب نے انفرادی نشستوں، باہمی گفتگو کی نشستوں اور پھر دونوں کے اہل خانہ کی مشترکہ نشستوں (فیملی سیشنز) کا ایک طویل اور صبر آزما سلسلہ شروع کیا، انہوں نے کاؤنسلنگ اور نفسیاتی علاج کی جدید تکنیکوں کو استعمال کرتے ہوئے دونوں کے لیے رویوں کی اصلاح (بیہیویئر موڈیفکیشن)، غصے پر قابو پانے (اینگر مینجمنٹ)، ناگہانی حالات سے نمٹنے (کرائسس مینجمنٹ)، اور ان محرکات کی نشان دہی (ٹریگرز) پر کام کیا جو دوبارہ جھگڑے کا باعث بن سکتے تھے، نیز ان کے درمیان حدود کا تعیّن کیا گیا اور دوبارہ پرانے رویوں کی طرف لوٹنے سے روکنے کی ترغیب دی گئی، دونوں خاندانوں کو بھی حکمت کے ساتھ اس بات پر آمادہ کیا گیا کہ وہ ان کی نجی زندگی میں حد سے زیادہ مداخلت کے بجائے ان کے لیے سکون کا ذریعہ بنیں گے۔بالآخر، فیملی فرسٹ کے پلیٹ فارم سے معین الدین پیٹی والا کی یہ مسلسل اور منظم کاوش رنگ لائی، ارسلان، شمائلہ کو اپنی غلطیوں کا احساس ہوا، انہوں نے اپنے ماضی کے رویوں پر ایک دوسرے سے معافی مانگی اور آئندہ کے لیے محبت و احترام کے پکے قول و قرار اور عہدوپیمان کیے، یہ طے پایا کہ وہ الگ پرسکون آشیانہ بسائیں گے، ارسلان مالی اور نان و نفقہ کی ذمہ داریاں پوری ذمہ داری کے ساتھ ادا کرے گا، شمائلہ گھر داری، اپنی پیشہ ورانہ ذمہ داریوں اور بچے کی تربیت کے درمیان متوازن انداز اختیار کرے گی، اور بچے کو نانی اور دادی دونوں کی محبتوں کا مساوی حق حاصل ہوگا، اس عہدوپیمان پر دونوں نے دستخط کرتے ہوئے ایک دوسرے کا ہاتھ تھام کر ہنستے مسکراتے فیملی فرسٹ گائیڈنس سے نکل کر اپنی زندگی کا گویا دوبارہ آغاز کیا اور الحمدللہ اب دونوں خوشگوار ازدواجی زندگی گزاررہے ہیں، ازدواجی زندگی میں کامیاب وہ نہیں ہوتا جو ہر بحث جیت جائے، بلکہ وہ ہوتا ہے جو ہر اختلاف کے بعد بھی اپنے رشتے کو بچا لے، رشتے انا کی ضدی جنگوں سے نہیں، بلکہ باہمی تفہیم، ایک دوسرے کے مقام کا احترام اور تھوڑی سی لچک دکھانے سے بچائے جاسکتے ہیں، اگر بروقت صحیح رہنمائی اور صبر کا دامن تھام لیا جائے تو گہرے سے گہرا زخم بھی بھر سکتا ہے اور اجڑتے ہوئے چمن میں پھر سے بہار آ سکتی ہے، قرآنِ کریم نے میاں بیوی کے تعلق کو مودّت اور رحمت کا رشتہ قرار دیا ہے، جب دونوں اپنی انا کے بجائے اللہ تعالیٰ کی رضا، باہمی احترام، عفو و درگزر اور حسنِ معاشرت کو مقدم رکھتے ہیں تو بکھرتے ہوئے رشتے بھی سنور جاتے ہیں اور گھر دوبارہ سکون و محبت کا گہوارہ بن جاتا ہے، آخرکار حقیقت یہی ہے کہ ازدواجی زندگی کی سب سے بڑی فتح اپنے شریکِ حیات کو شکست دینا نہیں، بلکہ اپنی انا کو شکست دے کر اپنے گھر کو بچا لینا ہے۔
(مضمون نگار معروف عالم دین، مشہور مذہبی اسکالر، معلم حجاج، شریعہ ایڈوائزر، مصنف، کالم نگار ، صدر مفتی دارالافتاء والارشاد جامع مسجد بمبئی اور فیملی فرسٹ گائیڈنس سینٹر کے بانی و ڈائریکٹر ہیں)

17/07/2026

وہم کی گرفت میں ایک حافظِ قرآن
مفتی اشفاق قاضی
ممبئی میں ایک مقام پر قرآنِ کریم کی تفسیر کا مستقل ایک نظام ہمارا ہوا کرتا تھا، جہاں ہر ہفتے تفسیر کے حلقے ہوتے، آیات قرآنی پڑھ کر ان کے معانی ومفاہیم کا مذاکرہ ہوتا، اس تفسیر کی مجلس میں جہاں مرد حضرات شریک ہوتے، وہیں خواتین بھی ایک طرف شرعی پردے کے اہتمام کے ساتھ شریک رہتیں، چونکہ یہ مجالس ایک بڑے مکان کے دالان میں ہوا کرتی تھیں، اس لیے دالان کے ایک طرف مرد بیٹھتے اور دوسرے حصے میں خواتین ہوا کرتیں، تفسیر کے بعد مردوں کی طرف سے اور کبھی کبھار خواتین کی طرف سے بھی تفسیر و تشریح یا فقہ و فتاوی سے متعلق سوالات ہوا کرتے تھے، گھر ہونے کی وجہ سے بسا اوقات کچھ رشتہ دار بھی شامل درس ہوا کرتے، ایسے ہی ایک مرتبہ چنئی (فرضی نسبت) سے کچھ رشتہ دار درس میں شریک ہوئے ، جن میں ایک ۲۳سالہ حافظِ قرآن نوجوان بھی شامل تھا، نہایت خوش الحان انداز میں قرآنِ کریم کی تلاوت کرنے والے، انتہائی نیک، متقی ،خوش اخلاق نوجوان تھا، وہ دینی تربیت کے ساتھ ساتھ دنیاوی تعلیم سے بھی آراستہ و پیراستہ تھا اور الحمدللہ ایم بی بی ایس کے آخری سال میں پہنچ چکا تھا، اس نے ملک کے نہایت مشکل سمجھے جانے والے نیٹ NEET امتحان میں بھی نمایاں کامیابی حاصل کر کے سرکاری میڈیکل کالج میں داخلہ پایا تھا، تعلیم و تربیت دونوں اعتبار سے بھی وہ بہت اچھا تھا، مگر دوسری طرف اسے بہت عجیب و غریب وساوس آتے تھے، تفسیر کی مجلس ختم ہونے کے بعد، اس نوجوان نے درخواست کی کہ مجھے آپ سے تنہائی میں ایک مسئلہ عرض کرنا ہے، جب الگ بیٹھے تو اس نے اپنی کیفیت بیان کرتے ہوئے کہا کہ میں حافظِ قرآن ہوں، نماز کا پابند ہوں، لیکن اس کے باوجود میرے ذہن میں اللہ تبارک و تعالیٰ کے بارے میں، قرآنِ کریم کے بارے میں اور اللہ کے رسول ﷺ کے بارے میں اتنے گندے، نامناسب بلکہ کفر پر مبنی خیالات آتے ہیں کہ میں ان کا ذکر نہیں کر سکتا، وہ یہ کہتے کہتے فرطِ جذبات میں بہت تفصیل سے باتیں کرنے لگا اور ان خیالات کا ذکر بھی کرنے لگا، اس ذکر کو سننا اور سمجھنا میرے لیے ضروری تھا، لیکن حقیقی صورتحال ایسی تھی کہ کسی عام آدمی کے لیے یہ سب سن کر اپنے آپ کو قابو میں رکھنا بھی مشکل ہو جائے، اس کی یہ اذیت محسوس کرکے میرا دل درد سے بھر گیا کہ کس طرح ایک اچھا بھلا انسان اس طرح کے وساوس میں مبتلا ہو جاتا ہے، اس کی پوری گفتگو سننے کے بعد میرے لیے واضح ہو گیا کہ یہ ایمان کی کمزوری نہیں بلکہ ایک نفسیاتی کیفیت ہے، جس میں انسان شکوک و شبہات اور وساوس کی دنیا میں بری طرح پھنس جاتا ہے، چنانچہ میں نے اس سے مزید سوالات کیے کہ یہ سب کس وقت زیادہ ہوتا ہے؟ تو کہنے لگا کہ امتحان کے زمانے میں یہ سوالات بہت زیادہ بڑھ جاتے ہیں؛ امتحان کی تیاری کے دوران بہت سارے مسائل پیدا ہوتے ہیں، جنت کے بارے میں، آخرت کے بارے میں اور قرآنِ کریم جو کہ اللہ کا کلام ہے، اس کے بارے میں عجیب عجیب خیالات اچھلتے ہیں، دوران گفتگو وہ کہنے لگا کہ میرا عقیدہ اور میرا ایمان تو اللہ اور رسول ﷺپر بہت مضبوط ہے اور مجھے خود معلوم ہے کہ ان سب چیزوں کی طرف توجہ نہیں دینی چاہیے، انہیں اگنور کر کے اللہ تبارک و تعالیٰ کی ذات پر پورا یقین رکھنا چاہیے، مگر میں مجبور ہو جاتا ہوں، اس نے عالمی سطح کے بڑے بڑے شیوخ اور علماء کے نام لیے جن کے کورسز وہ کرچکا تھا اور اسلامی نقطۂ نظر سے اسے ان کورسز سے بہت زیادہ فائدہ بھی ہوا تھا، لیکن اس بیماری اور اس وسوسے سے اسے باہر نکلنا مشکل ہو رہا تھا، حالت یہ تھی کہ وہ قرآنِ کریم پڑھتے پڑھتے جب ان سوالات کا شکار ہوتا، تو اپنے آپ ہی لا حول ولا قوۃ الا باللہ پڑھ کر اپنے اوپر پھونکتا تھا اور سر پر بہت ہاتھ مارتا تھا، پھر اسے یہ خیال ستاتا تھا کہ اس طرح کے سوالات میرے ذہن میں آنے کا کیا مطلب ہے؟ کیا اللہ تبارک و تعالیٰ مجھ سے ناراض ہے؟ اور اگر وہ ناراض ہے تو پھر میری دنیا و آخرت کا کیا ہوگا؟ میں نے اس کی یہ تمام تفصیلی باتیں بہت اطمینان، تحمل اور توجہ سے سنیں، یہاں میں ضمناً ایک بات عرض کروں جو کاؤنسلرز ہیں، علماء ہیں اور مفتیانِ کرام ہیں جن کے پاس لوگ اپنے ایسے مسائل لے کر آتے ہیں؛ ان کے لیے یہ بہت اہم موضوع ہے کہ وہ سامنے والے کی بات کو بہت اطمینان سے سنیں، اسے انگریزی میں ایکٹو لسننگ کہتے ہیں، سامنے والے کی بات کو بہت توجہ کے ساتھ، بہت درد مندی کے ساتھ اور اس کی تکلیف کا پورا احساس کرتے ہوئے سننا اس مسئلے کے حل میں بہت مفیدثابتہوتاہے، اگر سامنے والے کی آنکھوں میں آنسو ہوں، تو سننے والے کے دل پر بھی رقت کی کیفیت ہونی چاہیے، اس کیفیت کے ساتھ جب بات سنی جائے تو ہم اس شخص کے دل کے قریب ہوجاتے ہیں اور سائل کو یہ اندازہ ہوتا ہے کہ یہ شخص میرے درد اور میری تکلیف کو پوری طرح سمجھ رہا ہے، اسی کیفیت کے ساتھ میں دیر تک اس کی بات سنتا رہا، بات سننے کے بعد، چونکہ وہ خود میڈیکل کا طالب علم تھا، میں نے اس کے سامنے دماغ کے کام کرنے کے انداز کو طبی طریقہ کار سے سمجھایا کہ دماغ کے اعصابی نظام اور اس کے ردِّعمل کے تحت ہمارا یہ پورا نظام کس طریقے سے متحرک ہو جاتا ہے، اس کے اثرات دماغ پر کیسے پڑتے ہیں، اور پھر دماغ کس طرح پورے جسم کے افعال کو کنٹرول کرتا ہے، میں نے اسے بتایا کہ’لا حول ولا قوۃ الا باللہ‘ پڑھنے کی صورت میں، بار بار سر پر ہاتھ مارنے کی صورت میں اور بار بار یہ سوچنے کی صورت میں تمہارا ذہن انہی خیالات میں مزید الجھتا چلا جائے گا اور یہی دائرہ مضبوط ہوتا جائے گا اور اس سے تمہارے مسائل مزید پیدا ہوں گے، اس لیے میں نے اس سے سردست یہ کہا کہ اب سے تم نہ اعوذ باللہ پڑھو اور نہ ہی لاحول پڑھو،اگر ذہن میں کوئی وسوسہ آئے، تو اس خیال کی جانب بھی خیال مت کرو؛ خیال آتا رہے گا، جاتا رہے گا، یہ صرف ایک خیال ہے، اس سے زیادہ کچھ نہیں، میں نے اسے فقہِ اسلامی کا ایک سنہرا اور مسلمہ اصول سمجھایا کہ ’’الیَقِینُ لَا یَزُولُ بِالشَّکِّ‘‘ یعنی یقین کبھی شک سے زائل نہیں ہوتا۔ شریعت میں یقین کو بنیاد بنایا گیا ہے، اس لیے محض شک و شبہ کی کوئی مستقل حیثیت نہیں ؛ یقین مکمل طور پر شک کو زائل کر دیتا ہے، میں نے اسے نماز کی مثال دی کہ اگر کسی کو نماز میں یہ شک ہو جائے کہ میری تین رکعتیں ہوئی ہیں یا چار، تو شریعت کا حکم یہ ہے کہ وہ شک کو چھوڑ کر تین پر عمل کرے کیونکہ یقین تین پر ہے، میں نے اس طالب علم سے کہا کہ تم ایک پیپر (کاغذ) پر اپنی وہ تمام کیفیات لکھ کر رکھو جن پر تمہیں سو فیصد یقین ہے، جیسے مجھے اللہ کی وحدانیت پر یقین ہے، اللہ کے رسول کی رسالت پر یقین ہے، جنت پر یقین ہے، آخرت پر یقین ہے اور اس پر یقین ہے کہ یہ دنیا اللہ ہی نے بنائی ہے، اس یقینی کیفیت کو اپنے سامنے لکھ کر رکھو اور اب جو شک و شبہ آئے، اس کے لیے نہ کوئی علاج کرو، نہ کوئی ورد کرو اور نہ ہی کوئی توجہ دو؛ کیونکہ جب تم اس کے رد میں کوئی ورد یا وظیفہ کرتے ہو تو اس کا خیال آنا ضروری ہو جاتا ہے، پھر یہی خیالات دماغ کو مزید اسی دائرے میں الجھاتے چلے جاتے ہیں اور یہ مرض بہت زیادہ بڑھ جاتا ہے، خلاصہ یہ ہے کہ بس اسے یکسر نظر انداز کرتے چلے جاؤ،الحمدللہ، دو سے تین تفصیلی مجلسوں کے بعد اسے بہت زیادہ اطمینان ہوا اور وہ اپنی اس کیفیت سے بہت حد تک باہر نکل آیا اور آہستہ آہستہ وہ اپنی مثبت مشغولیات اور پڑھائی میں مصروف ہوتا چلا گیا، اور اس مرض وسوسہ کی شدت بہت حد تک باہر نکلتا چلا گیا اور اس کے شب و روز معمول کی زندگی کی طرف لوٹنے لگے، اس طرح وہ اپنی نوجوانی ہی میں اس کیفیت پر قابو پانے میں کامیاب ہو گیا، الحمدللہ ایک مخلصانہ کوشش تھی جس میں اللہ تبارک و تعالیٰ نے اپنے فضل و کرم سے ہمیں کامیابی دی، ان ہی تجربات کی بنیاد پر ہم نے فیملی فرسٹ گائیڈنس سینٹر قائم کیا ہے تاکہ ایسے نوجوانوں اور خاندانوں کی دینی اور نفسیاتی دونوں پہلوؤں سے صحیح رہنمائی کی جا سکے، کیونکہ بہت سے لوگ بیماری کو ایمان کی کمزوری سمجھ بیٹھتے ہیں، حالانکہ بروقت صحیح رہنمائی ان کی زندگی بدل سکتی ہے، ہمارا مقصد یہی ہے کہ ایسے دکھی انسانوں کو ان کا نفسیاتی پہلو دیکھ کر، انتہائی ہمدردی، رازداری اور درست علمی و نفسیاتی اصولوں کے تحت سنبھال لیاجائے، ایسے مریضوں کو سب سے زیادہ ضرورت اس بات کی ہوتی ہے کہ ان کے وسوسوں کو ان کا ایمان نہ سمجھا جائے بلکہ ان کی بیماری سمجھ کر صحیح رہنمائی کی جائے، شریعت انسان کو مشقت میں ڈالنے نہیں بلکہ آسانی اور عافیت عطا کرنے آئی ہے، اس لیے ایسے مریضوں کو ملامت نہیں بلکہ محبت، صحیح رہنمائی اور مناسب نفسیاتی معاونت کی ضرورت ہوتی ہے، تاکہ اضطراب کی جگہ اطمینان لے لے اور اللہ کی بنائی ہوئی شریعت کی آسانیاں ان کے لیے عافیت کا ذریعہ بن جائیں، بسا اوقات انسان کا سب سے بڑا دشمن اس کا اپنا وہم ہوتا ہے، اور اس کا سب سے مؤثر علاج اللہ تعالیٰ پر کامل یقین، صحیح رہنمائی اور صبر کے ساتھ معمول کی زندگی کی طرف واپس لوٹ آنا ہوتا ہے،اللہ تعالیٰ ہم سب کو ہر طرح کے ظاہری و باطنی امراض سے محفوظ رکھے اور اپنی رحمت و عافیت نصیب فرمائے۔ آمین۔
(مضمون نگار معروف عالم دین، مشہور مذہبی اسکالر، معلم حجاج، شریعہ ایڈوائزر، مصنف، کالم نگار ، صدر مفتی دارالافتاء والارشاد جامع مسجد بمبئی اور فیملی فرسٹ گائیڈنس سینٹر کے بانی و ڈائریکٹر ہیں)