Deeni Taleemi Bord JUH Moradabad

24/08/2026

16/08/2026

باسمہ تعالیٰ
رپورٹ: یومِ آزادی کے موقع پر دینی تعلیمی بورڈ کے مکاتب کے خصوصی پروگرام
دینی تعلیمی بورڈ جمعیۃ علماء شہر و ضلع مرادآباد کے زیرِ اہتمام و زیرِ نگرانی حضرت مولانا مفتی سید ابوبکر صدیق صاحب منصورپوری، صدر دینی تعلیمی بورڈ جمعیۃ علماء شہر و ضلع مرادآباد،
15 اگست یومِ آزادی کے موقع پر شہر مرادآباد، ضلع مرادآباد اور دیگر اضلاع میں دینی تعلیمی بورڈ کے زیرِ انتظام مختلف مکاتب میں نہایت جوش و خروش، نظم و ضبط اور امن و امان کے ساتھ خصوصی پروگرام منعقد کیے گئے۔
یومِ آزادی کے موقع پر مکاتب کے ننھے منے طلبہ نے نہایت خوبصورت اور شاندار پروگرام پیش کیے۔ بچوں نے تقاریر، ملی ترانے، نعتیں اور مختلف تعلیمی و اصلاحی پروگرام پیش کرکے حاضرین کو متاثر کیا۔ پروگراموں میں مکاتب کے ذمہ داران، اساتذہ، اہلِ محلہ اور دیگر معززین نے بھرپور شرکت کی اور بچوں کی حوصلہ افزائی کی۔
اس موقع پر علماء کرام نے اپنے بیانات میں جنگِ آزادی میں علماء کرام کی عظیم قربانیوں اور تاریخی کردار کو اجاگر کیا اور ملک و ملت کی خدمت کے لیے ہمارے اکابرین کی جدوجہد اور قربانیوں کو نئی نسل کے سامنے پیش کیا۔ بچوں اور عوام کو اس بات سے واقف کرایا گیا کہ آزادی کی نعمت کے حصول میں ہمارے اسلاف اور علماء کرام نے بے مثال قربانیاں پیش کی ہیں۔
دینی تعلیمی بورڈ کے مکاتب میں زیرِ تعلیم یہ معصوم اور ننھے بچے یومِ آزادی کے پروگراموں میں انتہائی خوش و خرم نظر آئے۔ کسی کے ہاتھ میں لہراتا ہوا ترنگا تھا، کسی کے چہرے پر معصوم مسکراہٹ، اور زبان پر "ہندوستان زندہ باد" کے نعرے تھے۔ مختلف مقامات پر بچوں کی جانب سے پُرامن ریلیاں بھی نکالی گئیں، جن میں بچوں نے جوش و خروش کے ساتھ شرکت کی۔
یہ تمام پروگرام نہایت منظم انداز میں اور مکمل امن و امان کے ماحول میں منعقد ہوئے۔ مکاتب کے بچوں نے نہ صرف یومِ آزادی کی خوشیوں میں شرکت کی بلکہ اپنی صلاحیتوں، اعتماد اور تربیت کا بھی بہترین مظاہرہ کیا۔ ان پروگراموں کے ذریعے بچوں میں وطن سے محبت، نظم و ضبط، اجتماعی شعور اور اپنے اسلاف کی قربانیوں سے واقفیت کا جذبہ مزید پروان چڑھا۔
دینی تعلیمی بورڈ کے مکاتب میں منعقد ہونے والے یہ پروگرام اس بات کا خوبصورت مظہر ہیں کہ دینی تعلیم کے ساتھ بچوں کی تربیت، اخلاق سازی، وطن سے محبت اور قومی شعور کی بیداری پر بھی خصوصی توجہ دی جا رہی ہے۔
اللہ تعالیٰ دینی تعلیمی بورڈ کے تمام مکاتب، ذمہ داران، اساتذہ اور طلبہ کی ان کوششوں کو قبول فرمائے اور ہمارے ملک میں امن، سلامتی، خوشحالی اور باہمی محبت کو قائم و دائم فرمائے۔

مولانا محسن جمال
معاون دینی تعلیمی بورڈ
جمعیۃ علماء مرادآباد
15.08.2026

02/04/2026

دینی تعلیمی بورڈ جمیعت العلماء مرادآباد کے مکاتب میں داخلہ جاری ہے