14/10/2025
مہمان کا اکرام و استقبال
آج ماشاءاللہ خانقاہ عالیہ ستاریہ نانکہ گندیوڑہ چھٹملپور میں ڈاکٹر محمد رضوان صاحب تشریف فرما ہوئے خانقاہ کے سربراہ حضرت الحاج فضل الرحمان رحیمی نانکوی نبیرہ قطب عالم شیخ حافظ عبد الستار نانکوی رح نے مہمانوں کا استقبال کیا کتاب سوانح حافظ عبد الستار نانکوی پیش کی اور فرمایا ۔
اسلام ایک ایسا دین ہے جو انسانیت، محبت، بھائی چارہ اور حسنِ سلوک کی تعلیم دیتا ہے۔ اس نے جہاں والدین رشتہ داروں اور پڑوسیوں کے حقوق بیان کیے ہیں وہیں مہمان نوازی کو بھی ایمان کا حصہ قرار دیا ہے۔
حضور نبی اکرم ﷺ نے فرمایا جو اللہ اور آخرت کے دن پر ایمان رکھتا ہو وہ مہمان کا اکرام کرے۔
(بخاری)
اس حدیث سے معلوم ہوتا ہے کہ مہمان کا احترام اور اس کی خاطر تواضع کرنا صرف ایک اخلاقی خوبی نہیں بلکہ ایمان کی علامت ہے۔
مہمان نوازی سے محبت، الفت اور بھائی چارہ بڑھتا ہے۔ یہ معاشرتی رشتوں کو مضبوط کرتی ہے اور دلوں میں قربت پیدا کرتی ہے۔ مہمان دراصل اللہ کی رحمت لے کر آتا ہے۔ حضور ﷺ نے فرمایا مہمان اپنی برکت کے ساتھ آتا ہے اور گھر کے گناہ باہر چلے جاتے ہیں مہمان کے ساتھ خوش اخلاقی مسکراہٹ، نرمی، اور خلوص سے پیش آنا مہمان نوازی کا اصل حسن ہے۔ اگر کچھ زیادہ پیش نہ کیا جا سکے تب بھی خندہ پیشانی سے استقبال کرنا سب سے بڑی خدمت ہے۔
اسلام میں مہمان نوازی کی مدت تین دن رکھی گئی ہے اور ایک دن ایک رات کا خصوصی اکرام مستحب ہے۔
عطاء الرحمن جمیل قاسمی نانکوی ناظم جامعۃ الشیخ عبدالستار نانکہ گندیوڑہ چھٹملپور سہارنپور
