03/08/2025
ਮੁਹੰਮਦ ਸਿੰਘ ਆਜ਼ਾਦ ਉਰਫ਼ ਊਧਮ ਸਿੰਘ ਸੁਨਾਮ
ਗੁਰਪੁਰਵਾਸੀ ਡਾ ਅਮਨਪ੍ਰੀਤ ਸਿੰਘ
ਸੁਣ ਊਧਮ ਸਿੰਘ ਵੀਰਿਆ, ਤੂੰ ਮੁੜ ਫਿਰ ਵਤਨੀਂ ਆ।
ਸਾਰੇ ਪੰਜਾਬ ਨੂੰ ਜਲਿਆਂ ਬਾਗ਼, ਲੀਡਰਾਂ ਨੇ ਦਿੱਤਾ ਬਣਾ।
ਸਭੇ ਜਨਰਲ ਡਾਇਰ ਬਣੇ, ਹੁਣ ਹੁਕਮ ਰਹੇ ਨੇ ਚੜਾ।
ਆੜ ਬੇਰੋਜ਼ਗਾਰੀ ਦੀ ਮਰ ਰਹੇ, ਤੇਰੇ ਉਹ ਵੀਰ ਭਰਾ।
ਪਾੜਨ ਸਰੂਪ ਪਾਵਨ ਗ੍ਰੰਥ ਦੇ, ਲਈਆਂ ਕਸਮਾਂ ਉਨ੍ਹਾਂ ਖਾ।
ਨਾ ਹੀ ਲਿਆਂਦੀ ਸ਼ਾਂਤੀ, ਨਾ ਕੋਈ ਲੇਵੇ ਸੁੱਖ ਦਾ ਸਾਹ।
ਏਥੇ ਡੇਰੇ ਵੱਧਦੇ ਜਾਂਵਦੇ, ਸਭ ਵੋਟਾਂ ਵਾਲੇ ਨੇ ਖੂਹ
ਮਰਦੇ ਕਿਸਾਨ ਪੰਜਾਬ ਦੇ, ਚੁੰਨੀ ਪੱਗ ਤੇ ਲੱਗਿਆ ਲਹੂ।
ਦਿਨ ਦਿਹਾੜੇ ਹੋਏ ਲਾਪਤਾ, ਕੱਢ ਕਿਡਨੀਆਂ ਵੇਚਦੇ ਲੋਕ।
ਡਾਕਟਰ ਦਾ ਧੰਦਾ ਬਣ ਗਿਆ, ਮੁਕ ਗਏ ਛੋਟੇ ਉਦਯੋਗ।
ਏਥੇ ਮੁੱਕਿਆ ਨਾਂ ਈਮਾਨ ਦਾ, ਹੈ ਮਿਲਾਵਟ ਦਾ ਦੌਰ।
ਏਥੇ ਪਾਣੀ ਮੁੱਕ ਗਿਆ ਵੀਰਿਆ, ਧਰਤੀ ਦੱਸ ਪਈ ਰੋ।
ਰੁੱਖ ਨਾ ਦਿਸਦੇ ਬਾਹਲ਼ੇ, ਨਾ ਚਿੜੀਆਂ ਦੀ ਕੋਈ ਉਡਾਰਿ।
ਬਿਹਾਰੀਆਂ ਕਬਜ਼ਾ ਕਰ ਲਿਆ, ਪੰਜਾਬੀ ਤੁਰ ਪਏ ਬਾਹਰ।
ਦੁੱਖ ਕਿਸੇ ਦਾ ਨਾ ਜਾਣਦੇ, ਕਿਸੇ ਨਾ ਦਿੰਦੇ ਭੇਤ।
ਮਾਰ ਮੁਕਾ ਕੇ ਸੁੱਟ ਗਿਆ, ਕਿਸੇ ਬੇਗਾਨੇ ਦੇ ਖੇਤ।
ਇੱਥੇ ਚਿੱਟਾ ਵਿਕਦਾ ਵੀਰਿਆ, ਭੁੱਕੀ ਅਫੀਮ ਦੇ ਠੇਕੇਦਾਰ
ਏਥੇ ਜ਼ਿਸਮ ਫਿਰੋਸ਼ੀ ਚੱਲ ਪਈ, ਤੇ ਕਲੱਬਾਂ 'ਚ ਨਚਾਰ।
ਬਾਬਾ ਬੋਲਦਾ ਰਹਿ ਗਿਆ, ਬਸ! ਗੁਰੂ ਘਰਾਂ ਦੇ ਵਿੱਚ।
ਗੋਲਕ ਚੁੱਕ ਕੇ ਲ਼ੈ ਗਏ, ਵੱਡੇ ਢਿੱਡਾਂ ਵਾਲੇ ਰਿੱਛ।
ਨਾ ਕੋਈ ਸੁਣੀਂ ਪੁਕਾਰ ਹੈ, ਕਿਸੇ ਗ਼ਰੀਬ ਕੋਲ਼ ਖਲੋ
ਹੋਰ ਨਾ ਸਕਾਂ ਦੱਸ ਮੈਂ, ਬਸ! ਆਪੇ ਹੀ ਤੂੰ ਨੇੜੇ ਹੋ।
ਪੜੇ ਲਿਖੇ ਨੇ ਮਰ ਰਹੇ, ਲਈਆਂ ਗਲਾਂ 'ਚ ਡਿਗਰੀਆਂ ਪਾ
ਅਨਪੜ੍ਹ ਜਾਂ ਪੰਜ ਪਾਸ ਨੇ, ਲਏ ਮੁਲਕ ਨੂੰ ਉਹ ਚਲਾ।
ਭਰ ਭਰ ਟੈਕਸ ਓ ਵਸੂਲਦੇ, ਲੱਦੇ ਗਾਂਧੀ ਵਾਲੇ ਨੋਟ।
ਨਾ ਹੁਣ ਬਚਣ ਘਰ ਆਲ੍ਹਣੇ, ਨਾ ਹੀ ਬਚਦੇ ਨੇ ਬੋਟ।
ਚੱਲ ਹੁਣ ਨਾ ਛੱਡੀਏ ਓਡਵਾਇਰ ਨੂੰ, ਡਾਇਰ ਨੂੰ ਪਾਰ ਬੁਲਾ
ਹੁਣ ਤੂੰ ਲੰਡਨੋਂ ਪਰਤ ਕੇ, ਕਦੇ ਵਿੱਚ ਪੰਜਾਬ ਦੇ ਆ।
ਮਿੱਟੀ ਛੋਹ ਪੰਜਾਬ ਦੀ, ਕਰ ਲੈਂ ਹੁਣ ਕੋਲ ਇਕਰਾਰ
ਪੰਜਾਬ ਦੇ ਜੰਮਿਆਂ ਨੂੰ ਨਿੱਤ ਮੁਹਿੰਮਾਂ, ਤਕੜੇ ਕਰੋ ਬਾਲ।
ਡਾ਼ ਅਮਨਪ੍ਰੀਤ ਸਿੰਘ, 31/07/19
