03/05/2026
৩ মে’,২০২৬:
জাতীয় কলা কৃষ্টি বিকাশ কেন্দ্ৰৰ উদ্যোগত আৰু নৱোদয় ফ্ৰেণ্ডশ্বিপ ছ'চাইটী, স্নেহাস্পদ ফাউণ্ডেশ্যনৰ সহযোগত আজি দেৰগাঁৱৰ বাতিপৰীয়া চিনিয়ৰ বেছিক বিদ্যালয়ত এখনি বিনামূলীয়া চিত্ৰ কৰ্মশালা আৰু চিত্ৰাংকন বিদ্যালয়ৰ শুভ উদ্বোধনী অনুষ্ঠান অনুষ্ঠিত হয়।
অনুষ্ঠানত অঞ্চলটোৰ বহু সংখ্যক আগ্ৰহী ছাত্ৰ-ছাত্ৰীয়ে উৎসাহেৰে অংশগ্ৰহণ কৰে। কৰ্মশালাখনত ফাইন আৰ্ট, ক্ৰাফট আৰু বিভিন্ন ধৰণৰ চিত্ৰকলাৰ ওপৰত প্ৰশিক্ষণ প্ৰদান কৰা হয়। ইয়াৰ জৰিয়তে ছাত্ৰ-ছাত্ৰীৰ সৃষ্টিশীল দক্ষতা বিকাশৰ লগতে তেওঁলোকৰ প্ৰতিভা বিকাশৰ বাবে এক উল্লেখযোগ্য মঞ্চ সৃষ্টি হয়।
জাতীয় কলা কৃষ্টি বিকাশ কেন্দ্ৰৰ সঞ্চালক ৰিয়াজ ৰাহুল হকে কয় যে, এই উদ্যোগৰ মূল উদ্দেশ্য হৈছে নৱপ্ৰজন্মৰ মাজত সৃষ্টিশীলতা বিকাশ কৰা, শিল্প-সংস্কৃতিৰ প্ৰতি আগ্ৰহ বৃদ্ধি আৰু চিত্ৰকলাক কেৱল হবি হিচাপে সীমাবদ্ধ নৰাখি এক কেৰিয়াৰমুখী শিক্ষাৰূপে গঢ় দি তোলা। অনুষ্ঠানত মূখ্য প্ৰশিক্ষকৰূপে উপস্থিত থাকে অঞ্চলটোৰ বিশিষ্ট চিত্ৰশিল্পী হোমেন ভূঞাঁ, লগতে কুৰিঘৰীয়া শাখাৰ প্ৰশিক্ষক মোজ্জামিল আহমেদ আৰু শ্বাহনাৱাজ আহমেদে ছাত্ৰ-ছাত্ৰীক প্ৰশিক্ষণ প্ৰদান কৰে।
উদ্বোধনী অনুষ্ঠানত উপস্থিত নৱোদয় ফ্ৰেণ্ডশ্বিপ ছ'চাইটীৰ বিষয়ববীয়াসকলে এই প্ৰচেষ্টাক উচ্চ প্ৰশংসা কৰি কয় যে, এনে সৃষ্টিশীল কাৰ্যসূচীয়ে ছাত্ৰ-ছাত্ৰীৰ লুকাই থকা প্ৰতিভা বিকাশত গুৰুত্বপূৰ্ণ ভূমিকা পালন কৰিব।
শেষত, আয়োজকসকলে আগন্তুক দিনসমূহতো এনে শিক্ষামূলক আৰু সৃষ্টিশীল কাৰ্যসূচী অব্যাহত ৰাখিবলৈ দৃঢ় সংকল্প ব্যক্ত কৰে।
Jatiya Kala Krishti Vikash Kendra Safique Alam
