27/09/2026
அரசுப் பள்ளியில் நெகிழி ஒழிப்பு விழிப்புணர்வு
திருச்சி, செப். 18:
திருச்சி எடமலைப்பட்டிப்புதூர் அரசு உயர்நிலைப் பள்ளியில் பசுமைப் பள்ளித் திட்டத்தின் கீழ், “நெகிழியில்லா உலகத்தை உருவாக்குவோம்” என்ற விழிப்புணர்வு நிகழ்ச்சி வெள்ளிக்கிழமை நடைபெற்றது.
திருச்சி எடமலைப்பட்டிப்புதூர் அரசு உயர்நிலைப் பள்ளியில் பசுமைப் பள்ளித் திட்டம் செயல்படுத்தப்பட்டு வருகிறது. இத்திட்டத்தின் கீழ், பள்ளி வளாகத்தில் காய்கறித் தோட்டம் அமைக்கப்பட்டு, சத்துணவுக்குத் தேவையான காய்கறிகள் சாகுபடி செய்யப்படுகின்றன.
மேலும், பழத்தோட்டம், மூலிகைத்தோட்டம், சோலார் பேனல், சொட்டுநீர் பாசனம் ஆகியவை அமைக்கப்பட்டு, பள்ளி வளாகம் முழுவதும் பசுமையாகப் பராமரிக்கப்பட்டு வருகிறது.
இதன் ஒரு பகுதியாக, பசுமைப் பள்ளித் திட்டத்தின் கீழ் நெகிழியில்லா உலகத்தை உருவாக்குவோம் என்ற விழிப்புணர்வு நிகழ்ச்சி நடைபெற்றது.
நிகழ்ச்சிக்கு பள்ளித் தலைமையாசிரியை ஆர். அன்புமணி தலைமை வகித்தார்.
இதில், நெகிழிப் பைகளைத் தவிர்த்து துணிப்பைகளைப் பயன்படுத்த வேண்டும் என்று மாணவர்களுக்கு விழிப்புணர்வு ஏற்படுத்தப்பட்டது. தொடர்ந்து, ஆசிரியர்கள், மாணவர்கள் மற்றும் நிகழ்ச்சியில் கலந்துகொண்ட அனைவரும் நெகிழியைத் தவிர்த்து துணிப்பையைப் பயன்படுத்துவோம் என்ற உறுதிமொழி ஏற்றனர்.
மேலும், பள்ளி ஆசிரியர்கள், மாணவர்கள் மற்றும் நிகழ்ச்சியில் கலந்துகொண்ட அனைவருக்கும் துணிப்பைகள் வழங்கப்பட்டன.
இந்த நிகழ்ச்சியில் பசுமைப் பள்ளித் திட்ட ஒருங்கிணைப்பாளர் பாலகிருஷ்ணன், மாவட்ட சுற்றுச்சூழல் ஒருங்கிணைப்பாளர் சத்தியமூர்த்தி, பள்ளி மேலாண்மைக் குழுத் தலைவர் தேன்மொழி ஆகியோர் சுற்றுச்சூழல் பாதுகாப்பு, பசுமைப் பள்ளியின் அவசியம் மற்றும் நெகிழியைத் தவிர்க்க வேண்டியதன் காரணங்கள் குறித்து பேசினர்.
முன்னதாக, உதவித் தலைமையாசிரியை விஜிலா ராஜகுமார் வரவேற்றார்.
