AITUC Tamilnadu

15/09/2026

தமிழ்நாடு தொழிலாளர் ஆணையர் அவர்களுக்கு,
தமிழ்நாட்டின் அனைத்து தொழிற்சங்கங்கள் சார்பில்
தொழிலாளர் சட்டத் தொகுப்புகளை தமிழ்நாட்டில் அமுலாக்க விதிகள் உருவாக்குவது குறித்த கலந்துரையாடல் கூட்டங்கள் தொடர்பாக ஆட்சேபனைகள், கோரிக்கைகள்

15.09.2026

தமிழ்நாடு அரசு ஒன்றிய அரசின் தொழிலாளர் விரோத நான்கு சட்டத் தொகுப்புகளில் மூன்று சட்டத் தொகுப்புகளுக்கு தமிழ்நாடு விதிகள் உருவாக்கி அமுலாக்குவது தொடர்பாக தொழிற்சங்கங்கள், வேலையளிப்பவர் அமைப்புகளுடன் 16.09.2026 முதல் 18.09.2026 வரையிலான தேதிகளில் தனித்தனியாக கலந்துரையாடல் கூட்டங்கள் நடத்த அழைப்பு விடுத்தது. இது குறித்து விவாதிப்பதற்காக தமிழ்நாட்டின் அனைத்து தொழிற்சங்கங்கள், கூட்டம் 2026 செப்டம்பர் 15 அன்று சென்னையில் சிந்தாதிரிப்பேட்டையில் தமிழ்நாடு ஏஐடியுசி அலுவலகத்தில் தமிழ்நாடு ஏஐடியுசி பொதுச்செயலாளர் ம.இராதாகிருஷ்ணன் அவர்கள் தலைமையில் நடைபெற்றது.

தோழர்கள், கி.நடராசன், வி.வேலுசாமி, ஜே.விஜயகுமார், (தொமுச), டி.எம்.மூர்த்தி (ஏஐடியுசி க.திருச்செல்வன், கே.சி.கோபிகுமார் (சிஐடியு) மு. சுப்பிரமணியன், பி.அன்பழகன் (எச்எம்எஸ்) ஆர்.ஆதிகேசவன், டி.வி.சேவியர், ஜி.கே.முரளிதரன், பி.சுகுமாறன் (ஐஎன்டியுசி) ஏ.மோகன்ராஜ் (எஐயூடியூசி) சொ.இரணியப்பன், ஜி.முனுசாமி (ஏஐசிசிடியு) ஏ.சேக்கிழார், என்.பழனி, கே.நாராயணமூர்த்தி (யுடியுசி) எஸ்.மாயாண்டி டியுசிசி, கி.வெங்கடேசன், தே.கஜேந்திரன், மா.அக்கினிராஜ் (எம்எல்எப்) ஆர்.சம்பத் (டபுள்யுபிடியுசி), க.பேரறிவாளன் (எல்எல்எஃப்) ஆகியோர் பங்கேற்றனர்.

தமிழ்நாடு தொழிலாளர் ஆணையர் அவர்கள், தொழிலாளர் சட்டத் தொகுப்புகளில் ஊதிய சட்டத் தொகுப்பு 2019, தொழில் உறவுகள் சட்டத் தொகுப்பு 2020 மற்றும் தொழில் பாதுகாப்பு, சுகாதாரம் மற்றும் பணி நிலைமைகள் சட்டத் தொகுப்பு 2020 ஆகியவற்றுக்கான மாநில வரைவு விதிகளை இறுதி செய்வதற்கு தொழிற்சங்கங்கள் மற்றும் வேலையளிப்போர் அமைப்புகளுடன் முறையே 16.09.2026, 17.09.2026, 18.09.2026 ஆகிய தேதிகளில் காலை 11 மணி முதல், பிற்பகல் 1 மணி வரையில் தொழிற்சங்கங்கள் மற்றும் பிற்பகல் 2 மணி முதல் 4 மணி வரை வேலையளிப்பவர் பிரதிநிதிகளுடன் கலந்தாய்வு கூட்டங்கள் நடத்தி தமிழ்நாடு விதிகள் இறுதிசெய்து அறிவிக்கப் போவதாக அழைப்பு அனுப்பி இருந்தார். இது குறித்து கீழ்க்கண்டவாறு தமிழ்நாட்டின் மத்திய, மாநில தொழிற்சங்கங்களின் ஆட்சேபனைகள், கோரிக்கைகளை முன்வைத்து கடிதம் அனுப்ப முடிவு செய்யப்பட்டது. அதன் அடிப்படையில் அனைத்து தொழிற்சங்க தலைவர்கள் கையொப்பமிட்டு அனுப்பப்பட்ட கடிதத்தில் குறிப்பிடப்பட்டுள்ளதாவது.

பார்வையில் கண்டுள்ள தங்களின் கடிதத்தின் மூலம் தொழிலாளர் சட்டத் தொகுப்புகளுக்கான மாநில வரைவு விதிகளில் உரிய திருத்தங்கள் மேற்கொள்ளுதல் தொடர்பாக தொழிற்சங்கங்கள் மற்றும் வேலையளிப்போர் அமைப்புகளுடன் கலந்தாய்வு கூட்டங்கள் ஊதிய சட்டத் தொகுப்பு (தமிழ்நாடு) விதிகள் 16.09.2026, தொழில் உறவுகள் (தமிழ்நாடு) விதிகள் 17.09.2026, தொழில் பாதுகாப்பு மற்றும் பணி நிலைமைகள் (தமிழ்நாடு) விதிகள் 18.09.2026 தேதிகளில் முற்பகல் 11 மணி மணி முதல் பிற்பகல் 1 மணி வரை நடைபெறுவதாக தெரிவிக்கப்பட்டுள்ளது.

இந்த கலந்தாய்வு குறித்து எமது ஆட்சேபனைகள், மற்றும் கோரிக்கைகள் வருமாறு:

1. இந்த சட்ட தொகுப்புகள் அனைத்தும், கடந்த 150 ஆண்டு காலமாக இந்தியத் தொழிலாளர்கள் போராடிப் பெற்ற உரிமைகளை பறிக்கும் வகையில் இயற்றப்பட்டவை ஆகும் என்ற எமது கருத்தை பதிவு செய்கிறோம். தமிழ்நாடு அரசு இந்த நான்கு தொழிலாளர் சட்டத் தொகுப்புகளையும் அமுல் நடத்த இயலாது என ஒன்றிய அரசுக்கு தெரிவிக்க வேண்டும் என்ற எமது கோரிக்கையை வலியுறுத்துகிறோம்.

2. பக்கத்தில் இருக்கும் கேரள மாநில அரசு, இந்த நான்கு சட்டத் தொகுப்புகளை அமுல் நடத்த மாட்டோம் என்று அறிவித்து, தொழிலாளர்கள் நலனை பாதுகாக்கும் மாற்று வழிகளை கண்டறிய நீதியரசர் கோபால் கௌடா அவர்கள் தலைமையில் குழு அமைத்து, அதன் பரிந்துரைகளின் அடிப்படையில் நடவடிக்கைகளை மேற்கொண்டு வருகிறது.

3. அரசியல் அமைப்பு சட்டம் வழங்கியுள்ள உரிமையை பயன்படுத்தி, தமிழ்நாட்டின் சமூக நீதி பாரம்பரியத்தை நிலை நாட்டும் வகையில் கேரள அரசு மேற்கொண்ட அதே நிலையை மேற்கொண்டு, தமிழ்நாட்டின் தொழிலாளர்கள் நலனை பாதுகாக்க வேண்டும் என்று தமிழ்நாடு அரசை வலியுறுத்தி கேட்டுக்கொள்கிறோம்.

4. தொழிலாளர் குறித்த சட்ட வரையறைகள் பொதுப்பட்டியலில் உள்ளவையாகும். தமிழ்நாடு அரசு நிறைவேற்றி அமலில் உள்ள சட்டங்களை, ஒன்றிய அரசு நீக்கம் செய்வது ஏற்கத்தக்கது அல்ல. எனவே தமிழ்நாடு அரசு இயற்றியுள்ள சட்டங்களில் உள்ள நியதிகளை, நீக்கியோ அல்லது மாற்றியோ அமைந்துள்ள ஒன்றிய அரசின் சட்டப் பிரிவுகளை தமிழ்நாட்டில் செயல்படுத்த முடியாது. அது மாநில அரசின் சட்டம் இயற்றும் அதிகாரத்தில் தலையிட்டுத் தடுப்பதாகும் என்று அறிவிக்க வேண்டும்.

5. தமிழ்நாடு விதிகளை நிறைவேற்றுவதைப் பற்றி 18.3.2022 அன்று மாண்புமிகு தொழிலாளர் அமைச்சர் தலைமையில் தொழிற்சங்க ஆலோசனை கூட்ட நடபெற்றது. வரைவு விதி நகல்களை தொழிற்சங்கங்களுக்கு அனுப்பி வைப்பதாகக் கூறிக் கூட்டம் முடிவுற்றது.

6. தமிழ்நாடு அரசு 11.04.2022 அன்று, ஊதிய சட்டத் தொகுப்பு 2019, தொழில் உறவுகள் சட்டத் தொகுப்பு 2020 மற்றும் தொழில் பாதுகாப்பு, சுகாதாரம் மற்றும் பணி நிலைமைகள் சட்டத் தொகுப்பு 2020 ஆகிய மூன்று தொகுப்புகளுக்கும், மாநில விதிகளை அரசிதழில் வெளியிட்டது.

7. இந்த சட்டத் தொகுப்புகளுக்கு விதிகளை நிறைவேற்றாமல் இருந்து, இவற்றை அமுலாக்கும் வாய்ப்பை ஒன்றிய அரசுக்குத் தராமல் தடுக்க வேண்டும் என்று தொழிற்சங்கங்கள் தொடர்ந்து வலியுறுத்திய நிலையில் முந்தைய திமுக ஆட்சி காலத்தில் மாண்புமிகு தொழிலாளர் அமைச்சர் அவர்கள் தொழிற்சங்கங்களிடமும், ஊடகங்களிலும், சட்டமன்றத்திலும் தொழிற்சங்கங்கள் ஏற்கும் வரை தமிழ்நாடு விதிகளை இறுதி செய்து அறிவிக்க மாட்டோம் என்று உறுதிபட கூறினார்.

இந்த நிலையில் தற்போது இந்த சட்ட தொகுப்புகளுக்கான விதிகளை தமிழ்நாடு அரசு இறுதி செய்யும் பொருட்டு மீண்டும் தொழிலாளர்களுக்கு நெருக்கடி தருவதால், வேறுவழியின்றி பின்வரும் ஆட்சேபனைகளையும், அவற்றுக்கான காரணங்களையும் முன்வைக்கிறோம்.

1) வழக்கமாக முத்தரப்பு கூட்டங்களுக்கு தமிழ்நாடு தொழிலாளர் நலத்துறை அழைப்பு அனுப்பும் கடித்தில் அழைக்கப்பட்ட தொழிற்சங்கங்கள், வேலையளிப்பவர்கள் அமைப்புகளின் பெயர், முகவரி முழுமையாக குறிப்பிட்டு அனுப்பப்படும். ஆனால் தற்போது அனுப்பியுள்ள பார்வையில் கண்ட கடிதத்தில் அத்தகைய வெளிப்படைத்தன்மை இல்லாமல் ஒவ்வொரு சங்கத்தின் பெயரும் தனித்தனியாக குறிப்பிட்டு அனுப்ப்பட்டுள்ளது. இதனால் எந்தெந்த அமைப்புகள் அழைக்கப்பட்டுள்ளன என்று யாரும் தெரிந்து கொள்ள முடியாத நிலை உள்ளது. எனவே வழக்கமாக அனுப்பப்பட்டவாறு அழைக்கப்படும் தொழிற்சங்கங்கள், வேலையளிப்பவர் அமைப்புகளின் பெயர், முகவரியுடன் கடிதம் அனுப்பி அரசின் வெளிப்படைத்தன்மையை பாதுகாக்க வேண்டுகிறோம்.

2) மேலும், அவ்வாறு அனுப்பிய கடிதம் கூட தமிழ்நாட்டில் செயல்படும் மத்திய தொழிற்சங்க அமைப்புகளான ஏஐயூடியூசி, மற்றும் மாநில தொழிற்சங்க அமைப்பான எல்எல்எஃப், உழைக்கும் மக்கள் மாமன்றம் போன்ற அமைப்புகளுக்கு அனுப்பப்படவில்லை. எனவே பாரபட்சம் இல்லாமல் தமிழ்நாட்டில் செயல்படும் மத்திய, மாநில தொழிற்சங்கங்களான ஏஐயூடியூசி, எல்எல்எஃப், உழைக்கும் மக்கள் மாமன்றம் உட்பட அனைத்து தொழிற்சங்கங்களுக்கும் அழைப்பு அனுப்பப்பட வேண்டும்.

3) கலந்துரையாடல் கூட்டங்கள் ஒவ்வொரு சட்டத் தொகுப்புக்கும் 11 மணி முதல் 1 மணி வரை என்னும் வரையறை வழங்கப்பட்டுள்ளது; இது போதுமானதல்ல. இரண்டு மணி நேரத்தில் விவாதித்து முடிக்க முடியாது.
4) தமிழ்நாடு அரசு 11.04.2022 அன்று, மேற்கண்ட மூன்று சட்டத் தொகுப்புகளுக்கும், மாநில விதிகளை அரசிதழில் வெளியிட்டதைத் தொடர்ந்து இறுதியாக 27.5.2022 அன்று ஊதிய சட்டத் தொகுப்பு, தொழிலுறவு சட்டத் தொகுப்பு ஆகியவற்றுக்கான தமிழ்நாடு விதிகள் குறித்து, தொழிற்சங்கக் கருத்தை கேட்பதற்கான கூட்டம் சென்னையில் நடைபெற்றது. தொழிலாளர் ஆணையர், கூடுதல் ஆணையர் சமரசம், இணை ஆணையர்- சென்னை, குறைந்தபட்ச ஊதிய இணை ஆணையர் உள்ளிட்டோர் அரசு சார்பில் ‌இதில் பங்கு பெற்றனர். அந்த கூட்டத்தில் தொழிற்சங்கங்கள் கூறிய கருத்துக்களை குறிப்பெடுத்துக் கொண்டனர். அதில் திருத்தங்கள் மற்றும் ஆட்சேபனைகள் முன்மொழியப்பட்ட போது, அதற்கான காரணங்களையும் சேர்த்து தொழிற்சங்கங்கள் கூறின. அதிலும் ஐயங்களைக் கேட்டு அதிகாரிகள் பதிவு செய்து கொண்டனர். பிற்பகல் 3.00 மணிக்கு தொடங்கி மாலை 5. 45 வரை 2 மணி 45 நிமிடம் நடைபெற்ற இந்த கூட்டத்தில் இரண்டு விதிகள் குறித்து மட்டுமே விவாதிக்க முடிந்தது. அதுவும் இரண்டு தொழிற்சங்கங்களின் தலைவர்கள் மட்டுமே கருத்துக்கள் முன்வைக்க நேரம் இருந்தது.

5) இந்த சூழலில் ஒரு சட்டத் தொகுப்புக்கான விதிகளுக்கு ஒவ்வொரு தொழிற்சங்கங்கமும், வேலையளிப்பவர் அமைப்புகளும் தந்துள்ள திருத்தங்கள், ஆட்சேபனைகள் குறித்து விவாதித்து, அரசு ஏற்றுக்கொள்ளும் திருத்தத்தை இறுதி செய்வது என்னும் பணி முழுமையும் இரண்டு மணி நேரத்தில் விவாதித்து முடிவுக்கு வர வேண்டும் என்ற நேர வரையறை எந்த விதத்திலும் பொறுத்தமானதல்ல; ஏற்புடையதல்ல. எனவே உரிய அளவில் நிதானமாக விவாதித்து தீர்மானிக்கும் வகையில் தேவையான நேர வரையறை வழங்க வேண்டும்.

6) மேலும் தொழிற்சங்கங்களின் சார்பில் தலா ஒருவர் மட்டுமே இந்த கலந்துரையாடல் கூட்டத்தில் பங்கேற்க வேண்டும் என்று நிபந்தனை விதிப்பதும் எந்த விதத்திலும் ஏற்புடையதல்ல; வேலையளிப்பவர் பிரதிநிதிகளுக்கும், அரசின் பிரதிநிதிகளுக்கும் அத்தகைய நிபந்தனை எதுவும் விதிக்காத போது; முத்தரப்பின் முதல் தரப்பான தொழிற்சங்கங்களுக்கு மட்டும் ஒருவர் மட்டுமே பங்கேற்க வேண்டும் என்ற நிபந்தனையை நீக்க வேண்டும்.

7) வெளியிடப்பட்ட வரைவு விதிகளுக்கு தொழிற்சங்கங்கள் மற்றும் வேலையளிப்போரிடமிருந்து பெறப்பட்ட ஆட்சேபனைகள் மற்றும் ஆலோசனைகளை கருத்தில் கொண்டும் திருத்தப்பட்ட மத்திய விதிகளுக்கு ஏற்றவாறும் மாநில வரைவு விதிகளில் உள்ள திருத்தங்கள் மேற்கொள்ள உத்தேசிக்கப்பட்டுள்ளது என்று கூட்டத்தின் நோக்கம் குறித்து தங்கள் கடிதத்தில் குறிப்பிடப்பட்டுள்ளது. அப்படியானால் தொழிற்சங்கங்கள், வேலையளிப்போர் அமைப்புகளின் எந்தெந்த அமைப்புகளிடமிருந்து என்ன ஆட்சேபனைகள், ஆலோசனைகள் பெறப்பட்டன என்றும், அதன் மீது அரசின் நிலைப்பாடு என்ன என்றும் முழுமையாக தெரியாமல் எப்படி கருத்துகளை முன்வைக்க இயலும். எனவே, இதுவரை பெறப்பட்ட அனைத்து ஆட்சேபனைகள், ஆலோசனைகள் மற்றும் அவற்றில் எதனை அரசு ஏற்கிறது, நிராகரிக்கிறது என்கிற முழுமையான ஆவணங்களையும் அனைத்து தொழிற்சங்கங்களுக்கும், வேலையளிப்பவர் அமைப்புகளுக்கும் வழங்க வேண்டும். அதோடு தொழிற்சங்கங்களும், வேலையளிப்பவர் அமைப்புகளும் தந்த ஆட்சேபனைகள், ஆலோசனைகளை பொது வெளியில் வெளியிடவும் வேண்டும் என்று வலியுறுத்துகிறோம்.

எனவே, எமது மேற்கண்ட ஆட்சேபனைகள், கோரிக்கைகளை கருத்தில் கொண்டு தக்க நடவடிக்கை எடுத்து முறையாக, முழுமையாக விவாதித்து முடிவெடுக்க போதுமான கால அவகாசத்துடன் கலந்துரையாடல் கூட்டங்களை ஏற்பாடு செய்திட வலியுறுத்திக் கேட்டுக்கொள்கிறோம்.

கையொப்பமிட்டுள்ள சங்கங்கள்
LPF AITUC HMS CITU INTUC AIUTUC AICCTU UTUC WPTUC TUCC MLF LLF

12/09/2026

11/09/2026

சாலமன் பாப்பையா மறைவுக்கு ஆழ்ந்த அஞ்சலி

சிறந்த தமிழறிஞரும், தமிழ்நாடு நன்கறிந்த பட்டிமன்ற நடுவருமான சாலமன் பாப்பையா (வயது 90) வயது முதிர்வு மற்றும் உடல் நலக்குறைவு காரணமாக இன்று (செப்டம்பர் 11, 2026) காலமானார் என்ற செய்தி மிகுந்த துயரத்தையும், வருத்தத்தையும் தருகிறது.

சாலமன் பாப்பையா, பிப்ரவரி 22, 1936 அன்று மதுரை மாவட்டம் திருமங்கலம் அருகில் உள்ள சாத்தான்குடியில் பிறந்தார். அவர் 12 ஆயிரத்திற்கும் மேற்பட்ட பட்டிமன்றங்களை நடத்தியவர். மதுரை அமெரிக்கன் கல்லூரியில் தமிழ்த்துறை பேராசிரியராகப் பணியாற்றியவர்.

தனது நகைச்சுவை ததும்பும் எளிய சொற்பொழிவால், வாதத் திறமையால், இனிய குரல் வளத்தால் தலைமுறைகளைத் தாண்டி அனைத்து பிரிவு மக்களையும் கவர்ந்தவர்.

திருக்குறள் மற்றும் பல பழந்தமிழ் இலக்கியங்களுக்கு எளிய முறையில் உரை எழுதியுள்ளார்.

தமிழ்நாடு அரசின் ‘கலைமாமணி’, ‘பத்ம ஸ்ரீ’ உள்ளிட்ட பல மதிப்புமிக்க விருதுகளைப் பெற்றுள்ளார்.

சாலமன் பாப்பையா அவர்கள் சிறந்த முற்போக்கு சிந்தனையாளர் ஆவார். அவர் ஏராளமான நூல்களை எழுதியுள்ளார். பட்டுக்கோட்டை கல்யாண சுந்தரம் அவர்களின் பாடல்களின் இலக்கியச் செழுமையை அவர் தனது நூல்களின் மூலம் வெளிப்படுத்தியுள்ளார்.

அவரது மறைவிற்கு தமிழ்நாடு ஏஐடியூசி ஆழ்ந்த அஞ்சலி தெரிவித்துக் கொள்கிறது. அவரை பிரிந்து வாடும் குடும்பத்தினர்களுக்கும், உறவினர்களுக்கும், நண்பர்களுக்கும் ஆறுதலை தெரிவித்துக் கொள்கிறது.

ம. இராதாகிருஷ்ணன்
பொதுச்செயலாளர்
தமிழ்நாடு ஏஐடியூசி

25/08/2026

25 ஆகஸ்ட் 2026
டாஸ்மாக் பணியாளர்களின் வேலைநிறுத்தப் போராட்டத்திற்கு
தமிழ்நாடு ஏஐடியூசி ஆதரவு

தொழிலாளர்களின் நியாயமான கோரிக்கைகளை
தமிழக அரசு உடனடியாக நிறைவேற்ற வேண்டும்!

தமிழ்நாடு அரசின் டாஸ்மாக் மதுபானக் கடைகளில் பணியாற்றி வரும் ஆயிரக்கணக்கான பணியாளர்கள், தங்களின் நீண்டகால நியாயமான கோரிக்கைகளை வலியுறுத்தி ஆகஸ்ட் 28ஆம் தேதி முதல் வேலைநிறுத்தப் போராட்டத்தில் ஈடுபட உள்ளனர். இந்தப் போராட்டத்திற்கு தமிழ்நாடு ஏஐடியூசி தனது முழுமையான ஆதரவைத் தெரிவித்துக் கொள்கிறது. இது குறித்து தமிழ்நாடு ஏஐடியுசி பொதுச்செயலாளர் ம.இராதாகிருஷ்ணன் விடுத்துள்ள அறிக்கை வருமாறு:

டாஸ்மாக் நிறுவனத்தின் மூலம் அரசுக்கு ஆண்டுதோறும் மிகப்பெரிய அளவில் வருவாய் கிடைக்கிறது. அந்த வருவாயை ஈட்டுவதில் நேரடியாகப் பணியாற்றும் டாஸ்மாக் பணியாளர்களின் உழைப்பை அரசு உரிய முறையில் அங்கீகரிக்க வேண்டும்.
ஆனால், பல ஆண்டுகளாகப் பணியாற்றி வரும் பணியாளர்கள் இன்னமும் நிரந்தரத் தன்மையற்ற பணிச்சூழல், குறைந்த ஊதியம், பணிப்பாதுகாப்பின்மை உள்ளிட்ட பல்வேறு பிரச்சினைகளை எதிர்கொண்டு வருகின்றனர்.

அரசுக்கு வருவாய் ஈட்டித் தரும் தொழிலாளர்களின் வாழ்க்கையில் மட்டும் ஏன் பாதுகாப்பின்மை? என்ற கேள்விக்கு தமிழக அரசு பதில் அளிக்க வேண்டும்.
டாஸ்மாக் பணியாளர்களின் கோரிக்கைகள் வெறும் ஊதிய உயர்வுக்கான கோரிக்கைகள் மட்டுமல்ல. அவை அவர்களின் வாழ்வாதாரம், பணிப்பாதுகாப்பு, தொழிலாளர் உரிமை மற்றும் சமூகப் பாதுகாப்பு ஆகியவற்றுடன் தொடர்புடையவை.

எனவே,
- நீண்டகாலமாகப் பணியாற்றி வரும் டாஸ்மாக் பணியாளர்களின் பணியை நிரந்தரப்படுத்த வேண்டும்.
- அவர்களுக்கு காலமுறை ஊதியம் மற்றும் உரிய ஊதிய உயர்வு வழங்க வேண்டும்.
- பணிப்பாதுகாப்பை உறுதி செய்ய வேண்டும்.
- தொழிலாளர் சட்டங்களின்படி கிடைக்க வேண்டிய அனைத்து உரிமைகளையும் வழங்க வேண்டும்.
- ஓய்வூதியம், வருங்கால வைப்பு நிதி உள்ளிட்ட சமூகப் பாதுகாப்புத் திட்டங்களை முழுமையாக உறுதி செய்ய வேண்டும்.
- பணிநேரம், வார விடுமுறை, விடுப்பு உள்ளிட்ட சட்டப்பூர்வ உரிமைகள் முறையாக அமல்படுத்தப்பட வேண்டும்.
- பணியிடங்களில் ஏற்படும் அச்சுறுத்தல் மற்றும் பாதுகாப்பு பிரச்சினைகளிலிருந்து பணியாளர்களைப் பாதுகாக்க உரிய நடவடிக்கை எடுக்க வேண்டும்.
- தொழிற்சங்கங்களுடன் முறையான பேச்சுவார்த்தை நடத்தி பிரச்சினைகளுக்கு தீர்வு காண வேண்டும்.

எந்த ஒரு நிறுவனத்தின் வளர்ச்சிக்கும் அதன் தொழிலாளர்களின் உழைப்பே அடிப்படை. டாஸ்மாக் மூலம் கிடைக்கும் வருவாயை மட்டும் கணக்கில் கொண்டு, அந்த வருவாயை உருவாக்கும் தொழிலாளர்களின் நலனை புறக்கணிப்பது சமூகநீதிக்கும் தொழிலாளர் நலக் கொள்கைக்கும் எதிரானதாகும்.

எனவே, வேலைநிறுத்தப் போராட்டத்தைத் தவிர்க்கும் வகையில் தமிழக அரசு உடனடியாக டாஸ்மாக் பணியாளர் சங்கங்களுடன் பேச்சுவார்த்தை நடத்தி, நியாயமான கோரிக்கைகளுக்கு தீர்வு காண வேண்டும்.
தொழிலாளர்கள் போராட்டத்திற்கு செல்லும் நிலையை உருவாக்காமல், அரசு பொறுப்புடன் செயல்பட வேண்டும். பேச்சுவார்த்தை மூலம் பிரச்சினைகளுக்குத் தீர்வு காண்பதே ஜனநாயக வழிமுறையாகும்.

டாஸ்மாக் பணியாளர்களின் நியாயமான போராட்டத்திற்கு தமிழ்நாடு ஏஐடியூசி தனது முழுமையான ஆதரவைத் தெரிவித்துக் கொள்கிறது.
தொழிலாளர்களின் ஒற்றுமையை வலுப்படுத்துவோம்!
டாஸ்மாக் பணியாளர்களின் நியாயமான கோரிக்கைகளை வென்றெடுப்போம்!


(ம.இராதாகிருஷ்ணன்)
பொதுச்செயலாளர்

21/08/2026

ஒன்றிய, மாநில அரசுகளின்
தொழிலாளர், விவசாயி, மக்கள் விரோத கொள்கைகளுக்கு எதிராக
தொழிலாளர்,விவசாயிகள் சங்கங்கள்
செப்டம்பர் 6-12 வரை பரப்புரை வாரம்

20.08.2026

தமிழ்நாட்டின் அனைத்து தொழிற்சங்கங்கள், ஐக்கிய விவசாயிகள் முன்னணி கூட்டம் 2026 ஆகஸ்ட் 20 அன்று சென்னையில் பல்லவன் இல்லம், விரைவு போக்குவரத்து கழக தொமுச அலுவலகத்தில் எச்எம்எஸ் தேசிய தலைவர் தோழர் க.அ.ராஜா ஸ்ரீதர் அவர்கள் தலைமையில் நடைபெற்றது.

தோழர்கள், கி.நடராசன், வி.வேலுசாமி, என்.தனசேகரன், பி.பன்னெர்செல்வம், ஜெ.விஜயகுமார், கி.சீனிவாசன், எம்.சண்முகம், எல்.பன்னீர்செல்வம், வி.மகேந்திரன், எஸ்.சுந்தரமூர்த்தி (தொமுச), ம.இராதாகிருஷ்ணன், (ஏஐடியுசி) கே.சி. கோபி குமார், எஸ்.ரேஜேந்திரன், (சிஐடியு) மு.சுப்ரமணியன், எம்.சுப்பிரமணிய பிள்ளை, பி.மோகந்தாஸ், எச்.கார்த்திக் (எச்எம்எஸ்) பி.சுகுமாறன் (ஐஎன்டியுசி) வி.சிவக்குமார், ஈ.சடையாண்டி (எஐயூடியூசி) சொ.இரணியப்பன், ஜி.முனுசாமி (ஏஐசிசிடியு) அ.சேக்கிழார் (யுடியுசி) எஸ்.மாயாண்டி (டியுசிசி), இரா. அந்திரிதாஸ், (எம்எல்எப்) ஆர்.சம்பத் (டபுள்யுபிடியுசி), க.பேரறிவாளன் (எல்எல்எஃப்) ஆகியோர் தொழிற்சங்கங்களின் சார்பிலும், கே.பாலகிருஷ்ணன் ஐக்கிய விவசாயிகள் முன்னணி சார்பிலும் பங்கேற்றனர்.

தமிழ்நாட்டில் ஆகஸ்ட் 10 அன்று மறியல் போராட்டத்தை எழுச்சிகரமான போராட்டமாக நடத்திட்ட அனைத்து தொழிற்சங்க, ஐக்கிய விவசாயிகள் முன்னணியின் மாவட்ட நிர்வாகிகளுக்கும், உற்சாகத்துடன் போராட்டத்தில் பங்கேற்ற தொழிலாளர்கள், விவசாயிகளுக்கும் பாராட்டுக்களையும், வாழ்த்துக்களையும் தெரிவிக்கிறோம்.

கூட்டத்தில் மேற்கொள்ளப்பட்ட முடிவுகள் வருமாறு:

அடுத்த கட்டமாக தொழிலாளர்கள்–விவசாயிகள் கூட்டு மாநாடுகள், பலநாள் பெருந்திரள் அமர்வு (Mahapadav), பலநாள் நேரடி நடவடிக்கைகளுக்கான தேதி, காலம் குறித்து அகில இந்திய தலைமையில் இருந்து அறிவிக்கப்படும் போது நாம் வெற்றிகரமாக நடத்துவதற்கு தயாராக வேண்டும்.

2026 செப்டம்பர் 6-12 வரை பரப்புரை வாரம்:

நமது தொடர் போராட்டத்தின் முன் தயாரிப்பாக 2026 செப்டம்பர் 6 ஆம் தேதி முதல் 12 ஆம் தேதி வரை உள்ள ஒரு வார காலத்தில் தொழிலாளர், விவசாயிகள் மாநாட்டின் கோரிக்கைகளோடு கீழ்க்கண்ட தமிழ்நாட்டின் கோரிக்கைகளையும் இணைத்து தொழிற்சங்கங்களும், விவசாயிகள் சங்கங்களும் ஒன்றிணைந்து நகரங்களிலும், கிராமங்களிலும் பரப்புரை மேற்கொள்ள வேண்டும். ஆலை வாயில், தெருமுனை கூட்டங்கள், நடைபயணம்/இருசக்கர வாகன பரப்புரை உள்ளிட்ட சாத்தியமுள்ள வடிவங்களில் மாவட்டத்தில் மூன்று நாட்களுக்கும் குறையாத நாட்கள் இந்த பரப்புரை மேற்கொள்ள வேண்டும்.

தமிழ்நாடு கோரிக்கைகள்:

ஒன்றிய அரசே!
1. காவிரி நீர் உரிமையை நிலைநாட்ட, தமிழ்நாட்டின் பங்கை தர நடவடிக்கை எடு,
2. மேக தாது அணை கட்டுமானத்திற்கு ஒன்றிய அரசே அனுமதிக்காதே

தமிழ்நாடு அரசே!
1.ஒன்றிய அரசின் நான்கு தொழிலாளர் சட்டத் தொகுப்புகளை ஏற்கமாட்டோம் என்று தமிழ்நாடு சட்டமன்றத்தில் தீர்மானம் இயற்று
2.முடங்கியுள்ள முத்தரப்பு குழுக்களை விரைந்து அமைத்து செயல்படுத்து
3.ஒன்றிய அரசின் வழியில் பொதுத்துறை, பொது சேவைகளை தனியார்மயமாக்கும் அபாயகரமான கொள்கைகளை கைவிடு
4.போராடும் மின்சாரம், போக்குவரத்து, டாஸ்மாக், சிவில் சப்ளை, உள்ளாட்சி, மருத்துவம், திட்டப்பணியாளர் உள்ளிட்ட துறைகளில் ஒப்பந்த முறையை கைவிட்டு தொழிலாளர்களின் பணி நிரந்தரம் கோரிக்கைகள் மீது தீர்வுகாண்,
5.கூட்டுறவு வங்கிகளில் விவசாயிகள் வாங்கிய கடனை முழுமையாக ரத்து செய்
6.குறைந்தபட்ச ஊதிய அரசாணைகளை மறுவரையறை செய்து ரூ. 42,000 க்கு குறையாமல் குறைந்த பட்ச ஊதியத்தை நிர்ணயித்து அமுலாக்கு
7.கட்டுமானம் உள்ளிட்ட அமைப்பு சாரா தொழிலாளர் நல வாரியங்கள் ஒன்றிய அரசின் சட்டத்தால் முடங்கும் நிலையை தடுத்திடு
8.காவிரி நதி நீர் பங்கீட்டில் தமிழ்நாட்டின் உரிமையை நிலைநாட்ட, மேக தாது அணை கட்டுமானத்தை தடுக்க உரிய சட்ட போராட்டத்தின் மூலம் நடவடிக்கை எடு
9.விவசாய தொழிலாளர்களின் வேலை வாய்ப்பு உரிமையை பறிக்கும் விஜி-கிராம் ஜி திட்டத்தை ஏற்றுக்கொண்ட தமிழ்நாடு அரசே விவசாய தொழிலாளர்களுக்கு வாக்குறுதி அளித்தவாறு 150 நாட்கள் வேலை வழங்கத் தக்க முழுமையான நிதி ஒதுக்கி, வேலைவழங்குவதை உறுதிசெய்
10. போராடும் ஜனநாயக உரிமைகளை பறிக்கும் அடக்குமுறைகளை கைவிடு

மாவட்டங்களில் தொழிற்சங்கங்கள், ஐக்கிய விவசாயிகள் முன்னணி கூட்டு கூட்டங்கள் கூட்டி பரவலாக பல்வேறு மையங்களில் திட்டமிட்டு மேற்கண்ட கோரிக்கைகளையும் இணைத்து பரப்புரை நடத்தவும் நடந்த விவரங்களை மாநில தலைமைக்கு தெரிவிக்கவும் வேண்டுகிறோம்.

தோழமைமிக்க,
LPF HMS AITUC CITU INTUC AIUTUC AICCTU UTUC WPTUC TUCC MLF LLF &

ஐக்கிய விவசாயிகள் முன்னணி (SKM)

05/08/2026

பத்திரிகைச் செய்தி
05.08.2026

தமிழ்நாடு அரசின் முதல் முழு நிதிநிலை அறிக்கை: தொழிலாளர்களின் அடிப்படைப் பிரச்சினைகளுக்கு தீர்வு காணத் தவறியுள்ளது – ஏஐடியூசி

தமிழ்நாடு அரசின் 2026–27ஆம் ஆண்டிற்கான முதல் முழு நிதிநிலை அறிக்கை தொழிலாளர்களின் அடிப்படைப் பிரச்சினைகளுக்கு உரிய முக்கியத்துவம் அளிக்கத் தவறியுள்ளது. இது உழைக்கும் மக்களிடையே ஏமாற்றத்தை ஏற்படுத்தியுள்ளது.

மாநிலத்தின் பொருளாதார வளர்ச்சியில் தொழிலாளர் வர்க்கம் தீர்மானகரமான பங்களிப்பைச் செய்து வருகிறது. ஆனால் அவர்களின் வாழ்வாதாரம், வேலைப் பாதுகாப்பு மற்றும் சமூகப் பாதுகாப்பை வலுப்படுத்தும் உறுதியான அறிவிப்புகள் பட்ஜெட்டில் இடம்பெறவில்லை.

அரசுத் துறைகள், உள்ளாட்சி அமைப்புகள், பொதுத்துறை நிறுவனங்கள் மற்றும் அரசு சார்ந்த நிறுவனங்களில் நீண்டகாலமாக காலியாக உள்ள பணியிடங்களை நிரப்புவதற்கான அறிவிப்பு இல்லை. ஒப்பந்த, அவுட்சோர்சிங் மற்றும் தொகுப்பூதிய முறையில் பணியாற்றும் தொழிலாளர்களை படிப்படியாக நிரந்தரப்படுத்துவதற்கான எந்தத் திட்டமும் அறிவிக்கப்படவில்லை.

அமைப்புசாரா தொழிலாளர்கள், கட்டுமானத் தொழிலாளர்கள், வீட்டு வேலைத் தொழிலாளர்கள், கிக் மற்றும் தள (Platform) தொழிலாளர்கள் ஆகியோருக்கு விரிவான சமூகப் பாதுகாப்பை உறுதி செய்யும் புதிய நடவடிக்கைகளும் இடம்பெறவில்லை. தொழிலாளர் சட்டங்களை திறம்பட அமல்படுத்துதல், பெண்தொழிலாளர்களின் பாதுகாப்பு, சம வேலைக்கு சம ஊதியம், பாதுகாப்பான பணிச்சூழல் ஆகியவற்றிலும் பட்ஜெட் கவனம் செலுத்தவில்லை. மேலும், ஒன்றிய அரசின் நான்கு தொழிலாளர் சட்டத் தொகுப்புகளை தமிழ்நாட்டில் அமல்படுத்த அனுமதிக்க மாட்டோம் என்ற உறுதியையும் பட்ஜெட் வெளிப்படுத்தவில்லை.

2026–27 இடைக்கால பட்ஜெட்டில் தொழிலாளர் நலன் மற்றும் திறன் மேம்பாட்டுத் துறைக்கு ₹1,996 கோடி ஒதுக்கப்பட்டிருந்த நிலையில், தற்போதைய முழு பட்ஜெட்டில் அது ₹2,022 கோடியாக உயர்த்தப்பட்டுள்ளது. அதாவது வெறும் ₹26 கோடி மட்டுமே கூடுதலாக ஒதுக்கப்பட்டுள்ளது. பணவீக்கம், அதிகரித்து வரும் வாழ்க்கைச் செலவு மற்றும் தொழிலாளர் நலத் தேவைகளைக் கருத்தில் கொண்டால், இந்த உயர்வு போதுமானதாகக் கருத முடியாது.

மேற்கண்ட கோரிக்கைகள் அனைத்தும் தவெக அரசின் தேர்தல் வாக்குறுதிகளில் இடம்பெற்றிருந்தன. புதிய அரசு தனது தேர்தல் வாக்குறுதிகளை நிறைவேற்றும் என்று தொழிலாளர்கள் பெரும் எதிர்பார்ப்புடன் இருந்தனர். ஆனால் அந்த எதிர்பார்ப்புகளுக்கு ஏற்ப இந்தப் பட்ஜெட்டில் எந்த உறுதியான நடவடிக்கையும் இடம்பெறவில்லை. தொழிலாளர்களுக்கு இந்தப் பட்ஜெட் ஏமாற்றத்தையே அளித்துள்ளது.

எனவே, அரசுத் துறைகளில் உள்ள அனைத்து காலிப்பணியிடங்களையும் உடனடியாக நிரப்புதல், ஒப்பந்த மற்றும் அவுட்சோர்சிங் தொழிலாளர்களை நிரந்தரப்படுத்துதல், அமைப்புசாரா மற்றும் கிக் தொழிலாளர்களுக்கு முழுமையான சமூகப் பாதுகாப்பு வழங்குதல், தொழிலாளர் நலத்திற்கான நிதி ஒதுக்கீட்டை கணிசமாக உயர்த்துதல் உள்ளிட்ட தேர்தல் வாக்குறுதிகளை உடனடியாக நிறைவேற்ற தமிழக அரசு நடவடிக்கை எடுக்க வேண்டும் என்று தமிழ்நாடு ஏஐடியூசி வலியுறுத்துகிறது.

ம. இராதாகிருஷ்ணன்
பொதுச்செயலாளர்
தமிழ்நாடு ஏஐடியூசி

03/08/2026

ஒன்றிய, மாநில அரசுகளின்
தொழிலாளர், விவசாயி, மக்கள் விரோத கொள்கைகளுக்கு எதிராக

ஆகஸ்ட் 10 அன்று
தொழிலாளர்,விவசாயிகள் மறியல்!

03.08.2026

மத்திய தொழிற்சங்கங்கள், தொழில்துறை சம்மேளனங்கள் மற்றும் சங்கங்கள், ஐக்கிய விவசாயிகள் முன்னணி (SKM) இணைந்து, 2026 ஜூலை 29 அன்று புதுடெல்லியில் இரண்டாவது தேசிய தொழிலாளர்கள்–விவசாயிகள் மாநாடு நடைபெற்றது. இம்மாநாட்டின் முடிவுகளை தமிழ்நாட்டில் அமுலாக்குவது தொடர்பான தமிழ்நாட்டின் அனைத்து தொழிற்சங்கங்கள், ஐக்கிய விவசாயிகள் முன்னணி கூட்டம் 2026 ஆகஸ்ட் 3 அன்று சென்னையில் “கலைஞரகம்” தொமுச அலுவலகத்தில் தொமுச தலைவர் தோழர் கி.நடராசன் அவர்கள் தலைமையில் நடைபெற்றது.

தோழர்கள், கோ.சி.வள்ளுவன், ஜெ.விஜயகுமார், இரா.பொன்னுராம், என்.தனசேகரன் (தொமுச), ம.இராதாகிருஷ்ணன், ஆர்.ஆறுமுகம், (ஏஐடியுசி) எஸ்.கண்ணன், க.திருச்செல்வன், எஸ்.கே.முருகேஷ் (சிஐடியு) எம்.சுப்பிரமணிய பிள்ளை, (எச்எம்எஸ்) பி.சுகுமாறன் (ஐஎன்டியுசி) வி.சிவக்குமார், ஈ.சடையாண்டி (எஐயூடியூசி) சொ.இரணியப்பன் (ஏஐசிசிடியு) கே.நாராயணமூர்த்தி (யுடியுசி) எஸ்.மாயாண்டி டியுசிசி, இரா. அந்திரிதாஸ், (எம்எல்எப்) கே.ராம்பாபு (டபுள்யுபிடியுசி), க.பேரறிவாளன் (எல்எல்எஃப்) ஆகியோர் தொழிற்சங்கங்களின் சார்பிலும், பி.எஸ்.மாசிலாமணி (ஏஐகேஎஸ்) அ.பாஸ்கர் (பிகேஎம்யு) சாமிநடராஜன் (ஏஐகேஎஸ்) மேரி லில்லிபாய், எஸ்.சுருளியாண்டவர் (ஏஐகேகேஎம்எஸ்) ஐக்கிய விவசாயிகள் முன்னணி சார்பிலும் பங்கேற்றனர்.

எச்எம்எஸ் தேசிய தலைவர் தோழர் க.அ.ராஜா ஸ்ரீதர் அவர்களின் வாழ்விணையர் சாந்தி அவர்கள் மறைவுக்கு கூட்டம் மவுன அஞ்சலி செலுத்தியது.
கூட்டத்தில் கீழ்க்கண்ட தீர்மானங்கள் நிறைவேற்றப்பட்டன

ஒன்றிய அரசின் கல்விக் கொள்கைகளுக்கு எதிராக போராடும் மாணவர்கள் மீது ஒன்றிய, மாநில அரசுகளின் ஒடுக்கு முறை நடவடிக்கைகளை கண்டிக்கிறோம். ஜென் Z இளைஞர்களின் கல்வி, வேலைவாய்ப்பு உரிமைக்கான போராட்டத்திற்கு முழுமையான ஆதரவை தெரிவிக்கிறோம்.

தமிழ்நாட்டில் தேங்கியுள்ள தொழிலாளர்களின் பிரச்சினைகள், முடங்கியுள்ள முத்தரப்பு குழுக்கள் , ஒன்றிய அரசின் நான்கு தொழிலாளர் சட்டத் தொகுப்புகள் குறித்து தெளிவுபடுத்தப்படாத தமிழ்நாடு அரசின் நிலை, கட்டுமானம் உள்ளிட்ட அமைப்பு சாரா தொழிலாளர் நல வாரியங்கள் ஒன்றிய அரசின் சட்டத்தால் முடங்கும் நிலை உள்ளிட்ட தமிழ்நாட்டின் தொழிலாளர்கள் பிர்ச்சினைகள் தொடர்பாக தமிழ்நாட்டின் தொழிற்சங்கங்களை அழைத்து பேசி தீர்க்க முன்வரவேண்டும் என்று தமிழ்நாடு அரசை வலியுறுத்துகிறோம்.

எம்ஆர்எஃப் தொழிலாளர்களின் போராட்டத்திற்கு ஆதரவு தெரிவிப்பதோடு, போராடும் தொழிலாளர்களின் கோரிக்கைகளை நிறைவேற்ற தமிழ்நாடு அரசு விரைந்து நடவடிக்கை எடுக்க வேண்டும்.

டெல்லியில் நடைபெறவிருந்த விவசாயிகள் போராட்டத்தில் பங்கேற்க ரயிலில் பயணம் செய்த தமிழ்நாட்டின் விவசாயிகளை நடுவழியில் இறக்கிவிட்டு கைது செய்துள்ள ஒன்றிய, மகாராஷ்ர அரசுகளின் ஜனநாயக உரிமைக்கு எதிரான அடக்குமுறை நடவடிக்கையை கண்டிக்கிறோம்.

மகாத்மா காந்தி தேசிய ஊரக வேலைவாய்ப்பு உரிமை சட்டத்தை விஜி-கிராம் ஜி என்று பெயரை மாற்றியதோடு விவசாய தொழிலாளர்களின் வேலை வாய்ப்பு உரிமையை பறிக்கும் சட்டத்தை தமிழ்நாட்டில் ஏற்று அமுலாக்குவதாக அறிவித்ததோடல்லாமல் கடந்த ஒரு மாதத்திற்கும் மேலாக இந்த தொழிலாளர்களுக்கு வேலை வழங்காத தமிழ்நாடு அரசின் நடவடிக்கை ஏற்புடையதல்ல; மகாத்மா காந்தி தேசிய ஊரக வேலைவாய்ப்பு சட்டம் தொடர வேண்டும் என தமிழ்நாடு அரசு ஒன்றிய அரசை வலியுறுத்த வேண்டும். வேலையில்லாமல் விவசாய தொழிலாளர்களை தவிக்கவிடும் நடவடிக்கையை கைவிட்டு வேலை வழங்க வேண்டும்.

கூட்டத்தில் மேற்கொள்ளப்பட்ட முடிவுகள் வருமாறு:

புதுடெல்லி தால்கடோரா அரங்கில் நடைபெற்ற தொழிலாளர்கள்– விவசாயிகளின் தேசிய மாநாடு, மக்கள் விரோதக் கொள்கைகளுக்கு எதிராக ஒன்றுபட்ட, போராட்டங்களை தீவிரப்படுத்துவதென முடிவு செய்து அறிவித்துள்ளது.

மாநாடு ஒருமனதாக விரிவான தீர்மானப் பிரகடனத்தை நிறைவேற்றியது. அதில்:
 நான்கு தொழிலாளர் சட்டத் தொகுப்புகளையும் (Labour Codes) ரத்து செய்ய வேண்டும்.
 தொழிற்சங்க உரிமைகளுக்கு முழுமையான உத்தரவாதம் வழங்க வேண்டும்.
 தொழிலாளர் பாதுகாப்புச் சட்டங்களை மீண்டும் அமல்படுத்த வேண்டும்.
 அகவிலைப்படியுடன் இணைக்கப்பட்ட ₹42,000 சட்டப்பூர்வ குறைந்தபட்ச ஊதியம் வழங்க வேண்டும்.
 சி-2 செலவு + 50% அடிப்படையில் சட்டப்பூர்வ குறைந்தபட்ச ஆதரவு விலை (MSP) மற்றும் உறுதியான அரசுக் கொள்முதல் விலை வழங்க வேண்டும்.
 விவசாயி மற்றும் தொழிலாளர் விரோத வெளிநாட்டு வர்த்தக ஒப்பந்தங்களை (FTA) கைவிட வேண்டும்.
 தனியார்மயமாக்கல் மற்றும் தேசிய சொத்து பணமாக்கல் திட்டம் (National Monetisation Pipeline 2.0) நிறுத்தப்பட வேண்டும்.
 மகாத்மா காந்தி தேசிய ஊரக வேலை உறுதித் திட்டம் (MGNREGA) மீண்டும் வலுப்படுத்தப்பட வேண்டும்.
 சமூகப் பாதுகாப்பு விரிவுபடுத்தப்பட வேண்டும்.
 வேலைவாய்ப்புகள் உருவாக்கப்பட வேண்டும்.
 பொதுக் கல்வி மற்றும் பொதுச் சுகாதாரம் வலுப்படுத்தப்பட வேண்டும்.
 பொதுவிநியோகத் திட்டம் (PDS) பாதுகாக்கப்பட வேண்டும்.
 அடக்குமுறைச் சட்டங்கள் திரும்பப் பெறப்பட வேண்டும்.
 அரசியலமைப்பு மற்றும் ஜனநாயக உரிமைகள் பாதுகாக்கப்பட வேண்டும்.

இந்தக் கோரிக்கைகளை முன்வைத்து

நாடு முழுவதும் தொழிலாளர்கள்–விவசாயிகளின் ஒருங்கிணைந்த போராட்டங்களை தீவிரப்படுத்தவும் மாநாடு முடிவு செய்தது.

உடனடி நடவடிக்கையாக, 2026 ஆகஸ்ட் 10, "வெள்ளையனே வெளியேறு" (Quit India) இயக்க தினத்தை முன்னிட்டு, மாவட்ட மற்றும் மாநில அளவில் ஆர்ப்பாட்டங்கள், ரயில் மறியல், சாலை மறியல், பணியிடப் போராட்டங்கள், மனிதச் சங்கிலி உள்ளிட்ட மக்கள் இயக்கங்களை நாடு முழுவதும் நடத்த அழைப்பு விடுக்கப்பட்டது.

மேலும், மாநில அளவிலான கூட்டு மாநாடுகள், பரவலாக்கப்பட்ட பெருந்திரள் அம்ர்வுகள் (Mahapadavs) மற்றும் அரசாங்கம் கோரிக்கைகளை ஏற்கத் தவறினால் மேலும் விரிவான நாடு தழுவிய நேரடி போராட்டங்களுக்கு தயாராகவும் முடிவு எடுக்கப்பட்டது.

இந்த மாநாடு, அதிகாரவாதப் போக்கை அதிகரித்துக் கொண்டிருக்கும் அரசை எதிர்கொள்ள தொழிலாளர்–விவசாயி ஒற்றுமையை மேலும் வலுப்படுத்த வேண்டும் என்ற வலிமையான செய்தியை வழங்கியது.
சமத்துவம், சமூக நீதி, மதச்சார்பின்மை மற்றும் சமூக முன்னேற்றத்தை அடிப்படையாகக் கொண்ட ஒரு சமூகத்தை உருவாக்கும் போராட்டத்தை தொடர்ந்து முன்னெடுக்கவும், தொழிலாளர்–விவசாயி ஒற்றுமையை மேலும் பலப்படுத்தவும், ஜனநாயக இயக்கங்களுடன் ஒற்றுமையை விரிவுபடுத்தவும் உறுதிமொழி ஏற்றது.

இதன்படி 2026 ஆகஸ்ட் 10 ஆம் தேதியன்று தமிழ்நாட்டில் ஒன்றிய அரசு அலுவலகங்கள் முன்பாக மறியல் போராட்டங்களை நடத்துவதென முடிவு செய்யப்பட்டது.

உடனடியாக மாவட்டங்களில் தொழிற்சங்கங்கள், ஐக்கிய விவசாயிகள் முன்னணி கூட்டு கூட்டங்கள் கூட்டி பரவலாக பல்வேறு மையங்களில் மறியல் போராட்டங்களை நடத்த திட்டமிட்டு எழுச்சியுடன் போராட்டங்களை நடத்தவும் நடந்த விவரங்களை மாநில தலைமைக்கு தெரிவிக்கவும் வேண்டுகிறோம்.

தோழமைமிக்க,
LPF HMS AITUC CITU INTUC AIUTUC AICCTU UTUC WPTUC MLF LLF &
ஐக்கிய விவசாயிகள் முன்னணி (SKM)

03/08/2026

திருச்சி வழக்கறிஞர் தோழர் பாலகிருஷ்ணன் காலமானார்
செவ்வணக்கம் தோழர் பாலகிருஷ்ணன்
ரானே, எம்ஆர்எப் உள்ளிட்ட பல்வேறு ஏஐடியூசி சங்கங்களின் வழிகாட்டியாக, தொழிலாளி வர்க்கத்தின் வழக்கறிஞராக பணியாற்றிய உழைக்கும் மக்களின் நலனுக்காக வாழ்நாள் முழுவதும் தன்னை அர்ப்பணித்த தோழர் வழக்கறிஞர் பாலகிருஷ்ணன்.
இளம் வயதில் இருந்தே இந்திய கம்யூனிஸ்ட் கட்சியில், ஏஐடியூசியில் பல்வேறு பொறுப்புகளில் செயல்பட்டவர்.
இன்று பெரம்பலூர் மாவட்ட ஆட்சியர் அலுவலகம் முன்பாக நடைபெறவிருந்த எம்ஆர்எப் தொழிலாளர்களின் ஆர்ப்பாட்டத்தில் பங்கேற்க தயாராகி கொண்டு இருந்த நிலையில் திடீரென ஏற்பட்ட மாரடைப்பு காரணமாக உயிரிழந்தார் என்ற செய்தி அதிர்ச்சி அளிக்கிறது. தோழர் பாலகிருஷ்ணன் மறைவு ஏஐடியூசி மற்றும் தொழிற்சங்க இயக்கத்திற்கு ஈடுசெய்ய முடியாத பேரிழப்பாகும்.
அவரது மறைவுக்கு ஆழ்ந்த அஞ்சலியும், அவரை இழந்து வாடும் வாழ்விணையர், அவரது குடும்பத்தினர், தோழர்கள், நண்பர்கள் உட்பட அனைவருக்கும் ஆழ்ந்த இரங்கலையும் தமிழ்நாடு ஏஐடியூசி சார்பில் தெரிவித்துக்கொள்கிறோம்.
செவ்வணக்கம் தோழர் பாலகிருஷ்ணன்.

ம. இராதாகிருஷ்ணன் பொதுச்செயலாளர்
தமிழ்நாடு ஏஐடியூசி

25/07/2026

ஒன்றிய கல்வி அமைச்சர் தர்மேந்திர பிரதான் ராஜினாமா: மாணவர் – இளைஞர்களின் முதல் வெற்றிக்கு ஏஐடியூசி வாழ்த்து

இன்று (25.07.2026) ஏஐடியூசி பொதுச்செயலாளர் தோழர் அமர்ஜீத் கவுர் வெளியிட்டுள்ள அறிக்கை வருமாறு:

கல்வி அமைப்பில் நிலவிய ஊழலுக்கும், நீட் (NEET) வினாத்தாள் கசிவு விவகாரத்திற்கும் அரசியல் மற்றும் நிர்வாகப் பொறுப்பை நிலைநாட்டும் வகையில் ஒன்றிய கல்வி அமைச்சர் தர்மேந்திர பிரதானின் ராஜினாமாவை பெற்றுத் தந்த CJP இயக்கத்தினருக்கும், அவர்களுக்கு ஆதரவாகப் போராடிய அனைத்து மாணவர்–இளைஞர் அமைப்புகளுக்கும், பொதுவாக நாடு முழுவதும் போராட்டத்தில் பங்கேற்ற மாணவர்–இளைஞர்களுக்கும் அகில இந்திய தொழிற்சங்க காங்கிரஸ் (ஏஐடியூசி) தனது மனமார்ந்த வாழ்த்துகளைத் தெரிவிக்கிறது.

இப்போது கவனம் செலுத்தப்பட வேண்டியது, சீரழிந்து வரும் கல்வி அமைப்பை முழுமையாக மறுஆய்வு செய்வதிலும், பிற்போக்குத்தனமான புதிய தேசிய கல்விக் கொள்கை (NEP), பல்வேறு நுழைவுத் தேர்வுகள் மற்றும் வேலைவாய்ப்பு ஆட்சேர்ப்புத் தேர்வு முறைகளில் உள்ள குறைபாடுகளைச் சரிசெய்வதிலும் இருக்க வேண்டும். நாட்டில் இதுவரை இல்லாத அளவிற்கு வேலைவாய்ப்பின்மை நிலவும் சூழலில் இது மிகவும் அவசியமானதாகும்.

இந்தப் போராட்டம், ஆட்சியில் இருப்பவர்கள் மக்களிடம் பொறுப்புக்கூற வேண்டியது ஜனநாயகத்தின் அடிப்படை நெறி என்பதை மீண்டும் உறுதிப்படுத்தியுள்ளது. மேலும், கருத்து தெரிவிக்கும் உரிமை, மாற்றுக் கருத்தை வெளிப்படுத்தும் உரிமை, கருத்துச் சுதந்திரம் மற்றும் அமைதியான போராட்ட உரிமை ஆகிய அரசியலமைப்புச் சட்டம் வழங்கியுள்ள அடிப்படை ஜனநாயக உரிமைகளை மீண்டும் நிலைநாட்டியுள்ளது.

இந்த தலைமுறை (Gen Z) முன்னெடுத்த போராட்டத்தை "தேசவிரோதம்", "அராஜகம்", "வெளிநாட்டு நிதியுதவி பெற்றது" என்று அவதூறு பரப்ப அரசாங்கம் மேற்கொண்ட முயற்சிகள் இறுதியில் அரசாங்கத்திற்கே எதிராகத் திரும்பின. போராட்டத்தை ஒடுக்க அரசு மேற்கொண்ட கொடூரமான காவல்துறை அடக்குமுறைகள்—பெல்லட் துப்பாக்கிகள், மின்அதிர்ச்சி தடியடிகள் உள்ளிட்ட வன்முறை, மாணவர்கள் மீது கண்மூடித்தனமாக குற்றவழக்குகள் பதிவு செய்தல், பல்கலைக்கழக நிர்வாகங்கள் மூலம் மிரட்டல் மற்றும் அச்சுறுத்தல் நோக்கில் நோட்டீஸ்கள் அனுப்புதல்—ஆகிய அனைத்தும் கடுமையாகக் கண்டிக்கத்தக்கவை.

ஆனால், ஜனநாயகத்தில் உண்மையைப் பேசுவதற்கான அச்சத்திற்கு இடமில்லை என்பதை இந்தப் போராட்டம் மீண்டும் நிரூபித்துள்ளது.

நீட் வினாத்தாள் கசிவு காரணமாக தங்கள் பிள்ளைகளை இழந்த குடும்பங்களுக்கு உரிய இழப்பீடு வழங்க வேண்டும்; மேலும், போராட்டத்தில் ஈடுபட்ட மாணவர்கள் மற்றும் இளைஞர்கள் மீது பதிவு செய்யப்பட்டுள்ள அனைத்து குற்றவழக்குகளும் திரும்பப் பெறப்பட வேண்டும் என்ற போராட்டக்காரர்களின் கோரிக்கைகளுக்கு ஏஐடியூசி தனது முழுமையான ஆதரவைத் தெரிவிக்கிறது.

மதச்சார்பற்ற ஜனநாயகமே இந்தியாவின் முதுகெலும்பாகும். இந்தப் போராட்டம் எழுப்பிய மகத்தான முழக்கம், கோடிக்கணக்கான இந்திய மக்களுக்கு மீண்டும் புதிய நம்பிக்கையை அளித்துள்ளது.

25.07.2026