21/07/2026
ડીસા શહેર કિસાન મોરચા દ્વારા પિન્ક સિટીમાં વૃક્ષારોપણ, પર્યાવરણ સંરક્ષણનો સંદેશ અપાયો
ડીસા: ભારતીય જનતા પાર્ટી ડીસા શહેર કિસાન મોરચા દ્વારા "એક પેડ માં કે નામ" અભિયાન અંતર્ગત પિન્ક સિટી વિસ્તારમાં વૃક્ષારોપણ કાર્યક્રમનું આયોજન કરવામાં આવ્યું હતું. કાર્યક્રમનો મુખ્ય હેતુ પર્યાવરણનું સંરક્ષણ, હરિયાળી વધારવી અને સમાજમાં વૃક્ષારોપણ પ્રત્યે જાગૃતિ લાવવાનો હતો.
કાર્યક્રમ દરમિયાન કિસાન મોરચાના હોદ્દેદારો અને કાર્યકર્તાઓએ ઉત્સાહભેર વિવિધ પ્રકારના વૃક્ષોના રોપાઓનું વાવેતર કર્યું હતું. ઉપસ્થિત સૌએ વૃક્ષોનું જતન કરી હરિયાળું, સ્વચ્છ અને પ્રદૂષણમુક્ત પર્યાવરણના નિર્માણ માટે સક્રિય યોગદાન આપવાનો સંકલ્પ વ્યક્ત કર્યો હતો.
આ પ્રસંગે વક્તાઓએ જણાવ્યું હતું કે વૃક્ષો પ્રકૃતિનું અમૂલ્ય વરદાન છે. પર્યાવરણનું સંતુલન જાળવવા, વરસાદનું પ્રમાણ વધારવા અને આવનારી પેઢીને સ્વચ્છ વાતાવરણ આપવા માટે વધુમાં વધુ વૃક્ષારોપણ અને તેનું સંરક્ષણ સમયની સૌથી મોટી જરૂરિયાત છે.
કાર્યક્રમ સફળતાપૂર્વક સંપન્ન થયો હતો અને અંતે સૌને વધુમાં વધુ વૃક્ષો વાવવા તથા તેનું જતન કરવા માટે અપીલ કરવામાં આવી હતી.
