16/08/2026
#കുടുംബശ്രീ_ഹോംഷോപ്പ്_പദ്ധതി
മധുരപ്പതിനേഴിലേക്ക് !
വമ്പൻ കമ്പനി ഉൽപ്പന്നങ്ങളുടെ വർണ്ണശബളിമയോടും, കോടികൾ ചെലവഴിച്ചുള്ള പരസ്യപ്രളയങ്ങളോടും നാട്ടുനന്മയും പരിശുദ്ധിയുമുള്ള നാടൻ കുടുംബശ്രീ ഉൽപ്പന്നങ്ങളുമായി, 'നല്ലതു വാങ്ങുക നന്മ ചെയ്യുക' എന്ന അഭ്യർത്ഥനയുമായി, ഒരു കൂട്ടം വനിതകൾ പൊരുതി ജയിക്കുന്നതിന്റെ വിജയഗാഥയാണ് കുടുംബശ്രീ ഹോംഷോപ്പ് പദ്ധതി ലോകത്തിനു മുമ്പിൽ കാണിച്ചുതരുന്നത് ! പതിനാറാം വാർഷികാഘോഷത്തിൻ്റെ ഉത്സാഹത്തിമിർപ്പിലാണ് ഹോംഷോപ്പ് പദ്ധതിയിലെ നൂറുകണക്കിന് കുടുംബശ്രീ വനിതകൾ.
മൂന്ന് ഉൽപാദന യൂണിറ്റുകളും 7 ഉൽപ്പന്നങ്ങളും 25 ഹോംഷോപ്പ് ഉടമകളുമായി 2019 ജൂലൈ 29ന് കൊയിലാണ്ടിയിൽ തുടങ്ങിയ പദ്ധതി ഇന്ന് 130ലധികം വ്യത്യസ്തങ്ങളായ ഉൽപ്പന്നങ്ങൾ നിർമ്മിക്കുന്ന 60ലധികം ഉൽപാദന യൂണിറ്റുകളും അവയിൽ പ്രവർത്തിച്ചുകൊണ്ടിരിക്കുന്ന 500നടുത്ത് വനിതകളും അവ സ്ഥിരമായി വീടുകൾ കയറി പ്രചരിപ്പിക്കുന്ന ആയിരത്തോളം ഹോംഷോപ്പ് ഉടമകളും ബ്ലോക്ക് കോഡിനേറ്റർമാർ, ഓഫീസ് സ്റ്റാഫുകൾ, മാനേജ്മെൻറ് ടീം തുടങ്ങി വിവിധ തട്ടുകളിലായി പ്രവർത്തിക്കുന്ന 1500ലധികം കുടുംബങ്ങൾ ഉപജീവനം നടത്തുന്ന വലിയൊരു പ്രസ്ഥാനമായി കോഴിക്കോട് ജില്ലയിൽ കുടുംബശ്രീ ഹോംഷോപ്പ് പദ്ധതി മാറിക്കഴിഞ്ഞു!
കുടുംബശ്രീ ഹോംഷോപ്പ് പദ്ധതി കോഴിക്കോട് ജില്ലയുടെ അഭിമാന പദ്ധതിയായി വളരുകയാണ്. പതുക്കെയത് സംസ്ഥാനത്തിന്റെ മുഴുവൻ ജില്ലകളിലേക്കും പടർന്നുകൊണ്ടിരിക്കുന്നു ! ഇന്ന് നാല്പതിനായിരത്തിൽ അധികം പേർക്ക് സ്ഥിരവരുമാനം ഉറപ്പുവരുത്തുകയും ചെയ്യുന്നു.
നാടിന് ആവശ്യമുള്ളതിൽ ആവുന്നതൊക്കെയും അതാത് പ്രദേശത്തുതന്നെ ഉൽപ്പാദിപ്പിക്കുകയും സ്വാശ്രയ ഉൽപ്പന്നങ്ങളുടെ ഉപഭോഗം അഭിമാനമുള്ള ജനതയുടെ ശീലമാക്കി മാററുകയും ചെയ്യുക എന്ന ഗാന്ധിജിയുടെ 'സ്വാശ്രയ ഗ്രാമം' എന്ന സ്വപ്നത്തെ ഏടുകളിലെ മൃതാക്ഷരങ്ങളിൽ നിന്നും പ്രായോഗികതയുടെ വിജയഗാഥയാക്കി പുതിയ ചരിത്രം സൃഷ്ടിച്ചു എന്നതാണ് ഹോംഷോപ്പ് പദ്ധതിയുടെ സവിശേഷത !
നോർവേ ഓസ്ലെ സർവ്വകലാശാലയിൽ നിന്നുള്ള പഠന സംഘം, ന്യൂയോർക്കിലെ സർവകലാശാല വിദ്യാർത്ഥികൾ, പാറ്റ്നയിലെ ഡെവലപ്മെന്റ് മാനേജ്മെൻറ് ഇൻസ്റ്റിറ്റ്യൂട്ടിലെ (DMI) ഉദ്യോഗസ്ഥർ, മധ്യപ്രദേശ് ഭാരത് ഗ്യാൻ വിജ്ഞാൻ സമിതി പ്രവർത്തകർ, പുണെ പഠനസംഘം ,ഗുഡല്ലുർ ജസ്റ്റ് ചെയ്ഞ്ച് പ്രവർത്തകർ തുടങ്ങി നിരവധി പഠനസംഘങ്ങൾ സമതയുടെയും ഹോംഷോപ്പ് പദ്ധതിയുടെയും പ്രവർത്തനങ്ങൾ പഠിക്കാനെത്തിയിരുന്നു. സ്കോച്ച് ഓർഡർ ഓഫ് മെറിറ്റ് ദേശീയ അവാർഡ് ഉൾപ്പെടെ നിരവധി പുരസ്കാരങ്ങൾ ഹോംഷോപ്പ് പദ്ധതിയെ തേടിയെത്തിയിട്ടുണ്ട്.
പദ്ധതിയിൽ വീടുകളിൽ ഉൽപ്പന്ന വിതരണം നടത്തി കൊണ്ടിരിക്കുന്ന ഹോംഷോപ്പ് ഓണർമാർക്ക് വേണ്ടി മാനേജ്മെന്റ് ടീം ഏർപ്പെടുത്തിയ സാമൂഹ്യ ക്ഷേമപദ്ധതികളും ജീവിതസുരക്ഷാ പദ്ധതികളുമാണ് കുടുംബശ്രീയുടെ മറ്റു പദ്ധതികളിൽ നിന്നും ഹോംഷോപ്പ് പദ്ധതിയെ വ്യത്യസ്തമാക്കുന്നത്.
'ശ്രീനിധി' എന്ന പേരിൽ ഹോംഷോപ്പ് ഓണർമാർക്ക് വേണ്ടി ആവിഷ്കരിച്ച ഒരു സമ്പാദ്യപദ്ധതിയുണ്ട്. എല്ലാ മാസവും കൃത്യമായി വേതനം നൽകുന്നതിനു പുറമേ അവരുടെ അധ്വാനത്തിന്റെ ഒരു വിഹിതം അവരുടെ പേരിൽ ബാങ്കിൽ നിക്ഷേപിച്ച്, ഓരോരുത്തരുടെയും കയ്യിലുള്ള പാസ് ബുക്കിൽ എല്ലാ മാസവും ചേർത്തുനൽകുകയാണ് ചെയ്യുന്നത്. പിരിഞ്ഞുപോകുമ്പോഴേ പിൻവലിക്കാവു എന്നാണ് പറയുന്നതെങ്കിലും അത്യാവശ്യം വരുമ്പോൾ ആർക്കും ബാങ്കിൽ നിന്ന് പിൻവലിക്കുന്നതാണ്. വിദ്യാഭ്യാസ സ്കോളർഷിപ്പ് പദ്ധതിയും ശ്രദ്ധേയമാണ്. ഹോംഷോപ്പ് ഓണർമാരുടെ ഒമ്പതാം ക്ലാസ്സ് മുതൽ പന്ത്രണ്ടാം ക്ലാസ് വരെ പഠിക്കുന്ന കുട്ടികൾക്ക് പ്രതിവർഷം 1200 രൂപ വീതം വിദ്യാഭ്യാസ സ്കോളർഷിപ്പായി പദ്ധതിയിൽ നിന്നും നൽകി വരാറുണ്ട്. ഹോംഷോപ്പ് ഓണർമാർക്കും അവരുടെ കുടുംബാംഗങ്ങൾക്കുമായുള്ള ആരോഗ്യസുരക്ഷാ പദ്ധതി എടുത്തുപറയേണ്ടതു തന്നെയാണ്. ഡോക്ടറുടെ പ്രിസ്ക്രിപ്ഷനും ബില്ലുകളും ഒപ്പം ഒരു അപേക്ഷയും മാത്രം മതി, പതിനായിരം രൂപവരെയുള്ള ചികിത്സാ സഹായം ഒട്ടും കാലതാമസമില്ലാതെ ലഭിക്കും.
12 ബ്ലോക്കുകളിലായി എല്ലാ മാസവും നടക്കുന്ന റിവ്യൂമീറ്റിങ്ങുകളിൽ സിഡിഎസ് ചെയർപേഴ്സൺമാരും കുടുംബശ്രീയുടെ ബ്ലോക്ക് കോഓർഡിനേറ്റർമാരും ജില്ലാമിഷൻ ഉദ്യോഗസ്ഥരും പങ്കെടുക്കാറുണ്ട്. ഒരു മാസക്കാലത്തെ പ്രവർത്തനങ്ങളെ അവലോകനം ചെയ്യുന്ന മീറ്റിങ്ങുകളിൽ മോട്ടിവേഷൻ ക്ലാസുകളും കൂടുതൽ നല്ല രീതിയിൽ പ്രവർത്തിച്ചവർക്കുള്ള സമ്മാനങ്ങളുടെ വിതരണവും നടക്കും.
വീട്ടിലിരുന്നുകൊണ്ട് അവനവന്റെ സമയത്തിനും സൗകര്യത്തിനുമനുസരിച്ച് ചെയ്യാൻ കഴിയുന്ന ഈ ജോലിയിൽ ഹോംഷോപ്പ് ഓണർമാർ സന്തോഷവതികളാണ്.. തങ്ങളുണ്ടാക്കുന്ന ഉൽപന്നങ്ങൾക്ക് ജില്ലയിലെമ്പാടും വിപണി ലഭിക്കുന്നതിനാൽ കൂടുതൽ ഉൽപ്പാദിപ്പിക്കാനും കൂടുതൽ വരുമാനം നേടാനും കഴിയുന്നു എന്നതിനാൽ ഉൽപാദന യൂണിറ്റ് അംഗങ്ങളായ കുടുംബശ്രീ വനിതകളും ഹാപ്പിയാണ്!
ഒരു ബദൽ വിപണന രീതി വളർത്തിയെടുത്ത്, പുതിയൊരു മാതൃക സൃഷ്ടിച്ച് നവകേരള സ്വപ്നങ്ങൾക്ക് നിറം പകരുകയാണ് കോഴിക്കോട്ടെ പെണ്ണുങ്ങൾ..
Kudumbasree HOME SHOP
Kudumbashree Kannur
Kudumbhashree Cds Puthuppadi
Kudumbashree Dist Mission Kozhikkode
Homeshop Kudumbashree
