31/08/2026
बेघर मुलांसाठी हक्काचे घर !!!
समाजातील
बेघर, आर्थिक दृष्ट्या दुर्बल आणि गरजु मुलांच्या निवारा- शिक्षण आणि उज्वल भविष्यासाठी उभारण्यात येणाऱ्या मुलांच्या वस्तीगृहाचे भुमिपूजन २९ ऑगस्ट २०२६ रोजी म्हस्कळ, टिटवाळा येथे उपस्थित मान्यवरांच्या हस्ते पार पडले.
बेघर मुले आणि त्या संबंधित विविध विषयांत प्रदीर्घ काळापासून जीवन संवर्धन फाउंडेशन ही संस्था कल्याण आणि परिसरात कार्यरत आहे. या संस्थेच्या नवीन वस्तीगृहाच्या इमारतीचे भूमिपूजन काल म्हस्कळ टिटवाळा येथे पार पडले.
गरजु विद्यार्थ्यांची वाढती संख्या पाहता, या नवीन वास्तूची आवश्यकता प्रकर्षाने जाणवत होती. विद्यार्थ्यांच्या प्रश्नांबद्दल सध्या विविध स्तरावर घडामोडी घडत असतांना, समाजातील जागरुक नागरिकांनी, सज्जन शक्तीने पुढे येऊन या प्रकल्पास सहाय्य केले आहे अशी भावना संस्थेचे अध्यक्ष श्री सदाशिव चव्हाण यांनी यावेळी व्यक्त केली.
संस्थेच्या या प्रकल्पास आवश्यक जागेसाठी पुढाकार घेऊन सिंहाचा वाटा उचलणारे समाजसेवक श्री राजाभाऊ पातकरजी तसेच रस्तोगी इस्टेटचे श्री संजयजी गुप्ता हे या कार्यक्रमाचे मुख्य अतिथी म्हणुन उपस्थित होते.
संस्थेचे आजपर्यंतचे काम या वास्तूमुळे आणखी जोमाने पुढे जाईल, आणि परिसरातील शेकडो गरजु विद्यार्थ्यांना याचा भरघोस फायदा होईल. अशी भावना राजाभाऊंनी यावेळी व्यक्त केली. त्याचवेळी विद्यार्थ्यांच्या सर्वांगीण विकासासाठी हितचिंतक म्हणुन आम्ही नेहमी उपलब्ध असु, अशी हमी श्री संजयजी गुप्ता यांनी दिली.
कार्यक्रमास टिटवाळा महागणपती मंदिराचे श्री सुभाष जी जोशी, बदलापूर येथील माजी नगरसेवक शरदजी म्हात्रे, तसेच संस्थेचे कित्येक आश्रयदाते उपस्थित होते. या इमारतीचे रेखाटन अंबरनाथ येथील प्रसिद्ध वास्तू विशारद माननीय श्री प्रमोद जी कांबळे यांनी केलेले आहे व बांधकाम व्यवसाय प्रशांतजी बुटेरे हे या कामात लक्ष देत आहेत. सर्वांचे आभार मानून कार्यक्रमाची सांगता करण्यात आली.
