12/05/2026
ခရစ်ယာန်တို့ရဲ့ပေးလှူခြင်း(၇)မျိုး
Ye Ming
နိဒါန်း
ပေးကမ်းခြင်းဟာ ဝတ်ပြုကိုးကွယ်ခြင်းရဲ့ အစိတ်အပိုင်းတစ်ခုဖြစ်ပါသည်။ ခရစ်ယာန်ယုံကြည်သူ တွေရဲ့ပေးကမ်းလှူဒါန်းခြင်းဆိုတာ မိမိပိုင်ဆိုင်သမျှသည် ဘုရားသခင်ပေးသနားသော ကောင်းချီးဖြစ်ကြောင်း အသိအမှတ်ပြုလျက်၊ ဘုရားသခင်၏ လုပ်ငန်းတော်အတွက် ဝမ်းမြောက်သောစိတ်နှင့် ပြန်လည်ပေးဆက်ခြင်းဖြစ်ပါသည်။ပေးလှူခြင်း(၇)မျိုးကိုဖော်ပြပေးလိုက်ပါသည်။
၁။ ဆယ်ဖို့တစ်ဖို့ (Tithes)
မိမိရရှိသော ဝင်ငွေ၏ ဆယ်ပုံတစ်ပုံကို ဘုရားသခင်ထံ သစ္စာရှိစွာ ပြန်လည်ပေးဆက်ခြင်း ဖြစ်ပါသည်။
("ဆယ်ဖို့တစ်ဖို့ရှိသမျှကို ဘဏ္ဍာတော်တိုက်ထဲသို့ သွင်းကြလော့။" — မာလခိ ၃:၁၀)
၂။သာမန်အလှူငွေ (Offerings)
ဘုရားကျောင်းတက်သည့်အခါ၊ဝတ်ပြုစည်းဝေးတိုင်းမှာ မိမိ၌ရှိသောငွေကို စေတနာအလျောက် ဘုရားသခင်၏ အမှုတော်တွင် ပါဝင်ခြင်းဖြစ်ပါသည်။
("ထာဝရဘုရားရှေ့တော်သို့ လက်ဗလာနှင့် မလာရ။ လူအသီးအသီးတို့သည် မိမိတို့အစွမ်းရှိသမျှအတိုင်း ပေးလှူရကြမည်။" — တရားဟောရာကျမ်း ၁၆:၁၆-၁၇)
၃။ အဦးသီးအလှူ (First Fruits)
မိမိလုပ်ငန်း သို့မဟုတ် စိုက်ပျိုးရေးမှ အစောဆုံးရရှိသော အမြတ်အစွန်းကို ဘုရားသခင်အား ဦးဦးဖျားဖျား ပူဇော်ခြင်းဖြစ်သည်။နှစ်သစ်ရဲ့ပထမဆုံးဝင်ငွေကိုလည်းခေါ်ဆိုသည်။
("မိမိဥစ္စာပစ္စည်းဖြင့်လည်းကောင်း၊ အဦးသီးသော အသီးအနှံရှိသမျှဖြင့်လည်းကောင်း၊ ထာဝရဘုရားကို ချီးမြှောက်လော့။" — သုတ္တံကျမ်း ၃:၉)
၄။အငယ်ဆုံးသောသူအတွက်အလှူ (Alms)
ဒုက္ခရောက်နေသူများ၊ မိဘမဲ့များနှင့် မုဆိုးမများကို ဘုရားသခင်၏ မေတ္တာဖြင့် ကူညီခြင်းဖြစ်သည်။
("ဆင်းရဲသောသူကို သနားသောသူသည် ထာဝရဘုရားအား ချေးငှားသောသူဖြစ်၍၊ သူပြုသောအမှု၏အကျိုးကို ဘုရားသခင် ဆပ်ပေးတော်မူမည်။" — သုတ္တံကျမ်း ၁၉:၁၇)
၅။ ဧဝံဂေလိသာသနာပြုအလှူ (Missions)
ဧဝံဂေလိတရား ပြန့်ပွားရန်အတွက် သာသနာပြုဆရာများနှင့် အမှုတော်ဆောင်များကို ထောက်ပံ့ခြင်းဖြစ်သည်။
("ဖိလိပ္ပိမြို့သားတို့၊ ငါသည် ဧဝံဂေလိတရားကို ဟောပြောစပြု၍ ... ငါ့အမှု၌ ပါဝင်သော အသင်းတော်တစ်ပါးမျှမရှိ၊ သင်တို့အသင်းတော်တစ်ပါးတည်းသာရှိ၏။" — ဖိလိပ္ပိ ၄:၁၅-၁၆)
၆။ ပွဲတော်အလှူငွေ (Lord's Supper Offering)
သန့်ရှင်းသောပွဲတော်မင်္ဂလာ ပါဝင်ပြီးနောက်ထည့်ဝင်သောအလှူငွေနှင့်၊ အသင်းတော်ရှိ ခရစ္စမတ်ပွဲ၊ထမြောက်ပွဲ၊ဘာပွဲညာပွဲရဲ့လိုအပ်ချက်များ သို့မဟုတ် အထူးအစီအစဉ်များအတွက် လှူဒါန်းခြင်းဖြစ်ပါသည်။
("အလှူငွေကို စုသိမ်းခြင်းအမှုမှာ ... အပတ်တိုင်း ပထမနေ့ရက်၌ သင်တို့အသီးအသီး မိမိတို့၌ စီးပွားရှိသည်အတိုင်း ထုတ်၍ စုထားကြလော့။" — ၁ ကောရိန္သု ၁၆:၁-၂)
၇။အချိန်နှင့်ခွန်အားဖြင့်ပေးလှူခြင်း (Sacrificial Service)
ငွေကြေးသာမက မိမိ၏ ကျွမ်းကျင်မှု(ဆုကျေးဇူး)နှင့် အချိန်ကို အမှုတော်အတွက် ပေးဆက်ခြင်းဖြစ်ပါသည်။
(ညီအစ်ကိုတို့၊ အသက်ရှင်ခြင်းလက္ခဏာ၊ သန့်ရှင်းခြင်းလက္ခဏာ၊ ဘုရားသခင်နှစ်သက်တော်မူဖွယ်သော လက္ခဏာနှင့် ပြည့်စုံသောယဇ်ကို သင်တို့သည် ပူဇော်၍၊ မိမိကိုယ်ခန္ဓာကို ဘုရားသခင်အား ဆက်ကပ်ခြင်းတည်းဟူသော သင်တို့ပြုအပ်သောဝတ်ကို ပြုမည်အကြောင်း၊ ဘုရားသခင်၏ ကရုဏာတော်ကို ထောက်ထား၍၊ သင်တို့ကို ငါတိုက်တွန်းနှိုးဆော်ပေ၏။ရောမ ၁၂:၁)
နိဂုံး
ပေးလှူတဲ့အခါရှောင်ကြဉ်ရမည့် စိတ်သဘောထားများ
၁။ ဝါကြွားလိုသောစိတ်ကို ရှောင်ပါ👉သူတစ်ပါး အထင်ကြီးစေရန် မလှူပါနှင့်။ (မဿဲ ၆:၁-၄)
၂။ အကျိုးကိုသာ မျှော်ကိုးခြင်းကို ရှောင်ပါ👉ကောင်းချီးရဖို့သက်သက်ကိုသာ ရည်ရွယ်ပြီး စီးပွားရေးဆန်ဆန် မလှူပါနှင့်။
၃။ ပိုလျှံမှလှူခြင်းကို ရှောင်ပါ👉မိမိ၌ ရှိသမျှထဲမှ အကောင်းဆုံးကို ဦးစားပေးလှူဒါန်းပါ။ (မာကု ၁၂:၄၁-၄၄)
၄။ တွန့်တိုသောစိတ်ကို ရှောင်ပါ👉ပညတ်ချက်အရ မပေးမနေရဆိုသော စိတ်ဖြင့် မလှူပါနှင့်။ (၂ ကောရိန္သု ၉:၇)
ဒါဆိုရင်ဘယ်လိုစိတ်ထားနဲ့ပေးလှူရမလဲ? "ကျေးဇူးတင်သောစိတ်နှင့်စေတနာစိတ်နဲ့ပေးလှူပါ။
(၂ကော၉:၇ လူတိုင်း ကိုယ်အလိုအလျောက် လှူရ၏။ နှမြောသောစိတ်နှင့် မလှူရ၊ မလှူဘဲမနေရဟု စိတ်ထင်နှင့် မလှူရ၊ အကြောင်းမူကား၊ စေတနာစိတ်နှင့် လှူသောသူကိုသာ ဘုရားသခင် နှစ်သက်တော်မူ၏။)
မူရင်း-ဆရာရဲမင်း
https://www.facebook.com/share/p/1FJggvpG3p/
