V-Lead Foundation

14/04/2026

14/04/2026

വിവേകാനന്ദ ലേണിംഗ് ആൻഡ് ഡെവലപ്മെൻ്റ് ഫൗണ്ടേഷൻ, ലീഡ് ഇൻഡ്യ 3.0 റെസിഡൻഷ്യൽ ക്യാമ്പ് ഈ മാസം 29 മുതൽ മെയ് 3 വരെ കാക്കനാട് പാലച്ചുവട് വ്യാസവിദ്യാലയത്തിൽ വെച്ച് നടക്കുകയാണ് .

വേനലവധിയുടെ രസം ഒട്ടും കളയാതെ കളിയും ചിരിയും വർത്തമാനവുമായിട്ടാണ് ഈ ക്യാമ്പ് സംഘടിപ്പിച്ചിട്ടുളളത്. കേരളത്തിലെ ഏറ്റവും മികച്ച ശാസ്‌ത്ര -സാങ്കേതിക വിദഗ്ദ്ധരും കലാപ്രവർത്തകരും മനശ്ശാസ്‌ത്ര വിദഗ്ദ്ധരും നിയമജ്ജരും ലഹരി വിരുദ്ധ പ്രവർത്തകരും പങ്കെടുക്കുന്ന ക്യാമ്പിൽ ആശയവിനിമയ രീതി (Interaction) ആണ് സ്വീകരിച്ചിട്ടുള്ളത്.

ഇത് കൂടുതൽ മികച്ച രീതിയിൽ പഠിക്കാൻ പ്രേരണ നൽകുക എന്ന ഉദ്ദേശ്യത്തിൽ മാത്രമുള്ള ക്യാമ്പല്ല .....

അതിനുമപ്പുറം , ജീവിതത്തിൽ തെറ്റുകൾ പറ്റാതെ , കൃത്യമായ ലക്ഷ്യം ഉറപ്പിച്ച് , വഴി തെറ്റി പോകാതെ പ്രണയക്കുരുക്കുകളിലും ലഹരി സംഘങ്ങളിലും പെടാതെ , നന്നായി പഠിച്ച് നല്ല മക്കളും നല്ല പൗരൻമാരുമായി വളരാൻ വഴി കാട്ടുന്ന ക്യാമ്പാണ് .....

ഉത്തരവാദിത്തമുള്ള പൗരൻ / മനുഷ്യൻ എന്നതാണ് ലക്ഷ്യം .....

ലക്ഷ്യം നിർണ്ണയിക്കപ്പെട്ടാൽ പഠനം താനേ നടക്കും

ക്യാമ്പിനെ സഫലമാക്കുന്നവർ -

Dr. Madhu S Nair , Former Chairman & Managing Director, Cochin Shipyard Ltd.

Dr. K . Shivaprasad , Former Vice Chancellor , Kerala Technical University

Adv. O M Shaleena, Deputy Solicitor General of India

Arun Krishnan P R, Senior Project Officer, Teach To Learn, IIT Madras

Dr. Bindu M P, Asst. Professor , Chinmaya Viswa Vidhyapeeth

Mahesh Mohan , Founder , Vivekayogi, Dpty . General Manager , Amritha University

Dr. Harikrishnan V P , Asst. Professor , Amrita University

Rema K Nair , Director , Theatre Activist

Joby Balakrishnan , Former Member , NCTE , Member , Text Book committee NCERT

P.N. Arin Chandra Bose, DySP (Rtd ) CBI ,Administrative Head, Ernakulam Medical Centre, Kochi

Dr Abesh Reghuvaran ,Assistant Professor ,Centre for Science in Society ,CUSAT

Saranya Mohan K , Consultant Psychologist , IDHAM Counselling Services.

Anjali E N , Project Cordinator ,Super 60 , ASAP Kerala

Deepak Ravi M , Medical Team member , National Football Team, INDIA

Reshma V M , Student Counsellor , Tribal Hostels

Akhil Sukumaran , National Cyclist , Central Uty , Kerala

Dr. G S Venu , MD , V - Lead Foundation

Divin Das , Director , V - Lead Foundation

Niranjana Kishan , JNU

കൂടാതെ കേരള പോലീസിൻ്റെ D- DAD, നാർക്കോട്ടിക് ടീം അംഗങ്ങളും ഒരു ദിവസം ക്യാമ്പിൽ ഉണ്ടായിരിക്കും.

ഒപ്പം ഇന്ത്യയിലെ വ്യത്യസ്ത യൂണിവേഴ്സിറ്റികളെ പരിചയപ്പെടുത്തുന്ന സെഷനും ഉണ്ടായിരിക്കും

രെജിസ്ട്രേഷനും വിശദാംശങ്ങൾക്കും ബ്രോഷറിലെ QR കോഡ് ഉപയോഗിക്കുക, തന്നിരിക്കുന്ന നമ്പറുകളിൽ വിളിക്കുക

09/01/2026

വിവേകാനന്ദ ലേണിംഗ് & ഡവലപ്മെൻ്റ് ഫൗണ്ടേഷനും സംസ്ഥാന സർക്കാരിൻെറ പട്ടിക വർഗ്ഗ വികസന വകുപ്പും കൈകോർക്കുകയാണ് പത്തനംതിട്ട ജില്ലയിലെ വടശ്ശേരിക്കര ഗവ: മോഡൽ റസിഡൻഷ്യൽ സ്കൂളിൽ .
ആദിവാസി -പട്ടികജാതി -പട്ടികവർഗ്ഗ വിദ്യാർത്ഥികൾക്ക് സമഗ്ര വികസന പിന്തുണ ഉറപ്പാക്കുന്നതിനുള്ള ശ്രമമാണ് STEP - Support Tribe for Education & Progress എന്ന പേരിൽ നടപ്പാക്കുന്ന പദ്ധതി ഇന്ന് ബഹു: പത്തനംതിട്ട ജില്ലാ കളക്ടർ പ്രേം കൃഷ്ണൻ എസ് ഐ എ എസ് ഉദ്ഘാടനം ചെയ്തു. ഒരു വർഷം നീണ്ടുനിൽക്കുന്ന പ്രവർത്തനം കളക്ടറുടെ പ്രത്യേക താൽപര്യപ്രകാരം നടക്കുന്നതാണ്. ചടങ്ങിൽ ശ്രീ. നിസാർ എ (സീനിയർ സൂപ്രണ്ട്, MRS വടശ്ശേരിക്കര) ശ്രീമതി രജില എം. രാജം (ഹെഡ്മിസ്ട്രസ്, MRS വടശ്ശേരിക്കര), ശ്രീ. മാലിക് എ
(ഹയർ സെക്കൻഡറി അധ്യാപകൻ)
ഡോ. ജി. എസ്. വേണു (മാനേജിംഗ് ഡയറക്ടർ, V-LEAD ഫൗണ്ടേഷൻ), ഡോ. മാലിനി പി.എം (ഡയറക്ടർ ,പ്രോജക്ട് STEP , പ്ലാനിംഗ് ബോർഡ് അംഗം, പുതുച്ചേരി സർവകലാശാല), ഡോ. ആശ ഒ. എസ്
(അക്കാദമിക് ഡയറക്ടർ - പ്രോജക്ട് STEP, മുൻ പ്രിൻസിപ്പാൾ, എസ്. എൻ. ട്രെയിനിംഗ് കോളേജ്)
ശ്രീമതി ശരണ്യ മോഹൻ കെ. സൈക്കോളജിസ്റ് & ഫൗണ്ടർ IDAHM കൗൺസിലിംഗ് സർവീസസ്)
അഖിൽ സുകുമാരൻ (MSW സെൻട്രൽ യൂണിവേഴ്സിറ്റി ഭീഹാർ ) ആനന്ദ് കൃഷ്‌ണ എസ് (പ്രോജക്ട് കോർഡിനേറ്റർ) എന്നിവർ പങ്കെടുത്തു.

20/05/2025

അട്ടപ്പാടിയിൽ, കാലത്തിന് കാവലാളാണ് മല്ലീശ്വരൻ മുടി .......
ഭവാനിയിലൂടെ ഒഴുകിത്തീർന്ന വെള്ളത്തിൽ കണ്ണീരുപ്പ് കലരുന്നത് കണ്ടിട്ടും .......
അമ്മയുടെ പാൽ നുകരുന്നതിന് മുമ്പേ ഹൃദയത്തിൻെ മിടിപ്പ് നിലച്ചുപോയ ഇളം പൈതലുകളെ കണ്ടിട്ടും ......
അട്ടപ്പാടിയുടെ വരണ്ട മണ്ണിൽ ദാരിദ്ര്യം പേക്കൂത്താടിയപ്പോഴും .....

എല്ലാറ്റിനും മീതെ , വിശപ്പിൻ്റെ നിസ്സഹായതയായി മധുവിൻ്റെ ആർത്തനാദം തന്നേക്കാൾ ഉയരത്തിൽ ഒച്ചയുണ്ടാക്കിയപ്പോഴും .....

മല്ലീശ്വരൻ മുടി സാക്ഷിയായിരുന്നു. ......
പാറയായിപ്പോയത് കൊണ്ട് കരയാനാവാതെ......

എന്നാൽ കാഴ്ച മാറുകയാണ്. ആദിവാസിയുടെ മോചനം വിദ്യാഭ്യാസത്തിലൂടെ മാത്രം എന്ന് വിശ്വസിക്കുന്ന വി- ലീഡ് ഫൗണ്ടേഷൻ പരിശീലിപ്പിച്ച 40 പേർ കേന്ദ്ര സർവ്വകലാശാല പ്രവേശന പരീക്ഷ എഴുതുന്നു . ഇത് ഒരു സ്വപ്നസാഫല്യ നിമിഷം......

കേരളത്തിലെ - ഒരു പക്ഷേ, ഭാരതത്തിലെയും - ആദിവാസി ജനതയുടെ ചരിത്രത്തിൽ ആദ്യമായാണ് ഇത്രയും പേർ ഒരുമിച്ച് തയ്യാറായി ഒരു പരീക്ഷ എഴുതുന്നത്.......

ദൈവത്തിൻ്റെ തീരുമാനം നടപ്പാക്കാൻ വി- ലീഡ് ഫൗണ്ടേഷൻ ഒരു കാരണമായി.
പരിശീലനം നൽകിയ കുന്നംകുളം 'ഏകലവ്യക്കും ' ഇത് അഭിമാന മുഹൂർത്തം.

ഈശ്വരൻ്റെ കൃപ ......

CUET എഴുതുന്ന എല്ലാ മക്കൾക്കും ഒരായിരം ആശംസകൾ🌹🌹🌹🌹🌹

13/05/2025

അട്ടപ്പാടിയിലെ കുട്ടികൾക്ക് ഫുട്ബോൾ കളി ജീവൻ ആണ്.... അവിടെ പന്ത് തട്ടാത്തവർ ആരും തന്നെ കാണില്ല.
കുട്ടികളുടെ ഈ ഇഷ്ടം അറിഞ്ഞപ്പോൾ അവർക്കായി ഇന്ത്യൻ പ്രൊഫഷണൽ ഫുട്ബോൾ കളിക്കാരനായ
ശ്രീ. വിബിൻ മോഹനൻ (ഇന്ത്യൻ സൂപ്പർ ലീഗ് ക്ലബ്ബായ കേരള ബ്ലാസ്റ്റേഴ്സിനും ഇന്ത്യൻ ദേശീയ ടീമിനും വേണ്ടി മിഡ്ഫീൽഡറായി കളിക്കുന്നു) അദ്ദേഹം നമ്മുടെ കുട്ടികൾക്കായി നൽകിയ സന്ദേശം. നമ്മുടെ കുട്ടികൾക്ക് മാതൃക ആയി നിൽക്കുന്നവരുടെ ആശംസകൾ അവർക്ക് എന്നും പ്രചോതനം നൽകും.

11/05/2025

അനുഭവങ്ങളുടെ ശേഖരണമാണ് ഒരു തരത്തിൽ വിദ്യാഭ്യാസം -

അത് ക്ലാസ് മുറികൾക്കകത്തെ ഔപചാരികതകളല്ല ....... മറകളില്ലാത്ത മനസ്സു തുറക്കലുകളുടെ ഇടങ്ങളാവണം.
പാഠപുസ്തകങ്ങൾക്കപ്പുറത്ത് , അനുഭവങ്ങളുടെ നേർസാക്ഷ്യങ്ങളുമായുള്ള ഇടപഴകലുകളിൽ നിന്നാണ് അറിവിൻ്റെ വിനിമയം നടക്കേണ്ടത്. നാല് ചുവരുകൾക്കകത്തെ ക്ലീഷേ സൂചകങ്ങൾ ഒരിക്കലും ജൈവികമായ വിദ്യാഭ്യാസ പ്രവർത്തനത്തെ സൃഷ്ടിക്കാനുതകില്ല. .....

പ്രകൃതിയുടെ മടിയിൽ , അതിൻ്റെ സ്വഭാവങ്ങൾക്കനുസരിച്ച് വേണം അറിവ് ചർച്ചയാവേണ്ടത്.........

പറയാനും കേൾക്കാനും സാധിക്കുന്ന ഇടങ്ങളിലാണ് അറിവ് ഉരുവപ്പെടുന്നത്.........

പഴയത് പഠിക്കാനല്ല , പുതിയത് തേടാനാണ് വിദ്യാഭ്യാസം. ......

നമുക്ക് മരച്ചുവടുകളിൽ ഇരുന്ന് വർത്തമാനം പറയാം.

വി- ലീഡ് ഫൗണ്ടേഷന്റെ താൽപര്യം നാല് ചുമരുകളെ പൊളിക്കുക എന്നതാണ്.

09/05/2025

അട്ടപ്പാടി .....

സഹ്യൻ കോട്ടകെട്ടി കാക്കുന്ന പച്ചത്തുരുത്ത് ...... ഭവാനിയും ശിരുവാണിയും നനച്ച് വളർത്തിയ മണ്ണ്. ഇരുളരും മുഡുഗരും കുറുമ്പരും അടങ്ങുന്ന ഗോത്രജനത കാട് നോക്കി , ഊര് നോക്കി പാർത്ത നാട്.......

മല്ലീശ്വരൻ എന്ന പേരിൽ സാക്ഷാൽ കൈലാസനാഥൻ കാത്തു പോരുന്ന പൗരാണിക സംസ്കൃതി......

ദാരിദ്ര്യത്തിൻ്റേയും ശിശുമരണങ്ങളുടേയും കെട്ട വാർത്തകൾ മാത്രം കേൾക്കാറുള്ള നാടായി മാറിപ്പോയ , ഇന്ന് കേരളത്തിൻ്റെ ഒരു കണ്ണുനീർത്തുള്ളിയായി നിൽക്കുന്ന പ്രദേശം ......

മാറ്റാൻ ശ്രമിക്കുകയാണ് വി - ലീഡ് ഫൗണ്ടേഷൻ .

സൗജന്യങ്ങൾക്കപ്പുറം , ആത്മവിശ്വാസത്തിൻ്റെ കരുത്ത് നൽകിക്കൊണ്ട് യുവതയിലേക്ക് വിദ്യാഭ്യാസത്തെ എത്തിക്കാനുള്ള ശ്രമം. ......

ഏപ്രിൽ ആദ്യം നടന്ന ,SSLC പൂർത്തിയാക്കിയവർക്കുള്ള കോഴ്സ് ഓറിയൻ്റേഷൻ , CUET കോച്ചിംഗ് , സ്വാമി വിവേകാനന്ദ മെഡിക്കൽ മിഷനുമായി ചേർന്ന് നടത്തുന്ന PROPEL (Programme for Promotion of Education and Leadership ) എന്നിവ ഈ ദിശയിലെ വലിയ പ്രതീക്ഷകളാണ് , ദൗത്യങ്ങളാണ്.

100 ഓളം കുട്ടികൾ പങ്കെടുത്ത കോഴ്സ് ഓറിയൻ്റേഷൻ പ്രോഗ്രാം കുട്ടികളിൽ എന്തൊക്കെ പഠിക്കാൻ സാധിക്കും എന്ന ബോധം ഉണ്ടാക്കാൻ സാധിച്ച ഒന്നാണ്. കോട്ടത്തറ സ്കൂളിൽ വെച്ചാണ് പരിപാടി നടന്നത്.

CUET 45 കുട്ടികളാണ് പങ്കെടുത്തത്. ഷോളയൂരിൽ നടന്ന 10 ദിവസത്തെ റെസിഡൻഷ്യൽ ക്യാമ്പ് അട്ടപ്പാടിയുടെ മാത്രമല്ല , ഗോത്രജനതയുടെ ചരിത്രത്തിലെ ആദ്യ സംഭവമാണ്.

പഠിക്കും നമ്മുടെ കുട്ടികൾ , പിന്തുണച്ച് പഠിപ്പിച്ചാൽ .....

മാറ്റണം, നമുക്ക് അട്ടപ്പാടിയെ , അറിവിലൂടെ , വിദ്യാഭ്യാസത്തിലൂടെ.....

06/05/2025

ഭവാനിയുടെ മക്കൾ പെരിയാറിൽ.... അട്ടപ്പാടിയിലെ പുഴയും എറണാകുളത്തെ പുഴയും വ്യത്യാസം ഉണ്ടെന്നാണ് നമ്മുടെ മക്കളുടെ അഭിപ്രായം. മക്കൾക്ക് ഓരോ ക്യാമ്പും പുതിയ അനുഭവങ്ങൾ ആക്കുവാൻ ആണ് നമ്മളും ശ്രമിക്കുന്നത്.

05/05/2025

നമുക്ക് പഠനം മാത്രം പോരല്ലോ...രാവിലെ ഒരു നടത്തം നമ്മുടെ കോച്ചിംഗ് ക്യാമ്പിൽ ഉള്ളതാണ്. ഇന്ന് നമ്മുടെ മക്കൾ തന്നെ ആണ് നല്ലശിങ്ക പോയാലോ എന്ന് ചോദിക്കുന്നത്. നമ്മൾ അങ്ങോട്ട് തന്നെ അങ്ങ് നടന്നു. നമ്മുടെ കാടും കുന്നും മണ്ണും കോടയും ആസ്വദിച്ച് ഒരു നടത്തം....

03/05/2025

കാട് കത്തും കാലം .........

ആദിവാസി-
കേവലം ഒരു പദമല്ലിത്. ഒരു സംജ്ഞയാണ്. ഒരു സംസ്കൃതിയുടെ വിളിപ്പേര്. ഒരു സമഷ്ടിയെ സൂചിപ്പിക്കുന്ന നാമം.
ചരിത്രഗതിയിലെ ഏതൊരു സാംസ്കാരിക വളർച്ചയേയും പോലെ തനതായ ഒരു സാംസ്കാരിക പാരമ്പര്യം നിലനിർത്തിയ ജനത. നാഗരികർ എന്ന് ഊറ്റം കൊള്ളുന്ന ഇതരജനവിഭാഗങ്ങളേക്കാൾ, ജീവിത ഗതിക്ക് ഉപകരിക്കുന്ന മൂല്യവ്യവസ്ഥയിൽ ഊന്നി കാലത്തിൻ്റെ ഭൂപടത്തിൽ അടയാളപ്പെടുത്തപ്പെട്ടവർ.

ദാരിദ്ര്യപ്പിശാചിനെ ആട്ടിയോടിക്കാൻ, അന്നം വിളയുന്ന മണ്ണ് തേടി കാടിൻ്റെ ഓരങ്ങളിലേക്ക് ജീവിതം പറിച്ചുനട്ട കൂടിയേറ്റക്കാർ കാടിനേയും മണ്ണിനേയും അറിഞ്ഞതും പ്രതിരോധിച്ചതും കാട്ടുമക്കളുടെ സഹായത്തോടെ ആയിരുന്നു. കാടിൻ്റെ പച്ചപ്പ് കുടിയേറ്റ ജനതയെ സ്വീകരിച്ചതു പോലെ ആദിവാസിയുടെ മനസ്സിൻ്റെ പച്ചപ്പും അവർക്കൊപ്പം നിന്നു. അവർ ഒരുമിച്ച് കാടിനെ അവരുടെ ജീവിതത്തിൻ്റെ കല്പവൃക്ഷമാക്കി.......

പോകെപ്പോകെ, കുടിയേറ്റ ജനതയിൽ ആർത്തി പെരുകി. അവർ ആദി വാസിയുടെ കാടിനെ, മണ്ണിനെ, പെണ്ണിനെ എല്ലാം ചൂഷണം ചെയ്തു തുടങ്ങി..... ആദിവാസിയുടെ ആവാസവ്യവസ്ഥയേയും അവൻ്റെ ജീവിത രീതികളേയും തകിടം മറിച്ച് കൊണ്ട് കുടിയേറ്റ-രാഷ്ട്രീയ കൂട്ട് കെട്ട് കാടിൻ്റെയും കാട്ടുവാസിയുടേയും മാറ് പിളർന്നു.

കാടിനെ ആശ്രയിച്ച് ജീവിതം നയിച്ചിരുന്ന ആദിവാസി അവൻ്റെ കാട്ടിൽ അന്യവത്ക്കരിക്കപ്പെട്ടു. കുടിയേറ്റക്കാരും ഇതര നാഗരിക മനുഷ്യരും ആദിവാസിയെ അപരിഷ്കൃതനെന്നും നിരക്ഷരനെന്നും വിളിക്കാനും മുദ്രകുത്താനും തുടങ്ങി. പോകെപ്പോകെ ആദിവാസി എന്നത് ദാരിദ്ര്യത്തിൻ്റേയും അനാരോഗ്യത്തിൻ്റേയും നിരക്ഷരതയുടേയും സാംസ്കാരിക രാഹിത്യത്തിൻ്റെയും മറുപേരായി മാറി ......

പിന്നീട് നാം കാണുന്നത് , ജനാധിപത്യ സർക്കാരുകളുടെ ആദിവാസി സംരക്ഷണ ദൗത്യങ്ങളുടെ പ്രവാഹമാണ്. സൗജന്യങ്ങളും പദ്ധതികളും വാരിക്കോരി ഒഴുക്കി പതിറ്റാണ്ടുകളായി ആദിവാസി സംരക്ഷണം എന്ന വെള്ളാന തടിച്ച് കൊഴുക്കുന്നു.

ചൂഷണത്തിനെതിരായ മിത - തീവ്രവാദ ആശയങ്ങളും ശ്രമങ്ങളും പലതും ഉണ്ടായെങ്കിലും, എല്ലാം കാടകങ്ങളിൽ വെടിയൊച്ചകളും പച്ചിലകളിൽ ചോരപ്പാടുകളും മാത്രമാണ് അവശേഷിപ്പിച്ചത്. .......

പരാജയപ്പെട്ട പോരാട്ടങ്ങളിൽ പരിതപിക്കാതെ, വി- ലീഡ് ഫൗണ്ടേഷൻ ആദിവാസിമേഖലകളിൽ പുതിയ പോരാട്ടത്തിനിറങ്ങുകയാണ്. വസന്തത്തിൻ്റെ ഇടി മുഴക്കങ്ങൾ അല്ല , മറിച്ച്, സുഗന്ധവും വർണ്ണജാലങ്ങളും തേടിയുള്ള പോരാട്ടം. ......

ലക്ഷ്യം വിപ്ലവം തന്നെയാണ്........

ലോകത്ത് ഒരു ശക്തിക്കും പരാജയപ്പെടുത്താൻ കഴിയാത്ത, ഒരു ശക്തിക്കും കുറ്റപ്പെടുത്താൻ കഴിയാത്ത, ഒരു ശക്തിയെക്കൊണ്ടും പുനരാലോചന ചെയ്യിപ്പിക്കാത്ത ഒരു സായുധവിപ്ലവം........

കാടകങ്ങൾക്ക് ഞങ്ങൾ തീയിടാൻ പോകുന്നു ....... വയറെരിയുന്ന കാട്ടുമക്കളുടെ തലച്ചോറുകളെ ഞങ്ങൾ തീ പിടിപ്പിക്കാൻ പോകുന്നു..........

ചൂഷണത്തിൻ്റെ സാധ്യതകൾ തീർത്ത മുൻകാല സാഹചര്യങ്ങളെ ഞങ്ങൾ ചുട്ടെരിക്കാൻ പോകുന്നു. .........

ഇനി വെടിയുതിർക്കുന്നത് കാടിൻ്റെ മക്കളായിരിക്കും.

പ്രപഞ്ചോൽപത്തി മുതൽ , നാളിതുവരെ ഒരു ശക്തിക്കും ചെറുക്കാനും നശിപ്പിക്കാനും കഴിയാത്ത, ചിരപുരാതനവും നിത്യനൂതനവുമായ ആയുധമാണ് പോർമുഖത്ത് ഞങ്ങൾ വിന്യസിക്കുന്നത്..

ആയുധങ്ങൾക്കും അഗ്നിക്കും പെരുവെള്ളപ്പെയ്ത്തിനും കാറ്റിനും കള്ളനും നശിപ്പിക്കാൻ കഴിയാത്ത ആയുധം....

ജ്ഞാനം - അറിവ് - വിദ്യാഭ്യാസം .......
ജനക മഹാരാജാവിൻ്റെ സംശയത്തിന് മറുപടിയായി യാജ്ഞവൽക്യൻ പറഞ്ഞത് , പ്രപഞ്ചത്തിലെ സകല ഊർജ്ജത്തിൻ്റേയും ഉറവിടമായ സൂര്യന് തുല്യം ശക്തമാണ് വാക്ക് എന്നാണ്.

വാക്ക്, അറിവ് അഗ്നിയാണ് .......

വി-ലീഡ് ഫൗണ്ടേഷൻ കാടെരിക്കാൻ പോകുന്നു......

ആദിവാസിക്ക് വിദ്യ പകർന്നു നൽകിക്കൊണ്ട് .......

സൗജന്യങ്ങൾക്ക് വേണ്ടി യാചനാ ഭാവത്തിൽ നീളുന്ന കരങ്ങളുടെ ചൂണ്ടുവിരലുകളിലേക്ക് അറിവിൻ്റെ അഗ്നി പ്രവാഹത്തെ ഞങ്ങൾ തുറന്നു വിടുന്നു .......

"വിദ്യകൊണ്ട് പ്രബുദ്ധരാവുക" എന്ന നാരായണ ഗുരുവാക്യത്തെ സ്വീകരിച്ച് "സ്വന്തം ഉത്തരവാദിത്തങ്ങളെ സ്വയം ചുമലിലേറ്റുക" എന്ന വിവേകാനന്ദാഹ്വാനത്തിലേക്ക് ഞങ്ങൾ കാടിൻ്റെ മക്കളെ കൊണ്ടുപോവുകയാണ്........

അറിവിൻ്റെ രാജസൂയയജ്ഞാഗ്നിയിൽ സഹ്യൻ്റെ താഴ്‌വാരങ്ങൾ എരിഞ്ഞു തുടങ്ങുന്നു. ......

PROPEL, CUET എന്നീ യാഗാശ്വങ്ങൾ അട്ടപ്പാടിയുടെ മലനിരകളിൽ കുളമ്പടിപ്പാടുകൾ വീഴ്ത്തി തലയുയർത്തി യാത്ര തുടരുന്നു ......

ഈ യാഗഭൂമിയിൽ എല്ലാവരും കൂടെയുണ്ടാവണം .....

30/04/2025

ഏതൊരു ജനതയുടെയും വികസനത്തിന്റെ അടിസ്ഥാനം വിദ്യാഭ്യാസമാണ്. ആദിവാസി മേഖലയിൽ വിദ്യാഭ്യാസത്തിലൂടെ ജീവിതത്തെ അഭിമുഖീകരിക്കുവാൻ വേണ്ട പ്രാപ്തിയുള്ള ഒരു പുതുതലമുറയെ സൃഷ്ടിക്കുക എന്ന ലക്ഷ്യത്തോടെയാണ് വീ- ലീഡ് ഫൗണ്ടേഷൻ വിവേകാനന്ദ മെഡിക്കൽ മിഷൻ്റെ സഹായത്തോടെ പ്രൊപ്പൽ പ്രോജക്ടിന് രൂപം കൊടുക്കുന്നത്. അവശതകൾ അനുഭവിക്കുന്ന ഒരു വിഭാഗത്തിനെ മുഖ്യ ധാരയിലേക്ക് കൊണ്ടുവരാൻ വേണ്ടത് സൗജന്യങ്ങൾ അല്ല. സൗജന്യങ്ങൾ ഒരിക്കലും വികസനത്തിന്റെ സൂചിക അല്ല ,ഒരു പരിധിവരെ മാത്രം കൊടുക്കേണ്ടുന്ന ഒന്നാണ്. ജീവിതത്തെ നേരിട്ട് കയ്യെത്തിപ്പിടിക്കാൻ അവരെ പ്രാപ്തരാക്കുകയാണ് വേണ്ടത്. അവരുടെ ആവാസവ്യവസ്ഥയുടെ പുറത്തേക്ക് കൊണ്ടുവന്ന് നാഗരിക വിദ്യാഭ്യാസ സാധ്യതകളെ മുഴുവൻ കൈപ്പിടിയിൽ ആക്കി കൊടുക്കുവാനുള്ള ശ്രമമാണ് വീ ലീഡ് ഫൗണ്ടേഷൻ പ്രൊപ്പൽ
(പ്രോഗ്രാം ഫോർ പ്രമോഷൻ ഓഫ് എഡ്യൂക്കേഷൻ ആൻഡ് ലീഡർഷിപ്പ് )എന്ന പ്രോജക്ടിലൂടെ മുന്നോട്ടു വയ്ക്കുന്നത്. കേരളത്തിലോ ഭാരതത്തിലോ ഇന്നുവരെ സംഭവിക്കാത്ത സമാനതകൾ ഇല്ലാത്ത ഈ പ്രോജക്ടിൽ അട്ടപ്പാടിയിലെ ഊരുകളിൽ നിന്നും തിരഞ്ഞെടുക്കപ്പെട്ട 20 കുട്ടികൾ അവരുടെ 10 വയസ്സു മുതൽ അടുത്ത 15 വർഷത്തേക്ക് - അവർ ബിരുദാനന്തര ബിരുദം കഴിയുന്നതുവരെ - വൺ ടു വൺ മെൻഡറിങ്ങിലൂടെ കൂടെ നിന്ന് പിന്തുണച്ച് ഒപ്പം കൈപിടിച്ച് നടത്തി അവർക്ക് സാധ്യമാകുന്ന അവരുടെ താല്പര്യത്തിനനുസരിച്ചുള്ള ഇടങ്ങളിൽ എത്തിക്കാനാണ് ലക്ഷ്യമിടുന്നത്. ഓണം, ക്രിസ്മസ്, സമ്മർ വെക്കേഷനുകളിൽ നടക്കുന്ന വ്യത്യസ്ത സ്ഥലങ്ങളിലെ ക്യാമ്പുകളിൽ അവരുടെ ജീവിതവും അനുഭവവും വിദ്യാഭ്യാസവുമായി ബന്ധപ്പെട്ടുള്ളതും നമ്മുടെ നാടിൻറെ സാംസ്കാരിക തനിമ നിലനിർത്തുന്നതും വിദ്യാഭ്യാസ ആവശ്യങ്ങൾ നിവർത്തിക്കുന്ന തരത്തിലുള്ളതുമായ സ്ഥലങ്ങൾ തിരഞ്ഞെടുത്താണ് ഈ ക്യാമ്പുകൾ നടത്തുന്നത്. ഇതൊരു സ്വപ്ന പദ്ധതിയാണ് 15 വർഷം നീണ്ടുനിൽക്കുന്ന ഈ പദ്ധതി സ്വന്തം കുഞ്ഞിനെ വളർത്തുന്ന പോലെ ഒരു ജീവൻ തുടിക്കുന്ന പ്രവർത്തനമാണ് . ഇതിൻറെ ഈ വർഷത്തെ ക്യാമ്പ് കാലടി ആദിശങ്കരാ ട്രെയിനിങ് കോളേജിൽ 25 ദിവസങ്ങളിലായി നടന്നുവരികയാണ്. 25 ദിവസം നീണ്ടുനിൽക്കുന്ന ഒരു ട്രൈബൽ വിദ്യാഭ്യാസ പ്രവർത്തനം ആദ്യമായിരിക്കും. ഇതിൽ പഠന പ്രവർത്തനം, മാനസിക ഉല്ലാസം, ആത്മവിശ്വാസം വർദ്ധിപ്പിക്കുവാനുള്ള പ്രവർത്തനങ്ങൾ തുടങ്ങി വിവിധ തരത്തിലുള്ള കാര്യങ്ങളാണ് നടത്തിവരുന്നത്. വലിയ ഒരു ലക്ഷ്യത്തിലേക്കുള്ള ഈ യാത്ര സ്വാമി വിവേകാനന്ദ മെഡിക്കൽ മിഷനും വീ
ലീഡ് ഫൗണ്ടേഷനും ചേർന്നാണ് നടത്തിവരുന്നത്. ആദിവാസി ക്ഷേമ പ്രവർത്തനരംഗത്ത് 20 വർഷത്തിലധികം പാരമ്പര്യമുള്ള ഓർഗനൈസേഷൻ ആണ് സ്വാമി വിവേകാനന്ദ മെഡിക്കൽ മിഷൻ. സ്വാമി വിവേകാനന്ദ മെഡിക്കൽ മിഷന്റെ മേൽനോട്ടം അതുകൊണ്ടുതന്നെ ഈ പദ്ധതിയെ കാര്യക്ഷമമാക്കുന്നു.