https://www.facebook.com/672309176469834/

Rotary Club Jalgaon- District3030, Ganpati Nagar, Jalgaon (2026)

22/04/2026

रोटरी जळगावतर्फे पर्यावरण संवर्धनासाठी नन्नवरे, डॉ. महाजन, वाणी, राणे, फालक यांचा गौरव

येथील रोटरी क्लब जळगावतर्फे पर्यावरण संवर्धनासाठी सातत्याने उल्लेखनीय कार्य करणाऱ्या शहरातील पाच मान्यवरांचा सन्मानचिन्ह प्रदान करून गौरव करण्यात आला. गणपती नगरातील रोटरी हॉलमध्ये झालेल्या कार्यक्रमप्रसंगी व्यासपीठावर रोटरी क्लब बडोदा ग्रीनचे प्रेसिडेंट इलेक्ट कौस्तुभ गोखले यांची प्रमुख अतिथी व वक्ते म्हणून तर सहप्रांतपाल डॉ. अपर्णा भट - कासार, प्रेसिडेंट एन्क्लेव्ह जितेंद्र ढाके, अध्यक्ष गिरीश कुलकर्णी, मानद सचिव सुभाष अमळनेरकर यांची विशेष उपस्थिती होती.
रोटरी कॅलेंडरप्रमाणे असलेल्या पर्यावरण महिन्यानिमित्त समर्पण संस्था व पर्यावरण शाळेचे संस्थापक राजेंद्र नन्नवरे, आर्यन फाऊंडेशनच्या डॉ. रेखा महाजन, ग्रीन सिटी फाऊंडेशनचे विजय वाणी, वनविभागाचे सेवानिवृत्त अधिकारी राजेंद्र राणे, वन्यजीव संरक्षक संस्थेचे अध्यक्ष रवींद्र फालक यांचा कौस्तुभ गोखले यांच्या हस्ते गौरव करण्यात आला. यावेळी प्रमुख वक्ते कौस्तुभ गोखले यांनी रोटरी क्लब बडोदा ग्रीन या पर्यावरणाला समर्पित असलेल्या क्लबने केलेल्या उपक्रमांची माहिती दिली.
क्लबने गावे दत्तक घेऊन सीएसआरच्या माध्यमातून पर्यावरण व वेस्ट मॅनेजमेंट विषयी ग्रामस्थांना प्रशिक्षण देत सहभागी करून घेतल्याचे सांगितले. मीयावाकी जंगल, चौपाल कॅफे, इको फर्निचर या नवीन संकल्पनाबद्दल देखील त्यांनी माहिती दिली. शाळेतील विद्यार्थी व नागरिकांसाठी स्पर्धा आयोजित करून अवघ्या अडीच तासात ६५० किलोपेक्षा जास्त ई - वेस्ट मटेरियल संकलित केल्याचे गोखले यांनी सांगितले.
त्यांच्या क्लबने केलेल्या काही उपक्रमांची पंतप्रधान नरेंद्र मोदी यांनी 'मन की बात'मध्ये दखल घेतली आहे. आपल्या छोट्याशा कृतीतूनही पर्यावरणासाठी मोठी मदत होत असते असे त्यांनी शेवटी सांगितले. आभार प्रदर्शन सुभाष अमळनेरकर यांनी केले. कार्यक्रमास रोटरी इलाईटचे अध्यक्ष संदीप झंवर, रोटरी स्टार्सचे अध्यक्ष विपुल पटेल, रोटरी ग्रीन सिटीचे अध्यक्ष धनश्री ठाकरे यांच्यासह विविध रोटरी क्लबचे अध्यक्ष, सचिव व पर्यावरण समिती प्रमुख तसेच रोटरीचे डिस्ट्रिक्ट ऑफिसर्स यांची उपस्थिती होती.

22/04/2026

प्रत्येक व्यक्तीने मृत्युपत्र बनविणे अत्यावश्यक:- ॲड. भोकरीकर

आरसीसी ऑफ राईपच्या
व्याख्यानास ज्येष्ठांची उपस्थिती

भविष्यातील वादविवाद टाळण्यासाठी प्रत्येक व्यक्तीने मृत्युपत्र बनविणे अत्यंत आवश्यक आहे, असे प्रतिपादन ॲड. महेश भोकरीकर यांनी केले. गणपती नगरातील रोटरी सभागृहात रोटरी क्लब जळगाव पुरस्कृत आरसीसी ऑफ राईपच्यावतीने आयोजित जाहीर व्याख्यानात ते बोलत होते. याप्रसंगी व्यासपीठावर अध्यक्ष पल्लवी शिंपी, रोटरीचे मानद सचिव सुभाष अमळनेरकर व लिटरसी कमिटी चेअरमन डाॅ. शुभदा कुलकर्णी उपस्थित होत्या.
आपल्या मनोगतात ॲड. भोकरीकर पुढे म्हणाले कि, मृत्युपत्र ही एखाद्या व्यक्तीने आपल्या मृत्यूनंतर आपल्या मालमत्तेचे कसे वाटप व्हावे याबाबत केलेली कायदेशीर घोषणा होय आणि ती व्यक्तीच्या मृत्यूनंतरही तिची इच्छा व्यक्त करणारा तिचा कायदेशीर आवाज असते. भारतामध्ये मृत्युपत्रासंबंधीचे कायदे इंडियन सेक्शन अॅक्ट १९२५ अंतर्गत येतात. मृत्युपत्र वैध ठरण्यासाठी ते लेखी असणे, संबंधित व्यक्तीची स्वाक्षरी आणि किमान दोन साक्षीदारांचे प्रमाणन आवश्यक असल्याचे त्यांनी स्पष्ट केले.
मृत्युपत्र कधीही बदलता येते व शेवटचे मृत्युपत्रच ग्राह्य धरले जाते. नोंदणी बंधनकारक नसली तरी भविष्यातील वाद टाळण्यासाठी ती उपयुक्त ठरते, असेही त्यांनी नमूद केले. योग्य पद्धतीने केलेले मृत्युपत्र कुटुंबातील वाद टाळण्यास मदत करते, त्यामुळे प्रत्येकाने वेळेवर मृत्युपत्र तयार करावे, असे आवाहन करण्यात आले. शेवटी उपस्थितांचे शंकानिरसन करण्यात आले.
प्रास्ताविक पल्लवी शिंपी यांनी केले. कार्यक्रमाचे सूत्रसंचालन स्वाती महाजन यांनी तर विनिता भट यांनी आभार प्रदर्शन केले. कार्यक्रमास आरसीसीच्या सदस्यांसह संवाद सचिव पंकज व्यवहारे, संजय दोशी, सुबोध सराफ, नित्यानंद पाटील व नागरिक मोठ्या संख्येने उपस्थित होते.

22/04/2026

रोटरी क्लब जळगावतर्फे पक्ष्यांसाठी घरटे व पाण्याच्या परळांचे वितरण

पर्यावरण संवर्धनाच्या दृष्टीने रोटरी क्लब जळगावतर्फे राबविण्यात आलेल्या पक्ष्यांसाठी घरटे व पिण्याच्या पाण्याच्या परळ वितरण उपक्रमास सदस्यांचा उत्स्फूर्त प्रतिसाद लाभला. आज झालेल्या कार्यक्रमात नोंदणी केलेल्या सदस्यांना घरटी व परळांचे वितरण करण्यात आले.

वाढत्या शहरीकरणामुळे पक्ष्यांना सुरक्षित घरटी बांधण्यासाठी जागा मिळणे कठीण होत चालले आहे. याच पार्श्वभूमीवर हा उपक्रम राबविण्यात आला असून, यामुळे पक्ष्यांना सुरक्षित निवारा मिळण्याबरोबरच त्यांच्या पिल्लांचा चिवचिवाट परिसरात अनुभवता येणार आहे. तसेच उन्हाळ्यातील तीव्र उष्णतेत पक्ष्यांसाठी पिण्याच्या पाण्याची सोय होऊन पर्यावरण संतुलन राखण्यास मदत होणार आहे.

यावेळी अध्यक्ष गिरीश कुळकर्णी यांनी या प्रकल्पाची उपयुक्तता अधोरेखित करत, “अशा छोट्या उपक्रमांमधून आपण निसर्गाशी नाते अधिक घट्ट करू शकतो,” असे प्रतिपादन केले. नाॅन-मेडीकल कमिटी चेअरमन संदीप शर्मा यांनी सदस्यांना या उपक्रमात सक्रिय सहभागी होण्याचे आवाहन केले. तर कॅप्टन मोहन कुलकर्णी यांनी, हे घरटे व परळ आपल्या मित्रपरिवारालाही भेट देण्यासाठी अत्यंत उपयुक्त असून, पर्यावरण संवर्धनाचा संदेश अधिक व्यापकपणे पोहोचविण्यास मदत करणार असल्याचे मत व्यक्त केले.

हा उपक्रम केवळ सदस्यांपुरता मर्यादित न राहता समाजामध्ये पर्यावरणाविषयी जागरूकता निर्माण करण्याचा रोटरी क्लबचा प्रयत्न असल्याचेही यावेळी सांगण्यात आले. ॲड. सागर चित्रे यांनी पन्नास घरटी घेऊन पर्यावरण जागृती संदेश देणार असल्याचे याप्रसंगी सांगितले. कार्यक्रमास मानद सचिव सुभाष अमळनेरकर, संजय दोशी, निलेश झोपे, उल्हास सुतार आदी उपस्थित होते.

01/04/2026

मोहफुलांपासून पौष्टिक पदार्थ निर्मितीमुळे
महिला सबलीकरणासोबत उपजीविकेच्या संधी: पाटील
रोटरी जळगाव व गांधी रिसर्च फाऊंडेशनच्या कार्यशाळेस सुरुवात

वैजापूर(ता. चोपडा)- रोटरी क्लब जळगाव व गांधी रिसर्च फाऊंडेशनच्या मोहफुलांपासून पौष्टिक पदार्थ बनविण्याच्या कार्यशाळेमुळे महिला सबलीकरणासोबतच उपजीविकेच्या अनेक संधी उपलब्ध होतील अशी अपेक्षा आदिवासी विकास विभाग यावलचे सहायक प्रकल्पाधिकारी सतिश पाटील यांनी व्यक्त केली. कार्यशाळेच्या उद्घाटन प्रसंगी ते बोलत होते. याप्रसंगी व्यासपीठावर सरपंच दत्तर सिंग पावरा, वनरक्षक विजय शिरसाठ, प्रशिक्षक डाॅ. सतिश गोगुलवार, शालिनीताई, अध्यक्ष गिरीश कुळकर्णी, मानद सचिव सुभाष अमळनेरकर, संवाद सचिव पंकज व्यवहारे, विद्याताई आदी मान्यवर उपस्थित होते.

कार्यक्रमाची सुरुवात महात्मा गांधीजींच्या प्रतिमेस मान्यवराचे हस्ते सुती अर्पण करुन अभिवादन करण्यात आले. प्रशांत सुर्यवंशी यांनी जीवन में कुछ करना है तो हिम्मत हारे मत बैठो... हे गीत सादर केले.

सरपंच दत्तर सिंग पावरा म्हणाले मोहफुलांचा उपयोग केवळ दारु बनविण्यासाठी माहिती होता मात्र रोटरी व गांधीतीर्थमुळे या नवीन पदार्थांची माहिती झाल्याचे सांगितले. वनरक्षक विजय शिरसाठ यांनी वनसंपदा आपल्यासाठी असून तिचा सुयोग्य कारणासाठी वाहावा. वनसंपदेच्या संवर्धन व मुल्यसंवर्धन याकडेही लक्ष देण्याची आवश्यकता सांगितली. डाॅ. गोगुलवार यांनी आपण कार्यशाळेतून मिळालेले शिक्षण व्यवहारात उपयोगी आणावे असे आवाहन केले. आयोजकांनी महिलांनी निर्माण केलेल्या पदार्थांना चांगली बाजारपेठ उपलब्ध करून दिली पाहिजे असेही आवाहन केले.

आज कार्यशाळेत मोहफुलांचा चिवडा, मोहफुलांचे लाडू व केक बनविण्याचे प्रशिक्षण देण्यात आले. कार्यशाळेस ३८ आदिवासी भगिनींनी सहभाग घेतला आहे. दोन दिवसीय कार्यशाळेचा समारोप शुक्रवार, दि. २७ मार्च रोजी दुपारी ३ वाजता होणार आहे.

कार्यक्रमाचे सूत्रसंचालन प्रशांत सुर्यवंशी यांनी तर आभार सचिव सुभाष अमळनेरकर यांनी मानले. कार्यक्रमास चंद्रकांत चौधरी, अर्जुन प्रसाद, रौनक, सतिश चौरसिया, पायल, अश्विनी, राखी, अभिषेक, वैभव, रजत, जयश्री, आशिक, आयुष, राहुल, युवराज कोळी, बाळू बारेला आदी उपस्थित होते.

01/04/2026

रोटरी क्लबतर्फे वर्धिष्णू संस्थेला लॅपटॉप भेट

आनंदघरातील मुलांना हायजीन किटचे वितरण

जळगाव : रोटरी क्लब जळगावतर्फे समाजोपयोगी उपक्रमांतर्गत वर्धिष्णू या स्वयंसेवी संस्थेला कार्यालयीन कामकाज सुलभ व्हावे यासाठी लॅपटॉप भेट देण्यात आला. या लॅपटॉपचा उपयोग संस्थेच्या नियोजन, अहवाल तयार करणे व आर्थिक हिशेब मांडणीसाठी होणार आहे.
याच उपक्रमांतर्गत शहरातील तंट्याभील वस्तीतील आनंदघरातील विद्यार्थ्यांना हायजीन किटचे वितरण करण्यात आले. या किटमध्ये टूथब्रश, टूथपेस्ट यांसह पौष्टिक आहार म्हणून राजगिरा लाडू व चिक्कीचा समावेश होता.
या उपक्रमाद्वारे विद्यार्थ्यांमध्ये स्वच्छतेबाबत जागरूकता निर्माण करण्याबरोबरच त्यांच्या आरोग्याचीही काळजी घेण्याचा प्रयत्न करण्यात आला.
कार्यक्रमादरम्यान वर्धिष्णूच्या प्रणाली
सिसोदिया यांनी संस्थेच्या कार्याची माहिती दिली.
रोटरी क्लब जळगावचे अध्यक्ष गिरीश कुळकर्णी यांनी विद्यार्थ्यांशी संवाद साधत शिक्षण, शिस्त व स्वच्छतेचे महत्त्व पटवून दिले.
या प्रसंगी माजी अध्यक्ष संदीप शर्मा, कॅप्टन मोहन कुलकर्णी, तसेच चंदन महाजन, योगेश गांधी, डॉ. शुभदा कुलकर्णी, सुबोध सराफ, संवाद सचिव पंकज व्यवहारे उपस्थित होते.
उल्लेखनीय बाब म्हणजे, रोटरी क्लब जळगावने यापूर्वीही समता नगर येथील आनंदघरातील विद्यार्थ्यांसाठी संगणक भेट देऊन त्यांच्या शैक्षणिक प्रगतीस हातभार लावला आहे. हा उपक्रम रोटरीच्या ‘मूलभूत शिक्षण व साक्षरता’ आणि ‘समुदाय विकास’ या प्रमुख क्षेत्रांना पूरक ठरत आहे.

01/04/2026

रोटरी सदस्यांनी विद्यार्थ्यांसाठी केलेले ज्ञानदानाचे पवित्र कार्य - निशा जैन

रोटरीच्या सेवन बाय सेवन बाय सेवन प्रकल्पाचा समारोप

जळगाव - विविध क्षेत्रात यशस्वी असलेल्या रोटरी सदस्यांनी आपल्या ज्ञानाचा अनुभवाचा उपयोग करीत विद्यार्थ्यांची ज्ञानवृद्धी करण्याचे पवित्र कार्य केले आहे, असे अनुभूती इंटरनॅशनल स्कूलच्या संचालिका निशा जैन यांनी प्रतिपादन केले.
रोटरी क्लब जळगावच्या सेवन बाय सेवन बाय सेवन या विद्यार्थ्यांसाठीच्या व्याख्यानमालेच्या समारोपप्रसंगी त्या बोलत होत्या.
गणपती नगरातील रोटरी हॉलमध्ये झालेल्या कार्यक्रम प्रसंगी व्यासपीठावर प्रमुख अतिथी म्हणून रोटरी डिस्ट्रिक्ट गव्हर्नर इलेक्ट डॉ. राजेश पाटील, सहाय्यक प्रांतपाल डॉ. अपर्णा भट - कासार, अध्यक्ष गिरीश कुलकर्णी, संवाद सचिव पंकज व्यवहारे, प्रकल्प प्रमुख सुबोध सराफ यांची प्रमुख उपस्थिती होती.
मूल्य आधारित शिक्षणातून विद्यार्थ्यांवर संस्कार होणे गरजेचे असून रोटरी क्लब जळगाव शैक्षणिक क्षेत्रात चांगले उपक्रम राबवीत आहे असे निशा जैन यांनी भाषणात सांगितले.
रोटरीने पुढील वर्षी हा उपक्रम शहरातील जास्तीत जास्त शाळांमध्ये राबवावा अशी अपेक्षाही त्यांनी व्यक्त केली.
डॉ. राजेश पाटील यांनी या उपक्रमाचे कौतुक करीत रोटरी क्लब जळगावच्या यावर्षीच्या काही प्रमुख उपक्रम आगामी वर्षात संपूर्ण रोटरी डिस्ट्रिक्ट मध्ये राबविण्याचा मानस व्यक्त केला.
कार्यक्रमात व्याख्यानमालेतील वक्ते कवरलाल संघवी, डॉ. शमा सुबोध, स्वाती ढाके, पंकज व्यवहारे, डॉ. शुभदा कुलकर्णी, डॉ. पराग जहागीरदार, डॉ. पवन बजाज, राजेश वेद, ॲड. महेश भोकरीकर, ॲड. आनंद मुजुमदार, गिरीश कुलकर्णी, ॲड. सागर चित्रे, डॉ. रवी हिरणी, डॉ. सतीश शिंदाडकर यांचा मान्यवरांच्या हस्ते सन्मानचिन्ह प्रदान करून गौरव करण्यात आला.
प्रास्ताविकात प्रकल्प प्रमुख सुबोध सराफ यांनी गेल्या १८ वर्षांपासून क्लबतर्फे शहरातील विविध शाळांमध्ये विद्यार्थ्यांसाठी ही ज्ञान सत्र व्याख्यानमाला राबविण्यात येत आहे.
गेल्या तीन वर्षांपासून प्रकल्प प्रमुख कार्य करीत यावर्षी १४ शाळांमध्ये १४ वक्त्यांनी विविध विषयांवर ८८ व्याख्यानाद्वारे मार्गदर्शन केल्याचे त्यांनी सांगितले.
व्याख्यानमालेतील वक्त्याच्या वतीने डॉ. पराग जहागीरदार, राजेश वेद यांनी तर मुख्याध्यापकांच्यावतीने सरोज तिवारी व शिक्षकांच्यावतीने संजय खैरनार यांनी मनोगत व्यक्त केले.
सूत्रसंचालन आदिती कुलकर्णी यांनी तर आभार पंकज व्यवहारे यांनी मानले. राष्ट्रगीताने कार्यक्रमाची सांगता झाली.

01/04/2026

सर्वोत्कृष्ट इंटरॅक्ट क्लब पुरस्काराचे रोटरी क्लब जळगाव तर्फे वितरण
इंटरॅक्ट क्लब ऑफ जिजामाता विद्यालयाला इंटरॅक्ट क्लब ऑफ द इयर पुरस्कार

जळगाव - येथील रोटरी क्लब जळगाव तर्फे शहरातील क्लबच्या २१ इंटरॅक्ट क्लब मधून सर्वोत्कृष्ट क्लब पुरस्कारचे वितरण करण्यात आले.
गणपती नगरातील रोटरी हॉलमध्ये झालेल्या कार्यक्रमास रोटरी डिस्ट्रिक्ट गव्हर्नर इलेक्ट डॉ. राजेश पाटील, अनुभूती स्कूलच्या संचालिका निशा जैन, अध्यक्ष गिरीश कुलकर्णी, संवाद सचिव पंकज व्यवहारे, इंटरॅक्ट कमिटी चेअरमन डॉ काजल फिरके यांची प्रमुख उपस्थिती होती.
यावेळी जिना इसी का नाम है या विषया वर प्रमुख अतिथी म्हणून डॉ. राजेश पाटील यांनी बोलताना इंटरॅक्ट सदस्य होणे म्हणजे सकारात्मक जीवनाकडचे तुमचे पहिले पाऊल आहे. केवळ स्वतःसाठी नाही तर इतरांसाठी जगा. आपल्या चुका, अपयशातून शिकून प्रगती करीत यशस्वी व्हावे. त्याचबरोबर चांगला माणूस बनण्याचा प्रयत्न करा. विद्यार्थ्यांमध्ये देशाच्या परिवर्तनाची ताकद आहे असे सांगितले. निशा जैन यांनीही मनोगत व्यक्त केले.
कार्यक्रमात इंटरॅक्ट क्लब ऑफ जिजामाता माध्यमिक विद्यालयाला इंटरॅक्ट क्लब ऑफ द इयर अवॉर्डने सन्मानित करण्यात आले.
ज्ञान संकल्प एक्सलन्स अवॉर्डने इंटरॅक्ट क्लब ऑफ नंदिनीबाई वामनराव मुलींचे विद्यालय तर मोस्ट व्हायब्रंट इंटरॅक्ट क्लब
अवॉर्डने इंटरॅक्ट क्लब ऑफ का.ऊ.कोल्हे विद्यालय व ज्युनिअर कॉलेज यांना प्रदान करण्यात आले.
इंटरॅक्ट क्लब ऑफ श्रीराम हायस्कूलला बेस्ट पार्टीसिपेटिव्ह इंटरॅक्ट क्लब तर धानोरा येथील इंटरॅक्ट
क्लब ऑफ झेड. टी. महाजन हायस्कूल यांना आऊटस्टँडिंग कम्युनिटी सर्विस अवॉर्डने गौरविण्यात आले.
इंटरॅक्ट क्लब ऑफ या.दे.पाटील विद्यालयाला डीकेड ऑफ डेडिकेशन अवॉर्ड सेवन बाय सेवन बाय सेवन प्रोजेक्टसाठी देण्यात आले.
कार्यक्रमात या.दे. पाटील विद्यालयाच्या वर्षा अहिरराव यांच्या तीन हस्तलिखितांचे मान्यवरांच्या हस्ते प्रकाशन करण्यात आले.
या.दे.पाटील विद्यालयाच्या राशी पाटील या विद्यार्थिनीने इंटरॅक्ट क्लबमुळे आत्मविश्वास व संधी या शब्दांचा अर्थ कळला आणि नेतृत्व विकसित झाले असे मनोगतात सांगितले.
प्रास्ताविक गिरीश कुलकर्णी यांनी तर सूत्रसंचालन आदिती कुलकर्णी यांनी केले. रोटरीच्या वॉटर सॅनिटेशन अँड हायजिन महिना व जागतिक जलदिनानिमित्त या.दे. पाटील विद्यालयाच्या विद्यार्थ्यांनी अवघ्या दोन दिवसात तयार केलेले जल है तो कल है या पथनाट्याचे सादरीकरण केले.
यावर्षी नव्याने स्थापन झालेल्या पाच इंटरॅक्ट क्लबला मान्यवरांच्या हस्ते चार्टर प्रदान करण्यात आले.
कार्यक्रमास २१ इंटरॅक्ट क्लब असलेल्या शाळांचे मुख्याध्यापक, शिक्षक, विद्यार्थ्यांची तसेच रोटरी सदस्यांची मोठ्या संख्येने उपस्थिती होती.

01/04/2026

रोटरी क्लब जळगावचे अजिंठा बुलेटीन एप्रिल २६...

12/03/2026

रोटरी डिस्ट्रिक्टची यशोगाथा सर्व क्लबची कथा - शेवाळे
रोटरी जळगावच्या शिस्त व परिपक्वतेबद्दल प्रांतपालांचे गौरवोद्गार

रोटरी वर्षात संपूर्ण डिस्ट्रिक्टची यशोगाथा हि डिस्ट्रिक्ट मधील १२० क्लबची कथा असेल. यात वर्षभरात १००० नवीन सदस्य, १० लाख डॉलरचे डोनेशन, ३० नवीन क्लब, ५०८६ रक्त पिशव्यांचे संकलन, ५००० सायकलींचे गरजूना वाटप या गोष्टी प्रत्येक रोटरी सदस्या साठी अभिमानाची गोष्ट असेल असे प्रतिपादन रोटरी डिस्ट्रिक्ट ३०३०चे प्रांतपाल ज्ञानेश्वर शेवाळे यांनी केले. रोटरी क्लब जळगावच्या अधिकृत भेटीप्रसंगी ते बोलत होते. याप्रसंगी व्यासपीठावर सहाय्यक प्रांतपाल डॉ. अपर्णा भट-कासार, अध्यक्ष गिरीश कुळकर्णी, मानद सचिव सुभाष अमळनेरकर उपस्थित होते.

आपल्या मनोगतात ते पुढे म्हणाले, डिस्ट्रिक्ट मधील विविध क्लबला दिलेली भेट माझ्यासाठी शिक्षणाची संधी असते. कारण मला यातून संस्कार, कर्तृत्व, आत्मपरीक्षण, संयम, नेतृत्वाचा परिचय होतो व क्षितिजापलीकडे जाण्याची संधी मिळते. रोटरी क्लब जळगावच्या भेटीत मला अनेक गोष्टी शिकायला मिळाल्या. रोटरी क्लब जळगावचे कार्य शिस्त, परिपक्वता व परिपूर्णतेचा आदर्श आहे आणि त्यामुळेच तो माझ्या हृदयाजवळील क्लब आहे असे ते म्हणाले.

७६ वर्षांचा वारसा लाभलेल्या या क्लबला भेट देतांना मला नेहमीच अभिमान वाटतो. क्लबच्या भेटीदरम्यान रोटरीला अपेक्षित असलेले कार्य मोठ्या प्रमाणावर झालेले दिसून आल्याचे गौरवोद्गार रोटरी डिस्ट्रिक्ट ३०३०चे प्रांतपाल ज्ञानेश्वर शेवाळे यांनी काढले.

कार्यक्रमाची सुरुवात कॅप्टन मोहन कुळकर्णी यांच्या बासरीवरील गणेश वंदनेने झाली. अध्यक्ष गिरीश कुळकर्णी यांनी वर्षभरात राबविलेल्या महत्त्वपूर्ण उपक्रमांची थोडक्यात माहिती दिली. संवाद सचिव पंकज व्यवहारे यांनी पॉवरपॉईंटद्वारे क्लबचा अहवाल सादर केला. यावर्षी जितेंद्र ढाके व डॉ. तुषार फिरके तसेच फाऊंडेशनला भरीव योगदान देणाऱ्या सदस्यांचा गौरव करण्यात आला. ॲड. हेमंत भंगाळे यांनी आभार मानले. राष्ट्रगीताने सभेची सांगता झाली. सभेस माजी प्रांतपाल डॉ. चंद्रशेखर सिकची, संजय गांधी, डिस्ट्रिक्टच्या फर्स्ट लेडी अनुपमा शेवाळे, क्लबच्या फर्स्ट लेडी अदिती कुळकर्णी, ज्येष्ठ सदस्य किरण बेंडाळे, अशोक जोशी, डॉ. प्रदीप जोशी, संदीप शर्मा, मनोज जोशी, डॉ. शुभदा कुळकर्णी व सदस्य मोठ्या संख्येने उपस्थित होते.

12/03/2026

रोटरी जळगावतर्फे महिला दिन उत्साहात
उल्लेखनीय कार्याबद्दल महिला सदस्यांचा गौरव

आंतरराष्ट्रीय महिला दिनाच्या निमित्ताने रोटरी क्लब जळगावतर्फे महिला सदस्यांचा सन्मान सोहळा उत्साहात पार पडला. कार्यक्रमात महापौरांसह रोटरीच्या विविध सेवा उपक्रमांत उल्लेखनीय योगदान देणाऱ्या महिला सदस्यांचा गौरव करण्यात आला.

कार्यक्रमास प्रमुख पाहुण्या महापौर दिपमाला काळे होत्या. यावेळी सहाय्यक प्रांतपाल अपर्णा भट-कासार यांनी जळगावातील सर्व रोटरी क्लबमधील महिला सदस्यांची संख्या शंभरच्या पुढे गेली असल्याचे सांगितले. अनेक महिला सदस्यांनी क्लब अध्यक्षपदासह डिस्ट्रिक्टमधील विविध पदे भूषवून आपला ठसा उमटवला आहे. रोटरीच्या सेवा कार्यात महिलांचे योगदान अत्यंत महत्त्वाचे असल्याचे त्यांनी नमूद केले.

महापौर दीपमाला काळे यांनी आपल्या मनोगतात रोटरी संस्थेचे समाजहिताचे प्रकल्प अत्यंत उपयुक्त असल्याचे सांगितले. जळगाव शहराच्या विकासासाठी महानगरपालिका आणि रोटरी संस्थांनी संयुक्तपणे विविध उपक्रम राबवावेत, असे आवाहनही त्यांनी केले. शहराच्या विकासामध्ये नागरिकांचा सक्रिय सहभाग अत्यावश्यक असल्याचेही त्या म्हणाल्या.

या प्रसंगी क्लबमधील महिला सदस्यांचा प्रातिनिधिक स्वरुपात विविध पुरस्कारांनी गौरव करण्यात आला. त्यामध्ये रोटरी शक्ती ॲवाॅर्ड हा सन्मान रो. डाॅ. अपर्णा भट-कासार यांना प्रदान करण्यात आला. तसेच सर्व्हीस एक्सलन्स ॲवाॅर्ड रो. पूनम मानुधने, आऊटस्टॅण्डींग लीडर ॲवाॅर्ड रो. डाॅ. शुभदा कुलकर्णी आणि मोस्ट प्राॅमिसिंग रोटेरियन रो. स्वाती ढाके यांना प्रदान करण्यात आले.

अध्यक्ष गिरीश कुळकर्णी यांनी आपल्या मनोगतात रोटरीच्या सेवा कार्यात महिला सदस्यांचा सहभाग क्लबच्या कार्याला नवी ऊर्जा देणारा असल्याचे सांगितले.
कार्यक्रमास क्लबचे पदाधिकारी, सदस्य तसेच मान्यवर मोठ्या संख्येने उपस्थित होते. यानंतर महिलांसाठी विशेष खेळ घेण्यात आले. यात वनिता वेद, स्वाती ढाके व जाखेटीया विजयी ठरल्या. त्यांना आकर्षक बक्षिसे देण्यात आली. संपूर्ण कार्यक्रमाचे संचालन फर्स्ट लेडी अदिती कुळकर्णी यांनी केले.

04/03/2026

विविधतेतून उमटला एकतेचा स्वर
रोटरी जळगावचा मानवतेचा जागर

जळगाव : रोटरी इंटरनॅशनलने फेब्रुवारी महिन्याच्या आधारावर रोटरी क्लब जळगावतर्फे ‘आओ लकीरे मिटाए…’ या विचारप्रवर्तक आणि हृदयस्पर्शी नाट्यप्रयोगाचे आयोजन करण्यात आले. कार्यक्रमास रोटरी सदस्यांची उत्स्फूर्त उपस्थिती लाभली.

गांधी रिसर्च फाउंडेशनच्या पीजी डिप्लोमा विद्यार्थ्यांनी सादर केलेल्या या नाटकाने उपस्थितांची मने जिंकली. जात, धर्म, संप्रदाय, लिंगभेद आणि युद्ध-संघर्ष यांमुळे समाजात निर्माण होणाऱ्या दुराव्यांवर प्रभावी प्रकाश टाकत मानवतेच्या नात्याने एकत्र येण्याचा आणि कृत्रिम भिंती पुसून टाकण्याचा संदेश देण्यात आला. या प्रसंगी सुबोध सराफ व रेश्मा चांदवाणी यांनी मनोगत व्यक्त करत नाट्यप्रयोगाचे कौतुक केले.

आजच्या विभाजित सामाजिक वातावरणात शांतता, सहिष्णुता आणि परस्पर सन्मान या मूल्यांची जपणूक करणे ही काळाची गरज असल्याचे त्यांनी नमूद केले.
नाटकात नेहा, जयश्री, पायल, सुशील, पुजा, मयूर, सागर, वैभव (महाराष्ट्र), आयुष (बनारस), रौनक, सतिश (उत्तर प्रदेश), आशिक (केरळ), अभिषेक (मध्य प्रदेश), भुपेंद्र (झारखंड), रुपक (त्रिपुरा), राखीकुमारी (बिहार) आदी कलाकारांनी प्रभावी भूमिका साकारल्या. विविध राज्यांतील विद्यार्थ्यांनी एकत्र येऊन सादर केलेल्या या नाट्यप्रयोगातून “विविधतेत एकता” हा भारताचा मूलमंत्र अधोरेखित झाला.
राष्ट्रपुरुषांच्या स्वप्नातील भारत घडविण्यासाठी महात्मा गांधी यांच्या विचारांचा स्वीकार आणि आचरण करणे अत्यावश्यक असल्याचा ठाम संदेश या कार्यक्रमातून देण्यात आला. जात, धर्म, संप्रदाय आणि लिंगभेद यांच्या पलीकडे जाऊन परस्पर सहकार्य व मानवतेच्या नात्याने समाजात शाश्वत शांतता प्रस्थापित करण्याचे आणि संघर्ष टाळण्याचे आवाहन नाटकातून करण्यात आले.

कार्यक्रमानंतर उपस्थितांनी नाट्यप्रयोगाचे मनापासून कौतुक केले. रोटरी क्लब जळगावचा हा उपक्रम समाजमनात शांततेचे आणि एकतेचे बीज रोवणारा ठरला.

Rotary Club Jalgaon- District3030

22/04/2026

22/04/2026

22/04/2026

01/04/2026

01/04/2026

01/04/2026

01/04/2026

01/04/2026

12/03/2026

12/03/2026

04/03/2026

Address

Website

Alerts

Shortcuts

Share

Category