15/09/2026
తేదీ : 13-09-2026
పాలేరు జవహర్ నవోదయ విద్యాలయంలో ‘ప్రాజెక్ట్ పాణి’ స్మార్ట్ గ్రీన్ హౌస్ ప్రారంభం
విద్యార్థుల్లో వ్యవసాయ అవగాహనకు ప్రాయోగిక వేదిక – ఆధునిక సాగు పద్ధతులపై శిక్షణ.
ఖమ్మం:
విద్యార్థుల్లో వ్యవసాయంపై ఆసక్తి, అవగాహన పెంపొందించడంతో పాటు ఆధునిక వ్యవసాయ పద్ధతులను ప్రత్యక్ష అనుభవం ద్వారా పరిచయం చేయాలనే లక్ష్యంతో వివేకానంద ఇన్‌స్టిట్యూట్ ఆఫ్ హ్యూమన్ ఎక్సలెన్స్ (VIHE), ఖమ్మం ఆధ్వర్యంలో పాలేరు జవహర్ నవోదయ విద్యాలయంలో ‘ప్రాజెక్ట్ పాణి’ పేరుతో ఏర్పాటు చేసిన గ్రీన్ హౌస్‌ను ప్రారంభించారు.
ఓక్రిడ్జ్ స్కూల్, హైదరాబాద్‌కు చెందిన 12వ తరగతి విద్యార్థి దక్ష్ సూదిని ఆలోచనతో ‘ప్రాజెక్ట్ పాణి’కు శ్రీకారం చుట్టారు. విద్యార్థుల్లో వ్యవసాయం, నీటి సంరక్షణ మరియు ఆధునిక సాగు విధానాలపై అవగాహన పెంపొందించాలనే ఉద్దేశంతో దక్ష్ రూపొందించిన ఈ ఆలోచనకు ఆయన తల్లిదండ్రులు ప్రోత్సాహం అందించారు. దక్ష్ ఈ ప్రాజెక్టుకు ‘పాణి (Paani)’ అనే పేరును పెట్టారు. ఆయన తల్లి శ్రీమతి దీప్తి ఈ ప్రాజెక్టుకు ఆర్థిక సహకారం అందించగా, వివేకానంద ఇన్‌స్టిట్యూట్ ఆఫ్ హ్యూమన్ ఎక్సలెన్స్ (VIHE) ద్వారా దీనిని కార్యరూపంలోకి తీసుకువచ్చారు.
VIHE వ్యవస్థాపకులు శ్రీ దేవకి వాసుదేవరావు గారు దక్ష్ సూదిని ఆలోచనను ఒక పైలట్ ప్రాజెక్టుగా స్వీకరించి, పాలేరు జవహర్ నవోదయ విద్యాలయంలో గ్రీన్ హౌస్‌ను ఏర్పాటు చేయడానికి చొరవ తీసుకున్నారు. విద్యార్థులు వ్యవసాయాన్ని కేవలం పుస్తకాల ద్వారా కాకుండా, స్వయంగా ఆచరణలో నేర్చుకునేలా చేయడమే ఈ ప్రాజెక్టు ప్రధాన ఉద్దేశం.
‘ప్రాజెక్ట్ పాణి’ ద్వారా తక్కువ నీటితో పంటల సాగు, పరిమిత స్థలంలో అధిక దిగుబడి సాధించే విధానాలు, మొక్కల పెంపకం మరియు సంరక్షణ, ఆధునిక వ్యవసాయ సాంకేతికత, సేంద్రియ సాగు, నీటి పొదుపు వంటి అంశాలపై విద్యార్థులకు ప్రాయోగిక అవగాహన కల్పించనున్నారు. గ్రీన్ హౌస్‌లో పండించే కూరగాయలు, ఇతర పంటల దిగుబడిని విద్యార్థుల అవసరాలకు వినియోగించేలా ప్రణాళిక రూపొందించారు.
ఈ కార్యక్రమానికి జవహర్ నవోదయ విద్యాలయం పాలేరు ప్రిన్సిపాల్ శ్రీ వెంకట రమణ గారు, VIHE కార్యదర్శి శ్రీ గన్నవరపు చంద్రశేఖర్ గారు, VIHE కమిటీ సభ్యులు శ్రీ జయంత్ పటేల్ గారు హాజరై కార్యక్రమాన్ని అభినందించారు.
కార్యక్రమాన్ని విద్యార్థులు ఎంతో ఉత్సాహంగా నిర్వహించారు. గ్రీన్ హౌస్ ఏర్పాటు వెనుక ఉన్న ఉద్దేశాన్ని, దాని ఉపయోగాలను తెలుసుకోవడంలో విద్యార్థులు అత్యంత ఆసక్తి ప్రదర్శించడంతో పాటు, కార్యక్రమ నిర్వహణలోనూ చురుకుగా పాల్గొన్నారు.
