12/05/2026
*প্ৰেছ বিজ্ঞপ্তি*
♦️১১ বছৰ ধৰি মজুৰি দিয়াৰ নামত শ্ৰমিকক চৰম প্ৰতাৰণা কৰি আহিছে বিজেপি চৰকাৰেঃ চি আই টি ইউ
♦️শ্ৰমকোড বাতিল আৰু শ্ৰমিকৰ ন্যুনতম মজুৰি বিচাৰি ৰাজ্যজুৰি চি আই টি ইউৰ বিক্ষোভ
১২ মে',২০২৬, গুৱাহাটীঃ দেশৰ লগতে অসমৰ শ্ৰমিক-কৰ্মচাৰীসকলে ধাৰাবাহিক আন্দোলন চলাই থকাৰ পিছতো ৰাজ্য চৰকাৰে শ্ৰমিক বিৰোধী শ্ৰম কোডৰ আধাৰত শ্ৰম বিধি ৰূপায়ণ প্ৰস্তুতি চলাই থকা কাৰ্যক কঠোৰ সকিয়নি জনাই আজি চি আই টি ইউয়ে সমগ্ৰ অসমৰ শ্ৰম কাৰ্যলয় সমূহত বৃহৎ বিক্ষোভ কাৰ্যসূচী ৰূপায়ণ কৰে। ১১ বছৰ ধৰি মজুৰি দিয়াৰ নামত শ্ৰমিক-কৰ্মচাৰীক চৰম প্ৰতাৰণা কৰা কাৰ্যক ধিক্কাৰ দিছে অসম ৰাজ্যিক কমিটিয়ে। শ্ৰমিকৰ ন্যূনতম মজুৰি পুনৰ নিৰ্ধাৰণ কৰি চৰকাৰী জনানী প্ৰকাশ নকৰা কাৰ্যকো কঠোৰ ভাষৰে গৰিহণা দিয়ে।
আজি কোকৰাঝাৰ, বঙাইগাঁও, বৰপেটা, বাগচা, নলবাৰী, তামুলপুৰ, শোণিতপুৰ, বিশ্বনাথ লক্ষীমপুৰ, তিনিচুকীয়া, ডিব্ৰুগড়, মাজুলি, গোলাঘাট, কাছাৰ, আদি জিলাত শ শ শ্ৰমিকে বিভিন্ন জিলাৰ শ্ৰম বিষয়াৰ কাৰ্যালয়ৰ সন্মুখত বিক্ষোভ কাৰ্যসূচীৰে শ্ৰম কোড অসমত প্ৰয়োগ বন্ধ ৰাখক, শ্ৰমিকৰ ন্যূনতম মজুৰি মাহিলী ২৬০০০/- টকা ধাৰ্য কৰি চৰকাৰী জাননী প্ৰকাশ কৰক, চাহ শ্ৰমিকৰ দৈনিক হাজিৰা ৬৬১/- টকা ধাৰ্য কৰা, আঁচনিভূক্ত শ্ৰমিক কৰ্মচাৰীসকলক মাননিৰ সলনি মজুৰি প্ৰদান, নিৰ্মাণ শ্ৰমিক কল্যাণৰ ধন সময় মতে আদায় দিয়া, ৰন্ধন গেছৰ চিলিণ্ডাৰৰ যোগান সহজলভ্য আৰু নিয়মীয়া কৰাৰ দাবী সম্বলিত এক স্মাৰক পত্ৰ জিলাসমূহৰ শ্ৰম বিষয়াৰ মাধ্যমেৰে শ্ৰম আয়ুক্তলৈ প্ৰেৰণ কৰে।
একেদৰে গুৱাহাটী শ্ৰম আয়ুক্তৰ কাৰ্যলয়তো কামৰূপ, দক্ষিণ কামৰূপ আৰু কামৰূপ মহানগৰ জিলাৰ উদ্যোগত প্ৰায় তিনি শতাধিক শ্ৰমিকে বিক্ষোভ প্ৰদৰ্শনেৰে স্মাৰক পত্ৰ প্ৰদান কৰে। বিক্ষোভত তিনিওখন জিলাৰ নেতৃত্ব ক্ৰমে, মদন তালুকদাৰ, প্ৰতুল বৰ্মন, কনকলতা দাস, বিশ্বনাথ বিশ্বাস, ৰাজ্যিক নেতা বিজন দাসে বক্তব্য ৰাখি কয় যে অসমৰ দৰে ঔদ্যোগীক দিশত পিছপৰা এখন ৰাজ্যত শ্ৰমকোড কাৰ্যকৰী কৰিব গ'লে সামগ্ৰিকভাৱে উৎপাদন ব্যৱস্থাটোৱে ব্যাহত হ'ব। তাৰোপৰি শ্ৰমকোড হৈছে শ্ৰমিকৰ অৰ্জিত অধিকাৰ কৰ্ত্তন কৰাৰ এক হাথিয়াৰ। ঠিকা শ্ৰমিক আৰু স্থায়ী শ্ৰমিকৰ বাবে সমান কামৰ সমান মজুৰি নীতি অসমত প্ৰযোজ্য হোৱা নাই। যাৰ ফলত সমান পৰিশ্ৰম কৰিও অসমৰ ২৩ লাখতকৈ অধিক ঠিকা শ্ৰমিক প্ৰকৃত মজুৰিৰ পৰা আজি বঞ্চিত। চৰকাৰৰ হেমাহিৰ বাবেই নয়দাকে ধৰি উত্তৰ ভাৰতৰ হাজাৰ হাজাৰ শ্ৰমিকে প্ৰাপ্য সা-সুবিধা আৰু জীয়াই থকাৰ অধিকাৰ বিচাৰি ৰাজপথলৈ ওলাই আহিছে। মেডিকেল এণ্ড চেলচ ৰিপ্ৰেজেন্টেটিভ একোগৰাকীয়ে মাহিলি মাথো ১৩/১৪ হাজাৰ টকা মজুৰি লৈ কাম কৰি আছে। অসমৰ প্ৰায় ১২ লাখ চাহ শ্ৰমিকে মাত্ৰ ২৫০/২২৮ টকা দিন হাজিৰা লৈ কাম কৰি থাকিবলৈ বাধ্য হৈ আছে। বহু আন্দোলনৰ পিছত যদিও অতি সম্প্ৰতি মাত্ৰ ৩০ টকা বৃদ্ধি কৰা হৈছে সেয়া অতি নগন্য। এয়া প্ৰতাৰণাৰ বাহিৰে আন একো নহয়। অসমত কল-কাৰখানাত কাম কৰি থকা শ্ৰমিক, বে-চৰকাৰী খণ্ডৰ মটৰ শ্ৰমিক, নিৰ্মাণ শ্ৰমিক, নাৰ্চিং হোম কৰ্মচাৰী, দোকান কৰ্মচাৰীসকল আইনমতে প্ৰাপ্য ন্যূনতম মজুৰিৰ পৰা বঞ্চিত, চিকিৎসা সুবিধাকে ধৰি সামাজিক সুৰক্ষামূলক সুবিধাৰ পৰাও বঞ্চিত। একেদৰে চৰকাৰী আঁচনি ৰূপায়ণৰ তৃণমূল কৰ্মচাৰী প্ৰায় ২ লাখ ৬০ হাজাৰ অঙ্গনৱাড়ী কৰ্মী-সহায়িকা, আশা কমী আৰু ৰন্ধন কৰ্মচাৰীয়ে কোনো মজুৰি নাপায়। আঁচনি কৰ্মচাৰীসকলৰ দীৰ্ঘ আন্দোলনৰ পিছত শেহতীয়া চৰকাৰে অতি হাস্যকৰ ভাৱে সামন্য মাননি বৃদ্ধি কৰিছে। এনে সামান্য মাননি বৃদ্ধিয়ে কৰ্মচাৰীসকলক কোনো সকাহ দিব নোৱাৰে। এওঁলোকৰ বাবে ভাৰতীয় শ্ৰম সন্মিলনৰ (ILC) সিদ্ধান্ত কাৰ্যকৰী কৰা দৰকাৰ বুলি চি আই টি ইউয়ে দাবী জনায়।
প্ৰকৃতাৰ্থত ৰাজ্য চৰকাৰখনে সমগ্ৰ শ্ৰমজীৱী ৰাইজক অৱহেলিত কৰি আছে। ৰাজ্য তথা দেশৰ সামগ্ৰীক ঘৰুৱা উৎপাদনৰ[GDP]ৰ ক্ষেত্ৰত তথা দেশৰ উন্নয়নৰ ক্ষেত্ৰত গুৰুত্বপূৰ্ণ অৰিহণা যোগোৱা শ্ৰমজীৱী ৰাইজক সম্পূৰ্ণ গুৰুত্বহীন কৰি থৈছে। ফলত লাভ হৈছে বৃহৎ কৰ্পৰেট তথা উদ্যোগপতিসকলৰ। শিল্প তথা উদ্যোগ-প্ৰতিস্থানৰ মালিকসকলক শ্ৰমিকক দিবলগীয়া প্ৰকৃত পাৰিশ্ৰমিক নিদিয়াকৈ থাকি অধিক মুনাফা বৃদ্ধিৰ সুযোগ কৰি দিছে। চি আই টি ইউয়ে ৰাজ্য চৰকাৰখনৰ এই কাৰ্য শ্ৰমিক বিৰোধী বুলি গণ্য কৰে।
চি আই টি ইউৰ ৰাজ্যিক কমিটিয়ে শ্ৰমিক-কৰ্মচাৰীৰ বাবে ন্যূনতম মজুৰিৰ ঘোষণাৰ ক্ষেত্ৰত চৰকাৰৰ চূড়ান্ত অৱহেলাক তীব্ৰ গৰিহণা দিয়ে লগতে আগন্তুক দিনত শ্ৰম কোড বাতিল কৰা আৰু ন্যূনতম দৰমহা গাঁথনি বৃদ্ধিৰ দাবীক লৈ ৰাজ্যজোৰা বৃহৎ শ্ৰমিক আন্দোলনকাৰ্যসূচী ল'বলৈ বাধ্য হ'ব বুলি জনায়।
