05/10/2026
'പൂ ചോദിച്ചപ്പോൾ പൂന്തോട്ടം നൽകി' എന്ന് പറയും പോലെയായിരുന്നു മലപ്പുറം ഈസ്റ്റ് ജില്ലയിൽ നടന്ന ആദർശ സമ്മേളനം!
മമ്പാട് വടപുറത്തെ ഐ.കെ. ഹാളിൽ ഒതുങ്ങുന്ന രീതിയിലാണ് സംഘാടകർ പ്രോഗ്രാം ആസൂത്രണം ചെയ്തിരുന്നത്. എന്നാൽ ആബാലവൃദ്ധം ജനങ്ങൾ ഒഴുകിയെത്തിയപ്പോൾ ഓഡിറ്റോറിയം ശരിക്കും ശ്വാസം മുട്ടി! ചുറ്റും പന്തലിട്ടിട്ടുപോലും അതും കവിഞ്ഞൊഴുകുന്ന ജനസഞ്ചയം!
കടുത്ത ചൂടിനെപ്പോലും തൃണവൽഗണിച്ച്, പ്രായമായവരും സ്ത്രീകളും അടങ്ങുന്ന സദസ്സ് അവസാനം വരെ വളരെ സമചിത്തതയോടെയാണ് പ്രോഗ്രാം ശ്രവിച്ചത്.
അവസാന സമയത്താണ് എനിക്ക് പ്രോഗ്രാമിൽ എത്താൻ സാധിച്ചത്. എന്റെ സംസാരത്തിനും സമാപന പ്രസംഗത്തിനും ശേഷവും സദസ്സ് നിറഞ്ഞുതന്നെ നിന്നു.
അൽഹംദുലില്ലാഹ്...
വളരെ ഹൃദ്യമായ സംഘാടനം! കുട്ടികൾക്കായി തൊട്ടപ്പുറത്ത് മറ്റൊരു പ്രോഗ്രാം കൂടി സംഘടിപ്പിച്ചത് ഏറെ പ്രശംസനീയമായി.
ബഹുമാനപ്പെട്ട കുഞ്ഞിമുഹമ്മദ് മദനി പറപ്പൂരിൻ്റെ കാര്യമാത്രപ്രസക്തമായ ഉദ്ഘാടന പ്രസംഗം മികച്ചുനിന്നു. ബഹു: മന്ത്രി എ.പി. അനിൽ കുമാർ, പി.കെ. ബഷീർ എന്നീ രണ്ട് ജനപ്രതിനിധികളുടെ സാന്നിധ്യവും സമ്മേളനത്തിന് മാറ്റുകൂട്ടി.
ഒരു കുടുംബത്തിന്റെ ആദർശ അടിത്തറ ഭദ്രമാക്കാനാവശ്യമായ എല്ലാ ചേരുവകളും ഉൾക്കൊള്ളിച്ച മികച്ചൊരു ഉള്ളടക്കമായിരുന്നു പ്രോഗ്രാമിന്റേത്.
ഈ പരിപാടി ഇത്രയും ഫലപ്രദവും വിജയകരവുമാക്കാൻ അഹോരാത്രം അധ്വാനിച്ച ജില്ലാ കമ്മിറ്റിക്കും പ്രിയപ്പെട്ട എല്ലാ പ്രവർത്തകർക്കും ഹൃദയം നിറഞ്ഞ അഭിനന്ദനങ്ങൾ നേരുന്നു.
അല്ലാഹു ഇതെല്ലാം ഉത്തമമായ സൽക്കർമ്മമായി സ്വീകരിക്കുമാറാകട്ടെ... ആമീൻ. 🤲
✍️ ടി കെ അഷ്‌റഫ്‌
(ജനറൽ സെക്രട്ടറി,
വിസ്ഡം ഇസ്‌ലാമിക് ഓർഗനൈസേഷൻ)
