08/09/2024
০৭/০৯/২৪ তাৰিখে সতী জয়মতী স্মৃতি ট্ৰাষ্ট ছ’চাইটিৰ আগন্তুক ৰূপালী জয়ন্তী সামৰণি অনুষ্ঠানৰ উদযাপন সমিতিৰ স্মৰণিকা উপ-সমিতিৰ এখনি সভা ৰুক্মিণীনগৰ ৰংগমঞ্চ প্ৰাংগনত অনুষ্ঠিত হৈ যায় ৷ ট্ৰাষ্টৰ সভাপতি ৰাজীৱ পানীফুকনে পৰিচালনা কৰা উক্ত সভাত ৰূপালী জয়ন্তী উপলক্ষে প্ৰকাশ পাবলগীয়া “জয়মতী কুঁৱৰী” স্মৃতিগ্ৰন্থৰ ওপৰত আলোচনা কৰা হয় ৷ সভাই ট্ৰাষ্টৰ ইতিহাসৰ উপৰি শুদ্ধভাবে উত্তৰ পূৰ্বাঞ্চলৰ সকলো জনগোষ্ঠীৰ বুৰঞ্জীভিত্তিক লেখাসমূহৰ বাবে বিষয়-বস্তু নিৰ্দ্ধাৰণ কৰি বিশিষ্ট লেখক-লেখিকাসকলৰ পৰা লেখা সংগ্ৰহ কৰাৰ ওপৰত মতামত পোষণ কৰে ৷ স্মৃতিগ্ৰন্থত অসমীয়া আৰু ইংৰাজী লেখাৰ দুটা ভাগ থাকিব ৷ ট্ৰাষ্টৰ ইতিপূৰ্বে অনুষ্ঠিত হৈ যোৱা সভা-সমিতি, ঘটনা পৰিঘটনা আদিৰ ফটো স্মৃতিগ্ৰন্থত সন্নিৱিষ্ট কৰাৰ ওপৰতো সভাই গুৰুত্ব আৰোপ কৰি ফটোসমূহ সংগ্ৰহ কৰাৰ কথা উনুকিয়ায় ৷ স্মৃতিগ্ৰন্থখনি গৱেষণামূলক গ্ৰন্থ হিচাপে প্ৰকাশ কৰি উলিওৱাৰ কথা ব্যক্ত কৰি শুভেচ্ছাবাণীৰ বাবে ভাৰতৰ মাননীয় ৰাষ্ট্ৰপতি, প্ৰধানমন্ত্ৰী, অসমৰ মাননীয় ৰাজ্যপাল আৰু মুখ্যমন্ত্ৰী মহোদয়লৈ আবেদন দিয়াৰ কথা আলোচনা কৰা হয় ৷ স্মৃতিগ্ৰন্থৰ বাবে বিজ্ঞাপন বিচাৰি নানা অনুষ্ঠান- প্ৰতিষ্ঠানলৈ যোৱাৰ কথা আলোচনা কৰা হয় ৷ সভাত উপস্থিত থাকি বিজয়া দেৱদাস, উৎপলা বৰা, অনিল সন্দিকৈ, মীনা শইকীয়া, নয়নতৰা দত্ত, মঞ্জুলা ভট্টাচাৰ্য,বনশ্ৰী গগৈ, গীতাঞ্জলি পানীফুকন আৰু পাৰুল বৰুৱাই বক্তব্য আগবঢ়ায় ৷ সভাপতি ৰাজীৱ পানীফুকনে সকলোৰে সহায়- সহযোগিতা কামনা কৰি স্মৃতিগ্ৰন্থখনি সৰ্বাংগসুন্দৰ ৰূপত প্ৰকাশ কৰি উলিয়াবলৈ সকলোকে আহ্বান জনায় ৷
