11/10/2026
സനാതനധർമ്മ പഠനത്തിന് പുതുദിശ പകർന്ന് സംസ്ഥാന ശിബിരം സമാപിച്ചു.
ക്ഷേത്രാചാരം മുതൽ സാമൂഹിക സമരസത വരെ വിവിധ വിഷയങ്ങളിൽ പഠനവും സംവാദവും;ഗുരുകുല സമാനമായ അന്തരീക്ഷത്തിൽഅഞ്ചുദിനപരിപാടി.
മഞ്ചേരി: സനാതനധർമ്മത്തിന്റെ അടിസ്ഥാനതത്ത്വങ്ങളും ക്ഷേത്രാചാര പാരമ്പര്യവും സാമൂഹിക പ്രസക്തിയും മുൻനിർത്തി കേരള ക്ഷേത്രസംരക്ഷണ സമിതി സംഘടിപ്പിച്ച സംസ്ഥാനതല വാർഷിക പഠനശിബിരം സമാപിച്ചു. മഞ്ചേരി മുള്ളമ്പാറയിലെ സമിതി ജില്ലാ കാര്യാലയമായ സനാതന ധർമ്മസേവാ കേന്ദ്രത്തിൽ ഒക്ടോബർ 5ന് ആരംഭിച്ച ശിബിരം പത്താം തീയതിയാണ് സമാപിച്ചത്. സംസ്ഥാനത്തിന്റെ വിവിധ ഭാഗങ്ങളിൽനിന്നുള്ള പ്രവർത്തകർ പങ്കെടുത്ത ശിബിരം പഠനത്തിനും ആശയവിനിമയത്തിനും സംഘടനാപരമായ മുന്നേറ്റത്തിനുമുള്ള വേദിയായി.
മഞ്ചേരി മാതാ അമൃതാനന്ദമയീ മഠം മഠാധിപതി സ്വാമിനി വരദാമൃത പ്രാണമാതാജി ശിബിരം ഉദ്ഘാടനം ചെയ്തു. സ്വാഗതസംഘം ചെയർമാൻ തന്ത്രി ഡോ. മൊടപ്പിലാപ്പള്ളി പരമേശ്വരൻ നമ്പൂതിരിപ്പാട് അധ്യക്ഷത വഹിച്ചു. എൻ.എം. കദംബൻ നമ്പൂതിരിപ്പാട്, എസ്. പ്രബോധ് കുമാർ, കെ. നാരായണൻകുട്ടി, പുഷ്പലത വട്ടേക്കാട് എന്നിവർ പങ്കെടുത്തു.
സനാതന ധർമ്മ സന്ദേശം, ഈശ്വരസങ്കൽപ്പം, നിത്യകർമ്മാനുഷ്ഠാനം, ക്ഷേത്രസങ്കൽപ്പവും പ്രതിഷ്ഠയും, ക്ഷേത്രദർശനം, ക്ഷേത്രനിത്യകർമ്മങ്ങൾ, വേദപരിചയം, യോഗം, ക്ഷേത്രോത്സവങ്ങൾ, കേരള നവോത്ഥാനചരിത്രം, കേരളത്തിന്റെ സാംസ്കാരിക വെല്ലുവിളികൾ, ഗുരുസങ്കൽപ്പം, പ്രായശ്ചിത്തങ്ങൾ, ഹിന്ദുധർമ്മപരിചയം, മാതൃകാ ഹിന്ദുകുടുംബം, ക്ഷേത്രങ്ങളും സാമൂഹിക സമരസതയും തുടങ്ങിയ വിഷയങ്ങളിലാണ് ക്ലാസുകളും ചർച്ചകളും നടന്നത്.
ഭാഗവതഗ്രാമം ആചാര്യൻ ശ്രീമദ് ഉദിത് ചൈതന്യ സ്വാമികൾ, ശ്രീമത് ഹനുമത്പാദാനന്ദ സരസ്വതി സ്വാമികൾ, രാജസ്ഥാനിൽനിന്നുള്ള മഹാമണ്ഡലേശ്വരൻ രവിശരണാനന്ദഗിരി മഹാരാജ്, അഖിലേന്ത്യാ ഗോ സമ്മാൻ അഭിയാൻ ദേശീയ സംയോജകൻ ഡോ. ശിവരാജ് ശർമ്മ, പ്രൊഫ. പി.എം. ഗോപി, പി.എൻ. ഈശ്വരൻ, കെ. നാരായണൻകുട്ടി, ചെങ്ങോത്ത് ശ്രീനിവാസൻ പോറ്റി, വി.കെ. വിശ്വനാഥൻ, ടി.യു. മോഹനൻ, ആർ. സഞ്ജയൻ, മുല്ലപ്പള്ളി കൃഷ്ണൻ നമ്പൂതിരി, എം. മോഹനൻ, എം. വിപിൻ, കുസുമം രാമചന്ദ്രൻ, കെ. സൗമിനി, വി.എസ്. രാമസ്വാമി, കെ.എസ്. നാരായണൻ, ജി.കെ. സുരേഷ് ബാബു എന്നിവർ വിവിധ വിഷയങ്ങളിൽ ക്ലാസുകൾ നയിച്ചു.
ക്ഷേത്രങ്ങളുടെ ആചാരപരമായ സവിശേഷതകൾ, ആരാധനാപാരമ്പര്യത്തിന്റെ പ്രാധാന്യം, ക്ഷേത്രങ്ങളുടെ സാമൂഹിക ധർമം, സമകാലിക സാഹചര്യങ്ങളിൽ സനാതനധർമ്മത്തിന്റെ പ്രസക്തി എന്നിവ ചർച്ചകളിൽ ഇടംപിടിച്ചു. വിഷയാധിഷ്ഠിത സംവാദങ്ങളും ചോദ്യോത്തരവേളകളും സംഘടിപ്പിച്ചത് പ്രവർത്തകർക്ക് ആചാര്യന്മാരുമായും പണ്ഡിതന്മാരുമായും നേരിട്ട് ആശയവിനിമയം നടത്താൻ അവസരമൊരുക്കി.
അഞ്ചുദിവസവും ശിബിരകേന്ദ്രത്തിൽ താമസിച്ചുകൊണ്ട് പഠനപരിപാടികളിൽ പങ്കെടുത്ത പ്രവർത്തകർക്ക് ഗുരുകുലസമാനമായ അന്തരീക്ഷത്തിൽ അറിവ് നേടാനും അനുഭവങ്ങൾ പങ്കുവെക്കാനും സാധിച്ചു. ക്ലാസുകൾക്കു പുറമേ കൂട്ടായ പ്രാർത്ഥനയും ആത്മീയചർച്ചകളും നടന്നു.
ഒക്ടോബർ 10 ന് ദക്ഷിണാമൂർത്തി പൂജക്കു ശേഷം സമിതി പ്രസിഡണ്ട് മുല്ലപ്പള്ളി കൃഷ്ണൻ നമ്പൂതിരിയുടെ അദ്ധ്യക്ഷതയിൽ നടന്ന സമാപന സഭയിൽ
തന്ത്രി മൊടപ്പിലാപ്പിള്ളി പരമേശ്വരൻ നമ്പൂതിരിപ്പാട് മുഖ്യപ്രഭാഷണം നടത്തി. അങ്ങാടിപ്പുറം തിരുമാന്ധാംകുന്ന് ഭഗവതി ദേവസ്വം മാനേജിംഗ് ട്രസ്റ്റി കൂടിയായ വള്ളുവനാട് മഹരാജാവ് എം.സി. ശ്രീധര വർമ്മരാജ മുഖ്യാതിഥിയായി.
സംസ്ഥാന ജനറൽ സിക്രട്ടറി വി.സ്. രാമസ്വാമി,
സംസ്ഥാന സിക്രട്ടറി എൻ.കെ. ചന്ദ്രൻ , സംത്സംഗ പ്രമുഖ് എസ് പ്രബോധ് കുമാർ, സ്വാഗത സംഘം ജനറൽ കൺവീനർ സുധീഷ്, മാതൃസമിതി രക്ഷാധികാരി കുസുമകുമാരി ടീച്ചർ, സംസ്ഥാന സിക്രട്ടറി പുഷ്പലത വട്ടേക്കാട് എന്നിവർ പ്രസംഗിച്ചു
സനാതനധർമ്മത്തെയും ക്ഷേത്രപാരമ്പര്യത്തെയും കുറിച്ചുള്ള അറിവ് പ്രവർത്തകരിലേക്ക് എത്തിക്കുന്നതിനൊപ്പം ശാഖാതല പ്രവർത്തനങ്ങൾക്ക് ആവശ്യമായ കാഴ്ചപ്പാടും സംഘടനാബോധവും ശക്തിപ്പെടുത്തുന്ന പരിശീലനവേദിയായും സംസ്ഥാന പഠനശിബിരം ശ്രദ്ധേയമായി.
