05/05/2026
स्रां-स्रां लाइमोन हान्जानि बान्जायनायाव खुंगा 4थि रंजालि बैसागु फोर्बो फालिथाय।
सातबिन्दो (हरिगाँव) सालाकाटि, क’क्राझार 05 मे, 2026 इं :
क’क्राझार जिल्ला सालाकाटि ओनसोलनि सिङाव थानाय सातबिन्दो (हरिगाँव) नि जोहोलाव सोमब्ला बसुमतारि गेलेग्रा फोथाराव सानसेनि बायदिसिना हाबाफारिनि गेजेरजों स्रां-स्रां लाइमोन हान्जानि बान्जायनायाव खुंगा 4थि रंजालि बैसागु फोर्बो फालिनाया थांनाय 03 मे, 2026 इं (19 बैसाग 1433) खालार खालि गाहामै जोबलांबाय।
हाबाफारि बायदियै फुंनि समाव स्रां-स्रां लाइमोन हान्जानि गोथार फिरफिलाखौ बिरहोयो हान्जानि मानिजाथाव आफादगिरि मुश्री बिरदाव ब्रह्म बिथाङा। “बोसोर गोदान रंजालि बैसागुनि मुङै गोजोन आरो खौसेथिनि गोथार फिरफिलाखौ” बिरहोयो सालाकाटि दख’रा एबसुनि मानगोनां लोगो आफादगिरि मुश्री खोमथा नार्जारि बिथाङा। जोहोलाव सोमब्ला बसुमतारिनि मुंख्लं खाम्फायाव बिबार बाउजेनो स्रां-स्रां लाइमोन हान्जानि मानिजाथाव मुश्री सुधु ब्रह्म बिथाङा।
नैथि हाबाफारि बायदियै हौवासाफोरनि खारनाय बादायलायनायाव सेथि बान्थाखौ मोन्नो हायो मुश्री मामु ब्रह्म (सातबिन्दो) नैथि बान्थाखौ मोन्नो हायो मुश्री फुलुं बसुमथारि (सातभेन्दि) आरो थामथि बान्थाखौ मोन्नो हायो मुश्री दानसोरां ब्रह्म (खोला-बर’ कुर्शाखाति) उन्दै-उन्दै फंबायमोनहा। लोगोसे दै बोरि बारनाय बादायलायनायाव सेथि बान्थाखौ मोन्नो हायो मुश्री फुलुं बसुमथारि (सातभेन्दि) नैथि बान्थाखौ मोन्नो हायो मुश्री जाफुं बसुमतारि, (सातबिन्दो) थामथि बान्थाखौ मोन्नो हायो थरायना अनसुमै मुसाहारि, (सा-बर’ कुर्साखाथि) उन्दै-उन्दै फंबाय-बिनानावमोनहा।
थामथि हाबाफारि बायदियै “बैसागु जानाय मोसानाय” बादायलायनायाव सेथि बान्था नोगोद 10,000 रांखौ मोननो हायो खोला-बर’ कुर्शाखाति, सालाकाटि निफ्राय। नैथि बान्था नोगोद 7,000 रोजा रांखौ मोननो हायो दांतल दालाइसा हारिमु आफाद, चिरां। आरो बिजिरगिरिफोरा मोजां मोननानै सायख'नाय बान्था (Consolation Prize) नोगोद 3,000 रोजा रांखौ आर’नाय हारिमु आफाद, काजलगानिफ्राय मोननो हायो।
मख’नो गोनांदि, स्रां-स्रां लाइमोन हान्जानि आफादगिरि मुश्री बिरदाव ब्रह्मनि मासि लानानै सामलायनाय “गेवलां मेलाव” गाहाइ आलासि महरै बाहागो लानानै बेसेन गोसा बिबुंथि लाखियो क’क्राझार जिल्ला दुलाराय बर’ हारिमु आफादनि मानिजाथाव आफादगिरि मुश्री सोमदोन औवारी बिथाङा। आरो बाहागो लायो जिल्ला आफादनिनो मानिजाथाव मावबादा नेहाथारि मुश्री जिबिस्वर बसुमतारि बिथाङा। लोगोसेनो क’क्राझार जिल्ला बर' थुनलाइ आफादनि सोद्रोमा मुश्री उटपल ब्रह्म, सालाकाटि गुदि बर' थुनलाइ आफादनिफ्राय आफादगिरि मुश्री दैथुन कु. ब्रह्म, नेहाथारि मुश्री सनजिब ब्रह्म, सालाकाटि दख’रा दुलाराय बर’ फरायसा आफादनिफ्राय आफादगिरि मुश्री दनेन नार्जारी, गाहाइ नेहाथारि मुश्री जांगिला बसुमतारि, लोगो गाहाइ नेहाथारि मुश्री सानखां औवारि, सालाकाटि दख'रा रंजालि बैसागु फोर्बो खुंफुं आफादनिफ्राय आफादगिरि मुश्री बायखोन्दा बसुमतारि, नेहाथारि मुश्री घनश्याम ब्रह्म, नादांगिरि दालाइसा दुलाराय बर' फरायसा आफादनि आफादगिरि मुश्री कुमायुन बसुमथारि, गाम्बारि फाइखि हान्जा, सालाकाटि दख’रा दुलाराय बर' फरायसा आफादनिफ्राय आफादगिरि मुश्रीमा जमुना बसुमतारी, लेङाइ आफादगिरि मुश्रीमा बोहैथि बसुमतारि, लेङाइ गाहाइ नेहाथारि मुश्रीमा रेका रानी इस्लारी लोगोसे सालाकाटि ओनसोलनि बर’नि गुबुन गुबुन माहारियारि आफादनि सानसुमै मेलेमजिबि, फोरोंगिरि/ बारग’ दैदेनगिरि बिथांमोनहा बाहागो लानो हायो।
बे हाबाफारियाव स्रां-स्रां लाइमोन हान्जानिफ्राय थांनाय 17 जानुवारी, 2026 इं खालार खालि गुवाहाटीनि सुरुसजाय स्टेडियामआव जालांनाय “बागुरुम्बा दोहौ” आव बाहागो लाहैनाय गासै सा- 21, आरो सालाकाटि ओनसोलनिफ्राय बाहागो लाबावनो हानाय मानिजाथाव मास्टार ट्रेनार्स, मोसाखाउरि गासै दाजाबदेरनानै सा- 33 बाहागोलागिरि बिथांमोनखौ दुंब्रुदै बरायनाय जायो।
आरोबाव स्रां-स्रां लाइमोन हान्जानिफ्रायनो देग्लायनि HSLC/HS आनजादाव उथ्रिसार जानो हानाय गासै सा- 12 बिजाथिफोरखौ दंब्रुदै बरायनाय जायो।
बै सानखालिनि हारिमु मोनाबिलिखौ बेखेवनानै होयो सालाकाटि दख’रा एबसुनि नेहाथारि मुश्री जोंसार बर’ बिथाङा। आरो जाखांफुनाय लाइमोन मेथाइ रोजाबगिरि मिरु एबसुनि से-नै-थाम देंखोमु बादायलायनायाव सेथि मासि देरहासारगिरि मुश्री जेलसिं बसुमतारि बिथाङा हारिमु मोनाबिलियाव मेथाइ रोजाबनानै हाबाफारिखौ मेहेर गोनां खालामो।
