KKTM Seeds

20/09/2026

ഹൃദയം നിറഞ്ഞ നന്ദി 🙏

കെ. കെ. ടി. എം. ഗവ. കോളേജിന്റെയും കെകെടിഎം സീഡ്സിന്റെയും സംയുക്താഭിമുഖ്യത്തിൽ സംഘടിപ്പിച്ച മഹാകവി കൊടുങ്ങല്ലൂർ കുഞ്ഞിക്കുട്ടൻ തമ്പുരാൻ ദിനാചരണം അവിസ്മരണീയമായ ഒരു സാംസ്കാരിക അനുഭവമാക്കി മാറ്റാൻ നേരിട്ടും അല്ലാതെയും സഹകരിച്ച എല്ലാവർക്കും ഹൃദയം നിറഞ്ഞ നന്ദി.

പരിപാടിക്ക് എല്ലാ പിന്തുണയും നൽകിയ കെ. കെ. ടി. എം. ഗവ. കോളേജ് പ്രിൻസിപ്പാൾ പ്രൊഫ. (ഡോ.) പ്രിയ. പി. മേനോൻ, മലയാള വിഭാഗം മേധാവി ഡോ. യാക്കൂബ് തോമസ്, കോളേജിലെ അധ്യാപക-അനധ്യാപകർ, വിദ്യാർത്ഥികൾ എന്നിവർക്ക് നന്ദി പ്രത്യേകം രേഖപ്പെടുത്തുന്നു.

കുഞ്ഞിക്കുട്ടൻ തമ്പുരാന്റെ സാഹിത്യ സംഭാവനകളെ ആഴത്തിൽ പരിചയപ്പെടുത്തി മുഖ്യപ്രഭാഷണം നിർവഹിച്ച പ്രൊഫ. വി. കെ. സുബൈദ, കവിതാ രചനാ മത്സരത്തിൽ ആവേശത്തോടെ പങ്കെടുത്ത തൃശൂർ ജില്ലയിലെ വിവിധ കോളേജുകളിലെ വിദ്യാർത്ഥികൾ എന്നിവർക്കും നന്ദി.

കേരളത്തിന്റെ പാരമ്പര്യ കലാരൂപമായ തോൽപ്പാവക്കൂത്ത് മനോഹരമായി അവതരിപ്പിച്ച് സദസ്സിന് വേറിട്ടൊരു ദൃശ്യാനുഭവം സമ്മാനിച്ച ഷൊർണൂർ രാജീവ് പുലവർക്കും സംഘത്തിനും പ്രത്യേക നന്ദി.

പരിപാടിയുടെ വാർത്തകൾ ജനങ്ങളിലെത്തിച്ച മാധ്യമ പ്രതിനിധികൾക്കും, പരിപാടിയുടെ സാങ്കേതിക മികവ് ഉറപ്പാക്കിയ ലൈറ്റ് & സൗണ്ട് ടീമിനും, സ്നേഹപൂർവ്വം സാന്നിധ്യമറിയിച്ച പൂർവ്വവിദ്യാർത്ഥികൾക്കും പൂർവ്വ അധ്യാപകർക്കും, പരിപാടിയുടെ വിജയത്തിനായി ഒത്തൊരുമയോടെ പ്രവർത്തിച്ച സീഡ്സ് അംഗങ്ങൾക്കും നന്ദി.

ഒരുമിച്ച് നിന്ന ഒരു വലിയ കൂട്ടായ്മയുടെ സ്നേഹവും സഹകരണവും ചേർന്നാണ് ഈ ദിനം ഇത്രയും മനോഹരമായത്.

മഹാകവി കൊടുങ്ങല്ലൂർ കുഞ്ഞിക്കുട്ടൻ തമ്പുരാൻ ദിനം അവിസ്മരണീയമാക്കാൻ സഹകരിച്ച ഓരോരുത്തർക്കും ഒരിക്കൽ കൂടി ഹൃദയം നിറഞ്ഞ നന്ദി. ❤️🙏

സ്നേഹത്തോടെ,
ടീം കെകെടിഎം. സീഡ്സ്

18/09/2026

കുഞ്ഞിക്കുട്ടൻ തമ്പുരാൻ ജന്മദിനാചരണം

പുല്ലൂറ്റ് കെ. കെ. ടി. എം. ഗവ. കോളേജ് പി.ടി.എ.യുടെയും കെകെടിഎം. സീഡ്സിന്റെയും സംയുക്താഭിമുഖ്യത്തിൽ കൊടുങ്ങല്ലൂർ കുഞ്ഞിക്കുട്ടൻ തമ്പുരാൻ ജന്മദിനാചരണം കോളേജിൽ വെച്ച് സംഘടിപ്പിച്ചു

കോളേജ് പ്രിൻസിപ്പാൾ പ്രൊഫ. (ഡോ.) പ്രിയ പി മേനോൻ അധ്യക്ഷത വഹിച്ച ചടങ്ങിൽ പ്രൊഫ. വി. കെ. സുബൈദ അനുസ്മരണ പ്രഭാഷണം നടത്തി. വൈസ് പ്രിൻസിപ്പാൾ ഡോ. ഒ. രഘു, ഐ.ക്യു.എ.സി. കോ-ഓർഡിനേറ്റർ ഡോ. ലൗലി, കെകെടിഎം. സീഡ്സ് പ്രസിഡന്റ് അഡ്വ. ഭാനുപ്രകാശ്. സി, പി.ടി.എ. വൈസ് പ്രസിഡന്റ് സജു ശ്രീകുമാർ എന്നിവർ ആശംസകൾ അർപ്പിച്ച് സംസാരിച്ചു. പി.ടി.എ. സെക്രട്ടറി ഡോ. രശ്മി സ്വാഗതം പറഞ്ഞു. കുഞ്ഞിക്കട്ടൻ തമ്പുരാൻ പ്രതിമയിൽ പുഷ്പാര്‍ച്ചന നടന്നു.
കൊടുങ്ങല്ലൂർ കുഞ്ഞിക്കുട്ടൻ തമ്പുരാൻ യുവസാഹിത്യപ്രതിഭ പുരസ്കാരത്തിന് അർഹനായ കോളേജിലെ മൂന്നാം വർഷ ഹിസ്റ്ററി ബിരുദ വിദ്യാർത്ഥി ഭരത് ഐ. ബി.ക്ക് പ്രശസ്ത ചിത്രകാരൻ ഡാവിഞ്ചി സുരേഷ് രൂപകൽപന ചെയ്ത ശിൽപ്പവും ക്യാഷ് പ്രൈസും സമ്മാനിച്ചു.

ദിനാചരണത്തിന്റെ ഭാഗമായി തൃശൂർ ജില്ലയിലെ കോളേജ് വിദ്യാർത്ഥികൾക്കായി നടത്തിയ കവിതാരചനാ മത്സരത്തിലെ വിജയികൾക്കുള്ള ക്യാഷ് പ്രൈസും, ശിൽപ്പവും വിതരണം ചെയ്തു. ആദര്‍ശ് കെ. വി(ശ്രീകേരളവര്‍മ്മ കോളേജ്, തൂശൂര്‍), അനിത എ ആര്‍ (കെ കെ ടി എം ഗവ. കോളേജ്, പുല്ലൂറ്റ്), കൃഷ്ണപ്രിയ കെ. എസ് (ശ്രീകേരളവര്‍മ്മ കോളേജ്, തൂശൂര്‍) എന്നിവര്‍ യഥാക്രമം ഒന്നും രണ്ടും സ്ഥാനങ്ങൾ നേടി.
സീഡ്സ് പ്രോഗ്രാം കമ്മിറ്റി കൺവീനർ പ്രദീപ്കുമാർ രാജ കൃതജ്ഞത രേഖപ്പെടുത്തി.

തുടർന്ന് ഷൊർണൂർ രാജീവ് പുലവരും സംഘവും അവതരിപ്പിച്ച തോൽപ്പാവക്കൂത്ത് അരങ്ങേറി.

17/09/2026

കുഞ്ഞിക്കുട്ടൻ തമ്പുരാൻ ജന്മദിനാചരണത്തിന്റെ ഭാഗമായി സംഘടിപ്പിച്ചിട്ടുള്ള
നിഴലും വെളിച്ചവും ചേർന്ന് കഥ പറയുന്ന,
പാരമ്പര്യത്തിന്റെ വർണ്ണചിത്രങ്ങൾ തിരശ്ശീലയിൽ വിരിയുന്ന
തോൽപ്പാവക്കൂത്ത് എന്ന നയനമനോഹര കലാവിരുന്നിലേക്ക്
എല്ലാവരെയും ക്ഷണിക്കുന്നു.

15/09/2026

കെകെടിഎം സീഡ്സ് ഒമാൻ അസോസിയേറ്റ് പ്രതിനിധികൾ മസ്കറ്റിൽ കേരള യുവജനകാര്യ, കായിക, രജിസ്ട്രേഷൻ വകുപ്പ് മന്ത്രി അഡ്വ. ഒ. ജെ. ജെനീഷുമായി പ്രത്യേക ഇന്ററാക്ഷൻ സെഷനിൽ പങ്കെടുത്തു.

കെ. കെ. ടി. എം. ഗവ. കോളേജിന്റെ വികസനവുമായി ബന്ധപ്പെട്ടും, സമൂഹത്തിന്റെ സമഗ്രമായ സാമൂഹിക വികസനത്തിന് കൂടുതൽ ശ്രദ്ധ നൽകേണ്ട വിവിധ വിഷയങ്ങളുമായി ബന്ധപ്പെട്ടും പ്രത്യേകം നിവേദനങ്ങളും നിർദ്ദേശങ്ങളും മന്ത്രിയുടെ ശ്രദ്ധയിൽപ്പെടുത്തി

സീഡ്സിന്റെ ആശയങ്ങളും ആവശ്യങ്ങളും മന്ത്രിയുടെ ശ്രദ്ധയിൽപ്പെടുത്താൻ മുൻകൈയെടുത്ത ഒമാൻ അസോസിയേറ്റ് പ്രതിനിധികൾക്ക് ഹൃദയം നിറഞ്ഞ നന്ദി.
ദൂരെയായിരുന്നാലും നമ്മുടെ കോളേജിൻ്റെയും നാടിന്റെയും നന്മയ്ക്കായി കരുതലോടെ ഇടപെടുന്ന ഓരോരുത്തർക്കും സ്നേഹാഭിവാദ്യങ്ങൾ. ❤️🌹

15/09/2026

പ്രിയപ്പെട്ടവരെ,

കുഞ്ഞിക്കുട്ടൻ തമ്പുരാൻ ജന്മദിനാചരണം

മലയാള സാഹിത്യത്തിന് അനശ്വരമായ സംഭാവനകൾ നൽകിയ മഹാകവി കൊടുങ്ങല്ലൂർ കുഞ്ഞിക്കുട്ടൻ തമ്പുരാന്റെ ജന്മദിനം കെ. കെ. ടി. എം. ഗവ. കോളേജ് പി.ടി.എ.യും കെകെടിഎം സീഡ്സും സംയുക്തമായി ആചരിക്കുകയാണ്.

സെപ്റ്റംബർ 18- ന് രാവിലെ 10.30 മുതൽ കെ. കെ. ടി. എം. ഗവ. കോളേജിലെ കിഫ്ബി ബ്ലോക്കിൽ നടക്കുന്ന ചടങ്ങിൽ
പ്രൊഫ. വി. കെ. സുബൈദ അനുസ്മരണ പ്രഭാഷണം നടത്തും.

കോളേജിലെ മൂന്നാം വർഷ ഡിഗ്രി വിദ്യാർത്ഥിയായ ഭരത് ഐ. ബി ക്ക് കൊടുങ്ങല്ലൂർ കുഞ്ഞിക്കുട്ടൻ തമ്പുരാൻ യുവസാഹിത്യപ്രതിഭ പുരസ്കാരം സമ്മാനിക്കും.

തൃശൂർ ജില്ലയിലെ കോളേജ് വിദ്യാർത്ഥികൾക്കായി സംഘടിപ്പിച്ച കവിതാരചനാ മത്സരത്തിലെ വിജയികൾക്കുള്ള ക്യാഷ് പ്രൈസും സമ്മാനങ്ങളും ചടങ്ങിൽ വിതരണം ചെയ്യും.

തുടർന്ന് ഷൊർണൂർ രാജീവ് പുലവരും സംഘവും അവതരിപ്പിക്കുന്ന പാരമ്പര്യ കലാരൂപമായ തോൽപ്പാവക്കൂത്തും അരങ്ങേറും.

കുഞ്ഞിക്കുട്ടൻ തമ്പുരാന്റെ സാഹിത്യസ്മരണ പുതുതലമുറയിലേക്ക് പകർന്നുനൽകുന്ന ഈ സാഹിത്യസംഗമത്തിലേക്ക് എല്ലാവരെയും ക്ഷണിക്കുന്നു.

28/08/2026

ഒരുമിച്ച് ഉണ്ണുകയും ഉറങ്ങുകയും, വിശേഷങ്ങൾ പങ്കുവെച്ച് പരസ്പരം താങ്ങായി കഴിയുകയും ചെയ്തിരുന്ന വിജയമണിയമ്മയുടെ ആകസ്മിക വേർപാടിൻ്റെ വേദനയിൽ കഴിയുന്ന മാതൃസദനത്തിലെ അമ്മമാർക്ക് സാന്ത്വനമേകാൻ സീഡ്സ് അംഗങ്ങൾ വീണ്ടും അവിടെയെത്തി.

മണിയമ്മയെക്കുറിച്ചുള്ള ഓർമ്മകൾ പങ്കുവെച്ചപ്പോൾ, പ്രിയപ്പെട്ട കൂട്ടുകാരിയെ നഷ്ടപ്പെട്ടതിന്റെ നൊമ്പരത്തിൽ പലരുടെയും കണ്ണുകൾ നിറഞ്ഞൊഴുകി. അവരെ സമാശ്വസിപ്പിക്കാൻ വാക്കുകൾ കിട്ടാതെ സീഡ്സ് അംഗങ്ങൾ നിശ്ശബ്ദരായിരുന്നു.

ഒറ്റപ്പെടലിന്റെ രാത്രികളിൽ തങ്ങൾക്കു ചുറ്റും കുറേ സ്നേഹമുള്ള ഹൃദയങ്ങൾ ഉണ്ടെന്നുള്ള സ്നേഹത്തിന്റെ തലോടലായി, കലാഭവൻ നൗഷാദ് സ്പോൺസർ ചെയ്ത തലയിണകൾ മാതൃസദനത്തിലെ മുഴുവൻ അമ്മമാർക്കും നൽകി.

“വീണ്ടും വരാം…” എന്ന ഉറപ്പുനൽകി സീഡ്സ് അംഗങ്ങൾ മടങ്ങുമ്പോൾ, നിറഞ്ഞ കണ്ണുകളോടെ കൈവീശി യാത്രയാക്കിയ ആ അമ്മമാരുടെ മുഖങ്ങളും, അവരുടെ സ്നേഹവും ഹൃദയത്തിൽ ഒരു നോവായി അവശേഷിച്ചു. 🙏💐

27/08/2026

വിജയമണി അമ്മയ്ക്ക് പ്രണാമം 🙏

ഈ പ്രാവശ്യത്തെ സീഡ്സിന്റെ ഓണാഘോഷം മേത്തല മാതൃസദനം അഗതിമന്ദിരത്തിലെ അമ്മമാർക്കൊപ്പമായിരുന്നു.

ഉറ്റവരും ഉടയവരുമില്ലാത്ത ആ അമ്മമാരുടെ ജീവിതത്തിലേക്ക് ഒരു ദിവസത്തേക്കെങ്കിലും ഓർമ്മകളുടെ നിറവും സന്തോഷത്തിന്റെ വെളിച്ചവും പകരാനായി സീഡ്സ് അംഗങ്ങൾ ഒത്തുചേർന്നു. ഉപഹാരങ്ങൾ നൽകി, പൂക്കളമൊരുക്കി, മേളവും തിരുവാതിരക്കളിയും ഒരുക്കി, വിഭവസമൃദ്ധമായ സദ്യയൊരുക്കി… അങ്ങനെ ആ അമ്മമാരെ അവരുടെ നിറമുള്ള ബാല്യകാല ഓർമ്മകളിലേക്ക് കൂട്ടിക്കൊണ്ടുപോയി

അവരുടെ വയറു മാത്രമല്ല, മനസ്സും നിറയ്ക്കാനായതിന്റെ സന്തോഷത്തോടെയാണ് സീഡ്സ് അംഗങ്ങൾ അന്ന് മടങ്ങിയത്.

എന്നാൽ, തിരുവോണമായ ഇന്നലെ ഒരു വേദനാജനകമായ വാർത്തയെത്തി. നമ്മോടൊപ്പം ഓണാഘോഷത്തിൽ പങ്കുചേർന്ന അമ്മമാരിൽ ഒരാളായ വിജയമണിയമ്മ നിര്യാതയായെന്ന വാർത്ത ഞെട്ടലോടെയാണ് കേട്ടത്.

ആ അമ്മയുടെ ചിരിയും സ്നേഹനിറഞ്ഞ സംസാരവും എന്നും സീഡ്സ് അംഗങ്ങളുടെ മനസ്സിൽ മായാതെ നിലനിൽക്കും.
വിജയമണിയമ്മയ്ക്ക് പ്രണാമം.
ആത്മാവിന് നിത്യശാന്തി നേരുന്നു. 🙏🌹

25/08/2026