Adim_Sanstha

11/08/2026

उपक्रमाची दखल घेतल्याबद्दल वृतपत्र व पत्रकार बंधूंचे मन:पूर्वक आभार !

09/08/2026

जागतिक आदिवासी दिनाच्या सर्व आदिवासी बांधवांना हार्दिक शुभेच्छा !

04/08/2026

घोडेगाव येथे 'समता ग्रंथालया'चे उद्घाटन
सेंद्रिय परसबाग बियाणे संचाचेही महिलांना वाटप; स्थानिक नागरिकांचा उत्स्फूर्त प्रतिसाद

आदिम संस्कृती, अभ्यास, संशोधन व मानव विकास केंद्र (आंबेगाव) यांच्या वतीने आयोजित ‘समता ग्रंथालय उद्घाटन’ आणि ‘सेंद्रिय परसबाग बियाणे वितरण’ कार्यक्रम घोडेगाव येथील जुन्नर फाट्याजवळील संस्था कार्यालयात मोठ्या उत्साहात पार पडला.

कार्यक्रमाच्या सुरुवातीला उपस्थित मान्यवरांच्या हस्ते फीत कापून 'समता ग्रंथालया'चे अधिकृत उद्घाटन करण्यात आले. तसेच, लोकशाहीर अण्णाभाऊ साठे यांच्या जयंतीनिमित्त त्यांच्या प्रतिमेस पुष्पहार अर्पण करून अभिवादन करण्यात आले.या प्रसंगी प्रमुख पाहुणे म्हणून घोडेगाव ग्रामीण रुग्णालयाच्या डॉ. सुवर्णा काळे आणि उपकोषागार कार्यालयाचे विजय दांगट उपस्थित होते.

मार्गदर्शन करताना डॉ. सुवर्णा काळे यांनी महिलांच्या आरोग्याबाबत सविस्तर माहिती दिली."आरोग्य उत्तम राहण्यासाठी सेंद्रिय आहाराचे महत्त्व अनन्यसाधारण आहे. संस्थेने परसबागेच्या माध्यमातून विषमुक्त भाजीपाला पिकवण्यासाठी सुरू केलेला हा उपक्रम अत्यंत कौतुकास्पद आहे," असे डॉ. काळे म्हणाल्या.

संस्थेचे समीर गारे यांनी संस्थेच्या विविध सामाजिक उपक्रमांचा आणि ‘समता ग्रंथालय’ सुरू करण्यामागील उद्दिष्टांचा सविस्तर आढावा मांडला. यानंतर उपस्थित महिलांना सेंद्रिय परसबाग बियाणे संचाचे वाटप करण्यात आले. परिसरातील महिला व नागरिकांनी या उपक्रमाला उत्स्फूर्त प्रतिसाद दिला.

या कार्यक्रमाचे प्रास्ताविक सुवर्णा आगाव यांनी केले, सूत्रसंचालन अंजली सांडभोर यांनी तर उपस्थितांचे आभार धनश्री गाढवे यांनी मानले. कार्यक्रमाचे संयोजन डॉ.अमोल वाघमारे, कमल बांबळे, सुप्रिया मते, अविनाश गवारी यांनी केले. यावेळी परिसरातील नागरिक आणि महिला आदी मोठ्या संख्येने उपस्थित होते. (वार – शनिवार | दि.०१/०८/२०२६ )

04/08/2026

समता ग्रंथालय उद्घाटन कार्यक्रम_ दि.०१/०८/२०२६ _ घोडेगाव

02/07/2026

मनकर्णिका देवराई | वर्ष दुसरे | एका वर्षात ३४० पैकी ३२० झाडे जगली आहेत.

11/06/2026

ज्ञानसरिता अभ्यासिकेतील विद्यार्थिनीची मुंबई पोलीस दलात निवड; सत्-करम फाऊंडेशनकडून अभ्यासिकेला खुर्च्यांची भेट

ग्रामीण भागातील विद्यार्थ्यांसाठी शिक्षणाचे केंद्र ठरलेल्या घोडेगाव येथील 'ज्ञानसरिता अभ्यासिके'ची विद्यार्थिनी साक्षी खंडे हिची मुंबई पोलीस दलात निवड झाली आहे. या यशाबद्दल तिचे सर्वत्र कौतुक होत आहे. विशेष म्हणजे, आतापर्यंत या अभ्यासिकेतील एकूण ११ विद्यार्थी विविध शासकीय सेवांमध्ये रुजू झाले असून, या यशाची परंपरा अभ्यासिकेने कायम राखली आहे.

या यशाचा आनंद साजरा करण्यासाठी आणि विद्यार्थ्यांच्या शैक्षणिक प्रवासाला अधिक बळ देण्यासाठी आदिम संस्था व सत्-करम फाऊंडेशनच्या वतीने विशेष कार्यक्रमाचे आयोजन करण्यात आले होते. फाऊंडेशनचे मार्गदर्शक मा. प्रफुल्ल भट यांनी आपल्या वाढदिवसाचे औचित्य साधून ग्रामीण भागातील विद्यार्थ्यांप्रती आपली सामाजिक बांधिलकी जपत. त्यांनी फाऊंडेशनच्या वतीने अभ्यासिकेसाठी २५ खुर्च्या भेट देऊन विद्यार्थ्यांना अभ्यासासाठी अधिक सोयीस्कर वातावरण उपलब्ध करून दिले आहे.

याप्रसंगी सत्-करम फाऊंडेशनचे दत्तात्रय सावंत यांनी उपक्रमामागची भूमिका स्पष्ट करताना सांगितले की, "ग्रामीण भागातील विद्यार्थ्यांमध्ये प्रचंड गुणवत्ता आहे. त्यांना अभ्यासासाठी पोषक आणि सोयीसुविधांनी युक्त वातावरण मिळावे, या उद्देशाने फाऊंडेशन सातत्याने प्रयत्नशील आहे. समाजाच्या सर्वांगीण विकासासाठी आणि शिक्षणाच्या प्रसारासाठी फाऊंडेशन कार्य करत आहे.’

या कार्यक्रमास सत्-करम फाऊंडेशनचे संचालक मा. ॲड. अनुज नरुला, दत्तात्रय सावंत, तसेच सदस्य चिमा बेंढारी, शंकर कराळे, गणेश मेंगडे, अनिल सोळसे, विद्या मेंगडे आणि निशा बोऱ्हाडे उपस्थित होते. याशिवाय आदिम संस्थेचे अशोक जोशी, प्रा. स्नेहल साबळे, समीर गारे, कमल बांबळे, अविनाश गवारी यांच्यासह ज्ञानसरिता अभ्यासिकेचे अनेक विद्यार्थी उपस्थित होते.
या कार्यक्रमाचे प्रास्ताविक समीर गारे यांनी केले तर आभार अशोक जोशी यांनी मांडले.
वार – बुधवार | दि.०४/०६/२०२६ _

10/06/2026

प्रौढ साक्षरता वर्गातील महिलांची आढावा बैठक व मोफत डोळे तपासणी शिबीर

आदिम संस्कृती अभ्यास,संशोधन व मानव विकास केंद्र व रोटरी क्लब ऑफ पुणे कोथरूड यांच्या वतीने साक्षरता वर्गातील महिलांची आढावा बैठक व मोफत डोळे तपासणी शिबिराचे आयोजन शहीद राजगुरू ग्रंथालय व सार्वजनिक वाचनालय, फलोदे येथे करण्यात आले होते. या शिबिरात ३५ पेक्षा अधिक महिलांची मोफत डोळे तपासणी व चष्मे वाटप करण्यात आले.

रोटरी क्लब ऑफ पुणे कोथरूड यांच्या सहकार्याने आंबेगाव तालुक्याच्या आदिवासी भागात राजपूर, जांभोरी येथे सुरु असलेल्या साक्षरता वर्गामधील महिलांच्या प्रगतीचा आढावा व डोळे तपासणी तपासणी होवून त्यांना जवळचे दिसण्यासाठी चष्मे देण्याच्या हेतूने या शिबिराचे आयोजन करण्यात आले होते.

यावेळी प्रौढ साक्षरता वर्गातील महिलांच्या प्रगतीचा आढावा घेण्यात आला. यावेळी महिलांचे मुळाक्षरे – अंक वाचन, लेखन, चेक भरणे, योग्य शब्दांच्या जोड्या लावणे इत्यादीचा आढावा घेण्यात आला. यावेळी महिलांनी साक्षरतेची गाणी देखील सादर केली. रात्रीच्या शाळेत येणाऱ्या काही महिलांना जवळचे व लांबचे दिसण्यास अडचणी येत असल्यामुळे या महिलांसाठी डोळे तपासणी शिबिराचे देखील यावेळी आयोजन करण्यात आले होते. या शिबिरात डॉ.दिलीप मोरे यांनी ३५ महिलांची मोफत डोळे तपासणी करून आवश्यकतेनुसार लांबचे व जवळचे दिसण्यासाठी मोफत चष्मे देखील वाटप करण्यात आले.

यावेळी बोलताना रोटरी क्लब ऑफ पुणे कोथरूड चे मा.उज्वल तावडे हे म्हटले कि, ‘दुर्गम भागातील महिलांची साक्षरतेची जिद्द कौतुकास्पद आहे, आपण दररोज वर्गात येऊन साक्षर व्हाल हि अपेक्षा आहे. आपल्या शिक्षणात दृष्टीदोषामुळे अडथळा येऊ नये म्हणून आम्ही या शिबिराचे आयोजन केले असून, यापुढेही अशा सामाजिक उपक्रमांना आमचे सहकार्य राहील.’

या वेळी रोटरी क्लब ऑफ पुणे कोथरूड चे मा.उज्वल तावडे, हेमचंद्र दाते, प्रशांत सिद्ध, सुहास पटवर्धन, आदिम संस्थेच्या प्रा.स्नेहल साबळे, रेखा शेळके, डॉ. दिलीप मोरे, शालीनी मोरे आदि उपस्थित होते. या कार्यक्रमाचे सूत्र संचालन सुप्रिया मते यांनी केले व प्रास्ताविक समीर गारे यांनी केले.
(वार – गुरुवार | दि.१४/०५/२०२६ )

30/04/2026

उपक्रमाची दखल घेतल्याबद्दल पत्रकार बधुंचे मन:पूर्वक आभार !

30/04/2026

30/04/2026

घोडेगाव येथे जागतिक आरोग्य दिनाच्या निमित्ताने ‘पौष्टिक पदार्थ प्रदर्शन कार्यक्रम’

पौष्टीक आहार हा आपल्या निरोगी जीवनाचा पाया आहे. शरीराला योग्य प्रमाणात पोषण मिळाले तर, आपण शारीरिक आणि मानसिकदृष्ट्या मजबूत राहू शकतो. या अनुषंगाने जागतिक आरोग्य दिनाच्या निमित्ताने, आदिम संस्कृती अभ्यास संशोधन व मानव विकास केंद्र च्या वतीने घोडेगाव येथे पौष्टिक पदार्थ प्रदर्शन कार्यक्रमाचे आयोजन केले होते .

या पौष्टिक पदार्थ प्रदर्शनाचे उद्‌घाटन, घोडेगाव पोलिस स्टेशनचे सहाय्यक पोलिस निरीक्षक मा.सागर पवार यांच्या हस्ते झाले व प्रमुख उपस्थिती म्हणून तालुका आरोग्य अधिकारी डॉ. तुषार पवार, डॉ.नंदकुमार गवारी, निसर्ग उपचार केंद्र - गोहे येथील वैद्यकीय अधिकारी डॉ. ए. लीलारसी व डॉ.सिध्दार्थ शंकर तसेच तहसील कार्यालय आंबेगाव येथील निवडणूक अधिकारी मा.जयश्री भवारी इ. उपस्थित होते.

‘पौष्टीक पदार्थांमुळे आपला औषधांवरचा खर्च कमी होऊन आपले आरोग्य निरोग्य राहते व जास्त प्रक्रियायुक्त असलेले अन्न आपल्या शरीरासाठी घातक असते. असे प्रतिपादन यावेळी सहाय्यक पोलिस निरिक्षक मा.सागर पवार यांनी केले. ‘आपले शरीर हीच आपली संपत्ती आहे. त्यामुळे आपल्या आरोग्याला आपण प्राधान्य दिले पाहिजे,’ असे प्रतिपादन तालुका आरोग्य अधिकारी डॉ. तुषार पवार यांनी केले. या प्रसंगी डॉ. नंदकुमार गवारी व आदिम संस्थेचे डॉ. अमोल वाघमारे यांनी ही आपले मनोगत व्यक्त केले. यावेळी उपस्थित महिलांना पौष्टीक पदार्थ यावर सविस्तर मार्गदर्शन डॉ. सिध्दार्थ शंकर यांनी केले.

या पौष्टीक पदार्थ प्रदर्शनात २० पेक्षा अधिक महिलांनी भाग घेतला होता. यामध्ये कारले, कडीपत्ता, नाचनी, वरई यापासून विविध पदार्थ महिलांनी बनवले होते. या सर्व पदार्थांची पहाणी व त्याची चव उपस्थित मान्यवर यांनी घेतली. या कार्यक्रमाचे सुत्रसंचालन सुप्रिया मते, प्रास्ताविक अंजली सांडभोर व आभार प्रा. स्नेहन साबळे यांनी मांडले.

या कार्यक्रमाचे संयोजन अविनाश गवारी, दिपाली खामकर, राहुल कारंडे, ऋतुजा भवारी, लिलाबाई जंगले, समिर गारे, कमल बांबळे यांनी केले होते.

( वार – मंगळवार | दि.०८/०४/२०२६ )