16/05/2026
മതിലകം പഞ്ചായത്തും പീപ്പിള്‍സ് ഫൗണ്ടേഷനും കൈകോര്‍ത്തു; അഞ്ച് നാടോടി കുടുംബങ്ങള്‍ക്ക് വീടൊരുങ്ങുന്നു.
`പതിറ്റാണ്ടുകളായി തെരുവുകളിലും പുറമ്പോക്കുകളിലുമായി അലഞ്ഞുതിരിഞ്ഞ അഞ്ച് നാടോടി കുടുംബങ്ങള്‍ക്ക് ഇനി സ്വന്തമായി വീടും മേല്‍വിലാസവുമാകും. മുന്‍ കൈപമംഗലം എം.എല്‍.എ ഇ.ടി. ടൈസണ്‍ മാസ്റ്ററുടെ ഇടപെടലിനെത്തുടര്‍ന്ന് മതിലകം പഞ്ചായത്തും പീപ്പിള്‍സ് ഫൗണ്ടേഷനും കൈകോര്‍ത്തതോടെയാണ് ഈ കുടുംബങ്ങള്‍ക്ക് മാരേക്കാട് വീടുകളുയരുന്നത്. ഓരോ കുടുംബത്തിനും വീടിനും സ്ഥലത്തിനുമായി ആറ് ലക്ഷം രൂപ വീതം മതിലകം പഞ്ചായത്ത് വഴി സംസ്ഥാന സര്‍ക്കാര്‍ അനുവദിച്ചിരുന്നു. ഭൂമി വാങ്ങാന്‍ നേരത്തെ പത്ത് ലക്ഷം രൂപയും ലഭ്യമാക്കിയിരുന്നു. പീപ്പിള്‍സ് ഫൗണ്ടേഷന് സൗജന്യമായി നല്‍കിയ സ്ഥലത്താണ് ഈ വീടുകള്‍ നിര്‍മിക്കുന്നത്. സര്‍ക്കാര്‍ അനുവദിച്ച തുകയില്‍ വീടുകള്‍ നിര്‍മിക്കാന്‍ ആരും തയാറാകാത്ത സാഹചര്യത്തില്‍ നിര്‍മാണച്ചുമതലയും പീപ്പിള്‍സ് ഫൗണ്ടേഷന് തന്നെ ഏറ്റെടുക്കുകയായിരുന്നു. കൂടപുള്ളി അബ്ദുറഹ്മാന്‍ പരേതനായ മകന്‍ അസ്‌ലമാണ് പീപ്പിള്‍സ് ഫൗണ്ടേഷന് സ്ഥലം നല്‍കിയത്. പീപ്പിള്‍സ് ഫൗണ്ടേഷന് വേണ്ടി മതിലകം പുന്നക്ക ബസാര്‍ വൈപ്പിപ്പാടത്ത് സ്വദേശികളായ റഫീഖ്, സഹോദരന്‍ ഈസ എന്നിവരാണ് നിര്‍മാണ പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്. നിര്‍മാണോദ്ഘാടനവും തറക്കല്ലിടല്‍ കര്‍മവും മതിലകം പഞ്ചായത്ത് പ്രസിഡന്റ് സുമതി സുന്ദരന്‍ നിര്‍വഹിച്ചു. വികസന കാര്യസമിതി അധ്യക്ഷ പ്രസിത അധ്യക്ഷത വഹിച്ചു. പീപ്പിള്‍സ് ഫൗണ്ടേഷന് ഏരിയ കോ ഓഡിനേറ്റര്‍ കെ.എം നാസര്‍ മാസ്റ്റര്‍, പഞ്ചായത്ത് അംഗം ചിഞ്ചു അനീഷ്, ഹസീന ഗഫൂര്‍ എന്നിവര്‍ സംസാരിച്ചു. അബ്ദുള്‍ ഖാദര്‍, എന്‍.എ. ഹസന്‍, ടി.എച്ച്. ഹൈദ്രോസ്, സി.കെ. മനാഫ്, ശ്രീജി കൊടുങ്ങല്ലൂര്‍, സിദ്ധീഖ് അഴിക്കോട് തുടങ്ങിയവര്‍ സംബന്ധിച്ചു.`
