21/01/2024
അവിചാരിതമായി കണ്ടുമുട്ടിയ ഒരു ഫങ്ക്ഷനിലാണ് പൂർവ്വ വിദ്യാർത്ഥി സംഗമത്തെകുറിച്ചു നാസ്സർ ഇക്കയോട് സംസാരിക്കുന്നത്. എനിക്ക് താല്പര്യമുണ്ട്, ഞാൻ എല്ലാ പരിപാടിയും മാറ്റിവെച്ചു പങ്കെടുക്കും എന്നറിയിച്ചു. ഒരു പ്രവാസിക്ക് അവധികാലം നൂറു തിരക്കുകളുടേതാണെന്ന് നമുക്കെല്ലാവർക്കുമറിയാം. അന്നുമുതൽ നമ്മുടെ സ്കൂളിന്റെ പരിപാടികൾക്ക് പ്രഥമ പരിഗണന നൽകി, ആളും അർഥവുമായി എന്തിനും ഏതു സമയത്തും കൂടെയുണ്ടെന്നത് സംഘാടകർക്ക് ഏറെ പ്രചോദനം നൽകുന്നതാണ്. സ്വന്തം നാടും, ഗൃഹാതുരത്ത്വം നിറഞ്ഞ സ്കൂൾ കാലഘട്ടവും ഇത്ര അകമഴിഞ്ഞ് മനസ്സിൽ സൂക്ഷിക്കാൻ കഴിയുന്നത് ഒരുപക്ഷെ പ്രവാസിയായതുകൊണ്ടാവാം.
കങ്ങരപ്പടിയിലെ പൊതു പ്രവർത്തന രംഗത്തും, കലാ പ്രവർത്തനങ്ങളിലും സജീവ സാന്നിധ്യമായ നാസറിക്കയെ വളരെ ആരാധനയോടെയാണ് കുട്ടിക്കാലത്തു നോക്കി കണ്ടിരുന്നത്. അതെ ഊഷ്മളത ഇന്നും മനസ്സിൽ സൂക്ഷിച്ചുകൊണ്ട് നിറഞ്ഞ മനസ്സോടെ സഹോദരതുല്യരായി കണ്ടു സഹകരിക്കാൻ തയ്യാറായ നാസ്സർ കെ. കെ. എന്ന നമ്മുടെ നാസറിക്കയോട് പൂർവ്വ വിദ്യാർത്ഥിയെന്നനിലയിൽ നന്ദിയറിയിക്കുന്നു. ഇക്കയെപ്പോലൊരാൾ കങ്ങരപ്പടിയിൽ ഉണ്ടായിരുന്നെങ്കിൽ നമ്മൾ കുറച്ചുകൂടി പ്രോഗ്രസ്സിവ് ആയേനെ എന്ന് ഈ സാഹചര്യത്തിൽ ഓർത്തുപോയി....ഏതാനും ദിവസങ്ങൾക്കുള്ളിൽ ഇക്ക, തന്റെ പ്രവാസജീവിതത്തിലെ തിരക്കുകളിലേക്ക് മടങ്ങിപ്പോകും, ഈ പുതുവർഷത്തിൽ എല്ലാ നന്മകൾ ആശംസിക്കുന്നു. സമയത്തിന് ഏറെ വിലമതിക്കുന്ന ഈ കാലഘട്ടത്തിൽ ഞങ്ങൾക്കായി മാറ്റിവെച്ച സമയത്തിനും, മനസ്സിനും ഹൃദയം നിറഞ്ഞ കൂപ്പുകൈ. പൂർവ്വ വിദ്യാർത്ഥി സംഗമം ഇത്ര പൂർണ്ണതയിലെത്തിയത് ഇക്കയുടെ സജീവ സാന്നിദ്യം കൊണ്ടുകൂടിയാണ്.......
